Chapter 66

apaśyaṃstu tatastatra pitaraṃ piturālaye |
jagāma bharato draṣṭuṃ mātaraṃ māturālaye || 1 ||
[Analyze grammar]

anuprāptaṃ tu taṃ dṛṣṭvā kaikeyī proṣitaṃ sutam |
utpapāta tadā hṛṣṭā tyaktvā sauvarṇamānasaṃ || 2 ||
[Analyze grammar]

sa praviśyaiva dharmātmā svagṛhaṃ śrīvivarjitam |
bharataḥ prekṣya jagrāha jananyāścaraṇau śubhau || 3 ||
[Analyze grammar]

taṃ mūrdhni samupāghrāya pariṣvajya yaśasvinam |
aṅke bharatamāropya praṣṭuṃ samupacakrame || 4 ||
[Analyze grammar]

adya te kati cid rātryaścyutasyāryakaveśmanaḥ |
api nādhvaśramaḥ śīghraṃ rathenāpatatastava || 5 ||
[Analyze grammar]

āryakaste sukuśalo yudhājinmātulastava |
pravāsācca sukhaṃ putra sarvaṃ me vaktumarhasi || 6 ||
[Analyze grammar]

evaṃ pṛṣṭhastu kaikeyyā priyaṃ pārthivanandanaḥ |
ācaṣṭa bharataḥ sarvaṃ mātre rājīvalocanaḥ || 7 ||
[Analyze grammar]

adya me saptamī rātriścyutasyāryakaveśmanaḥ |
ambāyāḥ kuśalī tāto yudhājinmātulaśca me || 8 ||
[Analyze grammar]

yanme dhanaṃ ca ratnaṃ ca dadau rājā paraṃtapaḥ |
pariśrāntaṃ pathyabhavattato'haṃ pūrvamāgataḥ || 9 ||
[Analyze grammar]

rājavākyaharairdūtaistvaryamāṇo'hamāgataḥ |
yadahaṃ praṣṭumicchāmi tadambā vaktumarhasi || 10 ||
[Analyze grammar]

śūnyo'yaṃ śayanīyaste paryaṅko hemabhūṣitaḥ |
na cāyamikṣvākujanaḥ prahṛṣṭaḥ pratibhāti me || 11 ||
[Analyze grammar]

rājā bhavati bhūyiṣṭhamihāmbāyā niveśane |
tamahaṃ nādya paśyāmi draṣṭumicchannihāgataḥ || 12 ||
[Analyze grammar]

piturgrahīṣye caraṇau taṃ mamākhyāhi pṛcchataḥ |
āhosvidamba jyeṣṭhāyāḥ kausalyāyā niveśane || 13 ||
[Analyze grammar]

taṃ pratyuvāca kaikeyī priyavadghoramapriyam |
ajānantaṃ prajānantī rājyalobhena mohitā |
yā gatiḥ sarvabhūtānāṃ tāṃ gatiṃ te pitā gataḥ || 14 ||
[Analyze grammar]

tacchrutvā bharato vākyaṃ dharmābhijanavāñ śuciḥ |
papāta sahasā bhūmau pitṛśokabalārditaḥ || 15 ||
[Analyze grammar]

tataḥ śokena saṃvītaḥ piturmaraṇaduḥkhitaḥ |
vilalāpa mahātejā bhrāntākulitacetanaḥ || 16 ||
[Analyze grammar]

etat suruciraṃ bhāti piturme śayanaṃ purā |
tadidaṃ na vibhātyadya vihīnaṃ tena dhīmatā || 17 ||
[Analyze grammar]

tamārtaṃ devasaṃkāśaṃ samīkṣya patitaṃ bhuvi |
utthāpayitvā śokārtaṃ vacanaṃ cedamabravīt || 18 ||
[Analyze grammar]

uttiṣṭhottiṣṭha kiṃ śeṣe rājaputra mahāyaśaḥ |
tvadvidhā na hi śocanti santaḥ sadasi saṃmatāḥ || 19 ||
[Analyze grammar]

sa rudatyā ciraṃ kālaṃ bhūmau viparivṛtya ca |
jananīṃ pratyuvācedaṃ śokairbahubhirāvṛtaḥ || 20 ||
[Analyze grammar]

abhiṣekṣyati rāmaṃ tu rājā yajñaṃ nu yakṣyati |
ityahaṃ kṛtasaṃkalpo hṛṣṭo yātrāmayāsiṣam || 21 ||
[Analyze grammar]

tadidaṃ hyanyathā bhūtaṃ vyavadīrṇaṃ mano mama |
pitaraṃ yo na paśyāmi nityaṃ priyahite ratam || 22 ||
[Analyze grammar]

amba kenātyagād rājā vyādhinā mayyanāgate |
dhanyā rāmādayaḥ sarve yaiḥ pitā saṃskṛtaḥ svayam || 23 ||
[Analyze grammar]

