Chapter 61

śrīkṛṣṇa uvāca |
mahiṣāsure vinihate bhagavatyā mahāsuraiḥ |
pūrvavairamanusmṛtya saṃgrāmā bahavaḥ kṛtāḥ || 1 ||
[Analyze grammar]

nānārūpadharā devī avatīrya punaḥpunaḥ |
dharmasaṃsthāpanārthāya nijaghne daityasattamān || 2 ||
[Analyze grammar]

atha raktāsuro nāma mahiṣasya suto mahān |
āsīttena tapastaptaṃ varṣāṇāṃ niyutāni ṣaṭ |
tasmai dadau caturvaktro rājyaṃ trailokyamaṇḍale || 3 ||
[Analyze grammar]

tena labdhaṃ vareṇātha melayitvā danoḥ sutān |
prārabdhaṃ saha śakreṇa yuddhaṃ gatvā'marāvatīm || 4 ||
[Analyze grammar]

taddṛṣṭvā dānavabalaṃ sannaddhātyuddhatadhvajam |
yuyudhe dānavaiḥ sārddhaṃ suraiḥ śakrapurassaraiḥ || 5 ||
[Analyze grammar]

tatra prāvartata nadī śoṇitaughataraṃgiṇī |
khaḍgamatsyagadāgrāhavasunaṃdakakacchapā |
vahaṃtī pitṛlokāya surāsurabhayānakā || 6 ||
[Analyze grammar]

atha raktāsuro roṣādyuyudhe vibudhaiḥ saha |
te hanyamānā vibudhā raktākṣeṇa mahāraṇe || 7 ||
[Analyze grammar]

bhraṣṭāḥ svargaṃ parityajya tyaktapraharaṇā drutam |
karacchatrāṃ purīṃ prāptā yatrāste bhavavallabhā || 8 ||
[Analyze grammar]

durgā cāmuṇḍayā sārdhaṃ navadurgāsamanvitā |
ādyā tāvanmahālakṣmīrnaṃdā kṣemakarī tathā || 9 ||
[Analyze grammar]

śivadūtī mahāruṇḍā bhrāmarī rudramaṃgalā |
revatī harasiddhistu navaitāḥ parikīrtitāḥ |
etāsāṃ te stutiṃ cakrustridaśāḥ praṇatānanāḥ || 10 ||
[Analyze grammar]

amarapatimukuṭacumbitacaraṇāṃbujasakalabhuvanasukhajananī |
jayati jagadīśavaṃditā sakalāmalaniṣkalā durgā || 11 ||
[Analyze grammar]

vikṛtanakhadaśanabhūṣaṇarudhiravaśācchuritakṣatakhaḍgahastā |
jayati naramuṃḍamuṃḍitapiśita surāhārakṛccaṇḍī || 12 ||
[Analyze grammar]

pracchāditaśikhigaṇodbalavikaṭajaṭābaddhacandramaṇiśobhā |
jayati digaṃbarabhūṣā siddhavaṭeśā mahālakṣmīḥ || 13 ||
[Analyze grammar]

karakamalajanitaśobhā padmāsanabaddhapadmavadanā ca |
jayati kamaṇḍaluhastā naṃdā devī natārtiharā || 14 ||
[Analyze grammar]

digvasanā vikṛtamukhā phetkāroddāma pūritadiśaughā |
jayati vikarāladehā kṣemaṃkarī raudrabhāvasthā || 15 ||
[Analyze grammar]

krośitabrahmāṃḍodarasuravaramukharahuṃkṛtaninādā |
jayati madātimihastā śivadūtī prathamaśivaśaktiḥ || 16 ||
[Analyze grammar]

muktāṭṭahāsabhairavaduḥsahataracakitasakaladikcakrā |
jayati bhujagendramaṇiśobhitakarṇā mahātuṇḍā || 17 ||
[Analyze grammar]

paṭupaṭahamurajamardalajhallarijhaṅkāranartitāvayavā |
jayati madhuvratarūpā daityaharī bhrāmarī devī || 18 ||
[Analyze grammar]

