Chapter 13

ṛṣaya ūcuḥ |
kasminmāsyabhavadyuddhaṃ tayoḥ katidināni ca |
tatpaścātsva purīṃ prāya tadā kimabhavanmune || 1 ||
[Analyze grammar]

sūta uvāca |
pauṣamāsyabhavadyuddhaṃ tayoḥ śatadināni ca |
jyeṣṭhe māsi gṛhaṃ prāptā dadhmurvādyānyanekaśaḥ || 2 ||
[Analyze grammar]

śrutvā parimalo rājā svasutāñjayino balīn |
dadau dānāni viprebhyaḥ sukhaṃ jātaṃ gṛhegṛhe || 3 ||
[Analyze grammar]

iti śrutvā mahīrājo balakhāniṃ mahābalam |
tatrāgatya namaskṛtya vacanaṃ prāha namradhīḥ || 4 ||
[Analyze grammar]

arddhakoṭimitaṃ dravyaṃ mattaḥ prāpya sukhī bhava |
māhiṣmatyāśca rāṣṭraṃ me dehi vīra namostu te || 5 ||
[Analyze grammar]

varṣe varṣe ca taddravyaṃ gṛhāṇa balavanprabho |
iti śrutvā tathā matvā balakhānirgṛhaṃ yayau || 6 ||
[Analyze grammar]

vayastrayodaśābde ca kṛṣṇāṃśe balavattare |
yathā jātā harerlīlā bhṛguśreṣṭha tathā śṛṇu || 7 ||
[Analyze grammar]

bhādre śukle trayodaśyāṃ cāhlādaḥ sānujo yayau |
gayārthe dhanamādāya hastyaśvarathasaṃkulam || 8 ||
[Analyze grammar]

kṛṣṇāṃśo bindulārūḍho vatsajo hariṇīsthitaḥ |
devaḥ papīhakārūḍhaḥ sukhakhāniḥ karālake || 9 ||
[Analyze grammar]

catvāro dvidinānte ca gayākṣetraṃ samāyayuḥ |
pūrṇimāṃte puraskṛtya ṣoḍaśaśrāddhakāriṇaḥ || 10 ||
[Analyze grammar]

śataṃ śataṃ gajāṃścaiva bhūṣitāṃśca rathāstathā |
dadurhayānsahasraṃ ca hemamālāvibhūṣi tān || 11 ||
[Analyze grammar]

dhenūrhiraṇyaratnāni vāsāṃsi vividhāni ca |
dattvā te suphalībhūya svagehāya dadhurmanaḥ || 12 ||
[Analyze grammar]

lakṣāvartistu yā veśyā yayau badarikāśramam |
prāṇāṃstatra parityajya sāpsarastvamupāgatā || 13 ||
[Analyze grammar]

rākāṃ caṃdre tu saṃprāptaṃ rāhugraste tamomaye |
kāśyāṃ samāgatā bhūpā nānā deśyāḥ kulaiḥ saha || 14 ||
[Analyze grammar]

himālayagirau ramye nānādhātuvicitrite |
tatra śārdūlavaṃśīyo netrasiṃho mahīpatiḥ || 15 ||
[Analyze grammar]

ratnabhāno hate śūre netrasiṃho bhayāturaḥ |
navatuṃge samāsādya toṣayāmāsa vāsavam || 16 ||
[Analyze grammar]

dvādaśābdāntare devo dadau ḍhakkāmṛtaṃ mudā |
pārvatyā nirmitaṃ yattu vāsavāya svasevine || 17 ||
[Analyze grammar]

dadau ḍhakkāmṛtaṃ rājñe punaḥ prāha śubhaṃ vacaḥ |
asya śabdena bhūpāla tvaṃ sainyaṃ jīvayiṣyasi || 18 ||
[Analyze grammar]

kṣayaṃ śīghraṃ gamiṣyaṃti śatravaste mahābhaṭāḥ |
prāpte ḍhakkāmṛte tasminnetrasiṃho mahābalaḥ || 19 ||
[Analyze grammar]

nagaraṃ kārayāmāsa tatra sarvajanairyutam |
yojanāntaṃ caturdvāraṃ durādharṣaṃ paraiḥ sadā || 20 ||
[Analyze grammar]

