Chapter 52

pratyāśvasto yadā rājā mohāt pratyāgataḥ punaḥ |
athājuhāva taṃ sūtaṃ rāmavṛttāntakāraṇāt || 1 ||
[Analyze grammar]

vṛddhaṃ paramasaṃtaptaṃ navagrahamiva dvipam |
viniḥśvasantaṃ dhyāyantamasvasthamiva kuñjaram || 2 ||
[Analyze grammar]

rājā tu rajasā sūtaṃ dhvastāṅgaṃ samupasthitam |
aśrupūrṇamukhaṃ dīnamuvāca paramārtavat || 3 ||
[Analyze grammar]

kva nu vatsyati dharmātmā vṛkṣamūlamupāśritaḥ |
so'tyantasukhitaḥ sūta kimaśiṣyati rāghavaḥ |
bhūmipālātmajo bhūmau śete kathamanāthavat || 4 ||
[Analyze grammar]

yaṃ yāntamanuyānti sma padāti rathakuñjarāḥ |
sa vatsyati kathaṃ rāmo vijanaṃ vanamāśritaḥ || 5 ||
[Analyze grammar]

vyālairmṛgairācaritaṃ kṛṣṇasarpaniṣevitam |
kathaṃ kumārau vaidehyā sārdhaṃ vanamupasthitau || 6 ||
[Analyze grammar]

sukumāryā tapasvinyā sumantra saha sītayā |
rājaputrau kathaṃ pādairavaruhya rathādgatau || 7 ||
[Analyze grammar]

siddhārthaḥ khalu sūta tvaṃ yena dṛṣṭau mamātmajau |
vanāntaṃ praviśantau tāvaśvināviva mandaram || 8 ||
[Analyze grammar]

kimuvāca vaco rāmaḥ kimuvāca ca lakṣmaṇaḥ |
sumantra vanamāsādya kimuvāca ca maithilī |
āsitaṃ śayitaṃ bhuktaṃ sūta rāmasya kīrtaya || 9 ||
[Analyze grammar]

iti sūto narendreṇa coditaḥ sajjamānayā |
uvāca vācā rājānaṃ sabāṣpaparirabdhayā || 10 ||
[Analyze grammar]

abravīnmāṃ mahārāja dharmamevānupālayan |
añjaliṃ rāghavaḥ kṛtvā śirasābhipraṇamya ca || 11 ||
[Analyze grammar]

sūta madvacanāttasya tātasya viditātmanaḥ |
śirasā vandanīyasya vandyau pādau mahātmanaḥ || 12 ||
[Analyze grammar]

sarvamantaḥpuraṃ vācyaṃ sūta madvacanāttvayā |
ārogyamaviśeṣeṇa yathārhaṃ cābhivādanam || 13 ||
[Analyze grammar]

mātā ca mama kausalyā kuśalaṃ cābhivādanam |
devi devasya pādau ca devavat paripālaya || 14 ||
[Analyze grammar]

bharataḥ kuśalaṃ vācyo vācyo madvacanena ca |
sarvāsveva yathānyāyaṃ vṛttiṃ vartasva mātṛṣu || 15 ||
[Analyze grammar]

vaktavyaśca mahābāhurikṣvākukulanandanaḥ |
pitaraṃ yauvarājyastho rājyasthamanupālaya || 16 ||
[Analyze grammar]

ityevaṃ māṃ mahārāja bruvanneva mahāyaśāḥ |
rāmo rājīvatāmrākṣo bhṛśamaśrūṇyavartayat || 17 ||
[Analyze grammar]

lakṣmaṇastu susaṃkruddho niḥśvasan vākyamabravīt |
kenāyamaparādhena rājaputro vivāsitaḥ || 18 ||
[Analyze grammar]

yadi pravrājito rāmo lobhakāraṇakāritam |
varadānanimittaṃ vā sarvathā duṣkṛtaṃ kṛtam |
rāmasya tu parityāge na hetumupalakṣaye || 19 ||
[Analyze grammar]

asamīkṣya samārabdhaṃ viruddhaṃ buddhilāghavāt |
janayiṣyati saṃkrośaṃ rāghavasya vivāsanam || 20 ||
[Analyze grammar]

ahaṃ tāvanmahārāje pitṛtvaṃ nopalakṣaye |
bhrātā bhartā ca bandhuśca pitā ca mama rāghavaḥ || 21 ||
[Analyze grammar]

sarvalokapriyaṃ tyaktvā sarvalokahite ratam |
sarvaloko'nurajyeta kathaṃ tvānena karmaṇā || 22 ||
[Analyze grammar]

jānakī tu mahārāja niḥśvasantī tapasvinī |
bhūtopahatacitteva viṣṭhitā vṛṣmṛtā sthitā || 23 ||
[Analyze grammar]

adṛṣṭapūrvavyasanā rājaputrī yaśasvinī |
tena duḥkhena rudatī naiva māṃ kiṃ cidabravīt || 24 ||
[Analyze grammar]

udvīkṣamāṇā bhartāraṃ mukhena pariśuṣyatā |
mumoca sahasā bāṣpaṃ māṃ prayāntamudīkṣya sā || 25 ||
[Analyze grammar]

tathaiva rāmo'śrumukhaḥ kṛtāñjaliḥ sthito'bhaval lakṣmaṇabāhupālitaḥ |
tathaiva sītā rudatī tapasvinī nirīkṣate rājarathaṃ tathaiva mām || 26 ||
[Analyze grammar]