Book 6 - ṣaṣṭhamamāhnikam

atha śrītantrāloke |
sthānaprakalpākhyatayā sphuṭastu bāhyo'bhyupāyaḥ pravivicyate'tha || 1 ||
[Analyze grammar]

sthānabhedastridhā proktaḥ prāṇe dehe bahistathā |
prāṇaśca pañcadhā dehe dvidhā bāhyāntaratvataḥ || 2 ||
[Analyze grammar]

maṇḍalaṃ sthaṇḍilaṃ pātramakṣasūtraṃ sapustakam |
liṅgaṃ tūraṃ paṭaḥ pustaṃ pratimā mūrtireva ca || 3 ||
[Analyze grammar]

ityekādaśadhā bāhyaṃ punastadbahudhā bhavet |
tatra prāṇāśrayaṃ tāvadvidhānamupadiśyate || 4 ||
[Analyze grammar]

adhvā samasta evāyaṃ ṣaḍvidho'pyativistṛtaḥ |
yo vakṣyate sa ekatra prāṇe tāvatpratiṣṭhitaḥ || 5 ||
[Analyze grammar]

adhvanaḥ kalanaṃ yattatkramākramatayā sthitam |
kramākramau hi citraikakalanā bhāvagocare || 6 ||
[Analyze grammar]

kramākramātmā kālaśca paraḥ saṃvidi vartate |
kālī nāma parā śaktiḥ saiva devasya gīyate || 7 ||
[Analyze grammar]

saiva saṃvidbahiḥ svātmagarbhībhūtau kramākramau |
sphuṭayantī prarohaṇa prāṇavṛttiriti sthitā || 8 ||
[Analyze grammar]

saṃvinmātraṃ hi yacchuddhaṃ prakāśaparamārthakam |
tanmeyamātmanaḥ projjhya viviktaṃ bhāsate nabhaḥ || 9 ||
[Analyze grammar]

tadeva śūnyarūpatvaṃ saṃvidaḥ parigīyate |
neti neti vimarśena yogināṃ sā parā daśā || 10 ||
[Analyze grammar]

sa eva khātmā meye'sminbhedite svīkriyonmukhaḥ |
patansamucchalattvena prāṇaspandormisaṃjñitaḥ || 11 ||
[Analyze grammar]

tenāhuḥ kila saṃvitprākprāṇe pariṇatā tathā |
antaḥkaraṇatattvasya vāyurāśrayatāṃ gataḥ || 12 ||
[Analyze grammar]

iyaṃ sā prāṇanāśaktirāntarodyogadohadā |
spandaḥ sphurattā viśrāntirjīvo hṛtpratibhā matā || 13 ||
[Analyze grammar]

sā prāṇavṛttiḥ prāṇādyai rūpaiḥ pañcabhirātmasāt |
dehaṃ yatkurute saṃvitpūrṇastenaiṣa bhāsate || 14 ||
[Analyze grammar]

prāṇanāvṛttitādātmyasaṃvitkhacitadehajām |
ceṣṭāṃ paśyantyato mugdhā nāstyanyaditi manvate || 15 ||
[Analyze grammar]

tāmeva bālamūrkhastrīprāyaveditṛsaṃśritām |
matiṃ pramāṇīkurvantaścārvākāstattvadarśinaḥ || 16 ||
[Analyze grammar]

teṣāṃ tathā bhāvanā caddārḍhyameti nirantaram |
taddehabhaṅge suptāḥ syurātādṛgvāsanākṣayāt || 17 ||
[Analyze grammar]

tadvāsanākṣaye tveṣāmakṣīṇaṃ vāsanāntaram |
buddhaṃ kutaścitsaṃsūte vicitrāṃ phalasampadam || 18 ||
[Analyze grammar]

adārḍhyaśaṅkanātprācyavāsanātādavasthyataḥ |
anyakartavyaśaithilyātsaṃbhāvyānuśayatvataḥ || 19 ||
[Analyze grammar]

atadrūḍhānyajanatākartavyaparilopanāt |
nāstikyavāsanāmāhuḥ pāpātpāpīyasīmimām || 20 ||
[Analyze grammar]

alamaprastutenātha prakṛtaṃ pravivicyate |
yāvānsamasta evāyamadhvā prāṇe pratiṣṭhitaḥ || 21 ||
[Analyze grammar]

dvidhā ca so'dhvā kriyayā mūrtyā ca pravibhajyate |
prāṇa eva śikhā śrīmattriśirasyuditā hi sā || 22 ||
[Analyze grammar]

baddhā yāgādikāle tuṃ niṣkalatvācchivātmikā |
yato'horātramadhye'syāścaturviṃśatidhā gatiḥ || 23 ||
[Analyze grammar]

prāṇavikṣeparandhrākhyaśataiścitraphalapradā |
kṣapā śaśī tathāpāno nāda ekatra tiṣṭhati || 24 ||
[Analyze grammar]

jīvādityo na codgacchettuṭyardhaṃ sāndhyamīdṛśam |
ūrdhvavaktro raviścandro'dhomukho vahnirantare || 25 ||
[Analyze grammar]

mādhyāhnikī mokṣadā syādvyomamadhyasthito raviḥ |
anastamitasāro hi jantucakraprabodhakaḥ || 26 ||
[Analyze grammar]

binduḥ prāṇo hyahaścaiva ravirekatra tiṣṭhati |
mahāsandhyā tṛtīyā tu supraśāntātmikā sthitā || 27 ||
[Analyze grammar]

evaṃ baddhā śikhā yatra tattatphalaniyojikā |
ataḥ saṃvidi sarvo'yamadhvā viśramya tiṣṭhati || 28 ||
[Analyze grammar]

amūrtāyāḥ sarvagatvānniṣkriyāyāśca saṃvidaḥ |
mūrtikriyābhāsanaṃ yatsa evādhvā maheśituḥ || 29 ||
[Analyze grammar]

adhvā krameṇa yātavye pade saṃprāptikāraṇam |
dvaitināṃ bhogyabhāvāttu prabuddhānāṃ yato'dyate || 30 ||
[Analyze grammar]

iha sarvatra śabdānāmanvarthaṃ carcayedyataḥ |
uktaṃ śrīmanniśācāre saṃjñātra trividhā matā || 31 ||
[Analyze grammar]

naimittikī prasiddhā ca tathānyā pāribhāṣikī |
pūrvatve vā pradhānaṃ syāttatrāntarbhāvayettataḥ || 32 ||
[Analyze grammar]

ato'dhvaśabdasyokteyaṃ niruktirnoditāpi cet |
kvacitsvabuddhyā sāpyūhyā kiyallekhyaṃ hi pustake || 33 ||
[Analyze grammar]

tatra kriyābhāsanaṃ yatso'dhvā kālāhva ucyate |
varṇamantrapadābhikhyamatrāste'dhvatrayaṃ sphuṭam || 34 ||
[Analyze grammar]

yastu mūrtyavabhāsāṃśaḥ sa deśādhvā nigadyate |
kalātattvapurābhikhyamantarbhūtamiha trayam || 35 ||
[Analyze grammar]

trikadvaye'tra pratyekaṃ sthūlaṃ sūkṣmaṃ paraṃ vapuḥ |
yato'sti tena sarvo'yamadhvā ṣaḍvidha ucyate || 36 ||
[Analyze grammar]

