Chapter 65

sa prāṅmukho rājagṛhādabhiniryāya vīryavān |
hrādinīṃ dūrapārāṃ ca pratyaksrotastaraṅgiṇīm |
śatadrūmataracchrīmānnadīmikṣvākunandanaḥ || 1 ||
[Analyze grammar]

eladhāne nadīṃ tīrtvā prāpya cāparaparpaṭān |
śilāmākurvatīṃ tīrtvā āgneyaṃ śalyakartanam || 2 ||
[Analyze grammar]

satyasaṃdhaḥ śuciḥ śrīmānprekṣamāṇaḥ śilāvahām |
atyayāt sa mahāśailān vanaṃ caitrarathaṃ prati || 3 ||
[Analyze grammar]

veginīṃ ca kuliṅgākhyāṃ hrādinīṃ parvatāvṛtām |
yamunāṃ prāpya saṃtīrṇo balamāśvāsayattadā || 4 ||
[Analyze grammar]

śītīkṛtya tu gātrāṇi klāntānāśvāsya vājinaḥ |
tatra snātvā ca pītvā ca prāyādādāya codakam || 5 ||
[Analyze grammar]

rājaputro mahāraṇyamanabhīkṣṇopasevitam |
bhadro bhadreṇa yānena mārutaḥ khamivātyayāt || 6 ||
[Analyze grammar]

toraṇaṃ dakṣiṇārdhena jambūprasthamupāgamat |
varūthaṃ ca yayau ramyaṃ grāmaṃ daśarathātmajaḥ || 7 ||
[Analyze grammar]

tatra ramye vane vāsaṃ kṛtvāsau prāṅmukho yayau |
udyānamujjihānāyāḥ priyakā yatra pādapāḥ || 8 ||
[Analyze grammar]

sālāṃstu priyakānprāpya śīghrānāsthāya vājinaḥ |
anujñāpyātha bharato vāhinīṃ tvarito yayau || 9 ||
[Analyze grammar]

vāsaṃ kṛtvā sarvatīrthe tīrtvā cottānakāṃ nadīm |
anyā nadīśca vividhāḥ pārvatīyaisturaṃgamaiḥ || 10 ||
[Analyze grammar]

hastipṛṣṭhakamāsādya kuṭikāmatyavartata |
tatāra ca naravyāghro lauhitye sa kapīvatīm |
ekasāle sthāṇumatīṃ vinate gomatīṃ nadīm || 11 ||
[Analyze grammar]

kaliṅga nagare cāpi prāpya sālavanaṃ tadā |
bharataḥ kṣipramāgacchat supariśrāntavāhanaḥ || 12 ||
[Analyze grammar]

vanaṃ ca samatītyāśu śarvaryāmaruṇodaye |
ayodhyāṃ manunā rājñā nirmitāṃ sa dadarśa ha || 13 ||
[Analyze grammar]

tāṃ purīṃ puruṣavyāghraḥ saptarātroṣiṭaḥ pathi |
ayodhyāmagrato dṛṣṭvā rathe sārathimabravīt || 14 ||
[Analyze grammar]

eṣā nātipratītā me puṇyodyānā yaśasvinī |
ayodhyā dṛśyate dūrāt sārathe pāṇḍumṛttikā || 15 ||
[Analyze grammar]

yajvabhirguṇasaṃpannairbrāhmaṇairvedapāragaiḥ |
bhūyiṣṭhamṛddhairākīrṇā rājarṣivarapālitā || 16 ||
[Analyze grammar]

ayodhyāyāṃ purāśabdaḥ śrūyate tumulo mahān |
samantānnaranārīṇāṃ tamadya na śṛṇomyaham || 17 ||
[Analyze grammar]

udyānāni hi sāyāhne krīḍitvoparatairnaraiḥ |
samantādvipradhāvadbhiḥ prakāśante mamānyadā || 18 ||
[Analyze grammar]

tānyadyānurudantīva parityaktāni kāmibhiḥ |
araṇyabhūteva purī sārathe pratibhāti me || 19 ||
[Analyze grammar]

na hyatra yānairdṛśyante na gajairna ca vājibhiḥ |
niryānto vābhiyānto vā naramukhyā yathāpuram || 20 ||
[Analyze grammar]

aniṣṭāni ca pāpāni paśyāmi vividhāni ca |
nimittānyamanojñāni tena sīdati te manaḥ || 21 ||
[Analyze grammar]

dvāreṇa vaijayantena prāviśacchrāntavāhanaḥ |
dvāḥsthairutthāya vijayaṃ pṛṣṭastaiḥ sahito yayau || 22 ||
[Analyze grammar]

sa tvanekāgrahṛdayo dvāḥsthaṃ pratyarcya taṃ janam |
sūtamaśvapateḥ klāntamabravīttatra rāghavaḥ || 23 ||
[Analyze grammar]

śrutā no yādṛśāḥ pūrvaṃ nṛpatīnāṃ vināśane |
ākārāstānahaṃ sarvāniha paśyāmi sārathe || 24 ||
[Analyze grammar]

malinaṃ cāśrupūrṇākṣaṃ dīnaṃ dhyānaparaṃ kṛśam |
sastrī puṃsaṃ ca paśyāmi janamutkaṇṭhitaṃ pure || 25 ||
[Analyze grammar]

ityevamuktvā bharataḥ sūtaṃ taṃ dīnamānasaḥ |
tānyaniṣṭānyayodhyāyāṃ prekṣya rājagṛhaṃ yayau || 26 ||
[Analyze grammar]

tāṃ śūnyaśṛṅgāṭakaveśmarathyāṃ rajo'ruṇadvārakapāṭayantrām |
dṛṣṭvā purīmindrapurī prakāśāṃ duḥkhena saṃpūrṇataro babhūva || 27 ||
[Analyze grammar]

bahūni paśyanmanaso'priyāṇi yānyannyadā nāsya pure babhūvuḥ |
avākśirā dīnamanā nahṛṣṭaḥ piturmahātmā praviveśa veśma || 28 ||
[Analyze grammar]