śāṃtā praśāṃtavadanā siṃhavarā dhyānayogata nniṣṭhā |
jayati caturbhujadehā candrakalā candramaṇḍalā devī || 19 ||
[Analyze grammar]

pakṣapuṭacaṃcughātaiḥ saṃcūrṇitavividhaśatrusaṃghātā |
jayati śitaśūlahastā bahurūpā revatī bhadrā || 20 ||
[Analyze grammar]

paryaṭati jagati haṣṭā pitṛvananilayeṣu yoginīsahitā |
jayati harasiddhināmnī harasiddhirvaṃditā siddhaiḥ || 21 ||
[Analyze grammar]

iti navadurgāsaṃstavamanupamamāryābhirapararāṭ kṛtvā |
idamūce saha devaistrāhyasmānsarvabhītibhyaḥ || 22 ||
[Analyze grammar]

punaḥpunaḥ praṇamyocurbhavānīṃ siṃhavāhinīm |
asmākaṃ bhayabhītānāṃ śaraṇye śaraṇaṃ bhava || 23 ||
[Analyze grammar]

devānāṃ tadvacaḥ śrutvā dattvā tebhyo'bhayaṃ tataḥ |
siṃhārūḍhā vinirgatya durgābhiḥ sahitā purā || 24 ||
[Analyze grammar]

yuyudhe dānavaissārdhaṃ mahāsamaradurdinam |
kumārī viṃśatibhujā ghanavidyullatopamā || 25 ||
[Analyze grammar]

te'pi tatrāsurāḥ prāptāḥ pracaṃḍā rudrarūpiṇaḥ |
sarve labdhavarāḥ śūrāḥ sutaptatapasastathā || 26 ||
[Analyze grammar]

mahāgrāhaparākrāṃtā duṣṭamāyāvinaṣṭaye |
abrāhmaṇyāddhṛdyamiṣā nāmataśca nijodyatāt || 27 ||
[Analyze grammar]

indramārī asatkleśaḥ pralaṃbo narakaḥ sutaḥ |
kuṣṭhaḥ pulomā śarabha śaṃbaro duṃdubhiḥ kharaḥ || 28 ||
[Analyze grammar]

ilvalo namucirbhaumo vātāpi dhenukaḥ kaliḥ |
māyāvṛtau balau bandhurmadhukaiṭabhakālajit || 29 ||
[Analyze grammar]

rahaḥ pauṃḍūाdidaityendrāḥ prādhānyena prakīrtitāḥ |
phanagobhirjanāḥ sarve sannaddhāḥ svāgrato dhvajaḥ || 30 ||
[Analyze grammar]

rūpato varṇitāścaiva dhvajāsteṣāṃ pṛthakpṛthak |
pratyadṛśyaṃta rājendra jvalitā iva pāvakāḥ || 31 ||
[Analyze grammar]

kāñcanāḥ kāñcanā pīḍāḥ kāñcanasragalaṃkṛtāḥ |
patākā vividhairvālairucchritā lakṣaṇānvitāḥ || 32 ||
[Analyze grammar]

nīlyaḥ pītāḥ sitā raktāḥ kṛṣṇāsrāḥ pañcavarṇakāḥ |
tatra paṭṭapaṭīsautrāḥ kṛtabudbudakarburāḥ || 33 ||
[Analyze grammar]

patākākāntiranalā nartakya iva śobhanāḥ || 34 ||
[Analyze grammar]

tato halahalārāvaṃ cakruste dānavottamāḥ |
prāsphālayaṃta paṇavabherījharjharagomukhān |
nyavādayaṃtānakānye śaṃkhāḍaṃbaraḍiṃḍimān || 35 ||
[Analyze grammar]

evaṃ te samayudhyaṃta bhavānīṃ daityadānavāḥ |
samājaghnuḥ śaraiḥ śūlaiḥ parighaiḥ śaktitomaraiḥ |
karṇakairīṣaṇaiḥ kuntaiḥ śataghnīkūṭamudgaraiḥ || 36 ||
[Analyze grammar]

āhatya mānaroṣeṇa jajvaluḥ samare'dhikam |
siṃhārūḍhā drutaṃ devī raṇamadhye pradhāvitā || 37 ||
[Analyze grammar]

