Chapter 84

vītahavyopākhyāna indriyānuśāsanayogopadeśo nāma sargaḥ |
caturaśītitamaḥ sargaḥ |
vasiṣṭhaḥ |
bhūyo munivaro dhīro dhiyā dhavalayeddhayā |
svamindriyagaṇaṃ guptaṃ bodhayāmāsa sādhvidam || 1 ||
[Analyze grammar]

tavendriyagaṇa svārthaṃ śṛṇu vakṣyāmyatisphuṭam |
śrutvā tadbhāvatāmetya parāṃ nirduḥkhatāṃ vraja || 2 ||
[Analyze grammar]

bhavatāmātmasattaikā duḥkhāyaivānapāyinī |
asatyāmātmanaḥ sattāṃ tadbhavantastyajantviti || 3 ||
[Analyze grammar]

madīyenopadeśena sattaiṣā bhavatāṃ kṣayam |
gataiveti sphuṭaṃ matto yūyaṃ hyajñānasambhavāḥ || 4 ||
[Analyze grammar]

svasattāsphuṭataivātiduḥkhāya tava cittaka |
taptakvāthe jatūllāso dāhāyaiva svapārśvayoḥ || 5 ||
[Analyze grammar]

paśya tvayi sati bhrātarjaḍakallolasaṅkulāḥ |
viśanti kālajaladhiṃ saṃsārasaritāṃ gaṇāḥ || 6 ||
[Analyze grammar]

patantyahamahamikāvihitānyo'nyavellanāḥ |
kuto'pi duḥkhāvalayo dhārā āsāragā iva || 7 ||
[Analyze grammar]

parisphuratyaparyantā hṛdayonmūlanodyatā |
ākrandakāriṇī krūrā bhāvābhāvaviṣūcikā || 8 ||
[Analyze grammar]

kāsaśvāsaraṇadbhṛṅge kalevarajaraddrume |
vikasatyamaloddyotā jarāmaraṇamañjarī || 9 ||
[Analyze grammar]

kallolavyālavalite śarīraśvabhrakoṭare |
khanatīhānakhī khātaṃ cintācapalagargaṭī || 10 ||
[Analyze grammar]

lobhalaṭvā laṭatpakṣā tīkṣṇayā dvandvatuṇḍayā |
kāyajīrṇadrumādasmādguṇapadmāni kṛntati || 11 ||
[Analyze grammar]

hṛdayāvakaraṃ kīrṇamitaścetaśca karkaśaḥ |
apavitroddhurākāraḥ kurute kāmakukkuṭaḥ || 12 ||
[Analyze grammar]

mahatyāṃ mohayāminyāmulbaṇo'jñānakauśikaḥ |
śmaśāna iva vetālaḥ parivalgati hṛddrume || 13 ||
[Analyze grammar]

etāścānyāśca bahvyo'pi tvayīndriyagaṇe sati |
piśācā iva śarvaryāṃ pravalgantyaśubhaśriyaḥ || 14 ||
[Analyze grammar]

tvayi tvasati he sādho sarvā eva śubhaśriyaḥ |
prabhāta iva padminyaḥ sālokaṃ vikasantyalam || 15 ||
[Analyze grammar]

praśāntamohamihikaṃ rājate hṛdayāmbaram |
nirmalālokavalitaṃ nīrajaskaṃ tatāntaram || 16 ||
[Analyze grammar]

aśaṅkitaṃ nabhaḥkośapatitopalapūravat |
nāpatanti vikalpaughāściraṃ vaikalyakāriṇaḥ || 17 ||
[Analyze grammar]

sarvasyāhlādanī śītā maitrī paramapāvanī |
abhyudeti hṛdo hṛdyā sutaroriva mañjarī || 18 ||
[Analyze grammar]

antaśchidravatī jāḍyayuktā guptaguṇā svayam |
cintā śoṣamupāyāti himadagdheva padminī || 19 ||
[Analyze grammar]

ālokaḥ sphuṭatāmantarāyātyajñānasaṅkṣaye |
praśāmyatyambude vyomni śaradīvārkamaṇḍalam || 20 ||
[Analyze grammar]

prasannasphāragambhīramakṣubdhamaparāhatam |
hṛdayaṃ samatāmeti śāntavāta ivārṇavaḥ || 21 ||
[Analyze grammar]

amṛtāpūrapūrṇena nityānandamayena ca |
sthīyate puruṣeṇāntaśśītena śaśinā yathā || 22 ||
[Analyze grammar]

saṃvidaṃśaikaviśrāntaṃ samagraṃ sacarācaram |
bhāvyate bharitākāraṃ vapurānandamantharam || 23 ||
[Analyze grammar]

