Chapter 3

yudhiṣṭhira uvāca |
kīdṛśī kṛṣṇa sā māyā viṣṇoramitatejasaḥ |
yayā vyāmohitaṃ yacca jagadetaccarācaram || 1 ||
[Analyze grammar]

śrīkṛṣṇa uvāca |
yena dvīpe purā viṣṇurāste cakragadādharaḥ |
vāsudevaḥ sagaruḍaḥ sacakraśca śriyā saha || 2 ||
[Analyze grammar]

nīlotpaladalaśyāmaḥ kuṃḍalābhyāṃ vibhūṣitaḥ |
bhrājate mukuṭoddyotakeyūravanamālayā || 3 ||
[Analyze grammar]

tasya draṣṭumathābhyāgānnārado munisattamaḥ |
praṇamya stutibhirddevaṃ prāhedaṃ vismayānvitaḥ || 4 ||
[Analyze grammar]

saṃśayaṃ paripṛcchāmi bhagavanvaktumarhasi |
kā māyā kīdṛśī māyā kiṃrūpā ca kutastathā || 5 ||
[Analyze grammar]

tasyā darśaya me rūpaṃ māyāyāḥ puruṣottama |
yā ca mohayate sarvaṃ trailokyaṃ sacarācaram || 6 ||
[Analyze grammar]

ābrahmastaṃbaparyaṃtaṃ sadevāsuramānuṣam |
vaikuṃṭhaṃ vāsudevaṃ ca prasādaṃ kartumarhasi || 7 ||
[Analyze grammar]

evamuktastu muninā devadevo janārdanaḥ |
prahasyovāca devarṣe na kāryaṃ māyayā tvayā || 8 ||
[Analyze grammar]

bhūyo'pi mohayāmāsa somagrāheṇa nāradam |
nāradopi mahārāja provācedaṃ punaḥ punaḥ || 9 ||
[Analyze grammar]

māyāṃ darśaya me deva nānyadasti prayojanam |
athāsau viṣṇurutthāya śvetadvīpaṃ punaryayau || 10 ||
[Analyze grammar]

aḍulyagreṇa saṃgṛhya nāradaṃ muni puṅgavam |
tato mārgagataścakre ātmānaṃ dvijarūpiṇam || 11 ||
[Analyze grammar]

ṛgvedasadṛśaḥ sākṣādviṣṇurbrahmavadāsthitaḥ |
vṛddhadvijottamavapuḥ saṃśayo nālpako bhavat || 12 ||
[Analyze grammar]

śikhī kamaṃḍaludhṛto mṛgacarmopavītakaḥ |
yajñaśarmeti saṃjñāṃ ca cakre'sāvātmanaḥ prabhuḥ || 13 ||
[Analyze grammar]

kṛtvāpi kuśataṃtvagrapavitrakṛta lakṣaṇam |
āyayau sa mahīpṛṣṭhe jambūdvīpaṃ cacāra ha || 14 ||
[Analyze grammar]

vaidiśaṃ nāma nagaraṃ vetravatyāstaṭe śubham |
tasminsadodyamaparo dhanadhānyasa mṛddhimān || 15 ||
[Analyze grammar]

gomahiṣyajasaṃpūrṇaṃ pāśupālyena saṃsthitaḥ |
halakarmavṛṣāsakto vaiśyajātiraniṃditaḥ || 16 ||
[Analyze grammar]

gṛhakarmaṇi tanniṣṭhaḥ sīrabhadra iti smṛtaḥ |
tasyāṃtike hariḥ sākṣānnāradena sahāgataḥ || 17 ||
[Analyze grammar]

tenāpyāsanasanmānaiḥ samarthena kṛtādarau |
proktaṃ kenātha kiṃ tubhyaṃ sādhyamannaṃ na sādhyate || 18 ||
[Analyze grammar]

na vāsmadīyaṃ yuṣmākaṃ rocatennaṃ tato hariḥ |
prahasya pradadau tasmai varaṃ dvijavaro mahat || 19 ||
[Analyze grammar]

unnāmya vaktraṃ covāca devasaṃstutayā girā |
saṃtu te bahavaḥ putrāḥ kṣetravyāpārabuddhayaḥ || 20 ||
[Analyze grammar]

paśupāśagṛhāsaktāḥ śatārddhabalavāhanāḥ |
teṣāṃ putrāśca pautrāśca kṛṣi vṛddhipravarddhakāḥ || 21 ||
[Analyze grammar]

