Chapter 15

sūta uvāca |
praśasya bhūpatiṃ śuddhaṃ vetālo rudrakiṃkaraḥ |
punarākhyānakaṃ vipra varṇayāmāsa sundaram || 1 ||
[Analyze grammar]

kānyakujje mahārāja brāhmaṇo dānaśīlakaḥ |
babhūva satyasaṃdhaśca devīpūjanatatparaḥ |
pratigraheṇa yaddravyaṃ tena dānamacīkarat || 2 ||
[Analyze grammar]

kadācittu śaratkāle navadurgāvrataṃ hyabhūt |
na prāptaṃ dānato dravyaṃ tadā ciṃtāturo'bhavat || 3 ||
[Analyze grammar]

kiṃ kartavyaṃ mayā cādya yena dravyayuto hyaham |
kanyā nimaṃtritāścādya kathaṃ tāṃ bhojayāmyaham || 4 ||
[Analyze grammar]

iti śokasamāyuktastadā devīprasādataḥ |
mudrāḥ pañca tadā prāptāstābhirvratamacīkarat || 5 ||
[Analyze grammar]

nirāhāravrataṃ tena kṛtaṃ tu navamāhnikam |
tena vrataprabhāvena mṛto devatvamāgataḥ || 6 ||
[Analyze grammar]

jīmūtaketuriti ca sobhūdvidyādharādhipaḥ |
himācalagirau ramye pure vidyādhare śubhe || 7 ||
[Analyze grammar]

uvāsa katicidvarṣāndivya bhogaprabhogavān |
tatra kalpadrumaṃ nityaṃ pūjayāmāsa bhaktitaḥ || 8 ||
[Analyze grammar]

tena vṛkṣaprabhāvena jātaḥ putro mahottamaḥ |
sarvākalāsu nipuṇo nāmnā jīmūtavāhanaḥ || 9 ||
[Analyze grammar]

sa vai pūrvabhave rājanmadhyadeśe mahottame |
kṣatriyaḥ śūrasenākhyo babhūva vasudhādhipaḥ || 10 ||
[Analyze grammar]

ekadā mṛgayākelilolupaḥ sa mahīpatiḥ |
prāptavānutpalāraṇyaṃ yatra vālmīkisaṃsthitiḥ || 11 ||
[Analyze grammar]

caitraśuklanavamyāṃ tu na kṛtaṃ jīvaghātanam |
utsavaṃ rāmadivase cakāra vidhivannṛpaḥ || 12 ||
[Analyze grammar]

vālmīkeśca kuṭīmadhye rātrau jāgaraṇaṃ kṛtam || 13 ||
[Analyze grammar]

śrutā rāmamayī gāthā tasya puṇyaprabhāvataḥ |
vidyādharatvamāpanno mumude tatra śakravat || 14 ||
[Analyze grammar]

kalpavṛkṣasya vai pūjā kṛtā tena mahātmanā |
varṣāṃtare drumaḥ prāha varaṃ varaya sattama || 15 ||
[Analyze grammar]

sa tamāha mahāvṛkṣa madīyaṃ nagaraṃ śubham |
dhanadhānyasa māyuktaṃ yathaiva syāttathā kuru || 16 ||
[Analyze grammar]

ityukte sati vṛkṣeṇa nagaraṃ bhūpateḥ samam |
kṛtaṃ tadā na ko'pyāsīdyo manyetpārthivāśrayam || 17 ||
[Analyze grammar]

sarve te rājatulyāśca kalpavṛkṣaprasādataḥ |
tadā tau tu pitāputrau tapaso'rthe vanaṃ gatau || 18 ||
[Analyze grammar]

malayādrau mahāramye tepaturbahulaṃ tapaḥ |
ekasmindivase rājanmalayadhvajabhūpateḥ || 19 ||
[Analyze grammar]

kamalākṣīti vikhyātā kanyā ca śivamaṃdire |
svasakhyā sahitā prāptā śivapūjanatatparā || 20 ||
[Analyze grammar]

jīmūtavāhanaścaiva pūjārthe maṃdiraṃ yayau |
bālāṃ dadarśa divyāṃgīṃ sarvabhūṣāsamanvitām || 21 ||
[Analyze grammar]

tasyā darśanamātreṇa kāmabāṇena pīḍitaḥ |
manasā kāmadevaṃ taṃ tuṣṭāva ślakṣṇayā girā || 22 ||
[Analyze grammar]

jīmūtavāhana uvāca |
madanāya namastubhyaṃ kṛṣṇaputrāya te namaḥ |
śaṃbaraprāṇahaṃtre ca caturvyūhāya te namaḥ || 23 ||
[Analyze grammar]

