Chapter 161

yudhiṣṭhira uvāca |
kapilādānamāhātmyaṃ kathayasva jagatpate |
puṇyaṃ yatsarvadānānāṃ sarvapātakanāśanam || 1 ||
[Analyze grammar]

śrīkṛṣṇa uvāca |
tatte'haṃ saṃpravakṣyāmi vinatāśvena yatpurā |
kathitaṃ kapilādānaṃ tacchṛṇuṣva mahāmate || 2 ||
[Analyze grammar]

vinatāśva uvāca |
ataḥ paraṃ mahārājobhayamukhyāḥ samāsataḥ |
vidhānaṃ yadvarāheṇa dharaṇyai kathitaṃ purā || 3 ||
[Analyze grammar]

tadahaṃ saṃpravakṣyāmi navapuṇyaphalaṃ ca yat |
dharaṇyuvāca |
yattvayā kapilā nāma pūrvamutpāvitā prabho || 4 ||
[Analyze grammar]

homadhenuḥ sadā puṇyā dhenuryajñāvatārabhūḥ |
sā kathaṃ brāhmaṇebhyo hi deyā kasmindine'pi ca || 5 ||
[Analyze grammar]

kīdṛśāya ca viprāya dātavyā puṇyalakṣaṇā |
kati vā kapilāḥ proktāḥ svayameva svayaṃbhuvā || 6 ||
[Analyze grammar]

tāsāṃ prayatnāddānena kiṃ puṇyaṃ syācca mādhava |
etadicchāmyahaṃ śrotuṃ vistarānmadhusūdana || 7 ||
[Analyze grammar]

varāha uvāca |
śṛṇuṣva bhadre tattvena pavitraṃ pāpanāśanam |
kṛtvā yatsarvapāpebhyo mucyate nātra saṃśayaḥ || 8 ||
[Analyze grammar]

kapilā agnihotrārthaṃ yajñārthe ca varānane |
uddhṛtya sarvatejāṃsi brahmaṇā nirmitā purā || 9 ||
[Analyze grammar]

pavitrāṇāṃ pavitraṃ ca maṅgalānāṃ ca maṃgalam |
puṇyānāṃ paramaṃ puṇyaṃ kapilā ca varānane || 10 ||
[Analyze grammar]

tapasastapa evāgryaṃ vratānāmuttamaṃ vrataṃ |
dānānāmuttamaṃ dānaṃ vidhinā hyetadakṣayam || 11 ||
[Analyze grammar]

pṛthivyāṃ yāni tīrthāni guhyānyāyatanāni ca |
pavitrāṇi ca puṇyāni sarvaloke vasundhare || 12 ||
[Analyze grammar]

hotavyānyagnihotrāṇi sāyaṃ prātardvijātibhiḥ |
kapilāyā ghṛteneha daśa kṣīreṇa vā punaḥ || 13 ||
[Analyze grammar]

yajaṃte ye'gnihotrāṇi annaiśca vividhaiḥ sadā |
pūjayantyatithīṃścaiva parāṃ bhaktimupāgatāḥ || 14 ||
[Analyze grammar]

teṣāṃ tvādityavarṇaiśca vimānairjāyate gatiḥ |
sūryamaṇḍalamadhye ca brahmaṇā nirmitā purā || 15 ||
[Analyze grammar]

kapilāyāḥ śiro grīvāṃ sarva tīrthāni bhāmini |
pitāmahaniyogācca nivasaṃti hi nityaśaḥ || 16 ||
[Analyze grammar]

prātarutthāya yo martyaḥ kapilā galamastakāt |
cyutaṃ tu bhaktyā pānīyaṃ śirasā dhārayennaraḥ || 17 ||
[Analyze grammar]

sa tena puṇyenopetastatkṣaṇādgatakilviṣaḥ |
viṃśadvarṣakṛtaṃ pāpaṃ dahatyagnirivendhanam || 18 ||
[Analyze grammar]

kalya utthāya yo martyaḥ kuryāttāsāṃ pradakṣiṇam |
pradakṣiṇīkṛtā tena pṛthivī syādvasundhare || 19 ||
[Analyze grammar]

pradakṣiṇāyāṃ caikāyāṃ kṛtāyāṃ ca vasundhare |
daśavarṣakṛtaṃ pāpaṃ naśyate nātra saṃśayaḥ || 20 ||
[Analyze grammar]

