Book 3 - tṛtīyamāhnikam

śrītantrālokasya tṛtīyamāhnikam |
atha paraupayikaṃ praṇigadyate padamanuttarameva maheśituḥ |
prakāśamātraṃ yatproktaṃ bhairavīyaṃ paraṃ mahaḥ |
tatra svatantratāmātramadhikaṃ pravivicyate || 1 ||
[Analyze grammar]

yaḥ prakāśaḥ sa sarvasya prakāśatvaṃ prayacchati |
na ca tadvyatirekyasti viśvaṃ sadvāvabhāsate || 2 ||
[Analyze grammar]

ato'sau parameśānaḥ svātmavyomanyanargalaḥ |
iyataḥ sṛṣṭisaṃhārāḍambarasya pradarśakaḥ || 3 ||
[Analyze grammar]

nirmale makure yadvadbhānti bhūmijalādayaḥ |
amiśrāstadvadekasmiṃścinnāthe viśvavṛttayaḥ || 4 ||
[Analyze grammar]

sadṛśaṃ bhāti nayanadarpaṇāmbaravāriṣu |
tathā hi nirmale rūpe rūpamevāvabhāsate || 5 ||
[Analyze grammar]

pracchannarāgiṇī kāntapratibimbitasundaram |
darpaṇaṃ kucakumbhābhyāṃ spṛśantyapi na tṛpyati || 6 ||
[Analyze grammar]

na hi sparśo'sya vimalo rūpameva tathā yataḥ |
nairmalyaṃ cātiniviḍasajātīyaikasaṃgatiḥ || 7 ||
[Analyze grammar]

svasminnabhedādbhinnasya darśanakṣamataiva yā |
atyaktasvaprakāśasya nairmalyaṃ tadgurūditam || 8 ||
[Analyze grammar]

nairmalyaṃ mukhyamekasya saṃvinnāthasya sarvataḥ |
aṃśāṃśikātaḥ kvāpyanyadvimalaṃ tattadicchayā || 9 ||
[Analyze grammar]

bhāvānāṃ yatpratīghāti vapurmāyātmakaṃ hi tat |
teṣāmevāsti sadvidyāmayaṃ tvapratighātakam || 10 ||
[Analyze grammar]

tadevamubhayākāramavabhāsaṃ prakāśayan |
vibhāti varado bimbapratibimbadṛśākhile || 11 ||
[Analyze grammar]

yastvāha netratejāṃsi svacchātpratiphalantyalam |
viparyasya svakaṃ vaktraṃ gṛhṇantīti sa pṛcchyate || 12 ||
[Analyze grammar]

dehādanyatra yattejastadadhiṣṭhāturātmanaḥ |
tenaiva tejasā jñatve ko'rthaḥ syāddarpaṇena tu || 13 ||
[Analyze grammar]

viparyastaistu tejobhirgrāhakātmatvamāgataiḥ |
rūpaṃ dṛśyeta vadane nije na makurāntare || 14 ||
[Analyze grammar]

svamukhe sparśavaccaitadrūpaṃ bhāyānmametyalam |
na tvasya spṛśyabhinnasya vedyaikāntasvarūpiṇaḥ || 15 ||
[Analyze grammar]

rūpasaṃsthānamātraṃ tatsparśagandharasādibhiḥ |
nyagbhūtaireva tadyuktaṃ vastu tatpratibimbitam || 16 ||
[Analyze grammar]

nyagbhāvo grāhyatābhāvāttadabhāvo'pramāṇataḥ |
sa cārthasaṃgamābhāvātso'pyādarśe'navasthiteḥ || 17 ||
[Analyze grammar]

ata eva gurutvādirdharmo naitasya lakṣyate |
nahyādarśe saṃsthito'sau taddṛṣṭau sa upāyakaḥ || 18 ||
[Analyze grammar]

tasmāttu naiṣa bhedena yadbhāti tata ucyate |
ādhārastatra tūpāyā dīpadṛksaṃvidaḥ kramāt || 19 ||
[Analyze grammar]

dīpacakṣurvibodhānāṃ kāṭhinyābhāvataḥ param |
sarvataścāpi nairmalyānna vibhādarśavatpṛthak || 20 ||
[Analyze grammar]

etacca devadevena darśitaṃ bodhavṛddhaye |
mūḍhānāṃ vastu bhavati tato'pyanyatra nāpyalam || 21 ||
[Analyze grammar]

pratīghāti svatantraṃ no na sthāyyasthāyi cāpi na |
svacchasyaivaiṣa kasyāpi mahimeti kṛpālunā || 22 ||
[Analyze grammar]

na deśoṃ no rūpaṃ na ca samayayogo na parimā na cānyonyāsaṃgo na ca tadapahānirna ghanatā |
na cāvastutvaṃ syānna ca kimapi sāraṃ nijamiti dhruvaṃ mohaḥ śāmyediti niradiśaddarpaṇavidhiḥ || 23 ||
[Analyze grammar]

itthaṃ pradarśite'mutra pratibimbanavartmani |
śabdasya pratibimbaṃ yat pratiśrutketi bhaṇyate || 24 ||
[Analyze grammar]

na cāsau śabdajaḥ śabda āgacchattvena saṃśravāt |
tenaiva vaktrā dūrasthaiḥ śabdasyāśravaṇādapi || 25 ||
[Analyze grammar]

piṭhirādipidhānāṃśaviśiṣṭachidrasaṃgatau |
citratvāccāsya śabdasya pratibimbaṃ mukhādivat || 26 ||
[Analyze grammar]

idamanyasya vedyasya rūpamityavabhāsate |
yathādarśe tathā kenāpyuktamākarṇaye tviti || 27 ||
[Analyze grammar]

niyamādbimbasāṃmukhyaṃ pratibimbasya yattataḥ |
tanmadhyagāḥ pramātāraḥ śṛṇvanti pratiśabdakam || 28 ||
[Analyze grammar]

mukhyagrahaṃ tvapi vinā pratibimbagraho bhavet |
svapaścātsthaṃ priyaṃ paśyeṭṭaṅkitaṃ mukure vapuḥ || 29 ||
[Analyze grammar]

sāṃmukhyaṃ cocyate tādṛgdarpaṇābhedasaṃsthiteḥ || 30 ||
[Analyze grammar]

ataḥ kūpādipiṭhirākāśe tatpratibimbitam |
vaktrākāśaṃ saśabdaṃ sadbhāti tatparavaktavat || 31 ||
[Analyze grammar]

yathā cādarśapāścātyabhāgastho vetti no mukham |
tathā tathāvidhākāśapaścātstho vetti na dhvanim || 32 ||
[Analyze grammar]

śabdo na cānabhivyaktaḥ pratibimbati taddhruvam |
abhivyaktiśrutī tasya samakālaṃ dvitīyake || 33 ||
[Analyze grammar]

kṣaṇe tu pratibimbatvaṃ śrutiśca samakālikā |
tulyakālaṃ hi no hastatacchāyārūpaniścayaḥ || 34 ||
[Analyze grammar]

itthaṃ pradarśite'mutra pratibimbasatattvake |
prakṛtaṃ brūmahe tatra pratibimbanamarhati || 35 ||
[Analyze grammar]