ṣaḍvidhādadhvanaḥ prācyaṃ yadetattritayaṃ punaḥ |
eṣa eva sa kālādhvā prāṇe spaṣṭaṃ pratiṣṭhitaḥ || 37 ||
[Analyze grammar]

tattavamadhyasthitātkālādanyo'yaṃ kāla ucyate |
eṣa kālo hi devasya viśvābhāsanakāriṇī || 38 ||
[Analyze grammar]

kriyāśaktiḥ samastānāṃ tattvānāṃ ca paraṃ vapuḥ |
etadīśvaratattvaṃ tacchivasya vapurucyate || 39 ||
[Analyze grammar]

udriktābhogakāryātmaviśvaikātmyamidaṃ yataḥ |
etadīśvararūpatvaṃ paramātmani yatkila || 40 ||
[Analyze grammar]

tatpramātari māyīye kālatattvaṃ nigadyate |
śivādiśuddhavidyāntaṃ yacchivasya svakaṃ vapuḥ || 41 ||
[Analyze grammar]

tadeva puṃso māyādirāgāntaṃ kañcukībhavet |
anāśritaṃ yato māyā kalāvidye sadāśivaḥ || 42 ||
[Analyze grammar]

īśvaraḥ kālaniyatī sadvidyā rāga ucyate |
anāśritaḥ śūnyamātā buddhimātā sadāśivaḥ || 43 ||
[Analyze grammar]

īśvaraḥ prāṇamātā ca vidyā dehapramātṛtā |
anāśrayo hi śūnyatvaṃ jñānameva hi buddhitā || 44 ||
[Analyze grammar]

viśvātmatā ca prāṇatvaṃ dehe vedyaikatānatā |
tena prāṇapathe viśvākalaneyaṃ virājate || 45 ||
[Analyze grammar]

yena rūpeṇa tadvacmaḥ sadbhistadavadhīyatām |
dvādaśāntāvadhāvasmindehe yadyapi sarvataḥ || 46 ||
[Analyze grammar]

otaprotātmakaḥ prāṇastathāpītthaṃ na susphuṭaḥ |
yatno jīvanamātrātmā tatparaśca dvidhā mataḥ || 47 ||
[Analyze grammar]

saṃvedyaścāpyasaṃvedyo dvidhetthaṃ bhidyate punaḥ |
sphuṭāsphuṭatvāddvaividhyaṃ pratyekaṃ paribhāvayet || 48 ||
[Analyze grammar]

saṃvedyajīvanābhikhyaprayatnaspandasundaraḥ |
prāṇaḥ kandātprabhṛtyeva tathāpyatra na susphuṭaḥ || 49 ||
[Analyze grammar]

kandādhārātprabhṛtyeva vyavasthā tena kathyate |
svacchandaśāstre nāḍīnāṃ vāyvādhāratayā sphuṭam || 50 ||
[Analyze grammar]

tatrāpi tu prayatno'sau na saṃvedyatayā sthitaḥ |
vedyayatnāttu hṛdayātprāṇacāro vibhajyate || 51 ||
[Analyze grammar]

prabhoḥ śivasya yā śaktirvāmā jyeṣṭhā ca raudrikā |
satadanyatamāvātmaprāṇau yatnavidhāyinau || 52 ||
[Analyze grammar]

prabhuśaktiḥ kvacinmukhyā yathāṅgamarudīraṇe |
ātmaśaktiḥ kvacitkandasaṃkocaspandane yathā || 53 ||
[Analyze grammar]

prāṇaśaktiḥ kvacitprāṇacāre hārde yathā sphuṭam |
trayaṃ dvayaṃ vā mukhyaṃ syādyogināmavadhāninām || 54 ||
[Analyze grammar]

avadhānādadṛṣṭāṃśādbalavattvādatheraṇāt |
viparyayo'pi prāṇātmaśaktīnāṃ mukhyatāṃ prati || 55 ||
[Analyze grammar]

vāmā saṃsāriṇāmīśā prabhuśaktirvidhāyinī |
jyeṣṭhā tu suprabuddhānāṃ bubhutsūnāṃ ca raudrikā || 56 ||
[Analyze grammar]

vāmā saṃsāravamanā jyeṣṭhā śivamayī yataḥ |
drāvayitrī rujāṃ raudrī roddhrī cākhilakarmaṇām || 57 ||
[Analyze grammar]

sṛṣṭyāditattvamajñātvā na mukto nāpi mocayet |
uktaṃ ca śrīyogacāre mokṣaḥ sarvaprakāśanāt || 58 ||
[Analyze grammar]

utpattisthitisaṃhārān ye na jānanti yoginaḥ |
na muktāste tadajñānabandhanaikādhivāsitāḥ || 59 ||
[Analyze grammar]

sṛṣṭyādayaśca te sarve kālādhīnā na saṃśayaḥ |
sa ca prāṇātmakastasmāduccāraḥ kathyate sphuṭaḥ || 60 ||
[Analyze grammar]

hṛdayātprāṇacāraśca nāsikyadvādaśāntataḥ |
ṣaṭtriṃśadaṅgulo jantoḥ sarvasya svāṅgulakramāt || 61 ||
[Analyze grammar]

kṣodiṣṭhe vā mahiṣṭhe vā dehe tādṛśa eva hi |
vīryamojo balaṃ spandaḥ prāṇacāraḥ samaṃ tataḥ || 62 ||
[Analyze grammar]

ṣaṭtriṃśadaṅgule cāre yadgamāgamayugmakam |
nālikātithimāsābdatatsaṅghro'tra sphuṭaṃ sthitaḥ || 63 ||
[Analyze grammar]

tuṭiḥ sapādāṅgulayukprāṇastāḥ ṣoḍaśocchvasan |
niḥśvasaṃścātra caṣakaḥ sapañcāṃśe'ṅgule'ṅgule || 64 ||
[Analyze grammar]