paṃcabāṇāya kāmāya pradyumnāya namonamaḥ |
madyogyāṃ kuru suśroṇīṃ kāminīṃ kamalānanām || 24 ||
[Analyze grammar]

tadā prasanno bhagavānmakaradhvajadevatā |
mohayitvā ca pitaraṃ tadvivāhamakārayat || 25 ||
[Analyze grammar]

viśvāvasuriti khyātastasya bhūpasya vai sutaḥ |
bhaginīpatinā sārddhaṃ sa yayau gaṃdhamādanam || 26 ||
[Analyze grammar]

naraṃ nārāyaṇaṃ natvā garuḍottuṃgamāyayau |
tadā nāgasya vai mātā śaṃkhacūḍasya bho nṛpa || 27 ||
[Analyze grammar]

ruroda bahudhā tatra yatra jīmūtavāhanaḥ |
duḥkhitaḥ sa jagāmāśu dayālurdīnavatsalaḥ || 28 ||
[Analyze grammar]

vṛddhāmāśvāsya papraccha kenedaṃ duḥkhamāgatam |
sāha me tanayo deva garuḍāsye gamiṣyati || 29 ||
[Analyze grammar]

tadviyogena duḥkhārtā vilapāmi mahākulā |
iti jñātvā sa nṛpatirgaruḍottuṃgamāyayau || 30 ||
[Analyze grammar]

garuḍo'pi gṛhītvā taṃ nabhomārgamupāgamat |
tasyāṃgado'sṛjā lipto nyadhāttattatra bhāminī || 31 ||
[Analyze grammar]

kamalākṣī tu viyati sthitaṃ garuḍabhakṣitam |
vilokya cārudadgāḍhaṃ patiduḥkhena duḥkhitā || 32 ||
[Analyze grammar]

tadā tu garuḍastrastastatrāgatya tvarānvitaḥ |
jīmūtavāhanaṃ prāha kasmāttvaṃ mama bhakṣitaḥ || 33 ||
[Analyze grammar]

sa hovāca prabho medya vacaḥ śṛṇu mahāmate |
śaṃkhacūḍasya jananī mahāduḥkhena duḥkhitā || 34 ||
[Analyze grammar]

tasyāḥ putrasya rakṣārthaṃ saṃprāpto'haṃ tavāṃtikam |
ityukte sati bhūpāla śaṃkhacūḍaśca pannagaḥ || 35 ||
[Analyze grammar]

tadvyālasyaiva duḥkhena duḥkhitaḥ śatrumāptavān |
māṃ prabhakṣa kṛpāsiṃdho tvadāhārārthamāgatam || 36 ||
[Analyze grammar]

saṃtyajya mānuṣaṃ divyaṃ kurvāhāraṃ mahāmate |
tadā prasanno garuḍo dadau tasmai varatrayam || 37 ||
[Analyze grammar]

jīmūtavāhanāyaiva vidyādharasutāya ca |
śaṃkhacūḍakulaṃ nāhaṃ bhakṣayiṣye kadā cana || 38 ||
[Analyze grammar]

tvaṃ tu vidyādharapure prāpya rājyaṃ mahottamam |
subhojayitvā lakṣābdaṃ tato vaikuṇṭhameṣyasi || 39 ||
[Analyze grammar]

ityuktvāntardadhau devaḥ sa pitrā rājyamāptavān |
svapatnyā saha rājyāṃgaṃ bhuktvā vaikuṃṭhamāyayau || 40 ||
[Analyze grammar]

ityuktvā sa tu vaitālo nṛpatiṃ prāha namradhīḥ |
teṣāṃ madhye mahārāja kasya prāptaṃ mahāphalam || 41 ||
[Analyze grammar]

rājovāca |
śaṃkhacūḍasya saṃprāptaṃ jīvadānamahāphalam |
nṛpasyaivopakāraṃ ca svabhāvo vidhinā kṛtaḥ || 42 ||
[Analyze grammar]

pativratāprabhāvena jīvadānena bhūpateḥ |
santuṣṭo garuḍo jātastasya kiṃ tarhi tatphalam || 43 ||
[Analyze grammar]

nirbhayaḥ śaṃkhacūḍastu svaśatruṃ prati cāgamat |
śarīramarpayitvā taṃ tataḥ prāptaṃ mahāphalam || 44 ||
[Analyze grammar]

iti śrībhaviṣye mahāpurāṇe pratisargaparvaṇi caturyugakhaṇḍāparaparyāye kaliyugīyeti hāsasamuccaye paṃcadaśo'dhyāyaḥ || 15 ||
[Analyze grammar]