Chapter 100

śikhidhvajaviśrāntirnāma sargaḥ |
śatatamaḥ sargaḥ |
vasiṣṭhaḥ |
iti brahmaṇi viśrāntimavāpya sa śikhidhvajaḥ |
muhūrtamāsītsaṃśāntamanā nirvāṇadīpavat || 1 ||
[Analyze grammar]

nirvikalpasamādhānapariṇatyāstamīyivān |
svalīlayeti kumbhena sa jhagityeva bodhitaḥ || 2 ||
[Analyze grammar]

kumbhaḥ |
rājannajñānanidrātaḥ prabuddho'si śivaḥ sthitaḥ |
kāryaṃ nāstamayeneto na cānastamayena te || 3 ||
[Analyze grammar]

sakṛdeva vibhātātmā tiṣṭhāniṣṭhapadātmakaḥ |
kalākalananirmukto jīvanmukto'ṅga sāmpratam || 4 ||
[Analyze grammar]

vasiṣṭhaḥ |
kumbhena bodhitastvevaṃ sa babhūva prabodhavān |
vinirgato rarājoccairmahāmohasamudgakāt || 5 ||
[Analyze grammar]

viśrāntadhīḥ kṣaṇenaiva paśyandṛśyasya vastunaḥ |
asattāmeva muktātmā līlayā samuvāca ha || 6 ||
[Analyze grammar]

śikhidhvajaḥ |
jñātaprāyamapīdaṃ tu yatpṛcchāmi taducyatām |
bhūyo nipuṇabodhāya mama mānada mohahan || 7 ||
[Analyze grammar]

śive śānte nirābhāse pare'nullaṅghitātmani |
draṣṭṛdarśanadṛśyākhyo viśvātmā pratyayaḥ kutaḥ || 8 ||
[Analyze grammar]

kumbhaḥ |
sādhu pṛṣṭaṃ mahārāja rājase bodhabhāsvatā |
etadeva hi te śiṣṭaṃ jñatāyāstadidaṃ śṛṇu || 9 ||
[Analyze grammar]

yadidaṃ dṛśyate kiñcijjagatsthāvarajaṅgamam |
sarvaṃ sarvaprakārāḍhyaṃ kalpānte tatpraṇaśyati || 10 ||
[Analyze grammar]

tataḥ stimitagambhīraṃ na tejo na tamastatam |
mahākalpavilāsānte satsāramavaśiṣyate || 11 ||
[Analyze grammar]

cinmātramamalaṃ kāntamābhātamamalaṃ nabhaḥ |
samastakalanonmuktaṃ yuktaṃ paramayā śriyā || 12 ||
[Analyze grammar]

yadekoditamatyacchaṃ śāntamātatamujjvalaṃ |
paramātmātmakaṃ tejaḥ stimitaṃ jñaptimātrakam || 13 ||
[Analyze grammar]

apratarkyamavijñeyaṃ samaṃ śivamaniṅganam |
brahma nirvāṇamāpūrṇamāghūrṇadiva sampadā || 14 ||
[Analyze grammar]

aṇīyasāmaṇīyastatsthaviṣṭhaṃ ca sthavīyasām |
garīyasāṃ gariṣṭhaṃ ca śreṣṭhaṃ ca śreyasāmapi || 15 ||
[Analyze grammar]

īdṛśaṃ tatparaṃ sūkṣmaṃ tasyāgre yadidaṃ nabhaḥ |
aṇoḥ pārśve mahāmeruriva sthūlātma lakṣyate || 16 ||
[Analyze grammar]

īdṛśaṃ tatparaṃ sthūlaṃ tasyāgre yadidaṃ jagat |
paramāṇuvadābhāti kvacideva na bhāti vā || 17 ||
[Analyze grammar]

īdṛśaṃ tadgariṣṭhaṃ ca jagadrājyaṃ yadakṣatam |
buddhvaitadamalaṃ śāntaṃ jarattṛṇalavāyate || 18 ||
[Analyze grammar]

īdṛśaṃ tatparaṃ śreyastasmin sati yadīśvare |
jagatpadārthasārthaśrīḥ svasattodeti vedanāt || 19 ||
[Analyze grammar]

tatsāramekameveha vidyate bhūpate tatam |
ekamekāntabuddhyāttaṃ naikamapyadvitāvaśāt || 20 ||
[Analyze grammar]

tasmāddvitīyā kalanā kācinnāma na vidyate |
ātmatattvamalaṃ bhātaṃ tadevāpūrṇamakṣatam || 21 ||
[Analyze grammar]

saṃsthitaṃ sarvadā sarvaṃ sarvākāramivoditam |
avācyatvādalabhyatvāttanna kāryaṃ na kāraṇam || 22 ||
[Analyze grammar]

pratyakṣāderagamyatvātkimapyekam taduttamam |
sarvaṃ sarvātmakaṃ sūkṣmamacchānubhavamātrakam || 23 ||
[Analyze grammar]

tasyānākhyasya rūpasya nirgatasya pramādṛśaḥ |
sato vāpyasato vāpi kathaṃ kāraṇatā bhavet || 24 ||
[Analyze grammar]

yadvai na kasyacidbījamanākhyatvānna kāraṇam |
na kiñcijjāyate tasmātpramāṇātigatātmanaḥ || 25 ||
[Analyze grammar]

akartṛkarmakaraṇaṃ satyaṃ cidghanamakṣatam |
ātmarūpamanābhāsaṃ svasaṃvedanalakṣaṇam || 26 ||
[Analyze grammar]

tasmānna jāyate kiñcitparasmādbrahmaṇo mune |
kathaṃ kila vadāvyakte syājjanyajanakakramaḥ || 27 ||
[Analyze grammar]

na kiñcijjāyate śānte na ca kiñcitpralīyate |
svasattayā sthitaṃ brahma na bījaṃ na ca kāraṇam || 28 ||
[Analyze grammar]