netrasiṃhagaḍhaṃ nāmnā vikhyātaṃ bhārate bhuvi |
kāśmīrānte kṛtaṃ rājye tena śṛṃgasamaṃ tataḥ || 21 ||
[Analyze grammar]

pālitaṃ netrasiṃhena tatpuraḥ putravanmune |
netrapāla iti khyāto grāmo'sau durgamaḥ pareḥ || 22 ||
[Analyze grammar]

so'pi rājā samāyāto netrasiṃho mahābalaḥ |
kanyā svarṇavatī tasya revatyaṃśasamanvitā |
kāmākṣyā varadānena sarvamāyāviśāradā || 23 ||
[Analyze grammar]

dṛṣṭvā tāṃ suṃdarīṃ kanyāṃ bālendusadṛśānanām |
mūrcchitāścābhavanbhūpā rūpayauvanamohitāḥ || 24 ||
[Analyze grammar]

dṛṣṭvā tāṃ ca tathāhrādaḥ sarvaratnavibhūṣitām |
ṣoḍaśābdavayoyuktāṃ kāminīṃ ratirūpiṇīm |
mūrcchitaścāpatadbhūmau sā taṃ dṛṣṭvā mumoha vai || 25 ||
[Analyze grammar]

dolāmāruhya tatsakhyau nṛpāntikamupāyayuḥ |
āhlādastu samutthāya mahāmohatvamāgataḥ || 26 ||
[Analyze grammar]

dṛṣṭvā tathāvidhaṃ baṃdhuṃ kṛṣṇāṃśaḥ prāha duḥkhitaḥ |
kimarthaṃ mohamāyāto bhavāṃstatvaviśāradaḥ || 27 ||
[Analyze grammar]

rajo rāgātmakaṃ viddhi pramādaṃ mohajaṃ tathā |
jñānāsinā śirastasya chiṃdhi tvamajitaḥ sadā || 28 ||
[Analyze grammar]

iti śrutvā vaco bhrātustyaktvā mohaṃ yayau gṛham |
bhojayitvā dvijaśreṣṭhānsahasraṃ vedatatparān || 29 ||
[Analyze grammar]

durgāmārādhayāmāsa japtvā madhyacaritrakam |
māsānte ca tadā devī dattvābhīṣṭaṃ hṛdi sthitam || 30 ||
[Analyze grammar]

mohayāmāsa tāṃ kanyāṃ vivāhārthamaninditā |
svapne dadarśa sā bālā rāmāṃśaṃ devakīsutam || 31 ||
[Analyze grammar]

prātarbuddhvā tu saṃciṃtya mahāmohamupāyayau |
tadā dhyātvā ca kāmākṣīṃ sarvābhīṣṭapradāyinīm || 32 ||
[Analyze grammar]

pauṣamāse tu saṃprāpte śukakaṃṭhe supatrikām |
baddhvā taṃ preṣayāmāsa śukaṃ patrasthitaṃ priyam || 33 ||
[Analyze grammar]

sa gatvā puṣpavipinaṃ mahāvatipurīsthitam |
naraśabdena vacanaṃ kṛṣṇāṃśāya śukobravīta || 34 ||
[Analyze grammar]

vīra te'varajo baṃdhurnāmnāhlādo mahābalaḥ |
tasmai hi preṣitā patrī svarṇavatyā hitapradā || 35 ||
[Analyze grammar]

tāṃ jñātvā ca punastasyā uttaraṃ dehi matpriyam |
atha vā patramālikhya tattvaṃ me kuru kaṃṭhake || 36 ||
[Analyze grammar]

iti śrutvodayo vīro gṛhītvā patramuttamam |
jñātavāṃstatra vṛttāṃtamāhlādāya punardadau || 37 ||
[Analyze grammar]

jambukaśca nṛpo vīro rudradattavaro balī |
ajeyonyanṛpairvīra tvayā yudhi nipātitaḥ || 38 ||
[Analyze grammar]

tathāvidhaṃ matpitaramiṃdradattavaraṃ ripum |
tamevaṃ jahi saṃgrāme mama pāṇigrahaṃ kuru || 39 ||
[Analyze grammar]