na nūnaṃ māṃ mahārājaḥ prāptaṃ jānāti kīrtimān |
upajighreddhi māṃ mūrdhni tātaḥ saṃnamya satvaram || 24 ||
[Analyze grammar]

kva sa pāṇiḥ sukhasparśastātasyākliṣṭakarmaṇaḥ |
yena māṃ rajasā dhvastamabhīkṣṇaṃ parimārjati || 25 ||
[Analyze grammar]

yo me bhrātā pitā bandhuryasya dāso'smi dhīmataḥ |
tasya māṃ śīghramākhyāhi rāmasyākliṣṭa karmaṇaḥ || 26 ||
[Analyze grammar]

pitā hi bhavati jyeṣṭho dharmamāryasya jānataḥ |
tasya pādau grahīṣyāmi sa hīdānīṃ gatirmama || 27 ||
[Analyze grammar]

ārye kimabravīd rājā pitā me satyavikramaḥ |
paścimaṃ sādhu saṃdeśamicchāmi śrotumātmanaḥ || 28 ||
[Analyze grammar]

iti pṛṣṭā yathātattvaṃ kaikeyī vākyamabravīt |
rāmeti rājā vilapan hā sīte lakṣmaṇeti ca |
sa mahātmā paraṃ lokaṃ gato gatimatāṃ varaḥ || 29 ||
[Analyze grammar]

imāṃ tu paścimāṃ vācaṃ vyājahāra pitā tava |
kāla dharmaparikṣiptaḥ pāśairiva mahāgajaḥ || 30 ||
[Analyze grammar]

siddhārthāstu narā rāmamāgataṃ sītayā saha |
lakṣmaṇaṃ ca mahābāhuṃ drakṣyanti punarāgatam || 31 ||
[Analyze grammar]

tacchrutvā viṣasādaiva dvitīyā priyaśaṃsanāt |
viṣaṇṇavadano bhūtvā bhūyaḥ papraccha mātaram || 32 ||
[Analyze grammar]

kva cedānīṃ sa dharmātmā kausalyānandavardhanaḥ |
lakṣmaṇena saha bhrātrā sītayā ca samaṃ gataḥ || 33 ||
[Analyze grammar]

tathā pṛṣṭā yathātattvamākhyātumupacakrame |
mātāsya yugapadvākyaṃ vipriyaṃ priyaśaṅkayā || 34 ||
[Analyze grammar]

sa hi rājasutaḥ putra cīravāsā mahāvanam |
daṇḍakān saha vaidehyā lakṣmaṇānucaro gataḥ || 35 ||
[Analyze grammar]

tacchrutvā bharatastrasto bhrātuścāritraśaṅkayā |
svasya vaṃśasya māhātmyāt praṣṭuṃ samupacakrame || 36 ||
[Analyze grammar]

kaccinna brāhmaṇavadhaṃ hṛtaṃ rāmeṇa kasya cit |
kaccinnāḍhyo daridro vā tenāpāpo vihiṃsitaḥ || 37 ||
[Analyze grammar]

kaccinna paradārān vā rājaputro'bhimanyate |
kasmāt sa daṇḍakāraṇye bhrūṇaheva vivāsitaḥ || 38 ||
[Analyze grammar]

athāsya capalā mātā tat svakarma yathātatham |
tenaiva strīsvabhāvena vyāhartumupacakrame || 39 ||
[Analyze grammar]

na brāhmaṇadhanaṃ kiṃ ciddhṛtaṃ rāmeṇa kasya cit |
kaścinnāḍhyo daridro vā tenāpāpo vihiṃsitaḥ |
na rāmaḥ paradārāṃśca cakṣurbhyāmapi paśyati || 40 ||
[Analyze grammar]

mayā tu putra śrutvaiva rāmasyaivābhiṣecanam |
yācitaste pitā rājyaṃ rāmasya ca vivāsanam || 41 ||
[Analyze grammar]

sa svavṛttiṃ samāsthāya pitā te tattathākarot |
rāmaśca sahasaumitriḥ preṣitaḥ saha sītayā || 42 ||
[Analyze grammar]

tamapaśyanpriyaṃ putraṃ mahīpālo mahāyaśāḥ |
putraśokaparidyūnaḥ pañcatvamupapedivān || 43 ||
[Analyze grammar]

tvayā tvidānīṃ dharmajña rājatvamavalambyatām |
tvatkṛte hi mayā sarvamidamevaṃvidhaṃ kṛtam || 44 ||
[Analyze grammar]

tat putra śīghraṃ vidhinā vidhijñairvasiṣṭhamukhyaiḥ sahito dvijendraiḥ |
saṃkālya rājānamadīnasattvamātmānamurvyāmabhiṣecayasva || 45 ||
[Analyze grammar]