Chapter 21

yudhiṣṭhira uvāca |
atha pṛcchāmi bhagavanvrataṃ dvādaśamāsikam |
lalitārādhanaṃ nāma māsamāsakrameṇa vā || 1 ||
[Analyze grammar]

kṛṣṇa uvāca |
śṛṇu pāṃḍava yatnena yathā vṛttaṃ purātanam |
śaṃkarasya mahādevyāḥ saṃvādaṃ kurusattama || 2 ||
[Analyze grammar]

kailāsaśikhare ramye bahupuṣpaphalopage |
sahakāradrumacchanne caṃpakāśokabhūṣite || 3 ||
[Analyze grammar]

kadaṃbabakulāmoda vaśīkṛtamadhuvrate |
mayūraravasaṃghuṣṭe rājahaṃsopaśobhite || 4 ||
[Analyze grammar]

mṛgarkṣagajasiṃhaiśca śākhāmṛgagaṇāvṛte |
gaṃdharvayakṣadevarṣisiddhakinnarapannagaiḥ || 5 ||
[Analyze grammar]

tapasvibhirmahābhāgaiḥ sevamānaṃ samaṃtataḥ |
sukhāsīnaṃ mahādevaṃ bhūtasaṃghaiḥ samāvṛtam || 6 ||
[Analyze grammar]

apsarobhiḥ parivṛtamumā natvābravīdidam |
umovāca |
bhagavandevadeveśa śūlapāṇe vṛṣadhvaja || 7 ||
[Analyze grammar]

kathayasva maheśāna tṛtīyāvratamuttamam |
saubhāgyaṃ labhate yena dhanaṃ putrānpaśūnsukham || 8 ||
[Analyze grammar]

nārī svargaṃ śubhaṃ rūpamārogyaṃ śriyamuttamām |
evamukto dayitayā bhāryayā prītipūrvakam |
vihasya śaṃkaraḥ prāha kiṃ vratena tava priye || 9 ||
[Analyze grammar]

ye kāmāstriṣu lokeṣu divyā bhūmyaṃtīrakṣajāḥ |
sarvepi tena cāyattā vaśyastehaṃ yataḥ patiḥ || 10 ||
[Analyze grammar]

umovāca || satyametatsureśāna tvayi dṛṣṭe na durlabham |
kiṃcittribhuvanābhogabhūṣaṇe śaśibhūṣaṇe || 11 ||
[Analyze grammar]

bhaktyā striyo hi māṃ deva prajapaṃti śubhāśubham |
virūpāḥ sulabhāḥ kāścidaputrā bahuputrakāḥ || 12 ||
[Analyze grammar]

suśīlāstapasā kāścicchvaśrubhiḥ pīḍitā bhṛśam |
śaucācārasamāyuktā na rocantetha kasyacit || 13 ||
[Analyze grammar]

evaṃ vahuvidhairduḥkhaiḥ pīḍyamānāstu dāruṇaiḥ |
śaraṇaṃ māṃ prapannāstāḥ kṛpāviṣṭā tato hyaham || 14 ||
[Analyze grammar]

yena tāḥ sukhasaṃbhogarūpalāvaṇyasaṃpadā |
putraiḥ saubhāgyavittaughai ryuktāḥ syuḥ surasattama |
tanme kathaya tattvena vratānāmuttamaṃ vratam || 15 ||
[Analyze grammar]

īśvara uvāca |
māghe māsi site pakṣe tṛtīyāyāṃ yatavratāḥ |
mukhaṃ prakṣālya hastau ca pādau caiva samāhitāḥ || 16 ||
[Analyze grammar]

upavāsasya niyamaṃ daṃtadhāvanapūrvakam |
madhyāhne tu tataḥ snānaṃ bilvairāmalakaiḥ śubhaiḥ || 17 ||
[Analyze grammar]

snātvā tīrthajale śubhre vāsasī paridhāya ca |
sugaṃdhaiḥ sumanobhiśca prabhūtaiḥ kuṃkumādibhiḥ || 18 ||
[Analyze grammar]

arcayaṃti sadā devi tvāṃ bhaktyā bhaktavatsale |
karpūrādyaistathā dhūpairnaivedyaiḥ śarkarādibhiḥ || 19 ||
[Analyze grammar]

yadṛcchālābhasaṃpannairdhūpadīpārcanādibhiḥ |
nāmneśānīṃ gṛhītvā tu pratīkṣeddhaṭikāṃ tataḥ || 20 ||
[Analyze grammar]

pātre tāmramaye śuddhe jalākṣatavimiśrite |
sahiraṇyaṃ dvijaṃ kṛtvā maṃtrapūrvaṃ samādhinā || 21 ||
[Analyze grammar]