tvañca vṛttiśatairnnityaṃ varddhasva svajanāvṛtaḥ |
ityuktvā sa jagannātho vāsudevaḥ sanāradaḥ || 22 ||
[Analyze grammar]

kṣetre gosvāmināmānaṃ dvijaṃ dadṛśatuśca tau |
daridraṃ halakarmārttaṃ methyādyopaskarārditam || 23 ||
[Analyze grammar]

bhāgīrathyāstaṭe ramye veṇikāgrāmasannidhau |
tṛṇagulmalatācchannakṣetre ciṃtākulo hi saḥ || 24 ||
[Analyze grammar]

tābhyāṃ saṃprārthito vipro bhojyaṃ prādācca kiṃcana |
sakāśaṃ tava saṃprāptau dūrādatithidharmiṇau || 25 ||
[Analyze grammar]

ityukto'sau dvijaśreṣṭho halakarma vidhāya tat |
ājagāma gṛhaṃ tūrṇaṃ tābhyāṃ saha sasaṃbhramam || 26 ||
[Analyze grammar]

cakre caivādaraṃ bhaktyā svayamāsanasatkriyām |
pādaśaucaṃ tathābhyaṃgaṃ kṛtvātra ca susaṃskṛtam || 27 ||
[Analyze grammar]

saha patnyā satanayo bhojyaṃ bhuktiṃ cakāra saḥ |
bhuktabhojyau ca śarvaryāṃ sukhaṃ suptau niśātyaye || 28 ||
[Analyze grammar]

prayātau dadatuḥ śreṣṭhaṃ varaṃ tasmai dvijātaye |
mā te bhavatu gosvāminkadācidapi karṣaṇam || 29 ||
[Analyze grammar]

mā dhānyaṃ makhasaṃtāna matprasādādvijottama |
ityuktvā jagmatustūrṇaṃ punaḥ papraccha nāradaḥ || 30 ||
[Analyze grammar]

kimidaṃ vada deveśa śāparūpo varastvayā |
bhadra gosvāmine dattaḥ kiṃ ca vaiśye tathāvidhaḥ || 31 ||
[Analyze grammar]

ityuktaḥ prāha deveśaḥ śṛṇu nārada madvacaḥ |
paramārthaṃ pravakṣye'haṃ tava saṃśayakartanam || 32 ||
[Analyze grammar]

saṃvatsareṇa yatpāpaṃ matsyaghātī samācaret |
tadahne kena kurute lāṃgalī nātra saṃśayaḥ || 33 ||
[Analyze grammar]

ato'rthaṃ kṛṣipālyena narakaṃ yāti lāṃgalī |
tadabhāvānna kalpaḥ syāttena mokṣo mayi dhruvam || 34 ||
[Analyze grammar]

mayi bhukte prasanne vā ko viśeṣo'sya nārada |
yadi svargo'tha vā mokṣo na saṃpadyeta tadvṛthā || 35 ||
[Analyze grammar]

idānīṃ halakāluṣyaiḥ sīrabhadro viceṣṭitaiḥ |
bahupāpaprasaṃgena ghoraṃ narakameṣyati || 36 ||
[Analyze grammar]

saputrapautrasaṃtāno hṛtorthastadgṛhe mayā |
na bhuktaṃ na ca viśrāntaṃ viśrāṃtaṃ dvijaveśmani || 37 ||
[Analyze grammar]

so'pi dvijo muniśreṣṭha saṃsārāduttariṣyati |
ityevaṃ saṃvadaṃtau ca jagmaturmārgamuttamam || 38 ||
[Analyze grammar]

kānyakubjasya sāmīpye saraḥ śreṣṭhamapaśyatām |
haṃsakāraṇḍa vākīrṇaṃ cakravākopaśobhitam || 39 ||
[Analyze grammar]

padminījalakahlāraraktotpalasitotpalaiḥ |
chāditaṃ padminīpatrairmatsyaiḥ kūrmairjjalodbhavaiḥ || 40 ||
[Analyze grammar]

taṭai ramyairghanairvṛkṣaiḥ ketakīkhaṇḍamaṃḍitam |
ketakīkusumāmodairllakucaistaṭamaṃḍitaiḥ || 41 ||
[Analyze grammar]

dātyūhaśikhibhāruṇḍacakorādyaiśca saṃkulam |
kuravaiścātakai ramyaṃ kekākulanināditam || 42 ||
[Analyze grammar]

jalakukkuṭasaṃgītaṃ haṃsasārasaśobhitam |
jīvaṃjīvakahārītacakorairupaśobhitam || 43 ||
[Analyze grammar]

vaśiṣṭhasya munernāmnā vikhyātaṃ śrīmahodayam |
asminnadya praveṣṭavyaṃ mahājanavivekinām || 44 ||
[Analyze grammar]

sthātavyaṃ puratasteṣāṃ tasmātsnānaṃ samācaret |
ityuktvā keśavaḥ pāpaṃ sasnau prāgeva tajjalaiḥ || 45 ||
[Analyze grammar]

yattīrthalokaṃ vikhyātaṃ snātvā tīraṃ samāśritaḥ |
prahare vāsudevasya nārado'pi mudā yutaḥ || 46 ||
[Analyze grammar]

