Chapter 114

śrīkṛṣṇa uvāca |
purā tretāyuge pārtha nāvarṣatpākaśāsanaḥ |
kathaṃcidanayādrājñastasya rāṣṭre samaṃtataḥ || 1 ||
[Analyze grammar]

tato rāṣṭraṃ kṣudhāviṣṭaṃ babhūvātīva dāruṇam |
pataṃgamūṣikākīrṇaṃ coravyālabhayākulam || 2 ||
[Analyze grammar]

tasminghorākule kāle sapatnīkaḥ sabālakaḥ |
kauśikaḥ svagṛhaṃ tyaktvā pararāṣṭramagācchanaiḥ || 3 ||
[Analyze grammar]

mārge'tha gacchatā tena kauśikena maharṣiṇā |
tyaktaḥ sa bālako hyeko durbharaṃ ca kuṭumbakam || 4 ||
[Analyze grammar]

tasminkāle viśeṣeṇa kṣīṇennauṣadhi saṃcaye |
kṛtvātinirghṛṇaṃ karma gato'sau kauśiko muniḥ || 5 ||
[Analyze grammar]

so'pi bālo rudandīno diśo vīkṣya sthitaḥ pathi |
utthāya pippalasyādhaḥ phalānyattuṃ pracakrame || 6 ||
[Analyze grammar]

kūpe jalaṃ papau nityaṃ tatraivāśramamaṃḍale |
kṛtvā samyak sthito raudraṃ tepe ca vipulaṃ tapaḥ || 7 ||
[Analyze grammar]

athājagāma bhagavānnārado vedapāragaḥ |
taṃ dṛṣṭvā dīnavadanaṃ kṣudhārtaṃ dvijapotakam || 8 ||
[Analyze grammar]

dayayā tasya saṃskāraṃ cakre mauṃjyādibaṃdhanam |
vedānadhyāpayāmāsa sarahasyapadakramān |
dadau ca vaiṣṇavaṃ maṃtraṃ dvādaśākṣaramityuta || 9 ||
[Analyze grammar]

vedābhyāsaratasyāsya viṣṇudhyānaparasya ca |
pratyahaṃ pippalādasya viṣṇuḥ pratyakṣatāṃ yayau || 10 ||
[Analyze grammar]

vainateyasamārūḍho nīlotpaladalacchaviḥ |
caturbhujaḥ pītavāsāḥ śaṃkhacakragadādharaḥ || 11 ||
[Analyze grammar]

sa uvāca tadā tuṣṭo varaṃ brūhi yami cchasi |
tacchrutvā nāradamukhaṃ samālokya śiśustadā |
nāradenāpyanujñāto jñānavidyāmayācata || 12 ||
[Analyze grammar]

dattvā jñānaṃ sopadeśaṃ yogābhyāsaṃ ca nirmalam |
nāgārigamano viṣṇustatraivāntarhitobhavat || 13 ||
[Analyze grammar]

tato rājanmahājñānī maharṣiḥ sa śiśustadā |
nāradaṃ paripapraccha kenāhaṃ pīḍito mune || 14 ||
[Analyze grammar]

graheṇāgrahabhūtena bālarūpo'pi duḥkhita |
na me pitā na me mātā jīvitosmyatipīḍayā || 15 ||
[Analyze grammar]

brāhmaṇyaṃ bhavatā dattaṃ daivānmama dvijottama |
etacchrutvā śiśorvākyaṃ kathayāmāsa nāradaḥ || 16 ||
[Analyze grammar]

śanaiścareṇa krūreṇa graheṇa tvaṃ hi pīḍitaḥ |
pīḍitaśca samasto'pi deśoyaṃ maṃdacāriṇā || 17 ||
[Analyze grammar]

tenaitatte phalaṃ prāptaṃ saiṣaḥ sauriḥ śanaiścaraḥ |
prajvalannatidarpeṇa sphuratīva nabhastale || 18 ||
[Analyze grammar]

evamuktaḥ śiśuḥ krodhātprajajvāleva pāvakaḥ |
ālokya gaganādbhūmau pātayāmāsa vai śanim |
patamāno gireḥ śṛṃgādbhagnaḥ khaṃjo babhūva ha || 19 ||
[Analyze grammar]

dharaṇyāṃ patitaṃ dṛṣṭvā bhāskarātmajamāturam |
narīnarti bhujakṣepairnārado hṛṣṭamānasaḥ || 20 ||
[Analyze grammar]

harṣāddevānathāhūya darśayāmāsa taṃ śanim || 21 ||
[Analyze grammar]

atha devāstathā prāptā brahmarudrendrapāvakāḥ |
śanaiḥ saṃśamayāsurūcuścedamṛṣiṃ ca tam || 22 ||
[Analyze grammar]

svasti te'stu mahābhāga pippalāda mahāmune |
bhadraṃ te'tra kṛtaṃ nāma nāradena maharṣiṇā |
anvarthayuktaṃ viprendra jīvitaṃ piplādanāt || 23 ||
[Analyze grammar]

bhagavanpippalānyattvā jīvito'si yato mune |
tataśca pippalādeti khyātiṃ loke gamiṣyasi || 24 ||
[Analyze grammar]

ye ca tvāṃ pūjayiṣyaṃti snātvā puṣpairmahāṛṣim || 25 ||
[Analyze grammar]

ihāśrame samabhyetya rūpesminbhaktibhāvitāḥ |
saptajanmāntaraṃ yāvatputrapautrānugāminaḥ || 26 ||
[Analyze grammar]