śabdo nabhasi sānande sparśadhāmani sundaraḥ |
sparśo'nyo'pi dṛḍhāghātaśūlaśītādikodbhavaḥ |
parasthaḥ pratibimbatvātsvadehoddhūlanākaraḥ || 36 ||
[Analyze grammar]

na caiṣa mukhyastatkāryapāramparyāprakāśanāt || 37 ||
[Analyze grammar]

evaṃ ghrāṇāntare gandho raso dantodake sphuṭaḥ || 38 ||
[Analyze grammar]

yathā ca rūpaṃ pratibimbitaṃ dṛśorna cakṣuṣānyena vinā hi lakṣyate |
tathā rasasparśanasaurabhādikaṃ na lakṣyate'kṣeṇa vinā sthitaṃ tvapi || 39 ||
[Analyze grammar]

na cāntare sparśanadhāmani sthitaṃ bahiḥspṛśonyākṣadhiyaḥ sa gocaraḥ || 40 ||
[Analyze grammar]

ato'ntikasthasvakatādṛgindriyaprayojanāntaḥkaraṇairyadā kṛtā |
tadā tadāttaṃ pratibimbamindriye svakāṃ kriyāṃ sūyata eva tādṛśīm || 41 ||
[Analyze grammar]

na tu smṛtānmānasagocarādṛtā bhavetkriyā sā kila vartamānataḥ |
ataḥ sthitaḥ sparśavarastadindriye samāgataḥ sanviditastathākriyaḥ || 42 ||
[Analyze grammar]

asaṃbhave bāhyagatasya tādṛśaḥ sva eva tasminpratibimbitastathā |
karoti tāṃ sparśavaraḥ sukhātmikāṃ sa cāpi kasyāmapi nāḍisaṃtatau || 43 ||
[Analyze grammar]

tena saṃvittimakure viśvamātmānamarpayat |
nāthasya vadate'muṣya vimalāṃ viśvarūpatām || 44 ||
[Analyze grammar]

yathā ca gandharūpaspṛgrasādyāḥ pratibimbitāḥ |
tadādhāroparāgeṇa bhānti khaṅge mukhādivat || 45 ||
[Analyze grammar]

tathā viśvamidaṃ bodhe pratibimbitamāśrayet |
prakāśatvasvatantratvaprabhṛtiṃ dharmavistaram || 46 ||
[Analyze grammar]

yathā ca sarvataḥ svacche sphaṭike sarvato bhavet |
pratibimbaṃ tathā bodhe sarvataḥ svacchatājuṣi || 47 ||
[Analyze grammar]

atyantasvacchatā sā yatsvākṛtyanavabhāsanam |
ataḥ svacchatamo bodho na ratnaṃ tvākṛtigrahāt || 48 ||
[Analyze grammar]

pratibimbaṃ ca bimbena bāhyasthena samarpyate |
tasyaiva pratibimbatve kiṃ bimbamavaśiṣyatām || 49 ||
[Analyze grammar]

yadvāpi kāraṇaṃ kiṃcidbimbatvenābhiṣicyate |
tadapi pratibimbatvameti bodhe'nyathā tvasat || 50 ||
[Analyze grammar]

itthametatsvasaṃvittidṛḍhanyāyāstrarakṣitam |
sāmrājyameva viśvatra pratibimbasya jṛmbhate || 51 ||
[Analyze grammar]

nanu bimbasya virahe pratibimbaṃ kathaṃ bhavet |
kiṃ kurmo dṛśyate taddhi nanu tadbimbamucyatām || 52 ||
[Analyze grammar]

naivaṃ tallakṣaṇābhāvādbimbaṃ kila kimucyate |
anyāmiśraṃ svatantraṃ sadbhāsamānaṃ mukhaṃ yathā || 53 ||
[Analyze grammar]

svarūpānapahānena pararūpasadṛkṣatām |
pratibimbātmatāmāhuḥ khaḍgādarśatalādivat || 54 ||
[Analyze grammar]

uktaṃ ca sati bāhye'pi dhīrekānekavedanāt |
anekasadṛśākārā na tvaneketi saugataiḥ || 55 ||
[Analyze grammar]

nanvitthaṃ pratibimbasya lakṣaṇaṃ kiṃ taducyate |
anyavyāmiśraṇāyogāttadbhedāśakyabhāsanam |
pratibimbamiti prāhurdarpaṇe vadanaṃ yathā || 56 ||
[Analyze grammar]

bodhamiśramidaṃ bodhādbhedenāśakyabhāsanam |
paratattvādi bodhe kiṃ pratibimbaṃ na bhaṇyate || 57 ||
[Analyze grammar]

lakṣaṇasya vyavasthaiṣākasmāccedbimbamucyatām |
prājñā vastuni yujyante na tu sāmayike dhvanau || 58 ||
[Analyze grammar]

nanu na pratibimbasya vinā bimbaṃ bhavetsthitiḥ |
kiṃ tataḥ pratibimbe hi bimbaṃ tādātmyavṛtti na || 59 ||
[Analyze grammar]

ataśca lakṣaṇasyāsya proktasya tadasaṃbhave |
na hānirhetumātre tu praśno'yaṃ paryavasyati || 60 ||
[Analyze grammar]

tatrāpi ca nimittākhye nopādāne kathaṃcana |
nimittakāraṇānāṃ ca kadācitkvāpi saṃbhavaḥ || 61 ||
[Analyze grammar]

ata eva purovartinyāloke smaraṇādinā |
nimittena ghanenāstu saṃkrāntadayitākṛtiḥ || 62 ||
[Analyze grammar]

anyathā saṃvidārūḍhā kāntā vicchedayoginī |
kasmādbhāti na vai saṃvid vicchedaṃ purato gatā || 63 ||
[Analyze grammar]

ata evāntaraṃ kiṃciddhīsaṃjñaṃ bhavatu sphuṭam |
yatrāsya vicchidā bhānaṃ saṃkalpasvapnadarśane || 64 ||
[Analyze grammar]

ato nimittaṃ devasya śaktayaḥ santu tādṛśe |
itthaṃ viśvamidaṃ nāthe bhairavīyacidambare |
pratibimbamalaṃ svacche na khalvanyaprasādataḥ || 65 ||
[Analyze grammar]

ananyāpekṣitā yāsya viśvātmatvaṃ prati prabhoḥ |
tāṃ parāṃ pratibhāṃ devīṃ saṃgirante hyanuttarām || 66 ||
[Analyze grammar]

akulasyāsya devasya kulaprathanaśālinī |
kaulikī sā parā śaktiraviyukto yayā prabhuḥ || 67 ||
[Analyze grammar]

tayoryadyāmalaṃ rūpaṃ sa saṃghaṭṭa iti smṛtaḥ |
ānandaśaktiḥ saivoktā yato viśvaṃ visṛjyate || 68 ||
[Analyze grammar]

parāparātparaṃ tattvaṃ saiṣā devī nigadyate |
tatsāraṃ tacca hṛdayaṃ sa visargaḥ paraḥ prabhuḥ || 69 ||
[Analyze grammar]

devīyāmalaśāstre sā kathitā kālakarṣiṇī |
mahāḍāmarake yāge śrīparā mastake tathā || 70 ||
[Analyze grammar]

śrīpūrvaśāstre sā mātṛsadbhāvatvena varṇitā |
saṃghaṭṭe'smiṃścidātmatvādyattatpratyavamarśanam || 71 ||
[Analyze grammar]

icchāśaktiraghorāṇāṃ śaktīnāṃ sā parā prabhuḥ |
saiva prakṣubdharūpā cedīśitrī saṃprajāyate || 72 ||
[Analyze grammar]

tadā ghorāḥ parā devyo jātāḥ śaivādhvadaiśikāḥ |
svātmapratyavamarśo yaḥ prāgabhūdekavīrakaḥ || 73 ||
[Analyze grammar]

jñātavyaviśvonmeṣātmā jñānaśaktitayā sthitaḥ |
iyaṃ parāparā devī ghorāṃ yā mātṛmaṇḍalīm || 74 ||
[Analyze grammar]

sṛjatyavirataṃ śuddhāśuddhamārgaikadīpikām |
jñeyāṃśaḥ pronmiṣankṣobhaṃ yadaiti balavattvataḥ || 75 ||
[Analyze grammar]

