Chapter 143

sumanturuvāca |
śrutvaivameva sāmbena vyāsātsatyavatīsutāt |
avyaṅgasya ca utpattiṃ punarāgānmahāmatiḥ || 1 ||
[Analyze grammar]

athāgatya mahātejāḥ sāmbo gatvāśramaṃ punaḥ || 2 ||
[Analyze grammar]

nāradasya mahābāhornāradaṃ vākyamabravīt |
kathamutkṣipya vai dhūpaṃ bhojakaiḥ saviturmune || 3 ||
[Analyze grammar]

snānamācamanaṃ caivamarghyadānaṃ mahātmane |
sāmbasya vacanaṃ śrutvā nārado munisattamaḥ || 4 ||
[Analyze grammar]

uvāca kuruśārdūla sāmbaṃ jāmbavatīsutam |
hanta te kathayiṣyāmi raverdhūpavidhikramam || 5 ||
[Analyze grammar]

snānamācamanaṃ caiva svarṇadānaṃ tathaiva ca |
ācāntastristataḥ snātvā vāsasī nirmale śubhe || 6 ||
[Analyze grammar]

anārdre saṃvasītaiva pavitre paridhāya ca |
udaṅmukhaḥ prāṅmukho vāpyācāmecca prayatnataḥ || 7 ||
[Analyze grammar]

jale jalastho nācāmejjalāduttīrya yatnataḥ |
apsu sūryastathāgniśca mātā devī sarasvatī || 8 ||
[Analyze grammar]

tasmāduttīrya cācāmennācāmettu jalāśaye |
upaviśya śucau deśe prayataḥ prāgudaṅmukhaḥ || 9 ||
[Analyze grammar]

pādau prakṣālya hastau ca antarjānustathācamet |
prasannāstriḥ pibettvāpaḥ prayataḥ susamāhitaḥ || 10 ||
[Analyze grammar]

sammārjanaṃ tu dviḥ kuryāttribhirabhyukṣaṇaṃ punaḥ |
mūrdhānaṃ khāni cātmānamupaspṛśyānu pūrvaśaḥ || 11 ||
[Analyze grammar]

ācānto'rkaṃ namaskṛtya śauceṣu śucitāmiyāt |
kriyāṃ yaḥ kurute mohādanācamyeha nāstikaḥ || 12 ||
[Analyze grammar]

bhavantīha kriyāḥ sarvā vṛthā tasya na saṃśayaḥ |
śucikāmā hi vai devā vedairevamudāhṛtāḥ || 13 ||
[Analyze grammar]

inopāsākṛtaścaiva sarve devāḥ prayatnataḥ |
śaucameva praśaṃsanti śaucāṅgairhi vidhīyate || 14 ||
[Analyze grammar]

ācānto maunamāsthāya devāgāraṃ tato vrajet |
śvāsarodhanimittaṃ tu prāṇamācchādya vāsasā || 15 ||
[Analyze grammar]

śiraḥ prāvṛtya yatnena keśodakanivṛttaye |
tataḥ pūjāṃ raveḥ kuryātpuṣpairnānāvidhaiḥ śubhaiḥ || 16 ||
[Analyze grammar]

gāyatrīṃ saśiraskāṃ ca yajamānaḥ prayatnataḥ |
dhūpaṃ tato'gnaye dadyātprathamaṃ guggulāhutam || 17 ||
[Analyze grammar]

puṣpāñjaliṃ tato gṛhya tacchikhāyāṃ prayatnataḥ |
ravermūrdhani taṃ dadyāddevamantramudāharan || 18 ||
[Analyze grammar]

oṃ vratena yadvratino varjayanti devā manuṣyāḥ pitaraśca sarve |
tasyādityaṃ prasaraṃ ca manāmahe yastejasā prathamaṃ nāvibhāti || 19 ||
[Analyze grammar]