kapilāyāstu mūtreṇa snāyādvai yaḥ śucivrataḥ |
sa gaṅgādyeṣu tīrtheṣu snāto bhavati mānavaḥ || 21 ||
[Analyze grammar]

yena snānena caikena bhavamukto bhavennaraḥ |
yāvajjīvakṛtātpāpāttatkṣaṇādeva mucyate || 22 ||
[Analyze grammar]

gosahasraṃ ca yo dadyādekāṃ vā kapilāṃ naraḥ |
samametatpurā prāha brahmaloke pitāmahaḥ || 23 ||
[Analyze grammar]

yaścaikāṃ kapilāṃ hanyānnaro rajjukaro yadi |
gosahasraṃ hataṃ tena bhavatīha na saṃśayaḥ || 24 ||
[Analyze grammar]

gavāṃ sthitiṃ kalpayeta ghṛtaṃ gavyaṃ na dūṣayet |
yāvaddhi varddhate gavyaṃ tāvatpāpaistu pūyate || 25 ||
[Analyze grammar]

gavāṃ kaṃḍūyanaṃ śreṣṭhaṃ tathā ca pratipālanam |
tulyaṃ goghṛtadānasya bhayarogādipālanam || 26 ||
[Analyze grammar]

tṛṇādibhakṣaṇārthaṃ ca gavāṃ dadyāddharādikam |
svargavāsaphalaṃ divyaṃ labhate mānavottamaḥ || 27 ||
[Analyze grammar]

daśeha kapilāḥ proktāḥ svayameva svayaṃbhuvā |
yo dadyācchrotriyasyaiva svargaṃ gatvā sa mānavaḥ || 28 ||
[Analyze grammar]

vimānairvividhairdivyairdivyakanyābhirarcitaḥ |
sevyamānastu gaṃdharvairdīpyamānā yathāgnayaḥ || 29 ||
[Analyze grammar]

suvarṇakapilā pūrvā dvitīyā gaurapiṅgalā |
āśā caiva tṛtīyā syādagnijvālā caturthikā || 30 ||
[Analyze grammar]

paṃcamī juhuvarṇā syātṣaṣṭhī tu ghṛtapiṅgalā |
saptamī śvetapiṅgā syādaṣṭamī kṣīrapiṅgalā || 31 ||
[Analyze grammar]

navamī pāṭalā jñeyā daśamī puṣpapiṅgalā |
etā daśa samākhyātāḥ kapilāśca vasuṃdhare || 32 ||
[Analyze grammar]

sarvā hyetā mahābhāgāstārayaṃti na saṃśayaḥ |
saṃgameṣu praśastāśca sarvapāpapraṇāśanāḥ || 33 ||
[Analyze grammar]

evametāstu kapilāḥ pāpaghnyaśca vasundhare |
āśā caiva tu yā proktā agnigarbhānalaprabhā || 34 ||
[Analyze grammar]

agnijvālojjvalaiḥ śṛṃgaiḥ pradīptāṃgāralocanā |
agnipuṣpā agnilomā tathānyā cānalaprabhā || 35 ||
[Analyze grammar]

tāmāgneyyāṃ sadā dadyādbrāhmaṇāyetaraiḥ sadā |
gṛhītvā kapilāṃ śūdraḥ kāmatastatpayaḥ pibet || 36 ||
[Analyze grammar]

patitaśca bhavennityaṃ caṃḍālasadṛśaḥ pumān |
tasmānna pratigṛhṇīyācchabalāṃ gāṃ kathaṃcana || 37 ||
[Analyze grammar]

dvārāṃte parihartavyā kapilā gaurdvijetaraiḥ |
lokeṣu te mṛḍhatamāḥ kapilākṣīrabhojanāḥ || 38 ||
[Analyze grammar]

asaṃbhāṣyāśca patitāḥ śūdrāste pāpakarmiṇaḥ |
pibaṃti yāvatkapilāṃ tāvatteṣāṃ pitāmahāḥ |
amedhyaṃ bhuñjate'tastāṃ nopajīveddvijetaraḥ || 39 ||
[Analyze grammar]

tāsāṃ ghṛtaṃ ca kṣīraṃ vā navanītamathāpi vā |
upajīvaṃti ye śūdrāste prayāṃti yamālayam || 40 ||
[Analyze grammar]

