Chapter 51

kathayitvā suduḥkhārtaḥ sumantreṇa ciraṃ saha |
rāme dakṣiṇa kūlasthe jagāma svagṛhaṃ guhaḥ || 1 ||
[Analyze grammar]

anujñātaḥ sumantro'tha yojayitvā hayottamān |
ayodhyāmeva nagarīṃ prayayau gāḍhadurmanāḥ || 2 ||
[Analyze grammar]

sa vanāni sugandhīni saritaśca sarāṃsi ca |
paśyannatiyayau śīghraṃ grāmāṇi nagarāṇi ca || 3 ||
[Analyze grammar]

tataḥ sāyāhnasamaye tṛtīye'hani sārathiḥ |
ayodhyāṃ samanuprāpya nirānandāṃ dadarśa ha || 4 ||
[Analyze grammar]

sa śūnyāmiva niḥśabdāṃ dṛṣṭvā paramadurmanāḥ |
sumantraścintayāmāsa śokavegasamāhataḥ || 5 ||
[Analyze grammar]

kaccinna sagajā sāśvā sajanā sajanādhipā |
rāmasaṃtāpaduḥkhena dagdhā śokāgninā purī |
iti cintāparaḥ sūtastvaritaḥ praviveśa ha || 6 ||
[Analyze grammar]

sumantramabhiyāntaṃ taṃ śataśo'tha sahasraśaḥ |
kva rāma iti pṛcchantaḥ sūtamabhyadravannarāḥ || 7 ||
[Analyze grammar]

teṣāṃ śaśaṃsa gaṅgāyāmahamāpṛcchya rāghavam |
anujñāto nivṛtto'smi dhārmikeṇa mahātmanā || 8 ||
[Analyze grammar]

te tīrṇā iti vijñāya bāṣpapūrṇamukhā janāḥ |
aho dhigiti niḥśvasya hā rāmeti ca cukruśuḥ || 9 ||
[Analyze grammar]

śuśrāva ca vacasteṣāṃ vṛndaṃ vṛndaṃ ca tiṣṭhatām |
hatāḥ sma khalu ye neha paśyāma iti rāghavam || 10 ||
[Analyze grammar]

dānayajñavivāheṣu samājeṣu mahatsu ca |
na drakṣyāmaḥ punarjātu dhārmikaṃ rāmamantarā || 11 ||
[Analyze grammar]

kiṃ samarthaṃ janasyāsya kiṃ priyaṃ kiṃ sukhāvaham |
iti rāmeṇa nagaraṃ pitṛvat paripālitam || 12 ||
[Analyze grammar]

vātāyanagatānāṃ ca strīṇāmanvantarāpaṇam |
rāmaśokābhitaptānāṃ śuśrāva paridevanam || 13 ||
[Analyze grammar]

sa rājamārgamadhyena sumantraḥ pihitānanaḥ |
yatra rājā daśarathastadevopayayau gṛham || 14 ||
[Analyze grammar]

so'vatīrya rathācchīghraṃ rājaveśma praviśya ca |
kakṣyāḥ saptābhicakrāma mahājanasamākulāḥ || 15 ||
[Analyze grammar]

tato daśarathastrīṇāṃ prāsādebhyastatastataḥ |
rāmaśokābhitaptānāṃ mandaṃ śuśrāva jalpitam || 16 ||
[Analyze grammar]

saha rāmeṇa niryāto vinā rāmamihāgataḥ |
sūtaḥ kiṃ nāma kausalyāṃ śocantīṃ prativakṣyati || 17 ||
[Analyze grammar]

yathā ca manye durjīvamevaṃ na sukaraṃ dhruvam |
ācchidya putre niryāte kausalyā yatra jīvati || 18 ||
[Analyze grammar]

satya rūpaṃ tu tadvākyaṃ rājñaḥ strīṇāṃ niśāmayan |
pradīptamiva śokena viveśa sahasā gṛham || 19 ||
[Analyze grammar]

sa praviśyāṣṭamīṃ kakṣyāṃ rājānaṃ dīnamātulam |
putraśokaparidyūnamapaśyat pāṇḍare gṛhe || 20 ||
[Analyze grammar]

abhigamya tamāsīnaṃ narendramabhivādya ca |
sumantro rāmavacanaṃ yathoktaṃ pratyavedayat || 21 ||
[Analyze grammar]

sa tūṣṇīmeva tacchrutvā rājā vibhrānta cetanaḥ |
mūrchito nyapatadbhūmau rāmaśokābhipīḍitaḥ || 22 ||
[Analyze grammar]

tato'ntaḥpuramāviddhaṃ mūrchite pṛthivīpatau |
uddhṛtya bāhū cukrośa nṛpatau patite kṣitau || 23 ||
[Analyze grammar]

sumitrayā tu sahitā kausalyā patitaṃ patim |
utthāpayāmāsa tadā vacanaṃ cedamabravīt || 24 ||
[Analyze grammar]

imaṃ tasya mahābhāga dūtaṃ duṣkarakāriṇaḥ |
vanavāsādanuprāptaṃ kasmānna pratibhāṣase || 25 ||
[Analyze grammar]

adyemamanayaṃ kṛtvā vyapatrapasi rāghava |
uttiṣṭha sukṛtaṃ te'stu śoke na syāt sahāyatā || 26 ||
[Analyze grammar]

deva yasyā bhayād rāmaṃ nānupṛcchasi sārathim |
neha tiṣṭhati kaikeyī viśrabdhaṃ pratibhāṣyatām || 27 ||
[Analyze grammar]

sā tathoktvā mahārājaṃ kausalyā śokalālasā |
dharaṇyāṃ nipapātāśu bāṣpaviplutabhāṣiṇī || 28 ||
[Analyze grammar]

evaṃ vilapatīṃ dṛṣṭvā kausalyāṃ patitāṃ bhuvi |
patiṃ cāvekṣya tāḥ sarvāḥ sasvaraṃ ruruduḥ striyaḥ || 29 ||
[Analyze grammar]

tatastamantaḥpuranādamutthitaṃ samīkṣya vṛddhāstaruṇāśca mānavāḥ |
striyaśca sarvā ruruduḥ samantataḥ puraṃ tadāsīt punareva saṃkulam || 30 ||
[Analyze grammar]