ūnatābhāsanaṃ saṃvinmātratve jāyate tadā |
rūḍhaṃ tajjñeyavargasya sthitiprārambha ucyate || 76 ||
[Analyze grammar]

rūḍhireṣā vibodhābdheścitrākāraparigrahaḥ |
idaṃ tadbījasaṃdarbhabījaṃ cinvanti yoginaḥ || 77 ||
[Analyze grammar]

icchāśaktirdvirūpoktā kṣubhitākṣubhitā ca yā |
iṣyamāṇaṃ hi sā vastudvairūpyeṇātmani śrayet || 78 ||
[Analyze grammar]

aciradyutibhāsinyā śaktyā jvalanarūpayā |
iṣyamāṇasamāpattiḥ sthairyeṇātha dharātmanā || 79 ||
[Analyze grammar]

unmeṣaśaktāvastyetajjñeyaṃ yadyapi bhūyasā |
tathāpi vibhavasthānaṃ sā na tu prācyajanmabhūḥ || 80 ||
[Analyze grammar]

icchāśakterataḥ prāhuścātūrūpyaṃ parāmṛtam |
kṣobhāntarasyāsadbhāvānnedaṃ bījaṃ ca kasyacit || 81 ||
[Analyze grammar]

prakṣobhakatvaṃ bījatvaṃ kṣobhādhāraśca yonitā |
kṣobhakaṃ saṃvido rūpaṃ kṣubhyati kṣobhayatyapi || 82 ||
[Analyze grammar]

kṣobhaḥ syājjñeyadharmatvaṃ kṣobhaṇā tadbahiṣkṛtiḥ |
antaḥsthaviśvābhinnaikabījāṃśavisisṛkṣutā || 83 ||
[Analyze grammar]

kṣobho'tadicche tattvecchābhāsanaṃ kṣobhaṇāṃ viduḥ |
yadaikyāpattimāsādya tadicchā kṛtinī bhavet || 84 ||
[Analyze grammar]

kṣobhādhāramimaṃ prāhuḥ śrīsomānandaputrakāḥ |
saṃvidāmīṣaṇādīnāmanudbhinnaviśeṣakam || 85 ||
[Analyze grammar]

yajjñeyamātraṃ tadbījaṃ yadyogādbījatā svare |
tasya bījasya saivoktā visisṛkṣā ya udbhavaḥ |
yato grāhyamidaṃ bhāsyadbhinnakalpaṃ cidātmanaḥ || 86 ||
[Analyze grammar]

eṣa kṣobhaḥ kṣobhaṇā tu tūṣṇīṃbhūtānyamātṛgam |
haṭhādyadaudāsīnyāṃśacyāvanaṃ saṃvido balāt || 87 ||
[Analyze grammar]

jātāpi visisṛkṣāsau yadvimarśāntaraikyataḥ |
kṛtārthā jāyate kṣobhādhāro'traitatprakīrtitam || 88 ||
[Analyze grammar]

tatastadāntaraṃ jñeyaṃ bhinnakalpatvamicchati |
viśvabījādataḥ sarva bāhyaṃ bimbaṃ vivartsyati || 89 ||
[Analyze grammar]

kṣobhyakṣobhakabhāvasya satattvaṃ darśitaṃ mayā |
śrīmanmaheśvareṇoktaṃ guruṇā yatprasādataḥ || 90 ||
[Analyze grammar]

prakṛtaṃ brūmahe nedaṃ bījaṃ varṇacatuṣṭayam |
nāpi yoniryato naitatkṣobhādhāratvamṛcchati || 91 ||
[Analyze grammar]

ātmanyeva ca viśrāntyā tatproktamamṛtātmakam |
itthaṃ prāguditaṃ yattatpañcakaṃ tatparasparam || 92 ||
[Analyze grammar]

ucchaladvividhākāramanyonyavyatimiśraṇāt |
yo'nuttaraḥ paraḥ spando yaścānandaḥ samucchalan || 93 ||
[Analyze grammar]

tāvicchonmeṣasaṃghaṭṭādgacchato'tivicitratām |
anuttarānandacitī icchāśaktau niyojite || 94 ||
[Analyze grammar]

trikoṇamiti tatprāhurvisargāmodasundaram |
anuttarānandaśaktī tatra rūḍhimupāgate || 95 ||
[Analyze grammar]

trikoṇadvitvayogena vrajataḥ ṣaḍarasthitim |
ta evonmeṣayoge'pi punastanmayatāṃ gate || 96 ||
[Analyze grammar]

kriyāśakteḥ sphuṭaṃ rūpamabhivyaṅktaḥ parasparam |
icchonmeṣagataḥ kṣobho yaḥ proktastadgaterapi || 97 ||
[Analyze grammar]

te eva śaktī tādrūpyabhāginyau nānyathāsthite |
nanvanuttaratānandau svātmanā bhedavarjitau || 98 ||
[Analyze grammar]

kathametāvatīmenāṃ vaicitrīṃ svātmani śritau |
śṛṇu tāvadayaṃ saṃvinnātho'parimitātmakaḥ || 99 ||
[Analyze grammar]

anantaśaktivaicitryalayodayakaleśvaraḥ |
asthāsyadekarūpeṇa vapuṣā cenmaheśvaraḥ || 100 ||
[Analyze grammar]

maheśvaratvaṃ saṃvittvaṃ tadatyakṣyaddhaṭādivat |
paricchinnaprakāśatvaṃ jaḍasya kila lakṣaṇam || 101 ||
[Analyze grammar]

jaḍādvilakṣaṇo bodho yato na parimīyate |
tena bodhamahasindhorullāsinyaḥ svaśaktayaḥ || 102 ||
[Analyze grammar]

āśrayantyūrmaya iva svātmasaṃghaṭṭacitratām |
svātmasaṃghaṭṭavaicitryaṃ śaktīnāṃ yatparasparam || 103 ||
[Analyze grammar]

etadeva paraṃ prāhuḥ kriyāśakteḥ sphuṭaṃ vapuḥ |
asmiṃścaturdaśe dhāmni sphuṭībhūtatriśaktike || 104 ||
[Analyze grammar]

triśūlatvamataḥ prāha śāstā śrīpūrvaśāsane |
nirañjanamidaṃ coktaṃ gurubhistattvadarśibhiḥ || 105 ||
[Analyze grammar]