kapilājīvinaḥ śūdrāḥ sarve gacchaṃti rauravam |
raurave bhuñjate duḥkhaṃ varṣakoṭi śatoṣitāḥ || 41 ||
[Analyze grammar]

tato vimuktāḥ kālena jāyaṃte śvānayoniṣu |
śvānayonervimuktāste viṣṭhāyāṃ kṛmiyonigāḥ || 42 ||
[Analyze grammar]

viṣṭhāsveva ca pāpiṣṭhā durgaṃdheṣu ca nityaśaḥ |
bhūyo'pi jāyamānāste tatrottāro na vidyate || 43 ||
[Analyze grammar]

brāhmaṇaścaiva yo devi kuryātteṣāṃ pratigraham |
tataḥ prabhṛtyamedhyāyāṃ pitarastasya śerate || 44 ||
[Analyze grammar]

taṃ vipraṃ nānubhāṣeta na cāpyekāsane viśet |
sa nityaṃ varjanīyo vai dūrāttu brāhmaṇādhamaḥ || 45 ||
[Analyze grammar]

yastena saha bhāṣeta prāyaścittī bhave ddvijaḥ |
ekasya gopradānasya sahasrāṃśo na pūryate || 46 ||
[Analyze grammar]

kimanyairbahubhirdānaiḥ koṭisaṃkhyātavistaraiḥ || 47 ||
[Analyze grammar]

śrotriyāya daridrāya suvṛttāyāhitāgnaye |
dattvaikāṃ kapilāṃ dhenuṃ sarvapāpaiḥ pramucyate || 48 ||
[Analyze grammar]

māse prasavinīṃ dhenuṃ dānārthī pratipālayet |
ātmārthe na prapālyā hi sadā narakabhīrubhiḥ || 49 ||
[Analyze grammar]

kapilā'rdhaprasūtā ca dātavyā hi dvijanmane |
jāyamānasya vatsasya mukhaṃ yonyāṃ pradṛśyate || 50 ||
[Analyze grammar]

tāvatsā pṛthivī jñeyā yāvadgarbhaṃ na muṃcati || 51 ||
[Analyze grammar]

dhenoryāvaṃti romāṇi savatsāyā vasundhare |
bhūmyāṃ tu pāṃsavo yāvadyāvannakṣatratārakāḥ || 52 ||
[Analyze grammar]

tāvadvarṣasahasrāṇi brahmeśādibhirarcitaḥ |
brahmaloke nivasati yaścaikakapilāpradaḥ || 53 ||
[Analyze grammar]

suvarṇaśṛṅgīṃ yaḥ kṛtvā khurai raupyaiḥ samarcitām |
brāhmaṇasya kare dattvā suvarṇaṃ raupyameva ca || 54 ||
[Analyze grammar]

kapilāyāstadā putraṃ brāhmaṇasya kare nyaset |
udakaṃ ca kare dattvā vācayeta svaśaktitaḥ || 55 ||
[Analyze grammar]

suvarṇaistu caturbhiśca tribhirdvābhyāmathāpi vā |
ekahīnā na dātavyā yadīcchecchubhamātmanaḥ || 56 ||
[Analyze grammar]

sa samudravanopetā saśailavanakānanā |
ratnapūrṇā bhaveddattā pṛthivī nātra saṃśayaḥ || 57 ||
[Analyze grammar]

pṛthivīdānatulyena dānenaitena vai naraḥ |
tārito yāti pitṛbhirvaiṣṇavaṃ yatpadaṃ param || 58 ||
[Analyze grammar]

brahmasvaharaṇo goghno bhrūṇahā brahmaghātakaḥ |
pāpakṛccobhayamukhīṃ dadyātsatkanakānvitām |
taddinaṃ ca payobhojī saṃyataścātivāhayet || 59 ||
[Analyze grammar]

gomayenopalipyātha maṇḍalaṃ vidhipūrvakam |
svaśākhoktena maṃtreṇa homayettu vicakṣaṇaḥ || 60 ||
[Analyze grammar]

vyāhṛtyā homayetpūrvaṃ paṃcavāruṇakaṃ tathā |
irāvatī dhenumatī devasya tveti vā punaḥ || 61 ||
[Analyze grammar]