śvāsapraśvāsayornālī proktāhorātra ucyate |
navāṅgulāmbudhituṭau praharāste'bdhayo dinam || 65 ||
[Analyze grammar]

nirgame'ntarniśenendū tayoḥ saṃdhye tuṭerdale |
ketuḥ sūrye vidhau rāhurbhaumādervārabhāginaḥ || 66 ||
[Analyze grammar]

praharadvayamanyeṣāṃ grahāṇāmudayo'ntarā |
siddhirdavīyasī mokṣo'bhicāraḥ pāralaukikī || 67 ||
[Analyze grammar]

aihikī dūranaikaṭyātiśayā praharāṣṭake |
madhyāhnamadhyaniśayorabhijinmokṣabhogadā || 68 ||
[Analyze grammar]

nakṣatrāṇāṃ tadanyeṣāmudayo madhyataḥ kramāt |
nāgā lokeśamūrtīśā gaṇeśā jalatattvataḥ || 69 ||
[Analyze grammar]

pradhānāntaṃ nāyakāśca vidyātattvādhināyakāḥ |
sakalādyāśca kaṇṭhyoṣṭhyaparyantā bhairavāstathā || 70 ||
[Analyze grammar]

śaktayaḥ pārameśvaryo vāmaśā vīranāyakāḥ |
aṣṭāvaṣṭau ye ya itthaṃ vyāpyavyāpakatājuṣaḥ || 71 ||
[Analyze grammar]

sthūlasūkṣmāḥ kramātteṣāmudayaḥ praharāṣṭake |
dine krūrāṇi saumyāni rātrau karmāṇyasaṃśayam || 72 ||
[Analyze grammar]

krūratā saumyatā vābhisandherapi nirūpitā |
dinarātrikṣaye muktiḥ sā vyāptidhyānayogataḥ || 73 ||
[Analyze grammar]

te coktāḥ parameśena śrīmadvīrāvalīkule |
sitāsitau dīrghahrasvau dharmādharmau dinakṣape || 74 ||
[Analyze grammar]

kṣīyete yadi taddīkṣā vyāptyā dhyānena yogataḥ |
ahorātraḥ prāṇacāre kathito māsa ucyate || 75 ||
[Analyze grammar]

dinaṃ kṛṣṇo niśā śuklaḥ pakṣau karmasu pūrvavat |
yāḥ ṣoḍaśoktāstithayastāsu ye pūrvapaścime || 76 ||
[Analyze grammar]

tayostu viśramo'rdhe'rdhe tithyaḥ pañcadaśetarāḥ |
sapāde dvyaṅgule tithyā ahorātro vibhajyate || 77 ||
[Analyze grammar]

prakāśaviśramavaśāttāveva hi dinakṣape |
saṃvitpratikṣaṇaṃ yasmātprakāśānandayoginī || 78 ||
[Analyze grammar]

tau klṛptau yāvati tayā tāvatyeva dinakṣape |
yāvatyeva hi saṃvittiruditoditasusphuṭā || 79 ||
[Analyze grammar]

tāvāneva kṣaṇaḥ kalpo nimeṣo vā tadastvapi |
yāvānevodayo vittervedyaikagrahatatparaḥ || 80 ||
[Analyze grammar]

tāvadevāstamayanaṃ veditṛsvātmacarvaṇam |
vedye ca bahirantarvā dvaye vātha dvayojjhite || 81 ||
[Analyze grammar]

sarvathā tanmayībhūtirdinaṃ vettṛsthatā niśā |
veditā vedyaviśrānto vettā tvantarmukhasthitiḥ || 82 ||
[Analyze grammar]

purā vicārayanpaścātsattāmātrasvarūpakaḥ |
jāgradveditṛtā svapno vettṛbhāvaḥ purātanaḥ || 83 ||
[Analyze grammar]

paraḥ suptaṃ kṣaye rātridinayosturyamadvayam |
kadācidvastuviśrāntisāmyenātmani carvaṇam || 84 ||
[Analyze grammar]

vedyavedakasāmyaṃ tat sā rātridinatulyatā |
vedye viśrāntiradhikā dinadairghyāya tatra tu || 85 ||
[Analyze grammar]

nyūnā syātsvātmaviśrāntirviparīte viparyayaḥ |
svātmautsukye prabuddhe hi vedyaviśrāntiralpikā || 86 ||
[Analyze grammar]

itthameva divārātrinyūnādhikyakramaṃ vadet |
yathā deheṣvahorātranyūnādhikyādi no samam || 87 ||
[Analyze grammar]

tathā pureṣvapītyevaṃ tadviśeṣeṇa noditam |
śrītraiyambakasantānavitatāmbarabhāskaraḥ || 88 ||
[Analyze grammar]

dinarātrikramaṃ me śrīśaṃbhuritthamapaprathat |
śrīsantānagurustvāha sthānaṃ buddhāprabuddhayoḥ || 89 ||
[Analyze grammar]

hṛda ārabhya yattena rātrindivavibhājanam |
tadasatsitapakṣe'ntaḥ praveśollāsabhāgini || 90 ||
[Analyze grammar]

abuddhasthānamevaitaddinatvena kathaṃ bhavet |
alaṃ vānena nedaṃ vā mama prāṅmatamatsaraḥ || 91 ||
[Analyze grammar]

heye tu darśite śiṣyāḥ satpathaikāntadarśinaḥ |
vyākhyātaḥ kṛṣṇapakṣo ya statra prāṇagataḥ śaśī || 92 ||
[Analyze grammar]