śaktimānañjyate yasmānna śaktirjātu kenacit |
icchā jñānaṃ kriyā ceti yatpṛthakpṛthagañjyate || 106 ||
[Analyze grammar]

tadeva śaktimatsvaiḥ svairiṣyamāṇādikaiḥ sphuṭam |
etattritayamaikyena yadā tu prasphurettadā || 107 ||
[Analyze grammar]

na kenacidupādheyaṃ svasvavipratiṣedhataḥ |
lolībhūtamataḥ śaktitritayaṃ tattriśūlakam |
yasminnāśu samāveśādbhavedyogī nirañjanaḥ || 108 ||
[Analyze grammar]

itthaṃ parāmṛtapadādārabhyāṣṭakamīdṛśam |
brāhmyādirūpasaṃbhedādyātyaṣṭāṣṭakatāṃ sphuṭam || 109 ||
[Analyze grammar]

atrānuttaraśaktiḥ sā svaṃ vapuḥ prakaṭasthitam |
kurvantyapi jñeyakalākāluṣyādvindurūpiṇī || 110 ||
[Analyze grammar]

uditāyāṃ kriyāśaktau somasūryāgnidhāmani |
avibhāgaḥ prakāśo yaḥ sa binduḥ paramo hi naḥ || 111 ||
[Analyze grammar]

tattvarakṣāvidhāne ca taduktaṃ parameśinā |
hṛtpadmamaṇḍalāntaḥstho naraśaktiśivātmakaḥ || 112 ||
[Analyze grammar]

boddhavyo layabhedena vindurvimalatārakaḥ |
yo'sau nādātmakaḥ śabdaḥ sarvaprāṇiṣvavasthitaḥ || 113 ||
[Analyze grammar]

adha ūrdhvavibhāgena niṣkriyeṇāvatiṣṭhate |
hlādataikṣṇyādi vaicitryaṃ sitaraktādikaṃ ca yat || 114 ||
[Analyze grammar]

svayaṃ tannirapekṣo'sau prakāśo gururāha ca |
yanna sūryo na vā somo nāgnirbhāsayate'pi ca || 115 ||
[Analyze grammar]

na cārkasomavahnīnāṃ tatprakāśādvinā mahaḥ |
kimapyasti nijaṃ kiṃ tu saṃviditthaṃ prakāśate || 116 ||
[Analyze grammar]

svasvātantryaprabhāvodyadvicitropādhisaṃgataḥ |
prakāśo yāti taikṣṇyādimavāntaravicitratām || 117 ||
[Analyze grammar]

durdarśano'pi gharmāṃśuḥ patitaḥ pāthasāṃ pathi |
netrānandatvamabhyeti paśyopādheḥ prabhāvitām || 118 ||
[Analyze grammar]

sūryādiṣu prakāśo'sāvupādhikaluṣīkṛtaḥ |
saṃvitprakāśaṃ māheśamata eva hyapekṣate || 119 ||
[Analyze grammar]

prakāśamātraṃ suvyaktaṃ sūrya ityucyate sphuṭam |
prakāśyavastusārāṃśavarṣi tatsoma ucyate || 120 ||
[Analyze grammar]

sūrya pramāṇamityāhuḥ somaṃ meyaṃ pracakṣate |
anyonyamaviyuktau tau svatantrāvapyubhau sthitau || 121 ||
[Analyze grammar]

bhoktṛbhogyobhayātmaitadanyonyonmukhatāṃ gatam |
tato jvalanacidrūpaṃ citrabhānuḥ prakīrtitaḥ || 122 ||
[Analyze grammar]

yo'yaṃ vahneḥ paraṃ tattvaṃ pramāturidameva tat |
saṃvideva tu vijñeyatādātmyādanapekṣiṇī || 123 ||
[Analyze grammar]

svatantratvātpramātoktā vicitro jñeyabhedataḥ |
somāṃśadāhyavastūtthavaicitryābhāsabṛṃhitaḥ || 124 ||
[Analyze grammar]

tata evāgniruditaścitrabhānurmaheśinā |
jñeyādyupāyasaṃghātanirapekṣaiva saṃvidaḥ || 125 ||
[Analyze grammar]

sthitirmātāhamasmīti jñātā śāstrajñavadyataḥ |
ajña eva yato jñātānubhavātmā na rūpataḥ || 126 ||
[Analyze grammar]

na tu sā jñātṛtā yasyāṃ śuddhajñeyādyapekṣate |
tasyāṃ daśāyāṃ jñātṛtvamucyate yogyatāvaśāt || 127 ||
[Analyze grammar]

mānataiva tu sā prācyapramātṛparikalpitā |
ucchalantyapi saṃvittiḥ kālakramavivarjanāt || 128 ||
[Analyze grammar]

uditaiva satī pūrṇā mātṛmeyādirūpiṇī |
pākādistu kriyā kālaparicchedātkramocitā || 129 ||
[Analyze grammar]

matāntyakṣaṇavandhyāpi na pākatvaṃ prapadyate |
itthaṃ prakāśatattvasya somasūryāgnitā sthitā || 130 ||
[Analyze grammar]

api mukhyaṃ tatprakāśamātratvaṃ na vyapohyate |
eṣāṃ yatprathamaṃ rūpaṃ hrasvaṃ tatsūrya ucyate || 131 ||
[Analyze grammar]

kṣobhānandavaśāddīrghaviśrāntyā soma ucyate |
yattatparaṃ plutaṃ nāma somānandātparaṃ sthitam || 132 ||
[Analyze grammar]

prakāśarūpaṃ tatprāhurāgneyaṃ śāstrakovidāḥ |
atra prakāśamātraṃ yatsthite dhāmatraye sati || 133 ||
[Analyze grammar]

uktaṃ vindutayā śāstre śivavindurasau mataḥ |
makārādanya evāyaṃ tacchāyāmātradhṛdyathā || 134 ||
[Analyze grammar]

ralahāḥ ṣaṇṭhavaisargavarṇarūpatvasaṃsthitāḥ |
ikāra eva rephāṃśacchāyayānyo yathā svaraḥ || 135 ||
[Analyze grammar]

tathaiva mahaleśādaḥ so'nyo dvedhāsvaro'pi san |
asyāntarvisisṛkṣāsau yā proktā kaulikī parā || 136 ||
[Analyze grammar]

saiva kṣobhavaśādeti visargātmakatāṃ dhruvam |
uktaṃ ca triśiraḥśāstre kalāvyāptyantacarcane || 137 ||
[Analyze grammar]

kalā saptadaśī tasmādamṛtākārarūpiṇī |
parāparasvasvarūpabindugatyā visarpitā || 138 ||
[Analyze grammar]

prakāśyaṃ sarvavastūnāṃ visargarahitā tu sā |
śaktikuṇḍalikā caiva prāṇakuṇḍalikā tathā || 139 ||
[Analyze grammar]

visargaprāntadeśe tu parā kuṇḍalinīti ca |
śivavyometi paramaṃ brahmātmasthānamucyate || 140 ||
[Analyze grammar]

visargamātraṃ nāthasya sṛṣṭisaṃhāravibhramāḥ |
svātmanaḥ svātmani svātmakṣepo vaisargikī sthitiḥ || 141 ||
[Analyze grammar]

visarga evamutsṛṣṭa āśyānatvamupāgataḥ |
haṃsaḥ prāṇo vyañjanaṃ ca sparśaśca paribhāṣyate || 142 ||
[Analyze grammar]

anuttaraṃ paraṃ dhāma tadevākulamucyate |
visargastasya nāthasya kaulikī śaktirucyate || 143 ||
[Analyze grammar]

visargatā ca saivāsyā yadānandodayakramāt |
spaṣṭībhūtakriyāśaktiparyantā procchalatsthitiḥ || 144 ||
[Analyze grammar]

visarga eva tāvānyadākṣiptaitāvadātmakaḥ |
iyadrūpaṃ sāgarasya yadanantormisaṃtatiḥ || 145 ||
[Analyze grammar]

ata eva visargo'yamavyaktahakalātmakaḥ |
kāmatattvamiti śrīmatkulaguhvara ucyate || 146 ||
[Analyze grammar]