ācamya sasnau tīrthena kṣaṇāttīrthamavāpya ca |
yāvaduttiṣṭhate toyātsnātvā ṛṣirudāradhīḥ || 47 ||
[Analyze grammar]

tāvatstrītvaṃ samāpanno nāradaḥ kena varṇyate |
yasyāstu vistṛte netre vaktraṃ candropamaṃ śubham || 48 ||
[Analyze grammar]

smarapāśopamau karṇau kapolau kanakojjvalau |
nāsikā tilasūnena kāmacāpopame bhruvau || 49 ||
[Analyze grammar]

daśanā hīrakaistulyā vidrumābhaḥ śubhādharaḥ |
mayūrasya kalāpena tulya kacanibaṃdhanam || 50 ||
[Analyze grammar]

śaṃkharekhātrayeṇaiva kaṃṭhadeśo virājate |
mādhavīlatayā tulyau maṃjū tasyā bhujau śubhau || 51 ||
[Analyze grammar]

yutau raktotpalābhāsau pāṇī raktanakhāṃgulī |
pīnāvatuṃgatanudhṛtkaṭhinau kalaśopamau || 52 ||
[Analyze grammar]

stanāvaviralau snigdhau cakravākayugopamau |
svalpakaṃ madhyadeśaṃ tu muṣṭigrāhyamasaṃśayam || 53 ||
[Analyze grammar]

nābhimaṃḍalagāṃbhīryaṃ lāvaṇyaṃ kena varṇyate |
valitrayeṇa vikṛtā romarājirvirājitā || 54 ||
[Analyze grammar]

nayane ca punastasyā mṛgyā iva suśobhane |
nitaṃbo biṃbaphalakā manmathāyatanaṃ śubham || 55 ||
[Analyze grammar]

raṃbhāyugmopamāvūrū smarabāṇanibaṃdhanau |
viparītaratāyāsakhedabhārasahau dṛḍhau || 56 ||
[Analyze grammar]

navakundalatāsārasaralaṃ sanibaṃdhanam |
jaṃghāyugaṃ mahārāja gūḍhagulpha yugaṃ tathā || 57 ||
[Analyze grammar]

raktāṃgulīlatātalpanakhacandrakayācitam |
caraṇāraviṃdayugalaṃ saraktaṃ supratiṣṭhitam || 58 ||
[Analyze grammar]

saivaṃvidhā tadā nārī sarvalakṣaṇapū jitā |
babhūva kṣaṇamātreṇa jagadvyāmohakāriṇī || 59 ||
[Analyze grammar]

kṣīrodamathanottīrṇā lakṣmīmanyābhivocchritām |
dṛṣṭvāpyadarśanaṃ prāpto māyayā madhusūdanaḥ || 60 ||
[Analyze grammar]

saṃprāpyate ca sā kālasaṃgarāhāriṇī yathā |
āsta ekākinī mugdhā kuryāddigavalokanam || 61 ||
[Analyze grammar]

athājagāma taṃ deśaṃ nāmnā tāladhvajo nṛpaḥ |
saha sainyaiḥ parivṛtaḥ puraṃdara ivāmaraiḥ || 62 ||
[Analyze grammar]

gajārūḍhairhayārūḍhai rathārūḍhairnarottamaiḥ |
vimānayānayugmasthaistathāṃtaḥpurikājanaiḥ || 63 ||
[Analyze grammar]

dhvajātapatrakalilairanīkaiḥ parivāritaḥ |
tena sā sahasā dṛṣṭā nārī kamalalocanā || 64 ||
[Analyze grammar]

babhūva kṣaṇamātreṇa kaṃdarpaśarapīḍitaḥ |
keyaṃ kasya kutaḥ prāptā kiṃ devī vātha mānuṣī || 65 ||
[Analyze grammar]

adṛṣṭarūpāpsarasā kāciddevī samāgatā |
ahorūpaṃ surūpāyā gocare paritaḥ pumān || 66 ||
[Analyze grammar]