syonā pṛthivi maṃtreṇa gaurvatsasahitā navā |
nikāmaphaladā dhenuḥ sā syātsurabhinaṃdinī || 62 ||
[Analyze grammar]

yā te sarasvatī devī viṣṇunā ca tathā mahī |
gaurī viṣṇupadaṃ coktvā śāṃtikarmaṇi vācayet || 63 ||
[Analyze grammar]

yāvadvatsasyadvau pādau śiraścaiva pradṛśyate |
tāvadvai pṛthivī jñeyā yāvadgarbhaṃ na muñcati |
tasminkāle pradātavyā brāhmaṇāya vasuṃdhare || 64 ||
[Analyze grammar]

suvarṇaśṛṃgīṃ raupyakhurāṃ kāsyadohāṃ satāmrakām |
savastraghaṃṭābharaṇāṃ gaṃdhapuṣpairalaṃkṛtām |
vastrākṣataiḥ samabhyarcya brāhmaṇāya samarpayet || 65 ||
[Analyze grammar]

suvarṇasya sahasreṇa tadardhenāpi bhāmini |
tasyāpyardhena śaktyā'tha tasyāpyarddhena vā punaḥ || 66 ||
[Analyze grammar]

yathā śaktyā pradātavyā vittaśāṭhyavivarjitaiḥ |
kare dattvā suvarṇaṃ ca athavā rūpyameva ca |
gṛhāṇemāṃ mahādhenuṃ bhava bhrātā mamāśu vai |
sarvapāpakṣayaṃ kṛtvā sadā svastikaro bhava || 68 ||
[Analyze grammar]

irāvatī dhenumatī jāhnavī tadanantaram |
pratidāsyāmi te dhenuṃ kuṭumbārthe viśeṣataḥ || 69 ||
[Analyze grammar]

bhavatātsvasti me nityaṃ sukhaṃ cānuttamaṃ tathā |
dattā tu pṛthivī devī tvayeyaṃ pratigṛhyatām || 70 ||
[Analyze grammar]

ko'dāditi ca vai maṃtro japitavyo dvijena ca || |
visṛjya brāhmaṇaṃ so'pi tāṃ dhenuṃ svagṛhaṃ nayet || 71 ||
[Analyze grammar]

evaṃ prasūyamānāṃ gāṃ yo dadāti vasundhare |
sā samudravanopetā saśailavanakānanā |
ratnapūrṇā bhaveddattā pṛthivī nātra saṃśayaḥ || 72 ||
[Analyze grammar]

prataptajāṃbūnadatulyavarṇāṃ mahānitaṃbāṃ tanuvṛttamadhyām |
arddhaprasūtāṃ dvimukhīṃ suśīlāṃ sevantyajasraṃ kapilāṃ hi devāḥ || 73 ||
[Analyze grammar]

prātarutthāya yo bhaktyā dhenukalpaṃ naro bhuvi |
jitendriyaḥ śucirbhūtvā paṭhedbhaktyā samanvitaḥ || 74 ||
[Analyze grammar]

trikālaṃ paṭhate yastu pāpaṃ varṣaśatodbhavam |
naśyatyekakṣaṇādeva vāyunā pāṃsavo yathā || 75 ||
[Analyze grammar]

śrāddhakāle paṭhedyastu idaṃ pāvanamuttamam |
tasyānnaṃ saṃskṛtaṃ tadvai pitaro'śnaṃti dhīmataḥ || 76 ||
[Analyze grammar]

amāvāsyāṃ ca yo vidvāndvijānāmagrataḥ paṭhet |
pitarastasya tuṣyaṃti varṣāṇāṃ śatameva ca || 77 ||
[Analyze grammar]

yaścaitatchṛṇuyātpuṇyaṃ tadgatenāṃtarātmanā |
saṃvatsarakṛtātpāpāttatkṣaṇādeva mucyate || 78 ||
[Analyze grammar]

idaṃ rahasyaṃ rājendra varāhamukhanirgatam |
dharaṇyai kathitaṃ pūrvaṃ sarvapāpapraṇāśanam || 79 ||
[Analyze grammar]

iti śrībhaviṣye mahāpurāṇa uttaraparvaṇi śrīkṛṣṇayudhiṣṭhirasaṃvāde kapilādānamāhātmyavarṇanaṃ nāmaikaṣaṣṭyuttaraśatatamo'dhyāyaḥ || 161 ||
[Analyze grammar]