iti jñātvā sa āhlādastāmāśvāsya hṛdi sthitām |
śukakaṃṭhe babaṃdhāśu likhitvā patramuttamam || 40 ||
[Analyze grammar]

sa śukaḥ pannagaḥ pūrvaṃ puṃḍarīkena śāpitaḥ |
revatyaṃśasya kāryaṃ ca kṛtvā mokṣatvamāgataḥ || 41 ||
[Analyze grammar]

mṛte tasmiñchuke ramye devī svarṇavatī tadā |
dāhayitvā dadau dānaṃ viprebhyastasya tṛptaye || 42 ||
[Analyze grammar]

māghamāsi ca saṃprāpte paṃcamyāṃ kṛṣṇapakṣake |
āhlādaḥ saptalakṣaiśca sainyaiḥ sārddhaṃ yayau mudā || 43 ||
[Analyze grammar]

tālanādyāśca te śūrāḥ svaṃsvaṃ vāhanamāśritāḥ |
āhlādaṃ rakṣayantaste yayuḥ paṃcadaśāhakam || 44 ||
[Analyze grammar]

vaṃgadeśaṃ samullaṃghya śīghraṃ prāptā himālayam |
rūpaṇaṃ patrakarttāraṃ balakhāniruvāca tam || 45 ||
[Analyze grammar]

gaccha tvaṃ vīra kavacī karālāśvaṃ samāsthitaḥ |
paṃcaśastrasamāyukto rājānaṃ śīghramāvaha || 46 ||
[Analyze grammar]

yuddhacihnaṃ tanau kṛtvā māmāgaccha tvarānvitaḥ |
tathā matvā śikhaṃḍyaṃśo yayau śīghraṃ sa rūpaṇaḥ || 47 ||
[Analyze grammar]

sa dadarśa sabhāṃ rājño bahuśūrasamanvitām |
pārvatīyairnṛpaiḥ sārddhaṃ sahasrairbalavattaraiḥ || 48 ||
[Analyze grammar]

sa uvāca nṛpaśreṣṭhaṃ netrasiṃhaṃ mahābalam |
tvatsutāyā vivāhāya balakhānirmahābalaḥ |
saptalakṣabalairguptaḥ saṃprāptastava rāṣṭrake || 49 ||
[Analyze grammar]

tasmāttvaṃ svasutāṃ śīghramāhlādāya samarpaya |
śulkaṃ me dehi nṛpate yuddharūpaṃ sudāruṇam || 50 ||
[Analyze grammar]

iti śrutvā vacastasya sa rājā krodhamūrchitaḥ |
paṭṭanādhipamājñāya bhūpaṃ pūrṇabalaṃ ruṣā |
arudhatsa kapāṭaṃ ca tasya baṃdhanahetave || 51 ||
[Analyze grammar]

pāśahastāñchūraśataṃ paṭṭanādhiparakṣitān |
dṛṣṭvā sa rūpaṇo vīraḥ khaḍgayuddhamacīkarat || 52 ||
[Analyze grammar]

hatvā tanmukuṭaṃ rājño gṛhītvākāśago balī |
balakhāniṃ tu saṃprāpya cihnaṃ tasmai nyavedayat || 53 ||
[Analyze grammar]

iti śrutvā prasannātmā sapta lakṣadalairyutaḥ |
arudhannagarīṃ sarvāṃ netrasiṃhena rakṣitām || 54 ||
[Analyze grammar]

netrasiṃhastu balavānpārvatīyairnṛpaiḥ saha |
himatuṃgatalaṃ prāpya yuddhārthī tānsamāhvayat || 55 ||
[Analyze grammar]

sahasraṃ ca gajāstasya hayā lakṣaṃ mahābalāḥ |
sahasraṃ ca nṛpāḥ śūrāścaturlakṣa padātibhiḥ || 56 ||
[Analyze grammar]

yogasiṃho gajaiḥ sārddhaṃ balakhāniṃ samāhvayat |
bhogasiṃho hayaiḥ sārddhaṃ kṛṣṇāṃśaṃ ca samāhvayat || 57 ||
[Analyze grammar]