āpyāyanātmanaikaikāṃ kalāṃ pratitithi tyajet |
dvādaśāntasamīpe tu yāsau pañcadaśī tuṭiḥ || 93 ||
[Analyze grammar]

sāmāvasyātra sa kṣīṇaścandraḥ prāṇārkamāviśet |
uktaṃ śrīkāmikāyāṃ ca nordhve'dhaḥ prakṛtiḥ parā |
ardhārdhe kramate māyā dvikhaṇḍā śivarūpiṇī || 94 ||
[Analyze grammar]

candrasūryātmanā dehaṃ pūrayetpravilāpayet |
amṛtaṃ candrarūpeṇa dvidhā ṣoḍaśadhā punaḥ || 95 ||
[Analyze grammar]

pivanti ca surāḥ sarve daśapañca parāḥ kalāḥ |
amā śeṣaguhāntaḥsthāmāvāsyā viśvatarpiṇī || 96 ||
[Analyze grammar]

evaṃ kalāḥ pañcadaśa kṣīyante śaśinaḥ kramāt |
āpyāyinyamṛtābrūpatādātmyātṣoḍaśī na tu || 97 ||
[Analyze grammar]

tatra pañcadaśī yāsau tuṭiḥ prakṣīṇacandramāḥ |
tadūrdhvagaṃ yattuṭyardhaṃ pakṣasaṃdhiḥ sa kīrtitaḥ || 98 ||
[Analyze grammar]

tasmādviśramatuṭyardhādāmāvasyaṃ purādalam |
paraṃ prātipadaṃ cārdhamiti saṃdhiḥ sa kalpyate || 99 ||
[Analyze grammar]

tatra prātipade tasmiṃstuṭyardhārdhe purādalam |
āmāvasyaṃ tithicchedātkuryātsūryagrahaṃ viśat || 100 ||
[Analyze grammar]

tatrārkamaṇḍale līnaḥ śaśī sravati yanmadhu |
taptatvāttatpibedindusahabhūḥ siṃhikāsutaḥ || 101 ||
[Analyze grammar]

arkaḥ pramāṇaṃ somastu meyaṃ jñānakriyātmakau |
rāhurmāyāpramātā syāttadācchādanakovidaḥ || 102 ||
[Analyze grammar]

tata eva tamorūpo vilāpayitumakṣamaḥ |
tatsaṃghaṭṭādvayollāso mukhyo mātā vilāpakaḥ || 103 ||
[Analyze grammar]

arkendurāhusaṃghaṭṭāt pramāṇaṃ vedyavedakau |
advayena tatastena puṇya eṣa mahāgrahaḥ || 104 ||
[Analyze grammar]

amāvasyāṃ vināpyeṣa saṃghaṭṭaścenmahāgrahaḥ |
yathārke meṣage rāhāvaśvinīsthe'śvinīdine || 105 ||
[Analyze grammar]

āmāvāsyaṃ yadā tvardhaṃ līnaṃ prātipade dale |
pratipacca viśuddhā syāttanmokṣo dūrage vidhau || 106 ||
[Analyze grammar]

grāsamokṣāntare snānadhyānahomajapādikam |
laukikālaukikaṃ bhūyaḥphalaṃ syātpāralaukikam || 107 ||
[Analyze grammar]

grāsyagrāsakatākṣobhaprakṣaye kṣaṇamāviśan |
mokṣabhāgdhyānapūjādi kurvaṃścandrārkayorgrahe || 108 ||
[Analyze grammar]

tithiccheda ṛṇaṃ kāso vṛddhirniḥśvasanaṃ dhanam |
ayatnajaṃ yatnajaṃ tu recanādatha rodhanāt || 109 ||
[Analyze grammar]

evaṃ prāṇe viśati citsūrya induṃ sudhāmayam |
ekaikadhyena bodhāṃśu kalayā paripūrayet || 110 ||
[Analyze grammar]

kramasaṃpūraṇāśāliśaśāṅkāmṛtasundarāḥ |
tuṭyaḥ pañcadaśaitāḥ syustithayaḥ sitapakṣagāḥ || 111 ||
[Analyze grammar]

antyāyāṃ pūrṇamastuṭyāṃ pūrvavatpakṣasandhitā |
indugrahaśca pratipatsandhau pūrvapraveśataḥ || 112 ||
[Analyze grammar]

aihikaṃ grahaṇe cātra sādhakānāṃ mahāphalam |
prāgvadanyadayaṃ māsaḥ prāṇacāre'bda ucyate || 113 ||
[Analyze grammar]

ṣaṭsu ṣaṭsvaṅguleṣvarko hṛdayānmakarādiṣu |
tiṣṭhanmāghāḍhikaṃ ṣaṭkaṃ kuryāttaccottarāyaṇam || 114 ||
[Analyze grammar]

saṃkrāntitritaye vṛtte bhukte cāṣṭādaśāṅgule |
meṣaṃ prāpte ravau puṇyaṃ viṣuvatpāralaukikam || 115 ||
[Analyze grammar]

praveśe tu tulāsthe'rke tadeva viṣuvadbhavet |
iha siddhipradaṃ caitaddakṣiṇāyanagaṃ tataḥ || 116 ||
[Analyze grammar]

garbhatā prodbubhūṣiṣyadbhāvaścāthodbubhūṣutā |
udbhaviṣyattvamudbhūtiprārambho'pyudbhavasthitiḥ || 117 ||
[Analyze grammar]

janma sattā pariṇatirvṛddhirhrāsaḥ kṣayaḥ kramāt |
makarādīni tenātra kriyā sūte sadṛkphalam || 118 ||
[Analyze grammar]

āmutrike jhaṣaḥ kumbho mantrādeḥ pūrvasevane |
catuṣkaṃ kila mīnādyamantikaṃ cottarottaram || 119 ||
[Analyze grammar]

praveśe khalu tatraiva śāntipuṣṭyādisundaram |
karma syādaihikaṃ tacca dūradūraphalaṃ kramāt || 120 ||
[Analyze grammar]

nirgame dinavṛddhiḥ syādviparīte viparyayaḥ |
varṣe'smiṃstithayaḥ pañca pratyaṅgulamiti kramaḥ || 121 ||
[Analyze grammar]

tatrāpyahorātravidhiriti sarvaṃ hi pūrvavat |
prāṇīye varṣa etasminkārtikādiṣu dakṣataḥ || 122 ||
[Analyze grammar]

pitāmahāntaṃ rudrāḥ syurdvādaśāgre'tra bhāvinaḥ |
prāṇe varṣodayaḥ prokto dvādaśābdodayo'dhunā || 123 ||
[Analyze grammar]

kharasāstithya ekasminnekasminnaṅgule kramāt |
dvādaśābdodaye te ca caitrādyā dvādaśoditāḥ || 124 ||
[Analyze grammar]

caitre mantroditiḥ so'pi tālunyukto'dhunā punaḥ |
hṛdi caitroditistena tatra mantrodayo'pi hi || 125 ||
[Analyze grammar]

pratyaṅgulaṃ tithīnāṃ tu triśate parikalpite |
sapañcāṃśāṅgule'bdaḥ syātprāṇe ṣaṣṭyabdatā punaḥ || 126 ||
[Analyze grammar]

