Chapter 30

sūta uvāca |
yadā te cīnadeśasthāstadāhūto nṛpeṇa vai |
kāmapālena bho vipra lakṣaṇo nakulāṃśakaḥ || 1 ||
[Analyze grammar]

jayacaṃdra mahābhāga sāvadhānaṃ vacaḥ śṛṇu |
vaiśākhaśukla saptamyāṃ muhūrto'yaṃ dināgame || 2 ||
[Analyze grammar]

ato vai lakṣaṇo vīraścaikākī māṃ samāpnuyāt |
gṛhītvā matsutāṃ dolāṃ gamiṣyati tavāṃtikam || 3 ||
[Analyze grammar]

senānvitaṃ ca taṃ jñātvā mahīrājo mahābalaḥ |
grahīṣyati parājitya tasmādyogyaṃ vaco mama || 4 ||
[Analyze grammar]

iti tatratyavacanaṃ matvā rājā prasannadhīḥ |
lakṣaṇaṃ hastinīsaṃsthaṃ śataśūrasamanvitam || 5 ||
[Analyze grammar]

āhūya preṣayāmāsa kāmapālāya dhīmate |
mārge paṃcadinaṃ vīra uṣitvā tadgṛhaṃ yayau || 6 ||
[Analyze grammar]

tadā padmākaraḥ śyālo jñātvā lakṣaṇamāgatam |
bhūmirājaṃ samāhūya tena yuddhamacīkarat || 7 ||
[Analyze grammar]

lakṣaṇo nakulāṃśaśca dṛṣṭvā śatrumupasthitam |
svaśaraistarpayāmāsa rājarājaṃ mahābalam || 8 ||
[Analyze grammar]

mūrcchayitvā mahīrājaṃ hatvā paṃcaśataṃ balī |
kāmapālaṃ samāgamya natvā vāsamakārayat || 9 ||
[Analyze grammar]

utthitaśca mahīrājo gatvā padmākaraṃ prati |
vacanaṃ prāha kāryārthī śṛṇu mitra vaco mama || 10 ||
[Analyze grammar]

lakṣaṇo me mahāñchatrussa ca tvadgehamāgataḥ |
yadi dāsyasi taṃ baddhvā tvāṃ madaṃgaṃ karomyaham || 11 ||
[Analyze grammar]

iti śrutvā sa lobhātmā dattvā hālāhalaṃ viṣam |
baddhvā taṃ lakṣaṇaṃ vīraṃ mahīrājāya cārpayat |
hatvā tāñchataśūrāṃśca guptavārtāmakārayan || 12 ||
[Analyze grammar]

jñātvā tatpadminī nārī duḥkhitālapya vai bhṛśam |
caṃḍikāṃ pūjayāmāsa patimaṃgalahetave || 13 ||
[Analyze grammar]

tadā prasannā sā devī varadā sarvamaṃgalā |
āśvāsya padminīṃ nārīṃ lakṣaṇāṃtamupāyayau || 14 ||
[Analyze grammar]

svapne tamāha sā devī hrīṃ phaṭ gheghe japaṃ kuru |
asya maṃtraprabhāvācca sarvavighnaḥ praṇaśyati || 15 ||
[Analyze grammar]

sa buddhvā lakṣaṇo vīrastaṃ maṃtraṃ ca jajāpa ha |
āṣāḍhe māsi saṃprāpte kṛṣṇāṃśādyā gṛhaṃ yayuḥ || 16 ||
[Analyze grammar]

tālanaśca yutastābhyāṃ kalyakubjamupāyayau |
na dṛṣṭo lakṣaṇo vīro jayacaṃdrapriyaṃkaraḥ |
jñātvā tatkāraṇaṃ taiśca kṛtaṃ yogamayaṃ vapuḥ || 17 ||
[Analyze grammar]

dhānyapālaḥ kāṃsyadhārī vīṇādhārī ca tālanaḥ |
lallasiṃho mṛdaṃgāṃko yayuste vai mahāvatīm || 18 ||
[Analyze grammar]

sabhāṃ parimalasyaiva gatvā te yogarūpiṇaḥ |
cakrurgānaṃ mudā yuktāḥ sarve te mohamāgatāḥ || 19 ||
[Analyze grammar]

prasannaśca tadā rājā muktāmālāṃ svakaṇṭhagām |
tālanāya dadau prītyā tābhyāṃ svarṇāṃgulīyake || 20 ||
[Analyze grammar]

