Chapter 40

tataḥ prasthāpya sugrīvastanmahadvānaraṃ balam |
dakṣiṇāṃ preṣayāmāsa vānarānabhilakṣitān || 1 ||
[Analyze grammar]

nīlamagnisutaṃ caiva hanumantaṃ ca vānaram |
pitāmahasutaṃ caiva jāmbavantaṃ mahākapim || 2 ||
[Analyze grammar]

suhotraṃ ca śarīraṃ ca śaragulmaṃ tathaiva ca |
gajaṃ gavākṣaṃ gavayaṃ suṣeṇamṛṣabhaṃ tathā || 3 ||
[Analyze grammar]

maindaṃ ca dvividaṃ caiva vijayaṃ gandhamādanam |
ulkāmukhamasaṅgaṃ ca hutāśana sutāv ubhau || 4 ||
[Analyze grammar]

aṅgadapramukhān vīrān vīraḥ kapigaṇeśvaraḥ |
vegavikramasaṃpannān saṃdideśa viśeṣavit || 5 ||
[Analyze grammar]

teṣāmagreṣaraṃ caiva mahadbalamasaṃgagam |
vidhāya harivīrāṇāmādiśaddakṣiṇāṃ diśam || 6 ||
[Analyze grammar]

ye ke cana samuddeśāstasyāṃ diśi sudurgamāḥ |
kapīśaḥ kapimukhyānāṃ sa teṣāṃ tānudāharat || 7 ||
[Analyze grammar]

sahasraśirasaṃ vindhyaṃ nānādrumalatāvṛtam |
narmadāṃ ca nadīṃ durgāṃ mahoraganiṣevitām || 8 ||
[Analyze grammar]

tato godāvarīṃ ramyāṃ kṛṣṇāveṇīṃ mahānadīm |
varadāṃ ca mahābhāgāṃ mahoraganiṣevitām || 9 ||
[Analyze grammar]

mekhalānutkalāṃścaiva daśārṇanagarāṇyapi |
avantīmabhravantīṃ ca sarvamevānupaśyata || 10 ||
[Analyze grammar]

vidarbhānṛṣikāṃścaiva ramyānmāhiṣakānapi |
tathā baṅgān kaliṅgāṃśca kauśikāṃśca samantataḥ || 11 ||
[Analyze grammar]

anvīkṣya daṇḍakāraṇyaṃ saparvatanadīguham |
nadīṃ godāvarīṃ caiva sarvamevānupaśyata || 12 ||
[Analyze grammar]

tathaivāndhrāṃśca puṇḍrāṃśca colānpāṇḍyān sakeralān |
ayomukhaśca gantavyaḥ parvato dhātumaṇḍitaḥ || 13 ||
[Analyze grammar]

vicitraśikharaḥ śrīmāṃścitrapuṣpitakānanaḥ |
sacandanavanoddeśo mārgitavyo mahāgiriḥ || 14 ||
[Analyze grammar]

tatastāmāpagāṃ divyāṃ prasannasalilāṃ śivām |
tatra drakṣyatha kāverīṃ vihṛtāmapsarogaṇaiḥ || 15 ||
[Analyze grammar]

tasyāsīnaṃ nagasyāgre malayasya mahaujasaṃ |
drakṣyathādityasaṃkāśamagastyamṛṣisattamam || 16 ||
[Analyze grammar]

tatastenābhyanujñātāḥ prasannena mahātmanā |
tāmraparṇīṃ grāhajuṣṭāṃ tariṣyatha mahānadīm || 17 ||
[Analyze grammar]

sā candanavanairdivyaiḥ pracchannā dvīpa śālinī |
kānteva yuvatiḥ kāntaṃ samudramavagāhate || 18 ||
[Analyze grammar]

tato hemamayaṃ divyaṃ muktāmaṇivibhūṣitam |
yuktaṃ kavāṭaṃ pāṇḍyānāṃ gatā drakṣyatha vānarāḥ || 19 ||
[Analyze grammar]

tataḥ samudramāsādya saṃpradhāryārthaniścayam |
agastyenāntare tatra sāgare viniveśitaḥ || 20 ||
[Analyze grammar]

citranānānagaḥ śrīmānmahendraḥ parvatottamaḥ |
jātarūpamayaḥ śrīmānavagāḍho mahārṇavam || 21 ||
[Analyze grammar]

nānāvidhairnagaiḥ phullairlatābhiścopaśobhitam |
devarṣiyakṣapravarairapsarobhiśca sevitam || 22 ||
[Analyze grammar]

siddhacāraṇasaṃghaiśca prakīrṇaṃ sumanoharam |
tamupaiti sahasrākṣaḥ sadā parvasu parvasu || 23 ||
[Analyze grammar]

dvīpastasyāpare pāre śatayojanamāyataḥ |
agamyo mānuṣairdīptastaṃ mārgadhvaṃ samantataḥ |
tatra sarvātmanā sītā mārgitavyā viśeṣataḥ || 24 ||
[Analyze grammar]