na teṣāṃ bādhikā satyaṃ grahapīḍā bhaviṣyati |
smariṣyaṃtīha ye ca tvāṃ pippalādeti nāmataḥ || 27 ||
[Analyze grammar]

teṣāṃ śanaiścara kṛtā pīḍā na prabhaviṣyati |
kṣamasvāsya mahābhāga nirdoṣo'yaṃ grahāgraṇīḥ || 28 ||
[Analyze grammar]

caranvṛkṣaṃ śanaireṣa śubhāśubhaphalapradaḥ |
hatasādhyā grahāścaite na bhavaṃti kadācana || 29 ||
[Analyze grammar]

balihomanamaskāraiḥ śāṃtiṃ yacchaṃti pūjitāḥ |
ato'rthamasya divase snānamabhyaṃgapūrvakam || 30 ||
[Analyze grammar]

kāryaṃ deyaṃ ca viprāṇāṃ tailamabhyaṃgahetave |
yastu saṃvatsaraṃ yāvatprāpte śanidine naraḥ || 31 ||
[Analyze grammar]

tailaṃ dadāti viprāṇāṃ svaśaktyānyajanepi ca |
tatassaṃvatsarasyāṃte prāpte tasya dinaṃ punaḥ || 32 ||
[Analyze grammar]

lohaissaṃghaṭitaṃ sauriṃ tailamadhye vinikṣipet |
lohabhāṃḍakamadhyasthaṃ kṛṣṇavastrayugacchadam || 33 ||
[Analyze grammar]

kṛṣṇagodakṣiṇāyuktaṃ kṛṣṇakaṃbala śāyinam |
tilatailena ca snānaṃ kṛṣṇapuṣpaiḥ supūjitam || 34 ||
[Analyze grammar]

kṛṣṇagaṃdhaiḥ kṛṣṇadhūpaiḥ kṛśarānnaistilaudanaiḥ |
pūjayitvā sūryaputraṃ brāhmaṇāya nivedayet || 35 ||
[Analyze grammar]

maṃtreṇānena brahmarṣe śannodevīti bhaktimān |
itareṣāṃ tu varṇānāṃ śṛṇu mantraṃ dvijottama || 36 ||
[Analyze grammar]

krūrāvalokanavaśādbhuvanaṃ nāśayiṣyati yo graho ruṣṭaḥ |
tuṣṭo dhanakanakasukhaṃ dadāti sauriḥ śanaiścaraḥ pātu || 37 ||
[Analyze grammar]

yatpurā naṣṭarājyāya nalāya pradadau kila |
svapne saurirnijaṃ mantraṃ śṛṇu kāmaphalapradam || 38 ||
[Analyze grammar]

kroḍaṃ nīlāñjanaprakhyaṃ nīlavarṇasamasrajama |
chāyāmārtaṃḍasaṃbhūtaṃ namasyāmi śanaiścaram || 39 ||
[Analyze grammar]

namo'rkaputrāya śanaiścarāya nīhāravarṇāṃjanamecakāya |
śrutvā rahasyaṃ bhavakāmadaśca phalaprado me bhava sūryaputra || 40 ||
[Analyze grammar]

namo'stu pretarājāya kṛṣṇadehāya vai namaḥ |
śanaiścarāya krūrāya śuddhabuddhipradāyine || 41 ||
[Analyze grammar]

ya ebhirnāmabhiḥ stauti tasya tuṣṭo bhavāmyaham |
madīyaṃ tu bhayaṃ tasya svapne'pi na bhaviṣyati || 42 ||
[Analyze grammar]

evamūce śaniḥ pūrvamatastaṃ brāhmaṇe dadet |
evametadvrataṃ vipra ye cariṣyaṃti mānavāḥ || 43 ||
[Analyze grammar]

sthāvaresthāvare prāpte vatsaraṃ yāvadeva tu |
teṣāṃ śānaiścarī pīḍā deśe'pi na bhaviṣyati || 44 ||
[Analyze grammar]

evamuktvā surāḥ sarve pratijagmuryathāgatam |
śanaiścaro'pi svasthāne grahāṃte khe pratiṣṭhitaḥ || 45 ||
[Analyze grammar]

pippalādo'pi brahmajño brahmājñāṃ pratipālayan |
śanaiścaraṃ tu saṃpūjya tuṣṭāva racitāñjaliḥ || 46 ||
[Analyze grammar]

koṇasthaḥ piṅgalo babhruḥ kṛṣṇo raudro'ntako yamaḥ |
sauriḥ śanaiścaro modaḥ prīyatāṃ me grahottamaḥ || 47 ||
[Analyze grammar]

śanaiścaramiti stutvā pippalādo mahāmuniḥ |
khe prajvalanvimānastho dṛśyate'dyāpi mānavaiḥ || 48 ||
[Analyze grammar]

idaṃ śanaiścarākhyānaṃ ye śroṣyanti samāhitāḥ |
teṣāṃ kuruvaraśreṣṭha śaniḥ pīḍāṃ na dāsyati || 49 ||
[Analyze grammar]

kṛṣṇāyasena ghaṭitāṃ graharājamūrtiṃ lohe nidhāya kalaśe tilatailapūrṇe |
yo brāhmaṇāya ravijaṃ pradadāti bhaktyā pīḍā śanaiścarakṛtā na hi bādhate tam || 50 ||
[Analyze grammar]