Chapter 230

pāṣāṇopakhyāne nirvāṇaṃ nāma sargaḥ |
triṃśaduttaradviśatatamaḥ sargaḥ |
rāmaḥ |
bandhamokṣajagadbuddhirna śūnyā nāpi sanmayī |
nāstameti na codeti kimapyādyamasau kila || 1 ||
[Analyze grammar]

upadiṣṭamidaṃ brahmaṃstvayā buddhamalaṃ mayā |
bhūyaḥ kathaya tṛptirhi śṛṇvato nāsti me'mṛtam || 2 ||
[Analyze grammar]

sargādisambhramadṛśaśśūnyatādidṛśastathā |
na kāścana vibho satyā asatyā na ca kāścana || 3 ||
[Analyze grammar]

evaṃ sthite tu yatsatyaṃ tatsarvaṃ buddhavānaham |
tathāpi bhūyo bodhāya sargānubhava ucyatām || 4 ||
[Analyze grammar]

vasiṣṭhaḥ |
yadidaṃ dṛśyate kiñcijjagatsthāvarajaṅgamam |
sarvaṃ sarvaprakārāḍhyaṃ deśakālakriyādimat || 5 ||
[Analyze grammar]

tasya nāśe mahānāśe mahāpralayanāmani |
brahmopendramarudrudramahendrapariṇāmini || 6 ||
[Analyze grammar]

śiṣyate śāntamatyacchaṃ kimapyajamanādimat |
yato vāco nivartante kimanyadavagamyate || 7 ||
[Analyze grammar]

sarṣapāpekṣayā meruryathātivitatākṛtiḥ |
tathākāśamapi sthūlaṃ śūnyaṃ sad yadapekṣayā || 8 ||
[Analyze grammar]

amāne'kalite somye'kāle'pariṇate ciram |
śānte tasminpare vyomanyādye hyanubhavātmani || 9 ||
[Analyze grammar]

asaṅkalpo mahāśānto dikkālairamitākṛtiḥ |
antarmahāṃścidākāśo vettīva paramāṇutām || 10 ||
[Analyze grammar]

asatyāmeva tāmantarbhāvayan svapnavatsvataḥ |
tataḥ sa brahmaśabdārthāṃ vetti cidrūpatāṃ tatām || 11 ||
[Analyze grammar]

vidbhāvo'nubhavatyantaścittvāccidaṇutāṃ nijām |
tāmeva paśyatīvātha tato draṣṭeva tiṣṭhati || 12 ||
[Analyze grammar]

yathā svapne mṛtiṃ paśyatyeka evātmanātmanaḥ |
mṛta eva mṛterdraṣṭā tathā cidaṇurātmani || 13 ||
[Analyze grammar]

tataścidbhāva eṣo'ntareka eva dvitāmiva |
paśyan kharūpa evāste draṣṭṛdṛśyamiva sthitaḥ || 14 ||
[Analyze grammar]

cidbhāvaśśūnya evātinirākāro'pyaṇuṃ tanum |
paśyandṛśyamivodeti draṣṭeva ca tadā dvitā || 15 ||
[Analyze grammar]

prakāśamaṇumātmānaṃ paśyaṃstadanubhāvataḥ |
ucchūnatāṃ cetayate bījamaṅkuratāmiva || 16 ||
[Analyze grammar]

deśakālakriyādravyadraṣṭṛdarśanadṛgdṛśaḥ |
arthāntarasvabhāvena tiṣṭhantyanuditābhidhāḥ || 17 ||
[Analyze grammar]

cidaṇuryatra bhāto'sau deśo mitimupāgataḥ |
yadā bhātastadā kālo yadbhānaṃ sā kriyā smṛtā || 18 ||
[Analyze grammar]

upalabdhaṃ vidurdravyaṃ draṣṭṛtātropalabdhṛtā |
ālokanaṃ darśanatā dṛgālokanakāraṇam || 19 ||
[Analyze grammar]