sa hi deśastu vadhyasya rāvaṇasya durātmanaḥ |
rākṣasādhipatervāsaḥ sahasrākṣasamadyuteḥ || 25 ||
[Analyze grammar]

dakṣiṇasya samudrasya madhye tasya tu rākṣasī |
aṅgāraketi vikhyātā chāyāmākṣipya bhojinī || 26 ||
[Analyze grammar]

tamatikramya lakṣmīvān samudre śatayojane |
giriḥ puṣpitako nāma siddhacāraṇasevitaḥ || 27 ||
[Analyze grammar]

candrasūryāṃśusaṃkāśaḥ sāgarāmbusamāvṛtaḥ |
bhrājate vipulaiḥ śṛṅgairambaraṃ vilikhanniva || 28 ||
[Analyze grammar]

tasyaikaṃ kāñcanaṃ śṛṅgaṃ sevate yaṃ divākaraḥ |
śvetaṃ rājatamekaṃ ca sevate yaṃ niśākaraḥ || 29 ||
[Analyze grammar]

na taṃ kṛtaghnāḥ paśyanti na nṛśaṃsā na nāstikāḥ |
praṇamya śirasā śailaṃ taṃ vimārgata vānarāḥ || 30 ||
[Analyze grammar]

tamatikramya durdharṣāḥ sūryavānnāma parvataḥ |
adhvanā durvigāhena yojanāni caturdaśa || 31 ||
[Analyze grammar]

tatastamapyatikramya vaidyuto nāma parvataḥ |
sarvakāmaphalairvṛkṣaiḥ sarvakālamanoharaiḥ || 32 ||
[Analyze grammar]

tatra bhuktvā varārhāṇi mūlāni ca phalāni ca |
madhūni pītvā mukhyāni paraṃ gacchata vānarāḥ || 33 ||
[Analyze grammar]

tatra netramanaḥkāntaḥ kuñjaro nāma parvataḥ |
agastyabhavanaṃ yatra nirmitaṃ viśvakarmaṇā || 34 ||
[Analyze grammar]

tatra yojanavistāramucchritaṃ daśayojanam |
śaraṇaṃ kāñcanaṃ divyaṃ nānāratnavibhūṣitam || 35 ||
[Analyze grammar]

tatra bhogavatī nāma sarpāṇāmālayaḥ purī |
viśālarathyā durdharṣā sarvataḥ parirakṣitā |
rakṣitā pannagairghoraistīkṣṇadaṃṣṭrairmahāviṣaiḥ || 36 ||
[Analyze grammar]

sarparājo mahāghoro yasyāṃ vasati vāsukiḥ |
niryāya mārgitavyā ca sā ca bhogavatī purī || 37 ||
[Analyze grammar]

taṃ ca deśamatikramya mahānṛṣabhasaṃsthitaḥ |
sarvaratnamayaḥ śrīmānṛṣabho nāma parvataḥ || 38 ||
[Analyze grammar]

gośīrṣakaṃ padmakaṃ ca hariśyāmaṃ ca candanam |
divyamutpadyate yatra taccaivāgnisamaprabham || 39 ||
[Analyze grammar]

na tu taccandanaṃ dṛṣṭvā spraṣṭavyaṃ ca kadā cana |
rohitā nāma gandharvā ghorā rakṣanti tadvanam || 40 ||
[Analyze grammar]

tatra gandharvapatayaḥ pañcasūryasamaprabhāḥ |
śailūṣo grāmaṇīrbhikṣuḥ śubhro babhrustathaiva ca || 41 ||
[Analyze grammar]

ante pṛthivyā durdharṣāstatra svargajitaḥ sthitāḥ |
tataḥ paraṃ na vaḥ sevyaḥ pitṛlokaḥ sudāruṇaḥ |
rājadhānī yamasyaiṣā kaṣṭena tamasāvṛtā || 42 ||
[Analyze grammar]

etāvadeva yuṣmābhirvīrā vānarapuṃgavāḥ |
śakyaṃ vicetuṃ gantuṃ vā nāto gatimatāṃ gatiḥ || 43 ||
[Analyze grammar]

sarvametat samālokya yaccānyadapi dṛśyate |
gatiṃ viditvā vaidehyāḥ saṃnivartitamarhatha || 44 ||
[Analyze grammar]

yastu māsānnivṛtto'gre dṛṣṭā sīteti vakṣyati |
mattulyavibhavo bhogaiḥ sukhaṃ sa vihariṣyati || 45 ||
[Analyze grammar]

tataḥ priyataro nāsti mama prāṇādviśeṣataḥ |
kṛtāparādho bahuśo mama bandhurbhaviṣyati || 46 ||
[Analyze grammar]

amitabalaparākramā bhavanto vipulaguṇeṣu kuleṣu ca prasūtāḥ |
manujapatisutāṃ yathā labhadhvaṃ tadadhiguṇaṃ puruṣārthamārabhadhvam || 47 ||
[Analyze grammar]