na bhavatyastasaṅgānāmāśāpāśavidhāyinām |
dagdhānāmiva parṇānāṃ janmanāṃ punarāgatiḥ || 24 ||
[Analyze grammar]

puṃsā kṣapitasaṃsārajarājanmamahādhvanā |
apunarbhramaṇāyātmadrume viśramyate ciram || 25 ||
[Analyze grammar]

evamprāyāstathānyāśca bhavanti guṇasampadaḥ |
asati tvayi sarvāśin sarvāśākṣaṇadākṣaye || 26 ||
[Analyze grammar]

pakṣayoretayościtta sattāsattāsvarūpayoḥ |
yenaiva paśyasi śreyastamevāṅgīkuru kṣaṇāt || 27 ||
[Analyze grammar]

svātmābhāvastava sukhaṃ manye mānavatāṃ vara |
tameva bhāvayābhāvaṃ sukhatyāgo hi mūḍhatā || 28 ||
[Analyze grammar]

yadi tvasti bhavatsatyamantarbhāvitacetanam |
jīvatastattavātyantamabhāvaṃ ka ivecchati || 29 ||
[Analyze grammar]

kiṃ tu nāstyasi satyena vadāmi tava sundara |
tena mithyaiva jīvāmītyāsthayā mā bhavāsukhi || 30 ||
[Analyze grammar]

prakrame vāsi nāstyeva yā vā bhrāntyā tvadastitā |
sāpīdānīṃ vicāreṇa bhṛśaṃ saṅkṣayamāgatā || 31 ||
[Analyze grammar]

etāvadeva te rūpaṃ sādho yadavicāraṇam |
vicāre vihite samyaktvamarūpamasatsthitam || 32 ||
[Analyze grammar]

avicārātprajātaṃ tvamanālokāttamo yathā |
vicāreṇopaśāntaṃ tvamālokena tamo yathā || 33 ||
[Analyze grammar]

etāvantaṃ sakhe kālaṃ babhūvālpavivekitā |
tāvataivātipīnatvamabhūdduḥkhaikakāraṇam || 34 ||
[Analyze grammar]

mohasaṅkalpamātreṇa bālavetālavadbhavat |
babhūvātyantasaṅkalpe kṣīṇe tvayi bhavatsthitam || 35 ||
[Analyze grammar]

idānīmuditaṃ nityaṃ tvaṃ prāgrūpe kṣayaṃ gate |
vivekasya prasādena vivekāya namo namaḥ || 36 ||
[Analyze grammar]

babhūvithāprabuddhaṃ tvaṃ cittakātyantabodhataḥ |
cittatāyāṃ vinaṣṭāyāṃ sthitastvaṃ parameśvaraḥ || 37 ||
[Analyze grammar]

prāksvarūpavilāsaste śreyasi sthitimāgataḥ |
samastavāsanonmuktaḥ sampratyasi maheśvaraḥ || 38 ||
[Analyze grammar]

yasyāvivekādutpattiḥ sa vivekādvinaśyati |
prakāśena prayātyantamanālokodbhavaṃ tamaḥ || 39 ||
[Analyze grammar]

anicchato'pi te sādho vicāre sthitimāgate |
arthato'yamupāyāto vināśaḥ sukhasiddhaye || 40 ||
[Analyze grammar]

tasmānnāstyasi nirṇītamiti siddhāntayuktibhiḥ |
mitrendriyeśvara svasti bhavatastvastamāgatam || 41 ||
[Analyze grammar]

nityaṃ pūrvamabhūtāya nāstirūpāya samprati |
bhaviṣyate ca nodarkaḥ svamanaḥ svasti te'stviti || 42 ||
[Analyze grammar]

parinirvāmi śānto'smi diṣṭyāsmi vigatajvaraḥ |
svātmanyevāvatiṣṭhe'haṃ turyarūpe pade sthitaḥ || 43 ||
[Analyze grammar]

ato nāstyeva nāstyeva saṃsārī cittasaṃsthitiḥ |
ātmā tvastyeva cāstyeva yasmādanyanna vidyate || 44 ||
[Analyze grammar]

ayamātmeti kalanā manye no nirmalāntarā |
pratiyogivyavacchedakalanaikasya vā kutaḥ || 45 ||
[Analyze grammar]

ahaṃ tenāyamātmeti kalanāmanudāharan |
maunī svātmani nirvāmi taraṅga iva vāriṇi || 46 ||
[Analyze grammar]

saṃśāntavāsanamanāśritacetanāṃśamaprāṇasañcaraṇamastavināśadoṣam |
saṃvedyavarjitamupetya susaṃvidaṃśaṃ śāmyāmi maunamayameva nirīhamantaḥ || 47 ||
[Analyze grammar]