Chapter 28

yudhiṣṭhira uvāca |
caitre bhādrapade māghe rūpasaubhāgya putradam |
tṛtīyātrayametanme kṛṣṇa kasmānna kīrtitam || 1 ||
[Analyze grammar]

kimahaṃ bhaktirahitastrayīmārgātigo naraḥ |
suprasiddhaṃ jagatyetadgopitaṃ kena hetunā || 2 ||
[Analyze grammar]

bhavānsarvārthānukūlaḥ sarvajña iti me matiḥ |
śrīkṛṣṇa uvāca |
vrataṃ caitajjagatkhyātaṃ nākhyātaṃ tena te mayā || 3 ||
[Analyze grammar]

yadyasti śravaṇe buddhiḥ śrūyatāṃ pāṇḍunandana |
ko'nyaḥ śrotā jagatyasminbhavatā sadṛśo bhuvi || 4 ||
[Analyze grammar]

jayā ca vijayā caiva umāyāḥ paricārike |
āgatya munikanyābhiḥ pṛṣṭebhīṣṭaphalecchayā || 5 ||
[Analyze grammar]

bhavatyau sarvadā devyāścittavṛttividau kila |
kena vratopacāreṇa kasminnahani pārvatī |
pūjitā tuṣṭimabhyeti maṃtrai kaiśca varānane || 6 ||
[Analyze grammar]

tāsāṃ tadvacanaṃ śrutvā jayā provāca sādaram |
śrūyatāmabhidhāsyāmi sarvakāmaphalapradam |
vratamutsavasaṃyuktaṃ naranārī manoramam || 7 ||
[Analyze grammar]

caitre sitatṛtīyāyāṃ dantadhāvanapūrvakam |
upavāsasya niyamaṃ gṛhṇīyādbhaktibhāvitam || 8 ||
[Analyze grammar]

sakuṃkumaṃ satāṃbūlaṃ sindūraṃ raktavāsasī |
vidhavā sopavāsāpyavaidhavyakaraṇaṃ param || 9 ||
[Analyze grammar]

vidhavā yāti mārgeṇa kumārī tu yadṛcchayā |
kuryādabhyarcanavidhiṃ śrūyatāṃ maṃtravikramaḥ || 10 ||
[Analyze grammar]

netrapaṭṭapaṭīvastrairvastramaṇḍapikāṃ śubhām |
kārayetkusumāmodadivyābharaṇabhūṣitām || 11 ||
[Analyze grammar]

pravālalaṃbitavrātāmaṃtardivyavitānikām |
vinyastapūrṇakalaśāṃ satpīṭhasthāpitadvijām || 12 ||
[Analyze grammar]

purataḥ kārayetkuṇḍaṃ hastamātraṃ samekhalam |
tataḥ snātānuliptāṃ ca paridhāya suvāsasī || 13 ||
[Analyze grammar]

devānpitṝnsamabhyarcya tato devīgṛhaṃ vrajet |
nāmāṣṭakena saṃpūjyā gaurī gopativallabhā || 14 ||
[Analyze grammar]

tatkālaprabhavaiḥ puṣpairgandhāli bakulākulaiḥ |
kuṃkumena samālabhya karpūrāgurucandanaiḥ || 15 ||
[Analyze grammar]

evaṃ saṃpūjya vidhivatsaddhūpenādhivāsayet |
pārvatī lalitā gaurī gāṃdhārī śāṅkarī śivā |
umā satī samuddiṣṭaṃ nāmāṣṭakamidaṃ mayā || 16 ||
[Analyze grammar]

laḍḍukaiḥ khaṇḍaveṣṭaiśca guḍakaiḥ siṃhakesaraiḥ |
somālakaiḥ kokasaraiḥ khaṇḍakhādyakaraṃbakaiḥ || 17 ||
[Analyze grammar]

ghṛtapakvairbahuvidhaiḥ supakvaphalakalpitaiḥ |
dṛṣṭiprāṇaharairhṛdyairnnaivedyaiḥ prīṇayedumām || 1 ||
[Analyze grammar]

kaṭukhaṃḍaṃ jīrakaṃ ca kuṃkumaṃ lavaṇārdrakam |
ikṣudaṃḍānaikṣavaṃ ca haridrārdrānpuro nyaset || 19 ||
[Analyze grammar]