yattadakṣaramavyakta kāntākaṇṭhe vyavasthitam |
dhvanirūpamanicchaṃ tu dhyānadhāraṇavarjitam || 147 ||
[Analyze grammar]

tatra cittaṃ samādhāya vaśayedyugapajjagat |
ata eva visargasya haṃse yadvatsphuṭā sthitiḥ || 148 ||
[Analyze grammar]

tadvatsānuttarādīnāṃ kādisāntatayā sthitiḥ |
anuttarātkavargasya sūtiḥ pañcātmanaḥ sphuṭam || 149 ||
[Analyze grammar]

pañcaśaktyātmatovaśa ekaikatra yathā sphuṭaḥ |
icchāśakteḥ svasvarūpasaṃsthāyā ekarūpataḥ || 150 ||
[Analyze grammar]

cavargaḥ pañcaśaktyātmā kramaprasphuṭatātmakaḥ |
yā tūktā jñeyakāluṣyabhākkṣipracarayogataḥ || 151 ||
[Analyze grammar]

dvirūpāyāstato jātaṃ ṭa-tādyaṃ vargayugmakam |
unmeṣātpādivargastu yato viśvaṃ samāpyate || 152 ||
[Analyze grammar]

jñeyarūpamidaṃ pañcaviṃśatyantaṃ yataḥ sphuṭam |
jñeyatvātsphuṭataḥ proktametāvatsparśarūpakam || 153 ||
[Analyze grammar]

icchāśaktiśca yā dvedhā kṣubhitākṣubhitatvataḥ |
sā vijātīyaśaktyaṃśapronmukhī yāti yātmatām || 154 ||
[Analyze grammar]

saiva śīghrataropāttajñeyakāluṣyarūṣitā |
vijātīyonmukhatvena ratvaṃ latvaṃ ca gacchati || 155 ||
[Analyze grammar]

tadvadunmeṣaśaktirdvirūpā vaijātyaśaktigā |
vakāratvaṃ prapadyeta sṛṣṭisārapravarṣakam || 156 ||
[Analyze grammar]

icchaivānuttarānandayātā śīghratvayogataḥ |
vāyurityucyate vahnirbhāsanātsthairyato dharā || 157 ||
[Analyze grammar]

idaṃ catuṣkamantaḥsthamata eva nigadyate |
icchādyantargatatvena svasamāptau ca saṃsthiteḥ || 158 ||
[Analyze grammar]

sajātīyakaśaktīnāmicchādyānāṃ ca yojanam |
kṣobhātmakamidaṃ prāhuḥ kṣobhākṣobhātmanāmapi || 159 ||
[Analyze grammar]

anuttarasya sājātye bhavettu dvitayī gatiḥ |
anuttaraṃ yattatraikaṃ taccedānandasūtaye || 160 ||
[Analyze grammar]

prabhaviṣyati tadyoge yogaḥ kṣobhātmakaḥ sphuṭaḥ |
atrāpyanuttaraṃ dhāma dvitīyamapi sūtaye || 161 ||
[Analyze grammar]

na paryāptaṃ tadā kṣobhaṃ vinaivānuttarātmatā |
icchā yā karmaṇā hīnā yā caiṣṭavyena rūṣitā || 162 ||
[Analyze grammar]

śīghrasthairyaprabhinnena tridhā bhāvamupāgatā |
anunmiṣitamunmīlatpronmīlitamiti sthitam || 163 ||
[Analyze grammar]

iṣyamāṇaṃ tridhaitasyāṃ tādrūpyasyāparicyuteḥ |
tadeva svoṣmaṇā svātmasvātantryapreraṇātmanā || 164 ||
[Analyze grammar]

bahirbhāvya sphuṭaṃ kṣiptaṃ śa-ṣa-satritayaṃ sthitam |
tata eva sakāre'sminsphuṭaṃ viśvaṃ prakāśate || 165 ||
[Analyze grammar]

amṛtaṃ ca paraṃ dhāma yoginastatpracakṣate |
kṣobhādyantavirāmeṣu tadeva ca parāmṛtam || 166 ||
[Analyze grammar]

sītkārasukhasadbhāvasamāveśasamādhiṣu |
tadeva brahma paramamavibhaktaṃ pracakṣate || 167 ||
[Analyze grammar]

uvāca bhagavāneva tacchrīmatkulaguhkare |
śaktiśaktimadaikātmyalabdhānvarthābhidhānake || 168 ||
[Analyze grammar]

kākacañcupuṭākāraṃ dhyānadhāraṇavarjitam |
viṣatattvamanackākhyaṃ tava snehātprakāśitam || 169 ||
[Analyze grammar]

kāmasya pūrṇatā tattvaṃ saṃghaṭṭe pravibhāvyate |
viṣasya cāmṛtaṃ tattvaṃ chādyatve'ṇoścyute sati || 170 ||
[Analyze grammar]

vyāptrī śaktirviṣaṃ yasmādavyāptuśchādayenmahaḥ |
nirañjanaṃ paraṃ dhāma tattvaṃ tasya tu sāñjanam || 171 ||
[Analyze grammar]

kriyāśaktyātmakaṃ viśvamayaṃ tasmātsphuredyataḥ |
icchā kāmo viṣaṃ jñānaṃ kriyā devī nirañjanam || 172 ||
[Analyze grammar]

etattrayasamāveśaḥ śivo bhairava ucyate |
atra rūḍhiṃ sadā kuryāditi no guravo jaguḥ || 173 ||
[Analyze grammar]

viṣatattve saṃpraviśya na bhūtaṃ na viṣaṃ na ca |
grahaḥ kevala evāhamiti bhāvanayā sphuret || 174 ||
[Analyze grammar]

nanvatra ṣaṇṭhavarṇebhyo janmoktaṃ tena ṣaṇṭhatā |
kathaṃ syāditi cedbrūmo nātra ṣaṇṭhasya sotṛtā || 175 ||
[Analyze grammar]

tathāhi tatragā yāsāvicchāśaktirudīritā |
saiva sūte svakartavyamantaḥsthaṃ sveṣṭarūpakam || 176 ||
[Analyze grammar]

yattvatra rūṣaṇāhetureṣitavyaṃ sthitaṃ tataḥ |
bhāgānna prasavastajjaṃ kāluṣyaṃ tadvapuśca tat || 177 ||
[Analyze grammar]

jñeyārūṣaṇayā yuktaṃ samudāyātmakaṃ viduḥ |
ṣaṇṭhaṃ kṣobhakatākṣobhadhāmatvābhāvayogataḥ || 178 ||
[Analyze grammar]

etadvarṇacatuṣkasya svoṣmaṇābhāsanāvaśāt |
ūṣmeti kathitaṃ nāma bhairaveṇāmalātmanā || 179 ||
[Analyze grammar]

kādi-hāntamidaṃ prahuḥ kṣobhādhāratayā budhāḥ |
yonirūpeṇa tasyāpi yoge kṣobhāntaraṃ vrajet || 180 ||
[Analyze grammar]

tannidarśanayogena pañcāśattamavarṇatā |
pañcaviṃśakasaṃjñeyaprāgvadbhūmisusaṃsthitam || 181 ||
[Analyze grammar]

catuṣkaṃ ca catuṣkaṃ ca bhedābhedagataṃ kramāt |
ādyaṃ catuṣkaṃ saṃvitterbhedasaṃdhānakovidam || 182 ||
[Analyze grammar]

bhedasyābhedarūḍhyekaheturanyaccatuṣṭayam |
itthaṃ yadvarṇajātaṃ tatsarva svaramayaṃ purā || 183 ||
[Analyze grammar]

vyaktiyogādvyañjanaṃ tatsvaraprāṇaṃ yataḥ kila |
svarāṇāṃ ṣaṭkameveha mūlaṃ syādvarṇasaṃtatau || 184 ||
[Analyze grammar]