mumūrṣurjāyate mohādanudigdhahato yathā |
iti saṃcintya hṛdaye rājā tāladhvajo'ntike || 67 ||
[Analyze grammar]

uvāca nārīṃ mugdhāṃ tāṃ śṛṇu madvacanaṃ śubhe |
kā tvaṃ kasya kutaḥ prāptā deśametaṃ śucismite || 68 ||
[Analyze grammar]

ityukte sāśru cārvaṃgī prāha māṃ viddhyayonijām |
pitrā mātrā vihīnāṃ ca tathādyāpi kumārikām || 69 ||
[Analyze grammar]

nirāśrayāṃ viditvaināṃ tato jātaḥ smarārditaḥ |
āropya hayapṛṣṭhe tāṃ tato rājāgato gṛham || 70 ||
[Analyze grammar]

nītvā vivāhayāmāsa śāstroktavidhinā tataḥ |
reme prāsādaśṛṃgāgre paryaṃke sitayā tayā || 71 ||
[Analyze grammar]

udyānabhavyabhūmīṣu nadīnāṃ pulineṣu ca |
parvatānāṃ nitaṃbeṣu nirjhareṣu guhāsu ca || 72 ||
[Analyze grammar]

padmakhaṃḍeṣu phulleṣu śobhiteṣu sarassu ca |
prayāgādiṣu tīrtheṣu nadīnāmāśrameṣu ca || 73 ||
[Analyze grammar]

divyāvasatharamyeṣu velākūleṣu pārthivaḥ |
yāvaddvādaśa varṣāṇi ekāhamapi bhārata || 74 ||
[Analyze grammar]

tatastrayodaśe varṣe tasyā garbho'bhavanmahān |
etasmingarbhasaṃpūrṇe jātaṃ dīrghamalābukam || 75 ||
[Analyze grammar]

tadbhedāhatakuṃbheṣu bījaprārohaṇānnarāḥ |
babhūvurddhātuśūnyā vai divyadehabalotkaṭāḥ || 76 ||
[Analyze grammar]

paṃcāśatsaṃkhyayā jātā upasargādivarjitāḥ |
ārūḍhayauvanāḥ sarve sutāḥ saṃgrāmakovidāḥ || 77 ||
[Analyze grammar]

teṣāṃ putrāśca pautrāśca babhūvuḥ surasattamāḥ |
yuyudhuḥ śarasaṃghātaiścakraśūlāsipaṭṭiśaiḥ || 78 ||
[Analyze grammar]

hayairanyairgajairanyaiḥ krodhāṃdhāḥ kauravā iva |
pāṃḍavaiḥ saha saṃgrāme yuyudhuḥ kṣayamaṃjasā || 79 ||
[Analyze grammar]

sapadātigajārohāḥ sāṃtaḥpurayugecchayā |
vineśurabdhimāsādya siṃdhūnāṃ pravahā iva || 80 ||
[Analyze grammar]

sāsisabalavistārāḥ sadarpāḥ samahocchrayāḥ |
indralokopamaṃ sarvaṃ kulaṃ naṣṭaṃ kṣaṇaṃ tadā || 81 ||
[Analyze grammar]

saṃdṛśya nāradīyaiṣā vinaṣṭaṃ svakulaṃ raṇe |
ruroda snehasaṃyuktai rasaiḥ kaluṣayā girā || 82 ||
[Analyze grammar]

hā daiva hā vidhe pāpa hā kṛtānta namaskṛta |
darśayitvā vidhānaṃ me punarnetre hṛte tvayā || 83 ||
[Analyze grammar]

ityuktvā svamurohastairjaghāna bhṛśaduḥkhitā |
bhūmau mūrcchāturā bhūtvā punaḥ prāptā vicetanam || 84 ||
[Analyze grammar]

so'pi rājā viṣaṇṇo'sau nirviṇṇaḥ śokasāgare |
bhūmau nipatito duḥkhādruroda bhṛśaduḥkhitaḥ || 85 ||
[Analyze grammar]

viṣaṇṇo maṃtribhiḥ sārdhaṃ vṛddhaśokena saṃyutaḥ |
etasminnaṃtare viṣṇurājagāma dvijaiḥ saha || 86 ||
[Analyze grammar]

dvijaveṣaparicchanna upaviṣṭaḥ sukhāsane |
tataḥ purassaro bhūtvā cakre dharmārthadarśanam || 87 ||
[Analyze grammar]

kiṃ rodanena bahunā yuvayoḥ kleśakāriṇā |
śrūyatāṃ viṣṇumāyaiṣā svapnadṛṣṭadhanopamā || 88 ||
[Analyze grammar]