nārikelānāmalakānmātuluṃgānsadāḍimān |
kūṣmāṇḍakarkaṭīvṛṃtanāraṅgapanasādikān || 20 ||
[Analyze grammar]

kālodbhavāni cānyāni phalāni vinivedayet |
gṛhādyulūkhalaśilāśūrpānpraṇatibhiḥ saha || 21 ||
[Analyze grammar]

netrāṃjanaśalākāśca nakhare canakāni ca |
darpaṇaṃ vaṃśapātrāṇi bhavānyai vinivedayet || 22 ||
[Analyze grammar]

śaṃkhatūryaninādena gītamaṅgalanisvanaiḥ |
bhaktyā saṃpūjayeddevīṃ svaśaktyā śivavallabhām || 23 ||
[Analyze grammar]

tato'stasamaye bhānoḥ kumāryaḥ karakairnavaiḥ |
snānaṃ kuryurmudā yuktāḥ saubhāgyārogyavṛddhaye || 24 ||
[Analyze grammar]

yāmeyāme gate snānaṃ devīpūjanameva ca |
taireva nāmabhirhomastilājyena praśasyate || 25 ||
[Analyze grammar]

padmāsanasthitā sādhvī tenaivārdreṇa vāsasā |
gaurīmukhekṣaṇaparā tāṃ rātrimativāhayet || 26 ||
[Analyze grammar]

kāścidvādyaṃti saṃhṛṣṭāḥ kāścinnṛtyaṃti harṣitāḥ |
kathayaṃti kathāḥ kāściddevyāstatra mahotsave || 27 ||
[Analyze grammar]

gītatālānu saṃbaddhamanuddhatamanākulam |
nṛtyaṃti sma pure devyāḥ kāścidullasitabhruvaḥ || 28 ||
[Analyze grammar]

nṛtyena hṛṣyati haro gaurī gītena tuṣyati |
sadbhāvenātha vā sarve gacchaṃti paramāṃ mudam || 29 ||
[Analyze grammar]

suvāsinībhyastāṃbūlaṃ kuṃkumaṃ kusumāni ca |
pradeyaṃ jāgaravatyā cānyeṣāmapi kiṃcana || 30 ||
[Analyze grammar]

naṭairviṭairbhaṭaiścaiva tathā prekṣaṇakotsavaiḥ |
sakhibhiḥ sahitā rātriṃ gāyanṛtyanhitāṃ nayet || 31 ||
[Analyze grammar]

evaṃ prabhātasamaye snātvā saṃpūjya pārvatīm |
tato vai sā samārohedvastrālaṃkṛtatoraṇam || 32 ||
[Analyze grammar]

tolayetsā tathāsīnaṃ guḍena lavaṇena ca |
kuṃkumenātha vā śaktyā karpūrāgarucaṃdanaiḥ || 33 ||
[Analyze grammar]

parvatānāmapicchedaiḥ kecidicchaṃti sūrayaḥ |
kuṃḍamaṃḍapasaṃbhārairmaṃtraistatraiva śobhayet || 34 ||
[Analyze grammar]

lavaṇena sahātmā hi tolyate ca guḍena vā |
kayāpi bhaktiparayā saubhāgyamatulīkṛtam || 35 ||
[Analyze grammar]

evaṃ devīṃ praṇamyāryāṃ kṣamāpya gṛhamāviśet |
āmaṃtrya śāstrakuśalānācāravidhipāragān || 36 ||
[Analyze grammar]

annaṃ ca madhuraprāyaṃ bhojayitvā suvāsinīḥ |
svayaṃ bhuṃjīta sahasā jñātījanabudhaiḥ svakaiḥ || 37 ||
[Analyze grammar]

yacca devyāḥ puro dattaṃ naive dyādi tadicchayā |
gṛhaṃ pratinayetsarvaṃ vibhajyābhrāṃtimānasā || 38 ||
[Analyze grammar]

tato dadyādgṛhasthebhyaḥ kṛtakṛtyā bhavettadā |
vidhirbhādrapade'pyeṣa susaundaryapradāyakaḥ || 39 ||
[Analyze grammar]