ṣaḍdevatāstu tā eva ye mukhyāḥ sūryaraśmayaḥ |
saurāṇāmeva raśmīnāmantaścāndrakalā yataḥ || 185 ||
[Analyze grammar]

ato'tra dīrghatritayaṃ sphuṭaṃ cāndramasaṃ vapuḥ |
candraśca nāma naivānyo bhogyaṃ bhoktuśca nāparam || 186 ||
[Analyze grammar]

bhoktaiva bhogyabhāvena dvaividhyātsaṃvyavasthitaḥ |
ghaṭasya na hi bhogyatvaṃ svaṃ vapurmātṛgaṃ hi tat || 187 ||
[Analyze grammar]

ato mātari yā rūḍhiḥ sāsya bhogyatvamucyate |
anuttaraṃ parāmṛśyaparāmarśakabhāvataḥ || 188 ||
[Analyze grammar]

saṃghaṭṭarūpatāṃ prāptaṃ bhogyamicchādikaṃ tathā |
anuttarānandabhuvāmicchādye bhogyatāṃ gate || 189 ||
[Analyze grammar]

saṃdhyakṣarāṇāmudayo bhoktṛrūpaṃ ca kathyate |
anuttarānandamayo devo bhoktaiva kathyate || 190 ||
[Analyze grammar]

icchādikaṃ bhogyameva tata evāsya śaktitā |
bhogyaṃ bhoktari līnaṃ ced bhoktā tadvastutaḥ sphuṭaḥ || 191 ||
[Analyze grammar]

ataḥ ṣaṇṇāṃ trikaṃ sāraṃ cidiṣyunmeṣaṇātmakam |
tadeva tritayaṃ prāhurbhairavasya paraṃ mahaḥ || 192 ||
[Analyze grammar]

tattrikaṃ parameśasya pūrṇā śaktiḥ pragīyate |
tenākṣiptaṃ yato viśvamato'sminsamupāsite || 193 ||
[Analyze grammar]

viśvaśaktāvavacchedavandhye jātamupāsanam |
ityeṣa mahimaitāvāniti tāvanna śakyate || 194 ||
[Analyze grammar]

aparicchinnaśakteḥ kaḥ kuryācchaktiparicchidām |
tasmādanuttaro devaḥ svācchandyānuttaratvataḥ || 195 ||
[Analyze grammar]

visargaśaktiyuktatvātsaṃpanno viśvarūpakaḥ |
evaṃ pañcāśadāmarśapūrṇaśaktirmaheśvaraḥ || 196 ||
[Analyze grammar]

vimarśātmaika evānyāḥ śaktayo'traiva niṣṭhitāḥ |
ekāśītipadā devī hyatrāntarbhāvayiṣyate || 197 ||
[Analyze grammar]

ekāmarśasvabhāvatve śabdarāśiḥ sa bhairavaḥ |
āmṛśyacchāyayā yogātsaiva śaktiśca mātṛkā || 198 ||
[Analyze grammar]

sā śabdarāśisaṃghaṭṭādbhinnayonistu mālinī |
prāgvannavatayāmarśātpṛthagvargasvarūpiṇī || 199 ||
[Analyze grammar]

ekaikāmarśarūḍhau tu saiva pañcāśadātmikā |
itthaṃ nādānuvedhena parāmarśasvabhāvakaḥ || 200 ||
[Analyze grammar]

śivo mātāpitṛtvena kartā viśvatra saṃsthitaḥ |
visarga eva śākto'yaṃ śivabindutayā punaḥ || 201 ||
[Analyze grammar]

garbhīkṛtānantaviśvaḥ śrayate'nuttarātmatām |
aparicchinnaviśvāntaḥsāre svātmani yaḥ prabhoḥ || 202 ||
[Analyze grammar]

parāmarśaḥ sa evokto dvayasaṃpattilakṣaṇaḥ |
anuttaravisargātmaśivaśaktyadvayātmani || 203 ||
[Analyze grammar]

parāmarśo nirbharatvādahamityucyate vibhoḥ |
anuttarādyā prasṛtirhāntā śaktisvarūpiṇī || 204 ||
[Analyze grammar]

pratyāhṛtāśeṣaviśvānuttare sā nilīyate |
tadidaṃ viśvamantaḥsthaṃ śaktau sānuttare pare || 205 ||
[Analyze grammar]

tattasyāmiti yatsatyaṃ vibhunā saṃpuṭīkṛtiḥ |
tena śrītrīśikāśāstre śakteḥ saṃpuṭitākṛtiḥ || 206 ||
[Analyze grammar]

saṃvittau bhāti yadviśvaṃ tatrāpi khalu saṃvidā |
tadetattritayaṃ dvandvayogātsaṃghātatāṃ gatam || 207 ||
[Analyze grammar]

ekameva paraṃ rūpaṃ bhairavasyāhamātmakam |
visargaśaktiryā śaṃbhoḥ setthaṃ sarvatra vartate || 208 ||
[Analyze grammar]

tata evasamasto'yamānandarasavibhramaḥ |
tathāhi madhure gīte sparśe vā candanādike || 209 ||
[Analyze grammar]

mādhyasthyavigame yāsau hṛdaye spandamānatā |
ānandaśaktiḥ saivoktā yataḥ sahṛdayo janaḥ || 210 ||
[Analyze grammar]

pūrva visṛjyasakalaṃ kartavyaṃ śūnyatānale |
cittaviśrāntisaṃjño'yamāṇavastadanantaram || 211 ||
[Analyze grammar]

dṛṣṭaśrutāditadvastupronmukhatvaṃ svasaṃvidi |
cittasaṃbodhanāmoktaḥ śāktollāsabharātmakaḥ || 212 ||
[Analyze grammar]

tatronmukhatvatadvastusaṃghaṭṭādvastuno hṛdi |
rūḍheḥ pūrṇatayāveśānmitacittalayācchive || 213 ||
[Analyze grammar]

prāgvadbhaviṣyadaunmukhyasaṃbhāvyamitatālayāt |
cittapralayanāmāsau visargaḥ śāmbhavaḥ paraḥ || 214 ||
[Analyze grammar]

tattvarakṣāvidhāne'to visargatraidhamucyate |
hṛtpadmakośamadhyasthastayoḥ saṃghaṭṭa iṣyate || 215 ||
[Analyze grammar]

visargo'ntaḥ sa ca proktaścittaviśrāntilakṣaṇaḥ |
dvitīyaḥ sa visargastu cittasaṃbodhalakṣaṇaḥ || 216 ||
[Analyze grammar]

ekībhūtaṃ vibhātyatra jagadetaccarācaram |
grāhyagrāhakabhedo vai kiṃcidatreṣyate yadā || 217 ||
[Analyze grammar]

tadāsau sakalaḥ prokto niṣkalaḥ śivayogataḥ |
grāhyagrāhakavicchittisaṃpūrṇagrahaṇātmakaḥ || 218 ||
[Analyze grammar]

tṛtīyaḥ sa visargastu cittapralayalakṣaṇaḥ |
ekībhāvātmakaḥ sūkṣmo vijñānātmātmanirvṛtaḥ || 219 ||
[Analyze grammar]

nirūpito'yamarthaḥ śrīsiddhayogīśvarīmate |
sātra kuṇḍalinī bījaṃ jīvabhūtā cidātmikā || 220 ||
[Analyze grammar]

tajjaṃ dhruvecchonmeṣākhyaṃ trikaṃ varṇāstataḥ punaḥ |
ā ityavarṇādityādiyāvadvaisargikī kalā || 221 ||
[Analyze grammar]

kakārādisakārāntā visargātpañcadhā sa ca |
bahiścāntaśca hṛdaye nāde'tha parame pade || 222 ||
[Analyze grammar]

bindurātmani mūrdhāntaṃ hṛdayādvyāpako hi saḥ |
ādimāntyavihīnāstu mantrāḥ syuḥ śaradabhravat || 223 ||
[Analyze grammar]

gurorlakṣaṇametāvadādimāntyaṃ ca vedayet |
pūjyaḥ so'hamiva jñānī bhairavo devatātmakaḥ || 224 ||
[Analyze grammar]