vijayo nṛpaputraśca sarvabhūpatibhiḥ saha |
devasiṃhastathā mlecchai rūpaṇaṃ ca samāhvayat || 58 ||
[Analyze grammar]

tayoścāsīnmahadyuddhaṃ senayostatra dāruṇam |
nirbhayāścaiva te śūrāḥ pārvatīyāḥ samaṃtataḥ |
jaghnuste śātravīṃ senāṃ dvilakṣāṃ vīrapālitām || 59 ||
[Analyze grammar]

prabhagnaṃ svabalaṃ dṛṣṭvā catvāro madamattakāḥ |
divyānaśvānsamāruhya cakruḥ śatrormahāvadham |
punarujīvitaṃ sarvaṃ ḍhakkāmṛtaravādbalam || 60 ||
[Analyze grammar]

yuddhāya saṃmukhaṃ prāpa bhṛguśreṣṭha punaḥ punaḥ |
ahorātraṃ raṇaścāsītteṣāṃ tatraiva dāruṇaḥ || 61 ||
[Analyze grammar]

evaṃ saptāhni saṃjāte yuddhe bhīrubhayaṃkare |
upāyairbahubhirvīrāścakruścaiva raṇaṃ bahum || 62 ||
[Analyze grammar]

punaste jīvamāpannā jaghnustānripusainyapān |
tālanādyāstu te śūrā duḥkhitāstatra cābhavan |
nirāśāṃ vijaye prāpya kṛṣṇāṃśaṃ śaraṇaṃ yayuḥ || 63 ||
[Analyze grammar]

tānāśvāsya sa kṛṣṇāṃśastatra divyahaye sthitaḥ |
nabhomārgeṇa balavānsvarṇavatyaṃtikaṃ yayau || 64 ||
[Analyze grammar]

harmyopari sthitāṃ devīṃ sarvaśobhāsamanvitām |
natvovāca vacaḥ ślakṣṇaṃ kiṃkarohamihodayaḥ |
śaraṇyāṃ tvāmupāgacchaṃ kāmākṣīmiva bhāmini || 65 ||
[Analyze grammar]

vṛttāntaṃ kathayāmāsa yathāsīcca mahāraṇaḥ |
śrameṇa karśitā vīrā nirāśāṃ jīvane'gaman || 66 ||
[Analyze grammar]

sāha codayasiṃha tvaṃ kāmākṣyā maṃdiraṃ vraja |
ahaṃ ca svālibhiḥ sārdhaṃ navamyāṃ pūjane ratā || 67 ||
[Analyze grammar]

ḍhakkāmṛtasya vādyena pūjaye sarvakāmadām |
iti śrutvā sa balavānsvasainyaṃ prati cāgamat || 68 ||
[Analyze grammar]

ardhaśeṣāṃ raṇātsenāṃ parājāpya ca dudruvuḥ |
paṭṭanākhyapure prāptāṃ jayaṃ prāpya mahābalāḥ || 69 ||
[Analyze grammar]

parājite ripau tasminnetrasiṃhasutaiḥ saha |
gṛhamāgatya balavānviprebhyo godhanaṃ dadau || 70 ||
[Analyze grammar]

navamyāṃ pitaraṃ prāha devī svarṇavatī tadā |
kāmākṣīsevanenāśu kuru yāgotsavaṃ mama |
yatprasādācca vijayī durjayebhyo'bhavadbhavān || 71 ||
[Analyze grammar]

iti śrutvā pitā prāha svapno dṛṣṭastathā mayā |
pūjanānmaṃgalaṃ rājñāṃ no cedvighno hi śobhane || 72 ||
[Analyze grammar]

pitroktaivaṃ niśāyāṃ tu sā sutā piturājñayā |
ḍhakkāmṛtasya vādyena kāmākṣīmadiraṃ yayau || 73 ||
[Analyze grammar]

kṛṣṇāṃśo mālyakārasya vadhūrbhūtvā samāgataḥ |
ḍhakkāmṛtaṃ ca nārībhyo gṛhītvā tvarito yayau || 74 ||
[Analyze grammar]

etasminnantare vīrāḥ ṣaṣṭirvāhanasaṃyutāḥ |
ḍhakkārthaṃ prayayuḥ śīghraṃ sarvaśastraiḥ samudyatāḥ || 75 ||
[Analyze grammar]