dhūpavelāḥ smṛtāḥ pañca dhūpeṣveva tu pañcasu |
havanādyāḥ kriyāḥ pañca rakṣiṣye'haṃ tathā punaḥ || 20 ||
[Analyze grammar]

daṇḍanāyakavelā tu pratyūṣe ṛkṣadarśanāt |
nājñāvelā pradoṣastu tattvakāryaṃ vijānatā || 21 ||
[Analyze grammar]

trikālaṃ tu raveḥ pūjā kartavyā sūryadarśanāt |
ardhoditastu pūrvāhṇe tato'rddhastu ravirvibhuḥ || 22 ||
[Analyze grammar]

helayeti ca pūrvāhṇe madhyāhne jvalanāya ca |
tathaiva maṇḍale deyaṃ nīcāhne jvalanāya ca || 23 ||
[Analyze grammar]

candanodakamiśrāṇi gandhodakayutāni ca |
padmāni karavīrāṇi tathā raktotpalāni ca || 24 ||
[Analyze grammar]

kusumodakamiśrāṇi kuruṃṭakusumaṃ tathā |
gandhādīni ca divyāni kṛtvā vai tāmrabhājane || 25 ||
[Analyze grammar]

dhūpaṃ dattvāgnaye vīra prayatnādguggulāhutim |
arghyapātraṃ tadā gṛhya kuryādāvāhanaṃ raveḥ || 26 ||
[Analyze grammar]

ehi sūrya sahasrāṃśo tejorāśe jagatpate |
anukampya māṃ deva gṛhāṇārghyaṃ divākara || 27 ||
[Analyze grammar]

anenāvāhanaṃ kṛtvā jānubhyāmavanīṃ gataḥ |
ravernivedayedarghyamādityahṛdaye gataḥ || 28 ||
[Analyze grammar]

oṃ namo bhagavate1 ādityāya viśvāya kheśāya brahmaṇelokakartṛṇe |
īśānāya purāṇāya sahasrākṣāya te namaḥ || 29 ||
[Analyze grammar]

somāya ṛgyajuratharvāya |
oṃ bhūrbhuvaḥsvaḥoṃmahaḥ oṃjanaḥ oṃtapaḥ oṃ satyaṃ brahmaṇe muṇḍe madhye purataḥ || ādityāya namaḥ || 30 ||
[Analyze grammar]

nārada uvāca |
sāvitryāśca pare tantre trailokyatrāṇakāriṇe |
paritaḥ parigṛhyātha dhūpabhājanamutkṣipet || 31 ||
[Analyze grammar]

nivedayettato dhūpaṃ vācametāmudīrayet |
tvameka eva rudrāṇāṃ vasūnāṃ ca purātanaḥ || 32 ||
[Analyze grammar]

devānāṃ gīrbhirabhitaḥ saṃstutaḥ śāśvato divi |
pūrvāhṇe ca tvayā tena madhyāhne cāpareṇa tu || 33 ||
[Analyze grammar]

oṃ namo bhagavate jñānātmane tvāṃ ca |
viṣṇostatparamaṃ padaṃ sadā paśyaṃti sūrayaḥ || 34 ||
[Analyze grammar]

divākarastu sāyāhne mantreṇārghyaṃ nivedayet | oṃ |
namo varuṇāya śambhave || 35 ||
[Analyze grammar]

oṃ ākṛṣṇena rajasā vartamāno niveśayannamṛtaṃ martyaṃ ca |
hiraṇyayena savitā rathenādevo yāti bhuvanāni paśyan || 36 ||
[Analyze grammar]

anena vidhinā dattvā dhūpaṃ sūryāya bhojakaḥ |
utkṣipeccaiva dhūpena viśedgarbhagṛhaṃ tataḥ || 37 ||
[Analyze grammar]

tataḥ praviśya dhūpaṃ tu pratimārthaṃ nivedayet |
mantreṇa mihirāyeti nikṣubhāyeti nityaśaḥ || 38 ||
[Analyze grammar]