ślokagāthādi yatkiṃcidādimāntyayutaṃ tataḥ |
tasmādvidaṃstathā sarvaṃ mantratvenaiva paśyati || 225 ||
[Analyze grammar]

visargaśaktirviśvasya kāraṇaṃ ca nirūpitā |
aitareyākhyavedānte parameśena vistarāt || 226 ||
[Analyze grammar]

yallohitaṃ tadagniryadvīryaṃ sūryenduvigraham |
a iti brahma paramaṃ tatsaṃghaṭṭodayātmakam || 227 ||
[Analyze grammar]

tasyāpi ca paraṃ vīrya pañcabhūtakalātmakam |
bhogyatvenānnarūpaṃ ca śabdasparśarasātmakam || 228 ||
[Analyze grammar]

śabdo'pi madhuro yasmādvīryopacayakārakaḥ |
taddhi vīryaṃ paraṃ śuddhaṃ visisṛkṣātmakaṃ matam || 229 ||
[Analyze grammar]

tadbalaṃ ca tadojaśca te prāṇāḥ sā ca kāntatā |
tasmādvīryātprajāstāśca vīrya karmasu kathyate || 230 ||
[Analyze grammar]

yajñādikeṣu tadvṛṣṭau sauṣadhīṣvatha tāḥ punaḥ |
vīrye tacca prajāsvevaṃ visarge viśvarūpatā || 231 ||
[Analyze grammar]

śabdarāśiḥ sa evokto mātṛkā sāca kīrtitā |
kṣobhyakṣobhakatāveśānmālinīṃ tāṃ pracakṣate || 232 ||
[Analyze grammar]

bījayonisamāpattivisargodayasundarā |
mālinī hi parā śaktirnirṇītā viśvarūpiṇī || 233 ||
[Analyze grammar]

eṣā vastuta ekaiva parā kālasya karṣiṇī |
śaktimadbhedayogena yāmalatvaṃ prapadyate || 234 ||
[Analyze grammar]

tasya pratyavamarśo yaḥ paripūrṇo'hamātmakaḥ |
sa svātmani svatantratvādvibhāgamavabhāsayet || 235 ||
[Analyze grammar]

vibhāgābhāsane cāsya tridhā vapurudāhṛtam |
paśyantī madhyamā sthūlā vaikharītyabhiśabditam || 236 ||
[Analyze grammar]

tāsāmapi tridhā rūpaṃ sthūlasūkṣmaparatvataḥ |
tatra yā svarasandarbhasubhagā nādarūpiṇī || 237 ||
[Analyze grammar]

sā sthūlā khalu paśyantī varṇādyapravibhāgataḥ |
avibhāgaikarūpatvaṃ mādhuryaṃ śaktirucyate || 238 ||
[Analyze grammar]

sthānavāyvādigharṣotthā sphuṭataiva ca pāruṣī |
tadasyāṃ nādarūpāyāṃ saṃvitsavidhavṛttitaḥ || 239 ||
[Analyze grammar]

sājātyāntarma yībhūtirjhagityevopalabhyate |
yeṣāṃ na tanmayībhūtiste dehādinimajjanam || 240 ||
[Analyze grammar]

avidanto magnasaṃvinmānāstvahṛdayā iti |
yattucarmāvanaddhādi kiṃcittatraiṣa yo dhvaniḥ || 241 ||
[Analyze grammar]

sa sphuṭāsphuṭarūpatvānmadhyamā sthūlarūpiṇī |
madhyāyāścāvibhāgāṃśasadbhāva iti raktatā || 242 ||
[Analyze grammar]

avibhāgasvaramayī yatra syāttatsurañjakam |
avibhāgo hi nirvṛtyai dṛśyatāṃ tālapāṭhataḥ || 243 ||
[Analyze grammar]

kilāvyaktadhvanau tasminvādane parituṣyati |
yā tu sphuṭānāṃ varṇānāmutpattau kāraṇaṃ bhavet || 244 ||
[Analyze grammar]

sā sthūlā vaikharī yasyāḥ kāryaṃ vākyādi bhūyasā |
asminsthūlatraye yattadanusandhānamādivat || 245 ||
[Analyze grammar]

pṛthakpṛthaktattritayaṃ sūkṣmamityabhiśabdyate |
ṣaḍjaṃ karomi madhuraṃ vādayāmi bruve vacaḥ || 246 ||
[Analyze grammar]

pṛthagevānusandhānatrayaṃ saṃvedyate kila |
etasyāpi trayasyādyaṃ yadrupamanupādhimat || 247 ||
[Analyze grammar]

tatparaṃ tritayaṃ tatra śivaḥ paracidātmakaḥ |
vibhāgābhāsanāyāṃ ca mukhyāstisro'tra śaktayaḥ || 248 ||
[Analyze grammar]

anuttarā parecchā ca parāparatayā sthitā |
unmeṣaśaktirjñānākhyā tvapareti nigadyate || 249 ||
[Analyze grammar]

kṣobharūpātpunastāsāmuktāḥ ṣaṭ saṃvido'malāḥ |
āsāmeva samāveśātkriyāśaktitayoditāt || 250 ||
[Analyze grammar]

saṃvido dvādaśa proktā yāsu sarvaṃ samāpyate |
etāvaddevadevasya mukhyaṃ tacchakticakrakam || 251 ||
[Analyze grammar]

etāvatā devadevaḥ pūrṇaśaktiḥ sa bhairavaḥ |
parāmarśātmakatvena visargākṣepayogataḥ || 252 ||
[Analyze grammar]

iyattākalanājjñānāttāḥ proktāḥ kālikāḥ kvacit |
śrīsāraśāstre cāpyuktaṃ madhya ekākṣarāṃ parām || 253 ||
[Analyze grammar]

pūjayedbhairavātmākhyāṃ yoginīdvādaśāvṛtām |
tābhya eva catuḥṣaṣṭiparyantaṃ śakticakrakam || 254 ||
[Analyze grammar]

ekārataḥ samārabhya sahasrāraṃ pravartate |
tāsāṃ ca kṛtyabhedena nāmāni bahudhāgame || 255 ||
[Analyze grammar]

upāsāśca dvayādvaitavyāmiśrākārayogataḥ |
śrīmattraiśirame tacca kathitaṃ vistarādbahu || 256 ||
[Analyze grammar]

iha no likhitaṃ vyāsabhayāccānupayogataḥ |
tā eva nirmalāḥ śuddhā aghorāḥ parikīrtitāḥ || 257 ||
[Analyze grammar]