saptadhānyasvarūpāṃ ca śūrpe saṃpūjayedumām |
gomūtraprāśanaṃ hyatra tena gomūtrasaṃjñitā || 40 ||
[Analyze grammar]

māghamāsatṛtīyāyāṃ viśeṣaḥ śrūyatāmiti |
pūrvoktaṃ sakalaṃ kṛtvā prabhāte yavasaṃstaram |
tolayitvā kuṃdapuṣpaiḥ pūjayettatsutāmiti || 41 ||
[Analyze grammar]

etena kāraṇenoktā caturthī kundasaṃjñayā |
tṛtīyākhyaṃ mayaitatte kathitaṃ sarvakāraṇam |
jayayā munikanyānāṃ yatpurā samudāhṛtam || 42 ||
[Analyze grammar]

śrīkṛṣṇa uvāca |
āsīdvidarbhanagare veśyā sarvāṃgasuṃdarī |
tayā brāhmaṇavākyena sarvametatkṛtaṃ purā || 43 ||
[Analyze grammar]

bhuktvā bhogānmahīpṛṣṭhe dattvā dānaṃ yathepsayā || 44 ||
[Analyze grammar]

kālena samanuprāptā maraṇaṃ manujeśvara |
acintyā rājaduhitā sā babhūvātiśobhanā |
avaṃtisundarī nāma devānāmapi sundarī || 45 ||
[Analyze grammar]

yadi vaktrasahasrāṇāṃ sahasraṃ syātkathaṃcana |
tathāpi nirvarṇayitumaśakyā sā sulocanā || 46 ||
[Analyze grammar]

caitratṛtīyāmāhātmyātsā babhūva prabhāvatī |
mātāpitroratipreṣṭhā śiṣṭā nyajanavallabhā || 47 ||
[Analyze grammar]

labdhābdhisaṃbhavā yadvatkṛṣṇenākliṣṭakarmaṇā |
tataḥ sā bubhuje bhogānbhartrā sārddhaṃ mudā satī || 48 ||
[Analyze grammar]

yadadādbrāhmaṇebhyaḥ sā bhūṣaṇaṃ kaṭakādikam |
tatprabhāveṇa sā lebhe saubhāgyaṃ kiṃ tataḥ param || 49 ||
[Analyze grammar]

putrāṃśca janayāmāsa viṣṇuśakraparākramān |
sarvāstraśastrakuśalā nvedoktavidhipāragān || 50 ||
[Analyze grammar]

evaṃ rūpaṃ mahatprāpya saubhāgyaṃ putrasaṃpadam |
bhartrā sahaiva maraṇamaṃte prāpya pativratā || 51 ||
[Analyze grammar]

śakrādilokapā lānāṃ bhavaneṣu yathākramam |
ākramya brahmalokaṃ ca jagāma śivasātmatām || 52 ||
[Analyze grammar]

evaṃ yānyāpi kurute nārī vratamidaṃ śubham |
sā rūpasaubhāgyasutānprāpya svarge mahīyate || 53 ||
[Analyze grammar]

na durbhagā kule tasyāḥ kācidbhavati kanyakā |
na durvinītaśca suto na bhṛtyo'priyakṛdbhavet || 54 ||
[Analyze grammar]

na dāridryaṃ gṛhe tasminna vyādhirupajāyate |
yatra sā ramate sādhvī dhmātacāmīkaraprabhā || 55 ||
[Analyze grammar]

anyāśca yāścariṣyaṃti brāhmaṇānumate vratam |
saṃpūjya vācakaṃ bhaktyā bhūṣaṇācchādanādibhiḥ || 56 ||
[Analyze grammar]

tāḥ sarvasukhasaṃpannā avipannamanorathāḥ |
bhaviṣyaṃti kuruśreṣṭha tasyai devi namostu te || 57 ||
[Analyze grammar]

māghe mahārghyamaṇimaṃḍitapādapīṭhāṃ caitre vicitrakusumotkaracarcitāṃgīm |
śūrpaprarūḍhanavasasyamayīṃ nabhasye saṃpūjya śaṃbhudayitāṃ prabhavaṃti nāryaḥ || 58 ||
[Analyze grammar]