tānāgatānsa balavāndṛṣṭvā khaḍgaṃ gṛhītavān |
paṃcapaṃcāśataḥ śūrānanayadyamasādanam || 76 ||
[Analyze grammar]

kṛṣṇāṃśastvarito gatvā rūpaṇo yatra tiṣṭhati |
ḍhakkāmṛtaṃ ca saṃprāpya hayārūḍho yayau sabhām || 77 ||
[Analyze grammar]

hṛte ḍhakkāmṛte divye netrasiṃho bhayāturaḥ |
aindraṃ yajñaṃ tathā kṛtvā havanāya paro'bhavat || 78 ||
[Analyze grammar]

prabhāte samanuprāpte te vīrāḥ svabalaiḥ saha |
tarasā prayayuḥ sarve gajoṣṭrahayasaṃsthitāḥ |
dinānte prāptavaṃtaśca yatrābhūtsamahāraṇaḥ || 79 ||
[Analyze grammar]

kṛṣṇāṃśaḥ pūjayitvā taṃ dadhmau ḍhakkāmṛtaṃ balī |
tacchabdena mṛtā vīrāḥ punarujīvitāstadā || 80 ||
[Analyze grammar]

saptalakṣabalaṃ tasya punaḥ prāptaṃ madāturam |
rurodha nagarīṃ sarvāṃ dadhmau vādyānyanekaśaḥ || 81 ||
[Analyze grammar]

ruddhe tu nagare tasminnetrasiṃho bhayāturaḥ |
svātmānamarpayāmāsa vahnau śakrāya dhīmate || 82 ||
[Analyze grammar]

tadā prasanno bhagavānuvāca nṛpatiṃ prati |
rāmāṃśoyaṃ ca kṛṣṇāṃśo bhuvi jātau kalaikayā || 83 ||
[Analyze grammar]

tasmai yogyāya sā kanyā rāmāṃśāya yaśasvine |
yoginīyaṃ svarṇavatī revatyaṃśāvatāriṇī || 84 ||
[Analyze grammar]

ityuktvā ca svayaṃ devo ḍhakkāmṛtamumāpriyam |
hṛtvā vahnau samākṣipya durgāyai saṃnyavedayat || 85 ||
[Analyze grammar]

gate tasminsurapato sa rājā brāhmaṇaiḥ saha |
mahīpatiṃ prati yayau melanārthaṃ samudyataḥ || 86 ||
[Analyze grammar]

tathāgataṃ nṛpaṃ dṛṣṭvā kṛṣṇāṃśaśca mahīpatiḥ |
āhlādamātulaḥ prāha mānyaḥ sarvabalaiḥ sadā || 87 ||
[Analyze grammar]

rājannayaṃ sa balavānāhrādaḥ sānujaiḥ saha |
matpaṃktau na sthito vīraḥ kule hīnatvamāgataḥ || 88 ||
[Analyze grammar]

āryābhīrī smṛtā teṣāṃ kiṃ tvayā viditaṃ na hi |
yadi deyā tvayā kanyā tarhi tvaṃ hīnatāṃ vraja || 89 ||
[Analyze grammar]

atastvaṃ vacanaṃ cedaṃ kulayogyaṃ śṛṇuṣva bhoḥ |
caturo bālakānnīcāṃstālanena samanvitān || 90 ||
[Analyze grammar]

vañcayitvā vivāhārthe śirāṃsyeṣāṃ samāhara |
maṃḍapati makhaṃ kṛtvā cāmuṇḍāyai samarpaya || 91 ||
[Analyze grammar]

tvatkanyayā samāhūtā vīrā vai revatī hi sā |
paścātkanyāṃ svayaṃ hatvā kulakalyāṇamāvaha || 92 ||
[Analyze grammar]

no cedbhavānkṣayaṃ yāyātsakulo jaṃbuko yathā |
ityuktvā sa yayau sārddhaṃ yatrāhrādasya bāṃdhavaḥ || 93 ||
[Analyze grammar]