ācchidyācchidya cihnāni dhvajānnānāvidhāṃstathā |
balātkāreṇa daityānāmanāthasamare ruṣā || 38 ||
[Analyze grammar]

cihnakāni dadau tuṣṭā devebhyaḥ śīghracāriṇī |
surairapi gṛhītāni jaya devīti vādibhiḥ || 39 ||
[Analyze grammar]

aṃbikā tu bhṛśaṃ tuṣṭā teṣāṃ cakre kṣaṇātkṣayam |
kālarātrī dānavānāṃ mārīva nipapāta sā |
jīvitāni ca jagrāha daityānāṃ devanaṃdinī || 40 ||
[Analyze grammar]

atha raktāsuraṃ kaṃṭhe gṛhītvāpātya bhūtale |
devī jaghāna tīkṣṇena triśūlena bhṛśaṃ divi || 41 ||
[Analyze grammar]

sa bhinnahṛdayaḥ paścādbhūmau tatra prapothitaḥ |
tathāpi devyā nihataḥ papāta ca mamāra ca || 42 ||
[Analyze grammar]

devāstānasurāñjitvā gatvā śatrupuraṃ jitam |
dadṛśuste raṇaprāṃte laṃbamānānmahādhvajān |
yātrāṃ cakruḥ saṃprahṛṣṭā navamyāṃ dhvajacihnitām || 43 ||
[Analyze grammar]

atodyāpīha bhūpālairjayalabdhīcchayādṛtaiḥ |
upoṣyate narairbhaktairnārībhiścaiva pāṃḍava || 44 ||
[Analyze grammar]

yudhiṣṭhira uvāca |
kīdṛgvidhānaṃ tasyāstu navamyā brūhi me prabho |
sarahasyaṃ samaṃtraṃ ca yena tuṣyati caṃḍikā || 45 ||
[Analyze grammar]

śrīkṛṣṇa uvāca |
pauṣasya śuklapakṣe yā navamī saṃpariśrutā |
tasyāṃ snātvā śubhaiḥ puṣpairarcanīyā hareḥ svasā || 46 ||
[Analyze grammar]

kumārī subhagā devī siṃhasyaṃndanagāminī |
dhvajānnānāvidhānkṛtvā purastasyāśca pūjayet |
mālatīkusumairddīpairgandhadhūpavilepanaiḥ || 47 ||
[Analyze grammar]

balibhiḥ paśubhirmedhyaiḥ surāmāṃsāsṛgambaraiḥ |
dadhicandanacūrṇaiśca bhagnaiścānagnipācitaiḥ |
maṃtreṇānena kauṃteya brahmaṇopyathavā nanu || 48 ||
[Analyze grammar]

bhadrāṃ bhagavatīṃ kṛṣṇāṃ viśvasya jagato hitām |
saṃveśinīṃ saṃyamanīṃ grahanakṣatra mālinīm || 49 ||
[Analyze grammar]

prapannohaṃ śivāṃ rātrī bhadre pāraya me vratam |
sarvabhūtapiśācebhyaḥ sarvasatvasarīsṛpaiḥ |
devebhyo mānuṣebhyaśca bhayebhyo rakṣa māṃ sadā || 50 ||
[Analyze grammar]

tataścāropayedrājā devīnāṃ bhavane tathā |
bhojayeta kumārīṃ ca praṇipatya kṣamāpayet || 51 ||
[Analyze grammar]

upavāsena kurvīta ekabhaktena vā punaḥ |
bhaktyā bhūpālapañcāsya bhaktistasyā garīyasī || 52 ||
[Analyze grammar]

evaṃ ye pūjayiṣyaṃti dhvajairbhagavatīṃ narāḥ |
teṣāṃ durgā durgamārge coravyālāgni saṃkaṭe || 53 ||
[Analyze grammar]

raṇe rājakule gehe yuddhamadhye jale sthite |
rakṣāṃ karoti satataṃ bhavānī sarvamaṃgalā || 54 ||
[Analyze grammar]

asyāṃ babhūva vijayo navamyāṃ pāṃḍunaṃdana |
bhagavatyāstu tenaiṣā navamī satataṃ priyā || 55 ||
[Analyze grammar]

dhanyā puṇyā pāpaharā sarvopadravanāśanī |
anuṣṭheyā prayatnena sarvānkāmānabhīpsubhiḥ || 56 ||
[Analyze grammar]

devyarcanāhitamatirmanujo navamyāṃ hemasrajaṃ dhvajavaraṃ sa hi ropayedyaḥ |
bhogānavāpya manasobhimatānprakāmaṃ dehaṃ vihāya samupaiti sa vīralokam || 57 ||
[Analyze grammar]