śatāni ṣaṭ sahasrāṇi caikaviṃśatirityayam |
vibhāgaḥ prāṇagaḥ ṣaṣṭivarṣāhorātra ucyate || 127 ||
[Analyze grammar]

praharāharniśāmāsaṛtvabdaraviṣaṣṭigaḥ |
yaśchedastatra yaḥ sandhiḥ sa puṇyo dhyānapūjane || 128 ||
[Analyze grammar]

iti prāṇodaye yo'yaṃ kālaḥ śaktyekavigrahaḥ |
viśvātmāntaḥsthitastasya bāhye rūpaṃ nirūpyate || 129 ||
[Analyze grammar]

ṣaṭ prāṇāścaṣakasteṣāṃ ṣaṣṭirnālī ca tāstathā |
tithistattriṃśatā māsaste dvādaśa tu vatsaraḥ || 130 ||
[Analyze grammar]

abdaṃ pitryastvahorātra udagdakṣiṇato'yanāt |
pitṝṇāṃ yatsvamānena varṣaṃ taddivyamucyate || 131 ||
[Analyze grammar]

ṣaṣṭyadhikaṃ ca triśataṃ varṣāṇāmatra mānuṣam |
tacca dvādaśabhirhatvā māsasaṃkhyātra labhyate || 132 ||
[Analyze grammar]

tāṃ punastriṃśatā hatvāhorātrakalpanā vadet |
hatvā tāṃ caikaviṃśatyā sahasraiḥ ṣaṭśatena ca || 133 ||
[Analyze grammar]

prāṇasaṃkhyāṃ vadettatra ṣaṣṭyādyabdodayaṃ punaḥ |
uktaṃ ca gurubhiḥ śrīmadrauravādisvavṛttiṣu || 134 ||
[Analyze grammar]

devānāṃ yadahorātraṃ mānuṣāṇāṃ sa hāyanaḥ |
śatatrayeṇa ṣaṣṭyā ca nṝṇāṃ vibudhavatsaraḥ || 135 ||
[Analyze grammar]

śrīmatsvacchandaśāstre ca tadeva matamīkṣyate |
pitṝṇāṃ tadahorātramityupakramya pṛṣṭhataḥ || 136 ||
[Analyze grammar]

evaṃ daivastvahorātra iti hyaikyopasaṃhṛtiḥ |
tena ye guravaḥ śrīmatsvacchandoktidvayāditaḥ || 137 ||
[Analyze grammar]

pitryaṃ varṣaṃ divyadinamūcurbhrāntā hi te mudhā |
divyārkābdasahasrāṇi yugeṣu caturāditaḥ || 138 ||
[Analyze grammar]

ekaikahānyā tāvadbhiḥ śataisteṣvaṣṭa saṃdhayaḥ |
caturyugaikasaptatyā manvantaste caturdaśa || 139 ||
[Analyze grammar]

brahmaṇo'hastatra cendrāḥ kramādyānti caturdaśa |
brahmāho'nte kālavahnerjvālā yojanalakṣiṇī || 140 ||
[Analyze grammar]

dagdhvā lokatrayaṃ dhūmāttvanyatprasvāpayettrayam |
nirayebhyaḥ purā kālavahnervyaktiryatastataḥ || 141 ||
[Analyze grammar]

vibhuradhaḥsthito'pīśa iti śrīrauravaṃ matam |
brahmaniḥśvāsanirdhūte bhasmani svedavāriṇā || 142 ||
[Analyze grammar]

tadīyenāplutaṃ viśvaṃ tiṣṭhettāvanniśāgame |
tasminniśāvadhau sarve pudgalāḥ sūkṣmadehagāḥ || 143 ||
[Analyze grammar]

agnivegeritā loke jane syurlayakevalāḥ |
kūṣmāṇḍahāṭakādyāstu krīḍanti mahadālaye || 144 ||
[Analyze grammar]

niśākṣaye punaḥ sṛṣṭiṃ kurute tāmasāditaḥ |
svakavarṣaśatānte'sya kṣayastadvaiṣṇavaṃ dinam || 145 ||
[Analyze grammar]

rātriśca tāvatītyevaṃ viṣṇurudraśatābhidhāḥ |
kramātsvasvaśatānteṣu naśyantyatrāṇḍalopataḥ || 146 ||
[Analyze grammar]

abādyavyaktatattvānteṣvitthaṃ varṣaśataṃ kramāt |
dinarātrivibhāgaḥ syāt svasvāyuḥśatamānataḥ || 147 ||
[Analyze grammar]

brahmaṇaḥ pralayollāsasahasraistu rasāgnibhiḥ |
avyaktastheṣu rudreṣu dinaṃ rātriśca tāvatī || 148 ||
[Analyze grammar]

tadā śrīkaṇṭha eva syātsākṣātsaṃhārakṛtprabhuḥ |
sarve rudrāstathā mūle māyāgarbhādhikāriṇaḥ || 149 ||
[Analyze grammar]

avyaktākhye hyāviriñcācchrīkaṇṭhena sahāsate |
nivṛttādhaḥsthakarmā hi brahmā tatrādhare dhiyaḥ || 150 ||
[Analyze grammar]

na bhoktā jño'dhikāre tu vṛtta eva śivībhavet |
sa eṣo'vāntaralayastatkṣaye sṛṣṭirucyate || 151 ||
[Analyze grammar]

sāṃkhyavedādisaṃsiddhāñchrīkaṇṭhastadaharmukhe |
sṛjatyeva punastena na samyaṅmuktirīdṛśī || 152 ||
[Analyze grammar]

pradhāne yadahorātraṃ tajjaṃ varṣaśataṃ vibhoḥ |
śrīkaṇṭhasyāyuretacca dinaṃ kañcukavāsinām || 153 ||
[Analyze grammar]

tatkramānniyatiḥ kālo rāgo vidyā kaletyamī |
yāntyanyonyaṃ layaṃ teṣāmāyurgāhanikaṃ dinam || 154 ||
[Analyze grammar]

taddinaprakṣaye viśvaṃ māyāyāṃ pravilīyate |
kṣīṇāyāṃ niśi tāvatyāṃ gahaneśaḥ sṛjetpunaḥ || 155 ||
[Analyze grammar]

evamavyaktakālaṃ tu parārdhairdaśabhirjahi |
māyāhastāvatī rātrirbhavetpralaya eṣa saḥ || 156 ||
[Analyze grammar]

māyākālaṃ parārdhānāṃ guṇayitvā śatena tu |
aiśvaro divaso nādaḥ prāṇātmātra sṛjejjagat || 157 ||
[Analyze grammar]