śobhane yādṛśaḥ śokaḥ kṛtaḥ saṃsārasāgare |
sarveṣāmeva bhūtānāṃ pariṇāmoyamīdṛśaḥ || 89 ||
[Analyze grammar]

puraṃdarasahasrāṇi cakravartiśatāni ca |
nirvāpitāni kālena pradīpa iva vāyunā || 90 ||
[Analyze grammar]

ye'pi śoṣayituṃ śaktāḥ samudraṃ grāhasaṃkulam || 99 ||
[Analyze grammar]

kuryuśca karayugmena cūrṇaṃ meruṃ mahītale || 91 ||
[Analyze grammar]

ūddhartuṃ dharaṇīsaṃjñāṃ grahītuṃ candrabhāskarau |
praviṣṭāste tu kālena kṛtāṃtavadanaṃ tadā || 92 ||
[Analyze grammar]

durgastrikūṭaḥ parikhāḥ samudrā rakṣāṃsi yodhā dhanadācca vittam |
maṃtraśca yasyauśanasā praṇītaḥ sa rāvaṇo daivavaśādviṣaṇṇaḥ || 93 ||
[Analyze grammar]

saṃgrāme gajaturagasamākule'pi vādādagnau vā gatavivare mahodadhau vā |
sarvairvā saha vasatāmudīrṇakopairnābhāvyo bhavati kadācideva nāśaḥ || 94 ||
[Analyze grammar]

pātālamāviśatu yātu surendralokamārohatu kṣitidharādhipatiṃ sumerum |
maṃtrauṣadhipraharaṇaiśca karotu rakṣāṃ yadbhāvi tadbhavati nātha vibhāvito'smi || 95 ||
[Analyze grammar]

roditi kaścidathāśrudhautānanagurutaraśokavihvalaḥ |
pravikaṭacaraṇavānapi nṛtyati kaściddharmādivigrahaḥ || 96 ||
[Analyze grammar]

gāyati hṛdayahāri sukhanirbharamāyatavistṛtā'dharo'dhikam |
sāra eṣa raṃgodaragatanaṭapaṭahākāma evāyam || 97 ||
[Analyze grammar]

ityevaṃ dharmamuddiśya viṣṇuḥ saṃsāraceṣṭitam |
tūṣṇīṃ babhūvānupadaṃ tataste dvijapuṅgavāḥ || 98 ||
[Analyze grammar]

uttiṣṭha snāhi putrāṇāṃ prakuruṣvaurdhvadehikam |
mā śokaṃ viṣṇumāyaiṣā viṣṇunā nirmitā svayam || 99 ||
[Analyze grammar]

ityuktā cārusarvāṃgī sa babhūvācalaḥ pumān |
sa eṣa sadṛśākāro nāradastatkṣaṇe'bhavat || 100 ||
[Analyze grammar]

so'pi rājā dadarśātha taṃ samaṃtripurohitaḥ |
sāṃtaḥpuramidaṃ sarvamiṃdrajālopamaṃ kṣaṇāt || 101 ||
[Analyze grammar]

nāradaṃ muniśārdūlaṃ jaṭābhārabhayānakam |
gauravarṇaṃ jvalaṃtaṃ ca brāhamyā lakṣmyā virājitam || 102 ||
[Analyze grammar]

śikhā kamaṇḍaludharaṃ vīṇādaṇḍakaraṃ tathā |
brahmasūtreṇa śubhreṇa kaupīnācchādanena ca |
pādukābhyāṃ sthitaṃ tīre saraso brāhmaṇāsane || 103 ||
[Analyze grammar]

saṃpragṛhya karāgreṇa jagāmādarśanaṃ hariḥ |
ambareṇa suraiḥ sārddhaṃ tasmāddeśādyudhiṣṭhira || 104 ||
[Analyze grammar]

śvetadvīpamathāsādya prāha devo muniṃ nṛpa |
devarṣe yattvayā pṛṣṭaṃ pūrvaṃ māyākathāṃ prati || 105 ||
[Analyze grammar]

māyā yayedṛśī māyā yatsvarūpā yadātmikā |
sā te māyā mayā brahmanvaiṣṇavī saṃpradarśitā || 106 ||
[Analyze grammar]

evamuktvā munivaraṃ devadevo janārdanaḥ |
babhūvāntarhitassadyo devarṣestasya paśyataḥ || 107 ||
[Analyze grammar]