tadā te harṣitāḥ sarve kṛṣṇāṃśaṃ prati cāyayuḥ |
jñātvā kṛṣṇāṃśa evāpi dhṛtvā yogamayaṃ vapuḥ |
yayau biṃdugaḍhaṃ vīrastālanādyaissamanvitaḥ || 21 ||
[Analyze grammar]

haṭṭamadhye samāgamya kṛtvā rāsotsavaṃ śubham |
gehaṃ padmākarasyaiva gatvā te nanṛturmudā || 22 ||
[Analyze grammar]

etasminnaṃtare sarvā yoṣitastatra cāgatāḥ |
veṇuvādyavṛtaṃvīraṃ kṛṣṇāṃśaṃ dadṛśurmuhuḥ |
mohitāstasya gānena jaḍībhūtā dhanaṃ daduḥ || 23 ||
[Analyze grammar]

tadā tu padminī nārī sarvalakṣaṇasaṃyutā |
jñātvā kṛṣṇāṃśamevāpi ruroda ciramāturā || 24 ||
[Analyze grammar]

uvāca ca vilapyāśu matpatirla kṣaṇo balī |
mahīrājena śūreṇa kārāgāre balātkṛtaḥ |
ahaṃ yoṣā bhavānyogī kathaṃ kāryaṃ bhaviṣyati || 25 ||
[Analyze grammar]

iti śrutvā tu sa nṛpo bhujamutthāpya satvaram |
āśvāsya padminīṃ nārīṃ yayuste dehalīṃ prati |
rājadvāramupāgamya kṛṣṇāṃśassa nanarta ha || 26 ||
[Analyze grammar]

mahīrājastu balavānprasannastasyalīlayā |
vāṃchitaṃ brūhi kṛṣṇāṃśa sarvaṃ yogindadāmyaham || 27 ||
[Analyze grammar]

iti śrutvā bhūpavaco vihasyovāca taṃ prati |
kārāgāraṃ lohamayaṃ nṛpayogyaṃ ca me nṛpa |
darśayāśu svakīyaṃ vai bhavānbhūpaśiromaṇiḥ || 28 ||
[Analyze grammar]

iti śrutvā sa nṛpatirmohitaḥ kṛṣṇalīlayā |
darśayitvā ca vai śīpraṃ punastebhyo dadau dhanam || 29 ||
[Analyze grammar]

tataste yoginassarve saṃprāpya ca mahāvatīm |
natvā parimalaṃ bhūpaṃ gaditvā sarvakāraṇam || 30 ||
[Analyze grammar]

svasenāṃ sajjayāmāsa cāhlādaśca nṛpājñayā |
pañcalakṣaṃ mahāvatyā hayārūḍhāssamāsthitāḥ || 31 ||
[Analyze grammar]

tālanassapta lakṣāṇi sainyānyāhūya cāgataḥ |
evaṃ dvādaśalakṣāṇi kṣatriyā raṇadurmadāḥ |
dehalīṃ ca samājagmussarvaśastrasamanvitāḥ || 32 ||
[Analyze grammar]

etasminnaṃtare mantrī cadrabhaṭṭo viśāradaḥ |
sarvaśāstrārthakuśalo vaiṣṇavīśaktipūjakaḥ || 33 ||
[Analyze grammar]

mahīrājaṃ samāgamya vacaḥ prāha śṛṇuṣva bhoḥ |
mayā vai ca rahaḥ krīḍā dṛṣṭā devīprasādataḥ || 34 ||
[Analyze grammar]

tatrodayaśca kṛṣṇāṃśaḥ pūrṇabrahmāṇamāgamat |
vacaḥ prāha prasannātmā śṛṇu tvaṃ sattvavigraha || 35 ||
[Analyze grammar]

agnivaṃśavināśāya cādya yāsyāmi dehalīm |
hatvāhaṃ kauravāṃśāṃśca sthāpayitvā kaliṃ bhuvi || 36 ||
[Analyze grammar]

punastavāntikaṃ prāpya rahaḥ krīḍāṃ karomyaham |
ityuktvā biṃdulārūḍhaḥ sa vīrastvāmupa sthitaḥ |
ityahaṃ dṛṣṭavānbhūpa kṛṣṇāṃśaṃ yoganidrayā || 37 ||
[Analyze grammar]

