Chapter 144

sumanturuvāca |
athājagāma bhagavānvyāso dvāravatīṃ purīm |
draṣṭuṃ nārāyaṇaṃ devaṃ śaṅkhacakragadādharam || 1 ||
[Analyze grammar]

tamāgatamṛṣiṃ dṛṣṭvā vāsudevo viśāṃpate |
abhyutthāya mahātejāḥ pūjayāmāsa bhārata || 2 ||
[Analyze grammar]

svayamevāsanaṃ dattvā pādyamarghyaṃ tathaiva ca |
papraccha prayato bhūtvā vyāsaṃ satyavatīsutam || 3 ||
[Analyze grammar]

ya ete bhojakā viprā ānītā matsutena vai |
śākadvīpamito gatvā jñānino mokṣagāminaḥ || 4 ||
[Analyze grammar]

tāndṛṣṭvā rūpato vipra praveśātkarmatastathā |
kautūhalaṃ samutpannaṃ harṣaśca paramo mama || 5 ||
[Analyze grammar]

kathamete kṣaṇamapi tiṣṭhante pṛthivītale |
yeṣāṃ raviḥ sadā pūjyasteṣāṃ muktiḥ sadā vaset || 6 ||
[Analyze grammar]

nāgatvā bhojakatvaṃ hi mokṣamāpnoti kaścana |
idaṃ me manaso brahmansadā sampratibhāti vai || 7 ||
[Analyze grammar]

vyāsa uvāca |
evameva yathāttha tvaṃ śaṅkhacakragadādhara |
dhanyā ete mahātmāno bhojakā nātra saṃśayaḥ || 8 ||
[Analyze grammar]

ye pūjayanti satataṃ bhānumantaṃ divākaram |
jñāninaḥ karmaniṣṭhāśca sadā mokṣagatiṃ gatāḥ || 9 ||
[Analyze grammar]

yajante satataṃ bhānuṃ balipuṣpaphalaistathā |
annenauṣadhibhiścaiva ājyahomaiśca kṛtsnaśaḥ || 10 ||
[Analyze grammar]

homaṃ ca śāśvataṃ kṛtvā paraṃ homaṃ tataḥ śritāḥ |
parahomasya karaṇātpūtātmāno hyakalmaṣāḥ || 11 ||
[Analyze grammar]

viśanti paramāṃ divyāṃ bhāskarīṃ taijasīṃ kalām |
karmaṇaḥ sādhane caikā tatra cāgnau pratiṣṭhitā || 12 ||
[Analyze grammar]

vāyumārgasthitā vyomni dvitīyāntaḥ prakāśikā |
tataḥ paraṃ tṛtīyā tu tatsmṛtaṃ sūryamaṇḍale || 13 ||
[Analyze grammar]

maṇḍalaṃ tacca saviturdivyaṃ hyajaramavyayam |
tasyā'sau puruṣo madhye yo'sau sadasadātmakaḥ || 14 ||
[Analyze grammar]

kṣarākṣarastu vijñeyo mahāsūryastathaiva ca |
niṣkalaḥ sakalaścāpi dvau ca tasya prakalpitau || 15 ||
[Analyze grammar]

akṣaraḥ sakalaścaiva sarvabhūtavyavasthitaḥ |
satattvaḥ sakalaḥ proktastattvahīnastu niṣkalaḥ || 16 ||
[Analyze grammar]

tṛṇagulmalatāvṛkṣavṛkasiṃhadvijādhipān |
surasiddhamanuṣyāṃśca sthalajāñjalajānharet || 17 ||
[Analyze grammar]

vyavasthitaḥ sa sarvatra sarveṣāmantarātmani |
yadā kalpātmakaścaiva dvitīyāṃ tanumāśritaḥ || 18 ||
[Analyze grammar]

niṣkalastu sadā jñeyaḥ saṃsthitastaijasīṃ kalām |
himaṃ gharmaṃ ca varṣaṃ ca trailokye kurute sadā || 19 ||
[Analyze grammar]

dvitīyā yā tanustasya akṣaraṃ tatparaṃ padam |
devayānaṃ tu panthānaṃ karmayogena saṃsthitā || 20 ||
[Analyze grammar]

ādityasiddhāntaritāḥ sāṅkhyayogavidaśca ye |
te'bhigacchanti tatsthānaṃ sa mokṣaḥ parikīrtitaḥ || 21 ||
[Analyze grammar]

nirdvandvo nirgamaścaiva tatra gatvā na śocati |
vedeṣu brahma vadanti dhyāyante tattvavedinaḥ || 22 ||
[Analyze grammar]

akāraṃ tattvataścāpi dhyāyante puruṣottama |
tryakṣaraṃ ca tamoṃkāraṃ sārdhamātrātraye sthitam || 23 ||
[Analyze grammar]

vadanti cārdhamātrasthaṃ makāraṃ vyañjanātmakam |
dhyāyanti ye makārīyaṃ jñānaṃ te hi sadātmakam || 24 ||
[Analyze grammar]

makāro bhagavāndevo bhāskaraḥ parikīrtitaḥ |
makāradhyānayogācca magā hyete prakīrtitāḥ || 25 ||
[Analyze grammar]

dhūpamālyairyutaścāpi upahāraistathaiva ca |
bhojayanti sahasrāṃśuṃ tena te bhojakāḥ smṛtāḥ || 26 ||
[Analyze grammar]

iti śrībhaviṣye mahāpurāṇe brāhme parvaṇi saptamīkalpe sāmbopākhyāne bhojakasyotpattivarṇanaṃ nāma catuścatvāriṃśadadhikaśatatamo'dhyāyaḥ || 144 ||
[Analyze grammar]