Chapter 137

bhārgavopākhyāne bhārgavajanmāntaravarṇanaṃ nāma sargaḥ |
saptatriṃśaduttaraśatatamaḥ sargaḥ |
vasiṣṭhaḥ |
vicārayantastattvajñā iti te jāgatīrgatīḥ |
samaṅgāyāstaṭāttasmātpraceluścañcalāṃśavaḥ || 1 || kramādākāśamākramya nirgatyāmbudakoṭaraiḥ |
samprāpuḥ siddhamārgeṇa mandaraṃ hemakandaram || 2 ||
[Analyze grammar]

adhityakāyāṃ tasyādrerārdraparṇāvaguṇṭhitām |
dadarśa bhārgavaśśuṣkāṃ pūrvajanmodbhavāṃ tanum || 3 ||
[Analyze grammar]

uvāca cedaṃ he tāta tanvī tanuriyaṃ hi sā |
yā tvayā sukhasambhogaiḥ purā samabhilālitā || 4 ||
[Analyze grammar]

iyaṃ sā mattanuryasyā mandārakusumotkaraiḥ |
racitāśśītalāśśayyā merūpavanabhūmiṣu || 5 ||
[Analyze grammar]

iyaṃ sā mattanurmattadevastrīgaṇalālitā |
sarīsṛpamukhakṣuṇṇā paśya śete dharātale || 6 ||
[Analyze grammar]

nandanodyānaṣaṇḍeṣu mama tanvā yayānayā |
ciraṃ vilasitaṃ seyaṃ śuṣkakaṅkālatāṃ gatā || 7 ||
[Analyze grammar]

surāṅganāṅgasaṃsaṅgāduttuṅgānaṅgaraṅgayā |
cetovṛttyā rahitayā tanveha mama śuṣyate || 8 ||
[Analyze grammar]

teṣu teṣu vilāseṣu tāsu tāsu daśāsu ca |
tathā tā bhāvanā baddhvā kathaṃ svastho'si dehaka || 9 ||
[Analyze grammar]

hā tano kvāvabhagnāsi tāpasaṃśoṣamāgatā |
karaṅkatāṃ prayātāsi māṃ bhāvayasi durbhage || 10 ||
[Analyze grammar]

dehenāhaṃ vilāseṣu yenaiva mudito'bhavam |
kaṅkalatāmupagatāttasmādeva bibhemyaham || 11 ||
[Analyze grammar]

tārājālasamākāro yatra hāro'bhavatpurā |
mamorasi nilīyante paśya tatra pipīlakāḥ || 12 ||
[Analyze grammar]

dravatkāñcanakāntena lobhaṃ nītā varāṅganāḥ |
yena madvapuṣā tena paśya kaṅkalatohyate || 13 ||
[Analyze grammar]

paśyeme vitatāsyena tāpasaṃśuṣkakṛttinā |
matkaṅkālakuvaktreṇa vitrāsyante vane mṛgāḥ || 14 ||
[Analyze grammar]

paśyātisaṃśuṣkatayā śavodaradarī mama |
prakāśārkāṃśujālena vivekeneva śobhate || 15 ||
[Analyze grammar]

mattanuḥ pariśuṣkeyaṃ sthitottānā vanāvanau |
vairāgyaṃ nayatīvātmatucchatvenāmbarasthitān || 16 ||
[Analyze grammar]

śabdarūparasasparśagandhalobhavimuktayā |
nirvikalpasamādhyeva mama tanvoṣyate girau || 17 ||
[Analyze grammar]

saṃśānte cittavetāle yāmānandakalāṃ tanuḥ |
yāti tāmapi rājyena jāgatena na gacchati || 18 ||
[Analyze grammar]

paśya viśrāntasarvehaṃ vigatāśeṣakautukam |
nirastakalpanājālaṃ sukhaṃ śete kalevaram || 19 ||
[Analyze grammar]

cittamarkaṭasaṃrambhasaṅkṣubdhaḥ kāyapādapaḥ |
tathā vegena calati yathā mūlāni kṛntati || 20 ||
[Analyze grammar]

cittānarthavimukto'drau gajābhraharivibhramam |
nāyaṃ paśyati me dehaḥ parānanda iva sthitaḥ || 21 ||
[Analyze grammar]

sarvāśājvarasammohamihikāśaradāgamam |
acittatvaṃ vinā nānyacchreyaḥ paśyāmi jantuṣu || 22 ||
[Analyze grammar]

ta eva sukhasambhogasīmāntaṃ samupāgatāḥ |
mahādhiyaśśāntadhiyo ye yātā vimanaskatām || 23 ||
[Analyze grammar]

sarvaduḥkhadaśāmuktāṃ saṃśāntāṃ vigatajvarām |
diṣṭyā paśyāmyamananāṃ vane tanumimāmaham || 24 ||
[Analyze grammar]