tato rājñai namaśceti nikṣubhāyai tato namaḥ |
daṇḍanāyakasaṃjñāya piṅgalāya ca vai namaḥ || 39 ||
[Analyze grammar]

tathā rājñāya srauṣāya tatheśāya garutmate |
tataḥ pradakṣiṇaṃ kurvandigdevebhyo nivedayet || 40 ||
[Analyze grammar]

diṇḍine tu tato dadyāddhemantāya yadūttama |
maheśvarāya dadyāttu tathā vyomāya yādava || 41 ||
[Analyze grammar]

oṃ brahmaṇe muṇḍapataye ādityāya puruṣeśvarāya sūryāya namonamaḥ || 42 ||
[Analyze grammar]

oṃ anekakāntaye natvā śeṣāya vāsukitakṣakakarkoṭakāya padmaśaṅkhakulikebhyo nāgarājebhyo namaḥ || 43 ||
[Analyze grammar]

talasutalapātālātalavitalarasātalādivāsibhyo daityādānavapiśācebhyo namaḥ |
tataḥ pradakṣiṇaṃ kuryānmātṛkābhyo namonamaḥ |
evamuddiśya nāmāni dhūpaṃ dattvā varānana |
utkṣipto yatra vai dhūpo muktvā tatraiva taṃ punaḥ || 46 ||
[Analyze grammar]

sūryaguptairabhiṣṭūya evaṃ vijñāya te tataḥ |
arcitastvaṃ yathā śaktyā mayā bhaktyā vibhāvaso |
aihikāmuṣmikīṃ nātha kāryasiddhiṃ vadasva me || 47 ||
[Analyze grammar]

evaṃ triṣavaṇaṃ snātvā yo'rcayetpraṇato ravim |
vidhinā tu yathoktena so'śvamedhaphalaṃ labhet || 48 ||
[Analyze grammar]

yaścaivaṃ kurute nityaṃ yathoktaṃ dhūpavistaram |
sa putravānarogī ca mṛtaḥ saṃlīyate ravau || 49 ||
[Analyze grammar]

vidhinā tu yathoktena kriyamāṇāni yatnataḥ |
sarvakāryāṇi siddhyanti saphalāni bhavanti ca || 50 ||
[Analyze grammar]

puṣpaṃ śreṣṭhaṃ yadā na syātpatrāṇi samupāharet |
patraṃ na syāttato dhūpaṃ dhūpo na syāttato jalam || 51 ||
[Analyze grammar]

sarvaṃ na syādyadā caiva praṇipātena pūjayet |
aśaktaḥ praṇipātasya manasā pūjayedravim || 52 ||
[Analyze grammar]

asambhave tu dravyāṇāṃ vidhireṣa prakīrtitaḥ |
dravyāṇāṃ sambhave caiva sarvamevopahārayet || 53 ||
[Analyze grammar]

mantraiḥ karmayuto yastu mitre dhūpaṃ nivedayet |
uccāraṇācca vai teṣāṃ dhūpaprīto bhavedraviḥ || 54 ||
[Analyze grammar]

śiro nāsāmukhaṃ caiva bhṛśamāvṛtya yatnataḥ |
pūjayedbhāskaraṃ vīra śithilaṃ1 tu na kārayet || 55 ||
[Analyze grammar]

nalinena tu rājendra naro yāti divākaram |
tasmādyuktaṃ sadā kāryaṃ pūjyate ca divākaraḥ || 56 ||
[Analyze grammar]

te'śvamedhaphalaṃ prāpya sūryalokaṃ vrajanti hi |
dhūpena pūjyamānaṃ tu narāḥ paśyanti yādava || 57 ||
[Analyze grammar]

yānti te paramaṃ sthānaṃ yanna paśyanti sūrayaḥ |
kriyamāṇaṃ tathārkaṃ ca bhaktyā paśyanti ye narāḥ |
sarvānkāmāniha prāpya te yānti paramaṃ padam || 58 ||
[Analyze grammar]