evamucchūnatā bhāti mitānantātha vā kramāt |
asatyaiva nabhasyeva nabhorūpaiva niṣpramā || 20 ||
[Analyze grammar]

cidaṇorbhāsanaṃ bhātaṃ tatpradeśena dehagam |
yena paśyati taccakṣustacchrotraṃ yena ca śrutiḥ || 21 ||
[Analyze grammar]

yena jighrati tadghrāṇaṃ yena spṛśati carma tat |
rasyate yena sā jihvā saṅgraho'kṣadṛśāmiti || 22 ||
[Analyze grammar]

cidaṇupratibhāse'ntaḥ prathamaṃ nāmavarjitam |
tanmātravṛndameteṣāmetadākāśarūpi tat || 23 ||
[Analyze grammar]

cidaṇupratibhākāśapiṇḍa ekaghanasthitiḥ |
anusandhānavivaśaścetatīndriyapañcakam || 24 ||
[Analyze grammar]

evaṃ cidanusandhānaṃ dṛśyapoṣamupaityalam |
tadeva jñānamityuktaṃ buddhirityabhidhīyate || 25 ||
[Analyze grammar]

tato manastayā rūḍhamahaṅkārapadaṃ gatam |
deśakālapariccheda ityaṅgīkṛta ātmanā || 26 ||
[Analyze grammar]

cidaṇorasya bhāvasya pratyagraṃ yatra vedanam |
sa tatrottarakālena pūrvābhikhyāṃ kariṣyati || 27 ||
[Analyze grammar]

anyasminnekadeśe'sāv ūrdhvābhikhyāṃ kariṣyati |
evaṃ digabhidhānādi kalpayiṣyati sa kramāt || 28 ||
[Analyze grammar]

deśakālakriyādravyaśabdānāmarthavedanam |
bhaviṣyati svayamasāvākāśaviśado'pi san || 29 ||
[Analyze grammar]

itthaṃ svānubhavenaiṣa vyomnyeva vyomarūpadhṛt |
ātivāhikanāmāntardehaḥ sampadyate citaḥ || 30 ||
[Analyze grammar]

eṣa eva ciraṃ kālaṃ tatra bhāvanayā tayā |
gṛhṇāti niścayaṃ pūrṇamādhibhautikamātmanaḥ || 31 ||
[Analyze grammar]

vyomnā vyomnyeva racito nirmaleneti vibhramaḥ |
asatāsatsamāstīrṇaṃ tāpanadyā jalaṃ yathā || 32 ||
[Analyze grammar]

saṅkalpanāmupādatte svadehe gaganākṛtiḥ |
śiraśśabdārthadāṃ kāñcitpādaśabdārthadāṃ kvacit || 33 ||
[Analyze grammar]

uraḥpārśvādiśabdārthamayīṃ kvacidanābilām |
bhāvābhāvagrahotsargaśabdādyarthamayīmapi || 34 ||
[Analyze grammar]

niyatākārakalanāṃ deśakālādiyantritām |
viṣayonmukhatāṃ yātāmindriyavrātavedhitām || 35 ||
[Analyze grammar]

so'ṇuḥ paśyatyathākāramātmanaḥ svātmakalpitam |
hastapādādikalitaṃ cittādikalanānvitam || 36 ||
[Analyze grammar]

evaṃ sampadyate brahmā tathā sampadyate hariḥ |
evaṃ sampadyate rudra evaṃ sampadyate krimiḥ || 37 ||
[Analyze grammar]

na ca kiñcana sampannaṃ yathāsthitamavasthitam |
śūnyaṃ śūnye vilasitaṃ jñaptau jñaptirvijṛmbhitā || 38 ||
[Analyze grammar]

praticchandaśśarīrāṇāṃ bījaṃ trailokyavīrudhām |
sargārgaḍaprado mukteḥ saṃsārāsāravāridaḥ || 39 ||
[Analyze grammar]