rāmaḥ |
bhagavan sarvadharmajña bhārgaveṇa tadā kila |
subahūnyupabhuktāni śarīrāṇi punaḥ punaḥ || 25 ||
[Analyze grammar]

bhṛguṇotpādite kāye tattasmiṃstasya kiṃ mune |
mahānatiśayo jātaḥ paridevanameva vā || 26 ||
[Analyze grammar]

vasiṣṭhaḥ |
śukrasya kalanā rāma yāsau jīvadaśāṃ gatā |
karmātmikā samutpannā bhṛgorbhārgavarūpiṇī || 27 ||
[Analyze grammar]

sā hīdamprathamatvena sametya paramātpadāt |
bhūtākāśapadaṃ prāpya vātavyāvalitā satī || 28 ||
[Analyze grammar]

prāṇāpānapravāheṇa praviśya hṛdayaṃ bhṛgoḥ |
krameṇa vīryatāmetya sampannauśanasī tanuḥ || 29 ||
[Analyze grammar]

vihitabrāhmasaṃskārā tataḥ sā pituragragā |
kālena mahatā prāptā śuṣkakaṅkālarūpatām || 30 ||
[Analyze grammar]

idamprathamamāyātā yadā sā brahmaṇastanuḥ |
tatastāṃ prati śukreṇa tadā tatparidevitam || 31 ||
[Analyze grammar]

vītarāgo'pyaniccho'pi samaṅgāviprarūpavān |
svāṃ śuśoca tanuṃ śukraḥ svabhāvo hyeṣa dehajaḥ || 32 ||
[Analyze grammar]

kiṃ tu pradarśitaṃ tena śokavyājena dhīmatām |
vairāgyapratipattyai tatpṛthaktvaṃ dehadehinoḥ || 33 ||
[Analyze grammar]

jñasyājñasya ca dehasya yāvajjīvamayaṃ kramaḥ |
lokavadvyavahāro yatsaktyāsaktyātha vā sadā || 34 ||
[Analyze grammar]

ye parijñātagatayo ye cājñāḥ paśudharmiṇaḥ |
lokasaṃvyavahāreṣu te sthitā vanajālavat || 35 ||
[Analyze grammar]

vyavahārī yathaivājñastathaiva kila paṇḍitaḥ |
vāsanāmātrabhedo'tra kāraṇaṃ bandhamokṣayoḥ || 36 ||
[Analyze grammar]

yāvaccharīraṃ tāvaddhi duḥkhe duḥkhaṃ sukhe sukham |
asaṃsaktadhiyo dhīrā darśayantyaprabuddhavat || 37 ||
[Analyze grammar]

sukheṣu sukhitā nityaṃ duḥkhitā duḥkhavṛttiṣu |
mahātmāno hi dṛśyante nūnamantastu śītalāḥ || 38 ||
[Analyze grammar]

stambhasya pratibimbāni kṣubhyanti na vapuḥ sthiram |
jñasya karmendriyāṇyeva kṣubhyanti na manaḥ sthiram || 39 ||
[Analyze grammar]

calācalatayā tajjño lokavṛttiṣu tiṣṭhati |
adhassthitiriva svacchaṃ pratibimbeṣu bhāskaraḥ || 40 ||
[Analyze grammar]

santyaktalokakarmāpi baddha evāprabuddhadhīḥ |
atyaktamohalīlo'pi mukta eva prabuddhadhīḥ || 41 ||
[Analyze grammar]

muktabuddhīndriyo mukto baddhakarmendriyo'pi hi |
baddhabuddhīndriyo baddho muktakarmendriyo'pi hi || 42 ||
[Analyze grammar]

sukhaduḥkhadṛśorloke bandhamokṣadṛśostathā |
heturbuddhīndriyāṇyeva tejāṃsīva prakāśane || 43 ||
[Analyze grammar]

bahirlokocitācārastvantarācāravarjitaḥ |
samo'sanniva tiṣṭha tvaṃ saṃśāntasakalaiṣaṇaḥ || 44 ||
[Analyze grammar]

sarvaiṣaṇāvimuktena svātmanātmani tiṣṭhatā |
kuru karmāṇi kāryāṇi nūnaṃ sāmanasi sthitiḥ || 45 ||
[Analyze grammar]

ādhivyādhimahāvarte garte saṃsāravartmani |
mamatogrāndhakūpe'sminmā patātapadāyini || 46 ||
[Analyze grammar]

na tvaṃ bhāveṣu no bhāvāstvayi tāmarasekṣaṇa |
śuddhabuddhasvabhāvastvamātmasaṃsthaḥ sthiro bhava || 47 ||
[Analyze grammar]

vyapagatamamatāmahāndhakāraṃ padamamalaṃ vigataiṣaṇaṃ sametya |
prabhavasi yadi cetaso mahātmaṃstadatidhiye mahate sate namaste || 48 ||
[Analyze grammar]