iti tasya vacaḥ śrutvā sa bhūpo vismayānvitaḥ |
bhayabhītaḥ sahasrāṇi śūrānāhūya satvaram |
tebhyaśca lakṣaṇaṃ dattvā vacanaṃ prāha tānprati || 38 ||
[Analyze grammar]

padmākarāya bhūpāya gatvā dattvāśu lakṣaṇam |
mamāntikamupāgamya kāraṇaṃ vadatāśu tat || 39 ||
[Analyze grammar]

iti śrutvā tu te sarve vahnivaṃśyā mahābalāḥ |
gatvā tatra tathā kṛtvā mahīrājamupāgaman || 40 ||
[Analyze grammar]

bhagadaṃtaśca teṣāṃ tu sahasrāṇāṃ ca nāyakaḥ |
mahīrājaṃ vacaḥ prāha śṛṇu tannṛpabhāṣitam || 41 ||
[Analyze grammar]

padminī me svasā rājan guptavidyāviśāradā |
tayā yajñapatirdevaḥ samyagārādhitaḥ purā || 42 ||
[Analyze grammar]

dattastena varo ramyo hyantardhānamayaḥ paraḥ |
sā tu taṃ lakṣaṇaṃ kāṃtamaṃtardhānaṃ kariṣyati |
iti śrutvā sa nṛpatiḥ paramānandamāptavān || 43 ||
[Analyze grammar]

etasminnaṃtare prāptāḥ kṛṣṇāṃśādyā mahābalāḥ |
rurudhurdehalīṃ sarvāṃ mahīrājena pālitām || 44 ||
[Analyze grammar]

sa tadā pṛthivīrājo gṛhītvā bahubhūṣaṇam |
sarvebhyaśca dadau premṇā vacanaṃ prāha namradhīḥ || 45 ||
[Analyze grammar]

lakṣaṇo nāma te rājā kārāgāre na vai mama |
yadi mannagare cāsti tarhi te roṣa īdṛśaḥ || 46 ||
[Analyze grammar]

ityuktvā taṃ ca kṛṣṇāṃśaṃ darśayāmāsa vai gṛham || |
mahādevasya śapathaṃ kṛtavānbhūpatirbhayāt || 47 ||
[Analyze grammar]

tadodayo bhūpavacaḥ satyaṃ matvā suduḥkhitaḥ |
svakīyaiḥ saha saṃprāpto grāmaṃ biṃdugaḍhaṃ śubham || 48 ||
[Analyze grammar]

kāmapālastu tacchrutvā kṛṣṇāṃśāgamanaṃ balī |
baliṃ bahuṃ gṛhītvāśu kṛṣṇāṃśaṃ śaraṇaṃ yayau |
prāṃjaliḥ praṇato bhūtvā vacanaṃ prāha bhīrukaḥ || 49 ||
[Analyze grammar]

sutā me padminī nārī lakṣaṇena samanvitā |
na jñātvā kva gatā'smābhissatyaṃ satyaṃ bravīmyaham || 50 ||
[Analyze grammar]

iti tadvacanaṃ śrutvā kṛṣṇāṃśaḥ svabalaissaha |
kānyakubjaṃ samāgatya jayacandramuvāca ha || 51 ||
[Analyze grammar]

bhrātṛjastava bhūpāla padminyā lakṣaṇo'nvitaḥ |
kāmapālagṛhe nāsti niścito bahudhā mayā || 52 ||
[Analyze grammar]

na jāne kva gato rājā mama prāṇasamo bhuvi |
yadi bhūpa na paśyāmi satyaṃ prāṇāṃstyajāmyaham || 53 ||
[Analyze grammar]

hā ratnabhānutanaya viṣṇubhakta śubhaṃkara |
svamitraṃ māṃ parityajya kāṃ diśaṃ gatavānbhavān |
ityuktvā mūrchitaścāsītkṛṣṇāṃśo vaiṣṇavapriyaḥ || 54 ||
[Analyze grammar]

tadā svarṇavatī devī svadāsyā śobhayā saha |
dhṛtvā śukamayaṃ rūpaṃ tatrāgatya svamūrtigā || 55 ||
[Analyze grammar]

tayā saṃpreṣitā śobhā mlecchamāyāviśāradā |
jayacaṃdramupāgamya dhṛtvā divyamayaṃ vapuḥ || 56 ||
[Analyze grammar]

uvāca vacanaṃ tatra śṛṇu bhūpaśiromaṇe |
māyāvinī ca māṃ viddhi śobhanāṃ nāma viśrutām || 57 ||
[Analyze grammar]

daṃpatī tava bhūpāla saṃhṛtau yena yatra vai |
tatrāhaṃ ca gamiṣyāmi mahāmadasamanvitā || 58 ||
[Analyze grammar]