kāraṇaṃ sarvakāryāṇāṃ netā kālakriyādiṣu |
sa cādyaḥ puruṣaḥ svairamityanutthita utthitaḥ || 40 ||
[Analyze grammar]

nāsya bhūtamayo deho nāsyāsthīni śarīrake |
avaṣṭabdhumasau muṣṭyā śakyate na ca kenacit || 41 ||
[Analyze grammar]

tenābdhimeghasaṅgrāmasiṃhagarjorjitātmanā |
api suptanareṇeva nūnaṃ maunavatā sthitam || 42 ||
[Analyze grammar]

jāgrataḥ svapnasandṛṣṭayodhārabhaṭavedanam |
yathā smṛtigataṃ nāsanna sattadvadasau sthitaḥ || 43 ||
[Analyze grammar]

bahuyojanalakṣaughapramāṇo'pi bṛhadvapuḥ |
paramāṇvantare māti lomāntassthajagattrayaḥ || 44 ||
[Analyze grammar]

kulaśailaguṇaughātmā bṛhadvṛndātmako'pi san |
tulāyāṃ dhānakāmātramapi nāpūrayatyajaḥ || 45 ||
[Analyze grammar]

jagatkoṭiśatābhogavistīrṇo'pyaṇumātrakam |
vastuto vyāptavāneṣa na deśaṃ svapnaśailavat || 46 ||
[Analyze grammar]

svayambhūreṣa kathito virāḍeṣa sa ucyate |
brahmāṇḍātmā jagaddeho vastutastu nabhomayaḥ || 47 ||
[Analyze grammar]

sanātana iti prokto rudra ityapi sañjñitaḥ |
indropendramarunmeghaśailajālādidehakaḥ || 48 ||
[Analyze grammar]

tejo'ṇumātraprathitaṃ cetitvā prathamaṃ vapuḥ |
krameṇa sphārasaṃvittirmahānahamiti sthitaḥ || 49 ||
[Analyze grammar]

spandasaṃvedanāttena spanda ityanubhūyate |
yaḥ sa evānilābhikhyo vātaskandhātmanā sthitaḥ || 50 ||
[Analyze grammar]

prāṇāpānaparispando vedanādanubhūyate |
tena yaḥ so'yamākāśe vātaskandha udāhṛtaḥ || 51 ||
[Analyze grammar]

cittvād ye kalpitāstena bāleneva piśācakāḥ |
tejaḥkaṇā asanto'pi ta ete dhiṣṇyatāṃ gatāḥ || 52 ||
[Analyze grammar]

prāṇāpānaparāvartadolā tadudaroditā |
vātaskandhābhidhāṃ dhatte jagattaddhṛdayaṃ bṛhat || 53 ||
[Analyze grammar]

praticchandaśśarīrāṇāṃ prathamaṃ bījameṣa saḥ |
jagadgatānāṃ sarveṣāmākalpavyavahāriṇām || 54 ||
[Analyze grammar]

praticchandād yadaitasmādutthitā jagadātmanaḥ |
dehāstadā yathā bāhyamantareṣāṃ tathā sthitam || 55 ||
[Analyze grammar]

citistasyādyabījasya pūrvameva yathoditā |
tathaivādyāpi jīve'ntastathodeti tadīhitā || 56 ||
[Analyze grammar]

śleṣmapittānilāstasya candrārkapavanāstrayaḥ |
grahā ṛkṣagaṇāstasya prāṇe ṣṭhīvanaśīkarāḥ || 57 ||
[Analyze grammar]

tasyāsthīnyadrijālāni medaso jālikā ghanāḥ |
śiraḥ pādau tvacaṃ dehātpaśyāmastasya no vayam || 58 ||
[Analyze grammar]

vapurvirājo jagadaṅga viddhi saṅkalparūpasya hi kalpanātma |
ākāśaśailāvanisāgarādi sarvaṃ cidākāśamataḥ praśāntam || 59 ||
[Analyze grammar]