ghoraghoratarāṇāṃ tu sotṛtvācca tadātmikāḥ |
sṛṣṭau sthitau ca saṃhāre tadupādhitrayātyaye || 258 ||
[Analyze grammar]

tāsāmeva sthitaṃ rūpaṃ bahudhā pravibhajyate |
upādhyatītaṃ yadrūpaṃ taddvidhā guravo jaguḥ || 259 ||
[Analyze grammar]

anullāsādupādhīnāṃ yadvā praśamayogataḥ |
praśamaśca dvidhā śāntyā haṭhapākakrameṇa tu || 260 ||
[Analyze grammar]

alaṃ grāsarasākhyena satataṃ jvalanātmanā |
haṭhapākapraśamanaṃ yattṛtīyaṃ tadeva ca |
upadeśāya yujyeta bhedendhanavidāhakam || 261 ||
[Analyze grammar]

nijabodhajaṭharahutabhuji bhāvāḥ sarve samarpitā haṭhataḥ |
vijahati bhedavibhāgaṃ nijaśaktyā taṃ samindhānāḥ || 262 ||
[Analyze grammar]

haṭhapākena bhāvānāṃ rūpe bhinne vilāpite |
aśnantyamṛtasādbhūtaṃ viśvaṃ saṃvittidevatāḥ || 263 ||
[Analyze grammar]

tāstṛptāḥ svātmanaḥ pūrṇa hṛdayaikāntaśāyinam |
cidvyomabhairavaṃ devamabhedenādhiśerate || 264 ||
[Analyze grammar]

evaṃ kṛtyakriyāveśānnāmopāsābahutvataḥ |
āsāṃ bahuvidhaṃ rūpamabhede'pyavabhāsate || 265 ||
[Analyze grammar]

āsāmeva ca devīnāmāvāpodvāpayogataḥ |
ekadvitricatuṣpañcaṣaṭsaptāṣṭanavottaraiḥ || 266 ||
[Analyze grammar]

rudrārkānyakalāsenāprabhṛtirbhedavistaraḥ |
alamanyena bahunā prakṛte'tha niyujyate || 267 ||
[Analyze grammar]

saṃvidātmani viśvo'yaṃ bhāvavargaḥ prapañcavān |
pratibimbatayā bhāti yasya viśveśvaro hi saḥ || 268 ||
[Analyze grammar]

evamātmani yasyedṛgavikalpaḥ sadodayaḥ |
parāmarśaḥ sa evāsau śāṃbhavopāyamudritaḥ || 269 ||
[Analyze grammar]

pūrṇāhantāparāmarśo yo'syāyaṃ pravivecitaḥ |
mantramudrākriyopāsāstadanyā nātra kāścana || 270 ||
[Analyze grammar]

bhūyobhūyaḥ samāveśaṃ nirvikalpamimaṃ śritaḥ |
abhyeti bhairavībhāvaṃ jīvanmuktyaparābhidham || 271 ||
[Analyze grammar]

ita eva prabhṛtyeṣā jīvanmuktirvicāryate |
yatra sūtraṇayāpīyamupāyopeyakalpanā || 272 ||
[Analyze grammar]

prāktane tvāhnike kācidbhedasya kalanāpi no |
tenānupāye tasminko mucyate vā kathaṃ kutaḥ || 273 ||
[Analyze grammar]

nirvikalpe parāmarśe śāmbhavopāyanāmani |
pañcāśadbhedatāṃ pūrvasūtritāṃ yojayedbudhaḥ || 274 ||
[Analyze grammar]

dharāmevāvikalpena svātmani pratibimbitām |
paśyanbhairavatāṃ yāti jalādiṣvapyayaṃ vidhiḥ || 275 ||
[Analyze grammar]

yāvadante paraṃ tattvaṃ samastāvaraṇordhvagam |
vyāpi svatantraṃ sarvajñaṃ yacchivaṃ parikalpitam || 276 ||
[Analyze grammar]

tadapyakalpitodārasaṃviddarpaṇabimbitam |
paśyanvikalpavikalo bhairavībhavati svayam || 277 ||
[Analyze grammar]

yathā raktaṃ puraḥ paśyannirvikalpakasaṃvidā |
tattaddvāraniraṃśaikaghaṭasaṃvittisusthitaḥ || 278 ||
[Analyze grammar]

tadvaddharādikaikaikasaṃghātasamudāyataḥ |
parāmṛśansvamātmānaṃ pūrṇa evāvabhāsate || 279 ||
[Analyze grammar]

matta evoditamidaṃ mayyeva pratibimbitam |
madabhinnamidaṃ ceti tridhopāyaḥ sa śāmbhavaḥ || 280 ||
[Analyze grammar]

sṛṣṭeḥ sthiteḥ saṃhṛteśca tadetatsūtraṇaṃ kṛtam |
yatra sthitaṃ yataśceti tadāha spandaśāsane || 281 ||
[Analyze grammar]

etāvataiva hyaiśvarya saṃvidaḥ khyāpitaṃ param |
viśvātmakatvaṃ cetyanyallakṣaṇaṃ kiṃ nu kathyatām || 282 ||
[Analyze grammar]

svātmanyeva cidākāśe viśvamasmyavabhāsayan |
sraṣṭā viśvātmaka iti prathayā bhairavātmatā || 283 ||
[Analyze grammar]

ṣaḍadhvajātaṃ nikhilaṃ mayyeva pratibimbitam |
sthitikartāhamasmīti sphuṭeyaṃ viśvarūpatā || 284 ||
[Analyze grammar]

sadoditamahābodhajvālājaṭilatātmani |
viśvaṃ dravati mayyetaditi paśyanpraśāmyati || 285 ||
[Analyze grammar]

anantacitrasadgarbhasaṃsārasvapnasadmanaḥ |
ploṣakaḥ śiva evāhamityullāsī hutāśanaḥ || 286 ||
[Analyze grammar]

jagatsarvaṃ mattaḥ prabhavati vibhedena bahudhā tathāpyetadrūḍhaṃ mayi vigalite tvatra na paraḥ |
taditthaṃ yaḥ sṛṣṭisthitivilayabhekīkṛtivaśādanaṃśaṃ paśyetsa sphurati hi turīyaṃ padabhitaḥ || 287 ||
[Analyze grammar]

tadasminparamopāye śāmbhavādvaitaśālini |
ke'pyeva yānti viśvāsaṃ pasmeśena bhāvitāḥ || 288 ||
[Analyze grammar]

snānaṃ vrataṃ dehaśuddhirdhāraṇā mantrayojanā |
adhvaklṛptiryāgavidhirhomajapyasamādhayaḥ || 289 ||
[Analyze grammar]

ityādikalpanā kāpi nātra bhedena yujyate |
parānugrahakāritvamatrasthasya sphuṭaṃ sthitam || 290 ||
[Analyze grammar]

yadi tādṛganugrāhyo daiśikasyopasarpati |
athāsau tādṛśo na syādbhavabhaktyā ca bhāvitaḥ || 291 ||
[Analyze grammar]

taṃ cārādhayate bhāvitādṛśānugraheritaḥ |
tadā vicitraṃ dīkṣādividhiṃ śikṣeta koviṃdaḥ || 292 ||
[Analyze grammar]

bhāvinyo'pi hyupāsāstā straivāyānti niṣṭhitim |
etanmayatvaṃ paramaṃ prāpyaṃ nirvarṇyateśivam || 293 ||
[Analyze grammar]

iti kathitamidaṃ suvistaraṃ paramaṃ śāmbhavamātmavedanam || 294 ||
[Analyze grammar]