iti śrutvā sa śalyāṃśaḥ suyodhanamukheritam |
tathetyuktvotsavaṃ kṛtvā maṃḍapāṃte vidhānataḥ |
āhlādasya samīpaṃ sa gatvaitadvaṃcanāya hi |
tamāha daṃḍavatpādau gṛhītvā nṛpatissvayam || 94 ||
[Analyze grammar]

bhavantoṃśāvatārāśca mayā jñātāḥ surottamāt |
nirastrānpañca yuṣmāṃśca pūjayitvā yathāvidhi |
rāmāṃśāya svakanyāṃ ca dāsyāmi kularītitaḥ || 95 ||
[Analyze grammar]

ityāhrādaṃ samādiśya sa nṛpaśchalamāśritaḥ |
durgotsave yayau gehaṃ tadvadhāya samudyataḥ || 96 ||
[Analyze grammar]

sahasraṃ maṃḍape bhūpānsaṃsthāpya svabalaiḥ saha |
tālanādyāṃśca ṣaṭ śūrānmaṃḍapāṃte samāhvayat || 97 ||
[Analyze grammar]

vivāhaprathamāvarte yogasiṃho'simuttamam |
varamāhatya śirasi jagarja balavānruṣā || 98 ||
[Analyze grammar]

tamāha tālano dhīmānna yogyaṃ bhavatā kṛtam |
śrutvāha netrasiṃhastaṃ kularītiriyaṃ balin |
nirāyudhaiḥ paraiḥ sārddhaṃ śastriṇāṃ saṃgaro hi naḥ || 99 ||
[Analyze grammar]

iti śrutvā yogasiṃhaṃ kṛṣṇāṃśastaṃ samārudhat |
bhogasiṃhaṃ tathā kṛṣya balakhānirgṛhītavān || 100 ||
[Analyze grammar]

vijayaṃ tṛtīyāvarte sukhakhānirnyaruṃddha vai |
caturthāvartake śatruṃ nṛpaṃ pūrṇabalaṃ śaṭham |
rūpaṇastaṃ gṛhītvāśu yuyudhe tadbalaiḥ saha || 101 ||
[Analyze grammar]

paṃcame bahurājānaṃ tālanaśca samārudhat |
ṣaṣṭhāvartte netrasiṃhaṃ tathāhlādo gṛhītavān || 102 ||
[Analyze grammar]

saṃprāpte tumale yuddhe bahuśūrāḥ kṣayaṃ gatāḥ |
nirāyudhāḥ ṣaḍ balinaḥ saṃkṣamya vraṇamuttamam |
nirāyudhānripūnsvānsvāṃścakruḥ śaktiprapūjakāḥ || 103 ||
[Analyze grammar]

etasminnantare devaḥ kāladarśī samāgataḥ |
nabhomārgeṇa tānaśvāṃstebhya āgatya saṃdadau || 104 ||
[Analyze grammar]

bindulaṃ caiva kṛṣṇāṃśo devastatra manoratham |
rūpaṇaśca karālāśvaṃ cāhlādastu papīhakam || 105 ||
[Analyze grammar]

hariṇīṃ balakhāniśca tadbhrātā harināgaram |
siṃhinīṃ tālanaḥ śūraḥ samāruhya raṇodyataḥ || 106 ||
[Analyze grammar]

rātrau tannṛpateḥ senāṃ hatvā baddhvā ca tatpatim |
dolāṃ gehācca niṣkāśya saptabhramarakāritām || 107 ||
[Analyze grammar]

svasainyaṃ te samājagmurnirbhayā balavattarāḥ |
tānsarvānnetrasiṃhādīndṛṣṭvā pāhīti jalpitaḥ || 108 ||
[Analyze grammar]

nigaḍairekataḥ kṛtvā pañca bhūpānhi vaṃcakān |
kārāgāre mahāghore tatra tānsaṃnyavāsayan || 109 ||
[Analyze grammar]

netrasiṃho varo bhrātā sundarāraṇyabhūmipaḥ |
hetuṃ jñātvāyayau śīghraṃ māyāvī lakṣasainyakaḥ || 110 ||
[Analyze grammar]

tatrāgatya harānando nāmnā tānayudhadbalī |
netrasiṃhasya sainyaṃ ca caturlakṣaṃ tadāgamat || 111 ||
[Analyze grammar]