śuddhānubhavamātraṃ tattasmādanyanna vidyate |
kiñcijjagadahantādi tadevānantamasti hi || 29 ||
[Analyze grammar]

śikhidhvajaḥ |
śive jagadahantādi mune nāstīti vedmyaham |
sargavedanamābhāti kathametadvadāśu me || 30 ||
[Analyze grammar]

kumbhaḥ |
citsāraṃ tadanādyantaṃ tatsvasaṃvidi tiṣṭhati |
tattadbhavanamatyacchaṃ tattāmātraṃ jagadviduḥ || 31 ||
[Analyze grammar]

citsvātmakacanaṃ nāma yadasambhavacetyadṛk |
tadahaṃvedanaṃ viddhi virāḍātma jagatsthitam || 32 ||
[Analyze grammar]

vātasya vātaspandasya yathā bhedo na vidyate |
śūnyatvakhatvopamayościnmātrāhantvayostathā || 33 ||
[Analyze grammar]

jale'sti deśakālātte yathormyādi sakāraṇam |
pare'styadeśakālātte tathā jagadakāraṇam || 34 ||
[Analyze grammar]

śikhidhvajaḥ |
jalādau yattaraṅgādi tatsakāraṇamastviha |
pare jagadahantādi nākāraṇamavaimyaham || 35 ||
[Analyze grammar]

kumbhaḥ |
idānīṃ bhavatā jñātametatsatyaṃ mahīpate |
idaṃ jagadahantādi neha kiñcana vidyate || 36 ||
[Analyze grammar]

jagacchabdārtharahitaṃ jagadasti śivātmakam |
vyomnyeva nirmitaṃ śāntaṃ vyomnaḥ sūkṣmatareṇa vā || 37 ||
[Analyze grammar]

yathā nabhasi śūnyatvaṃ tathedaṃ brahmaṇi sthitam |
sadasadvasturūpeṇa na vā rūpeṇa kenacit || 38 ||
[Analyze grammar]

evaṃrūpaṃ jagadidaṃ samyagjñānācchivaṃ bhavet |
samyagjñānaprabhāveṇa viṣamapyamṛtaṃ bhavet || 39 ||
[Analyze grammar]

asamyagjñānamakhilaṃ jagadduḥkhapradaṃ param |
viṣabuddhyāmṛtamapi bhuktaṃ viṣarasāyate || 40 ||
[Analyze grammar]

īśvaratvād yathā vetti yad yadeṣa cidīśvaraḥ |
tattathaivāśu bhavati tādṛgrūpatayā śivam || 41 ||
[Analyze grammar]

yathā jvālābhramālā vā vicitrākāravibhramaiḥ |
tiṣṭhatyananyarūpaiva brahmasattā tathaiva hi || 42 ||
[Analyze grammar]

yatparaṃ citsvarūpeṇa sthitamātmani mantharam |
tattenedamahantādi jagadādyeva lakṣyate || 43 ||
[Analyze grammar]

kevalaṃ paramevetthaṃ paramaṃ bhāsate śivam |
kuto jagadahantādi praśna eveha nocitaḥ || 44 ||
[Analyze grammar]

yadvastu vidyamānaṃ satpraśnastatra virājate |
prekṣitaṃ yattu nāstyeva prekṣāpraśnena tatra kim || 45 ||
[Analyze grammar]

sanniveśaṃ vinā sattā yathā hemno na vidyate |
tathā jagadahambhāvaṃ vinā neśasya saṃsthitiḥ || 46 ||
[Analyze grammar]

akāraṇatvānnāstīdaṃ brahmaivetthaṃ vijṛmbhate |
ajṛmbhamāṇamevāhaṃjagattveneha saṃsthitam || 47 ||
[Analyze grammar]

yanmayā eva tenaiva mithaḥ sampreritāśayam |
camatkurvantyamī bhāvāḥ pañceṣu mithunaughavat || 48 ||
[Analyze grammar]

cinmātra eva cinmātraṃ cinmātreṇaiva cīyate |
nānātmanevānānaiva svātmanātmāpyanātmavat || 49 ||
[Analyze grammar]

pūrṇātpūrṇamuddharanti pūrṇātpūrṇāni cakrire |
bhavanti pūrṇātpūrṇāni pūrṇamevāvatiṣṭhate || 50 ||
[Analyze grammar]

cinmātrameva kacati yaccinmātratayātmani |
akacattveva tannāma kacitaṃ sargavedanam || 51 ||
[Analyze grammar]

ahaṃ citā cidevāsau bhavatīva svayaṃ svataḥ |
abhavantyeva rūpaṃ svamatyajantī nirāmayam || 52 ||
[Analyze grammar]

cito rūpamanādyantaṃ manorūpamanantakam |
samrāṭcharīramābhāsi bhavatīva svayambhuvaḥ || 53 ||
[Analyze grammar]

paśyatyathāsadevedaṃ svarūpatvātsadeva vā |
bhāvanādghanatāmeti dṛśyaṃ bhavati ca kramāt || 54 ||
[Analyze grammar]

śāntaṃ jagatprasararūpatayā svabhāvaśabdārthamuktamidamavyapadeśyamekam |
vastusthitaṃ nijacamatkaraṇāvalokarūpaṃ jagattvarahitānubhavātmatattvam || 55 ||
[Analyze grammar]