āhlādaścendulo vīro devo vai tālano balī |
kṛṣṇāṃśapālitāssarve yāsyāmo bhūpate vayam || 59 ||
[Analyze grammar]

ityuktvā śobhanā veśyā kṛtvā yogamayaṃ vapuḥ |
mahāmadaṃ samāruhya paiśācaṃ rudrakiṃkaram |
prayayau tānpuraskṛtya yogiveṣānmahāba lān || 60 ||
[Analyze grammar]

āhlādo gajasaṃstho vai karālārūḍha indulaḥ |
tālanaḥ siṃhinīsaṃstho devasiṃho manorathe |
kṛṣṇāṃśo bindulārūḍho nartayāmāsa taṃ hayam || 61 ||
[Analyze grammar]

kāmarūpamayaṃ deśaṃ śatayojanagāminaḥ |
balavaṃtaśca saṃprāptā gehegehe janejane |
lakṣaṇaṃ śodhayāmāsurna prāptāstatra taṃ nṛpam || 62 ||
[Analyze grammar]

punarmayūranagaraṃ śobhanā taiḥ samanvitā |
cinvatī taṃ manuṣyeṣu na prāptā tatra vai nṛpam || 63 ||
[Analyze grammar]

punarinnagaḍhagrāmaṃ śobhanā ca janejane |
lakṣaṇaṃ mṛgayāmāsa na prāpa tatra lakṣaṇam || 64 ||
[Analyze grammar]

gatvā bāhlīkanagaraṃ śobhanā taissamanvitā |
lakṣaṇaṃ ca nṛpaśreṣṭhaṃ nāpaśyattatra duḥkhitā || 65 ||
[Analyze grammar]

punaḥ svadeśamāgamya bāhlīkaṃ mlecchavāsinam |
markaṭeśvaramīśānaṃ tatrāha vanavāsinam |
pūjayitvā ca sā veśyā gānanṛtyaparābhavat || 66 ||
[Analyze grammar]

sa devo bhūmimadhyāt samāgamya mudānvitaḥ |
kṛṣṇāṃśaṃ praṇato bhūtvā'bravīnmlecchaprapūjitaḥ || 67 ||
[Analyze grammar]

ahaṃ kālāgnirudreṇa bhūmigarte suropitaḥ |
asamarthaṃ ca māṃ viddhi gaccha vīra yathāsukham || 68 ||
[Analyze grammar]

iti śrutvā ca sā śobhā nirāśābhūttadā svayam || 69 ||
[Analyze grammar]

punaḥ svarṇavatīṃ prāpya sarvamevā dito'bravīt |
triṃśadabdaiśca kṛṣṇāṃśe caitraśukla samāgate || 70 ||
[Analyze grammar]

tānāśvāsya suvarṇāṃgī pūjayāmāsa caṃḍikām |
navarātraṃ gataṃ tasyā bhojanācchādanaṃ vinā |
niśīthānte tamaḥprāpte gatvāha jagadambikā || 71 ||
[Analyze grammar]

padminī nāma yā nārī maṇidevasya vai priyā |
jātā sā kāmapālasya gṛhe yajñāvamānitā || 72 ||
[Analyze grammar]

senāpatiḥ kuberasya maṇidevo hi sa smṛtaḥ |
pūrvaṃ hi bhīmasenena yakṣayuddheṣu ghātitaḥ || 73 ||
[Analyze grammar]

tadā tatpadminī nārī devadevamumāpatim |
tuṣṭāva ca nirāhārā matpatiṃ dehi śaṃkara || 74 ||
[Analyze grammar]