śirasi prakṣipettoyaṃ dhyāyaṃtī manasepsitam |
brahmāvartātsamāyātā brahmayonervinirgatā || 22 ||
[Analyze grammar]

bhadreśvarā tato devī lalitā śaṃkarapriyā |
gaṃgādvārāddharaṃ prāptā gaṅgājalapavitritā || 23 ||
[Analyze grammar]

saubhāgyārogyaputrārthamarthārthaṃ haravallabhe |
āyātā ghaṭikāṃ bhadre pratīkṣasva namonamaḥ || 24 ||
[Analyze grammar]

dattvā hiraṇyaṃ tattasmai prāśnīyācca kuśodakam |
ācamya prayato bhūtvā bhūbhisthā kṣapayetkṣapām || 25 ||
[Analyze grammar]

dhyāyamānā umāṃ daivīṃ harite yavasaṃstare |
dvitīyehni tataḥ snātvā tathaivābhyarcya pārvatīm || 26 ||
[Analyze grammar]

yathāśakti dvijānpūjya tato bhuñjīta vāgyatā |
evaṃ tu prathame māsi pūjanīyāsi kālike || 27 ||
[Analyze grammar]

dvitīye pārvatīnāma tṛtīye śaṃkarapriyā |
bhavānyatha caturthe tvaṃ skadamātātha pañcame || 28 ||
[Analyze grammar]

dakṣasya duhitā ṣaṣṭhe mainākī saptame smṛtā |
kātyāyanyaṣṭame māsi navame tu himādrijā || 29 ||
[Analyze grammar]

daśame māsi vikhyātā devi saubhāgyadāyinī |
umā tvekādaśe māsi gaurī tu dvādaśe parā || 30 ||
[Analyze grammar]

kuśodakaṃ payaḥ sarppirgomūtraṃ gomaya phalam |
niṃbapatraṃ kaṃṭakārī gavāṃ śṛṃgodakaṃ dadhi || 31 ||
[Analyze grammar]

pañcagavyaṃ tathā śākaḥ prāśanāni kramādamī |
māsimāsi sthitā hyevamupavāsaparāyaṇā || 32 ||
[Analyze grammar]

dadāti śraddhayaitāni vācake brāhmaṇottame |
kusuṃbhamājyaṃ lavaṇaṃ jīrakaṃ guḍameva ca || 33 ||
[Analyze grammar]

dattairebhiḥ sūryasthā tvaṃ sūryasthā tuṣyasi priye |
māsimāsi bhavenmantro gakāro dvādaśākṣaraḥ || 34 ||
[Analyze grammar]

oṅkārapūrvako devi namaskārāṃta īritaḥ |
ebhistvaṃ pūjitā maṃtraistuṣyasi vratataḥ priye || 35 ||
[Analyze grammar]

tuṣṭā tvabhīpsitānkāmāndadāsi prītipūrvakam |
samāpte tu vrate tasminbrāhmaṇaṃ vedapāragam || 36 ||
[Analyze grammar]

sahitaṃ bhāryayābhyarcya gaṃdhapuṣpādibhiḥ śubhaiḥ |
dvijaṃ maheśvaraṃ kṛtvā umāṃ bhāryāṃ tathaiva ca || 37 ||
[Analyze grammar]

annaṃ sadakṣiṇaṃ dadyāttathā śukle ca vāsasī |
raktaṃ vāsoyugaṃ dadyāttvāmuddiśya harapriye || 38 ||
[Analyze grammar]

brāhmaṇe śraddhayā yuktastasyāṃ phalamidaṃ śṛṇu |
daśavarṣasahasrāṇi lokānprāpya parāparān || 39 ||
[Analyze grammar]

modate bhartṛsahitā yatheṃdreṇa śacī tathā |
mānuṣatvaṃ punaḥ prāpya svena bhartrā sahaiva sā || 40 ||
[Analyze grammar]

puṇye kule śriyā yuktā nīrogā sukhamaśnute |
sapta janmāni yāvacca na vaidhavyamavāpnuyāt || 41 ||
[Analyze grammar]

putrānbhogāṃstathā rūpaṃ saubhāgyārogyameva ca |
ekapatnī tathā bhartuḥ prāṇebhyo'pyadhikā bhavet || 42 ||
[Analyze grammar]

śṛṇuyādvācyamānaṃ tu bhaktyā yā lalitāvratam |
mayā snehena kathitaṃ sāpi tatphalabhāginī || 43 ||
[Analyze grammar]

saṃpūjya lakṣalalitāṃ lalitāṃgayaṣṭiṃ gaṃdhodakāmṛtaghaṭīṃ śirasi kṣipedyaḥ |
sā svargametya lalitāsu lalāmabhūtā bhūpādhipaṃ patimavāpya bhuvaṃ bhunakti || 44 ||
[Analyze grammar]