tāvatī caiśvarī rātriryatra prāṇaḥ praśāmyati |
prāṇagarbhasthamapyatra viśvaṃ sauṣumnavartmanā || 158 ||
[Analyze grammar]

prāṇe brahmavile śānte saṃvidyāpyavaśiṣyate |
aṃśāṃśikāto'pyetasyāḥ sūkṣmasūkṣmataro layaḥ || 159 ||
[Analyze grammar]

guṇayitvaiśvaraṃ kālaṃ parārdhānāṃ śatena tu |
sādāśivaṃ dinaṃ rātrirmahāpralaya eva ca || 160 ||
[Analyze grammar]

sadāśivaḥ svakālānte bindvardhendunirodhikāḥ |
ākramya nāde līyeta gṛhītvā sacarācaram || 161 ||
[Analyze grammar]

nādo nādāntavṛttyā tu bhittvā brahmabilaṃ haṭhāt |
śaktitattve layaṃ yāti nijakālaparikṣaye || 162 ||
[Analyze grammar]

etāvacchaktitattve tu vijñeyaṃ khalvaharniśam |
śaktiḥ svakālavilaye vyāpinyāṃ līyate punaḥ || 163 ||
[Analyze grammar]

vyāpinyā taddivārātraṃ līyate sāpyanāśrite |
parārdhakoṭyā hatvāpi śaktikālamanāśrite || 164 ||
[Analyze grammar]

dinaṃ rātriśca tatkāle parārdhaguṇite'pi ca |
so'pi yāti layaṃ sāmyasaṃjñe sāmanase pade || 165 ||
[Analyze grammar]

sa kālaḥ sāmyasaṃjñaḥ syānnityo'kalyaḥ kalātmakaḥ |
yattatsāmanasaṃ rūpaṃ tatsāmyaṃ brahma viśvagam || 166 ||
[Analyze grammar]

ataḥ sāmanasātkālānnimeṣonmeṣamātrataḥ |
tuṭyādikaṃ parārdhāntaṃ sūte saivātra niṣṭhitam || 167 ||
[Analyze grammar]

daśaśatasahasramayutaṃ lakṣaniyutakoṭi sārbudaṃ vṛndam |
kharvanikharve śaṃkhābjajaladhimadhyāntamatha parārdhaṃ ca || 168 ||
[Analyze grammar]

ityekasmātprabhṛti hi daśadhā daśadhā krameṇa kalayitvā |
ekādiparārdhānteṣvaṣṭādaśasu sthitiṃ brūyāt || 169 ||
[Analyze grammar]

catvāra ete pralayā mukhyāḥ sargāśca tatkalāḥ |
bhūmūlanaiśaśaktisthāstadevāṇḍacatuṣṭayam || 170 ||
[Analyze grammar]

kālāgnirbhuvi saṃhartā māyānte kālatattvarāṭ |
śrīkaṇṭho mūla ekatra sṛṣṭisaṃhārakārakaḥ || 171 ||
[Analyze grammar]

tallayo vāntarastasmādekaḥ sṛṣṭilayeśitā |
śrīmānaghoraḥ śaktyante saṃhartā sṛṣṭikṛcca saḥ || 172 ||
[Analyze grammar]

tatsṛṣṭau sṛṣṭisaṃhārā niḥsaṃkhyā jagatāṃ yataḥ |
antarbhūtāstataḥ śāktī mahāsṛṣṭirudāhṛtā || 173 ||
[Analyze grammar]

laye brahmā harī rudraśatānyaṣṭakapañcakam |
ityanyonyaṃ kramādyānti layaṃ māyāntake'dhvani || 174 ||
[Analyze grammar]

māyātattvalaye tvete prayānti paramaṃ padam |
māyordhve ye sitādhvasthāsteṣāṃ paraśive layaḥ || 175 ||
[Analyze grammar]

tatrāpyaupādhikādbhedāllaye bhedaṃ pare viduḥ |
evaṃ tāttveśvare varge līne sṛṣṭau punaḥ pare || 176 ||
[Analyze grammar]

tatsādhakāḥ śiveṣṭā vā tatsthānamadhiśerate |
brāhmī nāma parasyaiva śaktistāṃ yatra pātayet || 177 ||
[Analyze grammar]

sa brahmā viṣṇurudrādyā vaiṣṇavyāderataḥ kramāt |
śaktimantaṃ vihāyānyaṃ śaktiḥ kiṃ yāti nedṛśam || 178 ||
[Analyze grammar]

chāditaprathitāśeṣa śaktirekaḥ śivastathā |
evaṃ visṛṣṭipralayāḥ prāṇa ekatra niṣṭhitāḥ || 179 ||
[Analyze grammar]

so'pi saṃvidi saṃvicca cinmātre jñeyavarjite |
cinmātrameva devī ca sā parā parameśvarī || 180 ||
[Analyze grammar]

aṣṭātriṃśaṃ ca tattattvaṃ hṛdayaṃ tatparāparam |
tena saṃvittvamevaitatspandamānaṃ svabhāvataḥ || 181 ||
[Analyze grammar]

layodayā iti prāṇe ṣaṣṭyabdodayakīrtanam |
icchāmātrapratiṣṭheyaṃ kriyāvaicitryacarcanā || 182 ||
[Analyze grammar]

kālaśaktistato bāhye naitasyā niyataṃ vapuḥ |
svapnasvapne tathā svapne supte saṃkalpagocare || 183 ||
[Analyze grammar]

samādhau viśvasaṃhārasṛṣṭikramavivecane |
mito'pi kila kālāṃśo vitatatvena bhāsate || 184 ||
[Analyze grammar]

pramātrabhede bhede'tha citro vitatimāpyasau |
evaṃ prāṇe yathā kālaḥ kriyāvaicitryaśaktijaḥ || 185 ||
[Analyze grammar]

tathāpāne'pi hṛdayānmūlapīṭhavisarpiṇi |
mūlābhidhamahāpīṭhasaṅkocapravikāsayoḥ || 186 ||
[Analyze grammar]

brahmādyanāśritāntānāṃ cinute sṛṣṭisaṃhṛtī |
śaśvadyadyapyapāno'ya mitthaṃ vahati kiṃtvasau || 187 ||
[Analyze grammar]

avedyayatno yatnena yogibhiḥ samupāsyate |
hṛtkandānandasaṃkocavikāsadvādaśāntagāḥ || 188 ||
[Analyze grammar]