śatavarṣāṃtare devo mahādeva uvāca tām |
kalau vikramakāle hi śatadvādaśake'ntike || 75 ||
[Analyze grammar]

nakulāṃśaṃ ca saṃprāpya bhuktvā tena mahatsukham |
tadviyogena saṃtyajya dehaṃ padmānuvāsitam |
svapatiṃ ca tadā prāpya kailāsaṃ punareṣyasi || 76 ||
[Analyze grammar]

mahāvatīṃ purīṃ ramyāṃ rāṣṭrapālāya śāradā |
kariṣyati tadā devī maṇidevastu tvatpatiḥ || 77 ||
[Analyze grammar]

tayā viracito bhūmau grāmarakṣārthamudyataḥ |
prāptastvāṃ padminīṃ nārīṃ kailāsaṃ punareṣyati || 78 ||
[Analyze grammar]

ataḥ svarṇavati tvaṃ vai kailāsaṃ guhyakālayam |
gatvāśu padminīṃ tatra bodhayāśu vacaḥ kuru || 79 ||
[Analyze grammar]

iti śrutvā svarṇavatī padminīṃ prati cāgamat |
vṛttāṃtaṃ kathayitvāgre padminīṃ tu dayāturā || 80 ||
[Analyze grammar]

kāmapālagṛhaṃ prāpya tatra vāsamakārayat |
svarṇavatyapi saṃprāptā tadā śīghraṃ mahāvatīm || 81 ||
[Analyze grammar]

tasyāṃ gatāyāṃ gehe vai padminyā likhitaṃ śubham |
patraṃ parimalo rājā vartayāmāsa harṣitaḥ || 83 ||
[Analyze grammar]

āgaccha senayā sārddhaṃ kṛṣṇāṃśa balavattara |
jitvā padmākaraṃ baṃdhuṃ matpatiṃ mocayāśu vai |
bhūtale lakṣaṇo rājā sthitaḥ padmākarārtigaḥ || 83 ||
[Analyze grammar]

iti jñātvā ca kṛṣṇāṃśo lakṣadvādaśasenayā |
rurodha nagarīṃ sarvāṃ kāmapālena rakṣitām || 84 ||
[Analyze grammar]

kāmapālastu balavāṃstrilakṣabalasaṃyutaḥ |
sutājñayā yayau yuddhaṃ sārddhaṃ padmākareṇa vai || 85 ||
[Analyze grammar]

tayoścāsīnmahadyuddhaṃ senayorubhayostadā |
ahorātrapramāṇena bhūpasenā parājitā || 86 ||
[Analyze grammar]

padminīṃ śaraṇaṃ prāpya tadā bhrātā pitā sthitaḥ |
tayorvijayamevāśu yathāprāptaṃ cakāra sā |
antarddhānamayaṃ patraṃ tayorarthe ca sā dadau || 87 ||
[Analyze grammar]

tau tatrāntarhitau bhūtvā svakhaḍgena riporbalam |
ayutaṃ jaghnaturmattau tadā te vismayaṃ gatāḥ || 88 ||
[Analyze grammar]

tālanādyā raṇaṃ tyaktvā kṛṣṇāṃṇaśaṃ śaraṇaṃ yayuḥ |
kṛṣṇāṃśo'pi tadā duḥkhī dhyātvā sarvamayīṃ śivām || 89 ||
[Analyze grammar]

divyadṛṣṭistato jātaḥ saṃprāpya tamayudhyata |
nabhogataṃ kāmapālaṃ tathā padmākaraṃ nṛpam || 90 ||
[Analyze grammar]

baddhvā tatra mudāviṣṭo lakṣaṇaṃ prāpya nirbhayaḥ |
dolāmāropya tāṃ devīṃ svagehāya mudā yayau || 91 ||
[Analyze grammar]

jayacaṃdrāya bhūpāya dattvā vai tau ca daṃpatī |
lakṣaṇaṃ padminīṃ caiva kṛtakṛtyastadābhavat || 92 ||
[Analyze grammar]

jayacaṃdro'pi balavāndṛṣṭvā gehe svadaṃpatī |
dadau dānaṃ dvijātibhyo bhūpatiṃ samamocayat |
jyeṣṭhe māsi site pakṣe kṛṣṇāṃśo gehamāgataḥ || 93 ||
[Analyze grammar]

iti te kathitaṃ vipra kṛṣṇāṃśacaritaṃ śubham |
punaste kathayiṣyāmi dṛṣṭaṃ yogabalena vai || 94 ||
[Analyze grammar]

iti śrībhaviṣye mahāpurāṇe pratisargaparvaṇi caturyugakhaṃḍāparaparyāye kaliyugīyetihāsasamuccaye triṃśo'dhyāyaḥ || 30 ||
[Analyze grammar]