pañcalakṣai raṇo ghoraḥ saptalakṣayutairabhūt |
pañcāhorātramātraṃ ca tayoścāsītsa saṃkulaḥ |
arddhasainyaṃ ripostatra hataśeṣamadudruvat || 112 ||
[Analyze grammar]

vismitaḥ sa harānando rudramāyāviśāradaḥ |
balādhikyayutāñjñātvā śivadhyānaparo'bhavat || 113 ||
[Analyze grammar]

racitvā śāṃbarīṃ māyāṃ nānārūpavidhāriṇīm |
pāṣāṇabhūtānsakalānkṛtvā bhūpānsamāyayau || 114 ||
[Analyze grammar]

sasutaṃ bhrātaraṃ jyeṣṭhaṃ nṛpaṃ pūrṇabalaṃ tataḥ |
mocayitvā yayau gehaṃ kṛtakṛtyo mahābalī || 115 ||
[Analyze grammar]

āhlādaṃ nigaḍairbaddhvā māyayā jaḍatāṃ gatam |
netrasiṃhaḥ sa balavānyayau svaṃ durgamudyataḥ |
taṃ praśaṃsyānujaṃ vīro viprebhyaśca dadau dhanam || 116 ||
[Analyze grammar]

tadā svarṇavatī dīnā baddhaṃ jñātvā patiṃ nijam |
kṛṣṇāṃśādyānmohitāṃśca śaṃbhumāyāvaśānugān || 117 ||
[Analyze grammar]

rurodoccaistadā devīṃ dhyāyaṃtī kāmarūpiṇīm |
tadā tuṣṭā jagaddhātrī mūrcchitāṃstānabodhayat || 118 ||
[Analyze grammar]

te sarve cetanāṃ prāptāḥ prāhuḥ svarṇavatīṃ mudā |
kvāsthito vaṃdhurāhlādo devi tvaṃ kāraṇaṃ vada || 119 ||
[Analyze grammar]

yathā baddhaḥ svayaṃ svāmī kathayāmāsa sā tathā |
ahaṃ śukī bhavāmyadya bhavānbiṃdulasaṃsthitaḥ || 120 ||
[Analyze grammar]

ityuktvā sā śukī bhūtvā kṛṣṇāṃśena samanvitā |
yatrāste tatpatirbaddhastatra sā kāminī yayau || 121 ||
[Analyze grammar]

kṛṣṇāṃśo'pi hayārūḍho nabhomārgeṇa cāptavān |
abhīrīṃ mūrtimāsādya svāminaṃ prati sā yayau || 122 ||
[Analyze grammar]

āśvāsya taṃ yathāyogyaṃ kṛṣṇāṃśaṃ pratyavarṇayat |
kṛṣṇāṃśastatra balavānhatvā durga nivāsinaḥ || 123 ||
[Analyze grammar]

rakṣakāñchatasāhasrānhatvā bhrātaramāyayau |
paurṇimāṃ madhuyuktāṃ ca jñātvā sarve tvarānvitāḥ || 124 ||
[Analyze grammar]

ayodhyāṃ śīghramāgamya snātvā vai sarayūṃ nadīm |
holikādāhasamaye śīghraṃ veṇyāṃ samāgatāḥ || 125 ||
[Analyze grammar]

snānadhyānādikā niṣṭhāḥ kṛtvā gehamupāyayuḥ |
sāgarasya taṭaṃ prāpya kṛtvā te ca mahotsavam |
caitrasya kṛṣṇapañcamyāṃ svagehaṃ punarāyayuḥ || 126 ||
[Analyze grammar]

dūtā uṣṭrasamārūḍhāstatkṣemakaraṇotsukāḥ |
vaiśākhe śuklapaṃcamyāṃ svagehaṃ punarāyayuḥ || 127 ||
[Analyze grammar]

malanā bhūpatiścaiva gehegehe mahotsavam |
kārayitvā vidhānena brāhmaṇebhyo dadau dhanam || 128 ||
[Analyze grammar]

iti śrībhaviṣye mahāpurāṇe pratisargaparvaṇi caturyugakhaṇḍāparaparyāye kaliyugīyetihāsasamuccaye trayodaśo'dhyāyaḥ || 13 ||
[Analyze grammar]