brahmādayo'nāśritāntāḥ sevyante'tra suyogibhiḥ |
ete ca parameśānaśaktitvādviśvavartinaḥ || 189 ||
[Analyze grammar]

dehamapyaśnuvānāstatkāraṇānīti kāmike |
bālyayauvanavṛddhatvanidhaneṣu punarbhave || 190 ||
[Analyze grammar]

muktau ca dehe brahmādyāḥ ṣaḍadhiṣṭhānakāriṇaḥ |
tasyānte tu parā devī yatra yukto na jāyate || 191 ||
[Analyze grammar]

anena jñātamātreṇa dīkṣānugrahakṛdbhavet |
samastakāraṇollāsapade suvidite yataḥ || 192 ||
[Analyze grammar]

akāraṇaṃ śivaṃ vindedyattadviśvasya kāraṇam |
adhovaktraṃ tvidaṃ dvaitakalaṅkaikāntaśātanam || 193 ||
[Analyze grammar]

kṣīyate tadupāsāyāṃ yenordhvādharaḍambaraḥ |
atrāpānodaye prāgvatṣaṣṭyabdodayayojanām || 194 ||
[Analyze grammar]

yāvatkurvīta tuṭyāderyuktāṅgulavibhāgataḥ |
evaṃ samāne'pi vidhiḥ sa hi hārdīṣu nāḍiṣu || 195 ||
[Analyze grammar]

saṃcaransarvatodikkaṃ daśadhaiva vibhāvyate |
daśa mukhyā mahānāḍīḥ pūrayanneṣa tadgatāḥ || 196 ||
[Analyze grammar]

nāḍyantaraśritā nāḍīḥ krāmandehe samasthitiḥ |
aṣṭāsu digdaleṣveṣa krāmaṃstaddikpateḥ kramāt || 197 ||
[Analyze grammar]

ceṣṭitānyanukurvāṇo raudraḥ saumyaśca bhāsate |
sa eva nāḍītritaye vāmadakṣiṇamadhyage || 198 ||
[Analyze grammar]

indvarkāgnimaye mukhye caraṃstiṣṭhatyaharniśam |
sārdhanālīdvayaṃ prāṇaśatāni nava yatsthitam || 199 ||
[Analyze grammar]

tāvadvahannahorātraṃ caturviṃśatidhā caret |
viṣuvadvāsare prātaḥ sāṃśāṃ nālīṃ sa madhyagaḥ || 200 ||
[Analyze grammar]

vāmetarodaksavyānyairyāvatsaṃkrāntipañcakam |
evaṃ kṣīṇāsu pādonacaturdaśasu nāliṣu || 201 ||
[Analyze grammar]

madhyāhne dakṣaviṣuvannavaprāṇaśatīṃ vahet |
dakṣodaganyodagdakṣaiḥ punaḥ saṃkrāntipañcakam || 202 ||
[Analyze grammar]

navāsuśatamekaikaṃ tato viṣuvaduttaram |
pañcake pañcake'tīte saṃkrānterviṣuvadbahiḥ || 203 ||
[Analyze grammar]

yadvattathāntaḥ saṅkrāntirnavaprāṇaśatāni sā |
evaṃ rātrāvapītyevaṃ viṣuvaddivasātsamāt || 204 ||
[Analyze grammar]

ārabhyāharniśāvṛddhihrāsasaṅkrāntigo'pyasau |
rātryantadinapūrvāṃśau madhyāhno divasakṣayaḥ || 205 ||
[Analyze grammar]

sa śarvaryudayo madhyamudakto viṣutedṛśī |
vyāptau viṣeryato vṛttiḥ sāmyaṃ ca vyāptirucyate || 206 ||
[Analyze grammar]

tadarhati ca yaḥ kālo viṣuvattadihoditaḥ |
viṣuvatprabhṛti hrāsavṛddhī ye dinarātrige || 207 ||
[Analyze grammar]

tatkrameṇaiva saṃkrāntihrāsavṛddhī divāniśoḥ |
itthaṃ samānamaruto varṣadvayavikalpanam || 208 ||
[Analyze grammar]

cāra ekatra nahyatra śvāsapraśvāsacarcanam |
samāne'pi tuṭeḥ pūrvaṃ yāvatṣaṣṭyabdagocaram || 209 ||
[Analyze grammar]

kālasaṃkhyā susūkṣmaikacāragā gaṇyate budhaiḥ |
saṃdhyāpūrvāhṇamadhyāhnamadhyarātrādi yatkila || 210 ||
[Analyze grammar]

antaḥsaṃkrāntigaṃ grāhyaṃ tanmukhyaṃ tatphaloditeḥ |
uktaḥ samānagaḥ kāla udāne tu nirūpyate || 211 ||
[Analyze grammar]

prāṇavyāptau yaduktaṃ tadudāne'pyatra kevalam |
nāsāśaktyantayoḥ sthāne brahmarandhrordhvadhāmanī || 212 ||
[Analyze grammar]

tenodāne'tra hṛdayānmūrdhanyadvādaśāntagam |
tuṭyādiṣaṣṭivarṣāntaṃ viśvaṃ kālaṃ vicārayet || 213 ||
[Analyze grammar]

vyāne tu viśvātmamaye vyāpake kramavarjite |
sūkṣmasūkṣmocchaladrūpamātraḥ kālo vyavasthitaḥ || 214 ||
[Analyze grammar]

sṛṣṭiḥ pravilayaḥ sthemā saṃhāro'nugraho yataḥ |
kramātprāṇādike kāle taṃ taṃ tatrāśrayettataḥ || 215 ||
[Analyze grammar]

prāṇacāre'tra yo varṇapadamantrodayaḥ sthitaḥ |
yatnajo'yatnajaḥ sūkṣmaḥ paraḥ sthūlaḥ sa kathyate || 216 ||
[Analyze grammar]

eko nādātmako varṇaḥ sarvavarṇāvibhāgavān |
so'nastamitarūpatvādanāhata ihoditaḥ || 217 ||
[Analyze grammar]

sa tu bhairavasadbhāvo mātṛsadbhāva eṣa saḥ |
parā saikākṣarā devī yatra līnaṃ carācaram || 218 ||
[Analyze grammar]

hrasvārṇatrayamekaikaṃ ravyaṅgulamathetarat |
praveśa iti ṣaḍvarṇāḥ sūryendupathagāḥ kramāt || 219 ||
[Analyze grammar]

ikārokārayorādisandhau saṃdhyakṣaradvayam |
e o iti praveśe tu ai au iti dvayaṃ viduḥ || 220 ||
[Analyze grammar]

ṣaṇṭhārṇāni praveśe tu dvādaśāntalalāṭayoḥ |
gale hṛdi ca bindvarṇavisargau paritaḥsthitau || 221 ||
[Analyze grammar]

kādipañcakamādyasya varṇasyāntaḥ sadoditam |
evaṃ sasthānavarṇānāmantaḥ sā sārṇasantatiḥ || 222 ||
[Analyze grammar]

hṛdyeṣa prāṇarūpastu sakāro jīvanātmakaḥ |
binduḥ prakāśo hārṇaśca pūraṇātmatayā sthitaḥ || 223 ||
[Analyze grammar]

uktaḥ paro'yamudayo varṇānāṃ sūkṣma ucyate |
praveśe ṣoḍaśaunmukhye ravayaḥ ṣaṇṭhavarjitāḥ || 224 ||
[Analyze grammar]

tadevendvarkamatrānye varṇāḥ sūkṣmodayastvayam |
kālo'rdhamātraḥ kādīnāṃ trayastriṃśata ucyate || 225 ||
[Analyze grammar]

mātrā hrasvāḥ pañca dīrghāṣṭakaṃ dvistriḥ plutaṃ tu lṝ |
ekāśītimimāmardhamātrāṇāmāha no guruḥ || 226 ||
[Analyze grammar]

yadvaśādbhagavānekāśītikaṃ mantramabhyadhāt |
ekāśītipadā devī śaktiḥ proktā śivātmikā || 227 ||
[Analyze grammar]

śrīmātaṅge tathā dharmasaṃghātātmā śivo yataḥ |
tathā tathā parāmarśaśakticakreśvaraḥ prabhuḥ || 228 ||
[Analyze grammar]

sthūlaikāśītipadajaparāmarśairvibhāvyate |
tata eva parāmarśo yāvatyekaḥ samāpyate || 229 ||
[Analyze grammar]

tāvattatpadamuktaṃ no suptiṅniyamayāntritam |
ekāśītipadodāravimarśaktamabṛṃhitaḥ || 230 ||
[Analyze grammar]

sthūlopāyaḥ paropāyastveṣa mātrākṛto layaḥ |
ardhamātrā nava nava syuścaturṣu caturṣu yat || 231 ||
[Analyze grammar]

aṅguleṣviti ṣaṭtriṃśatyekāśītipadodayaḥ |
aṅgule navabhāgena vibhakte navamāśakāḥ || 232 ||
[Analyze grammar]

vedā mātrārdhamanyattu dvicatuḥṣaṅguṇaṃ trayam |
evamaṅgularandhrāṃśacatuṣkadvayagaṃ laghu || 233 ||
[Analyze grammar]

dīrghaṃ plutaṃ kramāddvitriguṇamardhaṃ tato'pi hal |
kṣakārastryardhamātrātmā mātrikaḥ satathāntarā || 234 ||
[Analyze grammar]

viśrāntāvardhamātrāsya tasmiṃstu kalite sati |
aṅgulārdhe'dribhāgena tvardhamātrā purā punaḥ || 235 ||
[Analyze grammar]

kṣakāraḥ sarvasaṃyogagrahaṇātmā tu sarvagaḥ |
sarvavarṇodayādyantasandhiṣūdayabhāgvibhuḥ || 236 ||
[Analyze grammar]

itthaṃ ṣaṭtriṃśake cāre varṇānāmudayaḥ phale |
krūre saumye vilomena hādi yāvadapaścimam || 237 ||
[Analyze grammar]

hṛdyakāro dvādaśānte hakārastadidaṃ viduḥ |
ahamātmakamadvaitaṃ yaḥ prakāśātmaviśramaḥ || 238 ||
[Analyze grammar]

śivaśaktyavibhāgena mātraikāśītikā tviyam |
dvāsaptatāvaṅguleṣu dviguṇatvena saṃsaret || 239 ||
[Analyze grammar]

uktaḥ sūkṣmodayastraidhaṃ dvidhoktastu parodayaḥ |
atha sthūlodayo'rṇānāṃ bhaṇyate guruṇoditaḥ || 240 ||
[Analyze grammar]

ekaikamardhapraharaṃ dine vargāṣṭakodayaḥ |
rātrau ca hrāsavṛddhyatra kecidāhurna ke'pi tu || 241 ||
[Analyze grammar]

eṣa vargodayo rātrau divā cāpyardhayāmagaḥ |
prāṇatrayodaśaśatī pañcāśadadhikā ca sā || 242 ||
[Analyze grammar]

adhyardhā kila saṃkrāntirvarge varge divāniśoḥ |
tadaikye tūdayaścāraśatānāṃ saptaviṃśatiḥ || 243 ||
[Analyze grammar]

nava vargāṃstu ye prāhusteṣāṃ prāṇaśatī svīn |
satribhāgaiva saṃkrāntirvarge pratyekamucyate || 244 ||
[Analyze grammar]

aharniśaṃ tadaikye tu śatānāṃ śruticakṣuṣī |
sthūlo vargodayaḥ so'yamathārṇodaya ucyate || 245 ||
[Analyze grammar]

ekaikavarṇe prāṇānāṃ dviśataṃ ṣoḍaśādhikam |
bahiścaṣakaṣaṭtriṃśaddina itthaṃ tathāniśi || 246 ||
[Analyze grammar]

śatamaṣṭottaraṃ tatra raudraṃ śāktamathottaram |
yāmalasthitiyoge tu rudraśaktyavibhāgitā || 247 ||
[Analyze grammar]

dinarātryavibhāge tu dṛgvahnyabdhyasucāraṇāḥ |
sapañcamāṃśā nāḍī ca bahirvarṇodayaḥ smṛtaḥ || 248 ||
[Analyze grammar]

iti pañcāśikā seyaṃ varṇānāṃ paricarcitā |
ekonāṃ ye tu tāmāhustanmataṃ saṃpracakṣmahe || 249 ||
[Analyze grammar]

vedāścārāḥ pañcamāṃśanyūnaṃ cārārdhamekaśaḥ |
varṇe'dhikaṃ taddviguṇamavibhāge divāniśoḥ || 250 ||
[Analyze grammar]

sthūlo varṇodayaḥ so'yaṃ purā sūkṣmo nigadyate || 251 ||
[Analyze grammar]

iti kālatattvamuditaṃ śāstramukhāgamanijānubhavasiddham || 252 ||
[Analyze grammar]