Chapter 121

śatānīka uvāca |
śarīralekhanaṃ1 bhānoruktaṃ saṃkṣepatastvayā |
vistarācchrotumicchāmi tanmamācakṣva suvrata || 1 ||
[Analyze grammar]

sumanturuvāca |
piturgṛhaṃ tu yātāyāṃ saṃjñāyāṃ kurunaṃdana |
bhāskaraściṃtayāmāsa saṃjñā madrūpakāriṇī || 2 ||
[Analyze grammar]

etasminnaṃtare brahmā tatrāgatya divākaram |
avravīnmadhurāṃ vācaṃ raveḥ prītikarāṃ śubhām || 3 ||
[Analyze grammar]

ādidevo'si devānāṃ vyāptametattvayā jagat |
śvaśuro viśvakarmā te rūpaṃ nirvartayiṣyati || 4 ||
[Analyze grammar]

evamuktvā raviṃ brahmā viśvakarmāṇamabravīt |
nivartasya mārtaṇḍaṃ svarūpaṃ tatsuśobhanam || 5 ||
[Analyze grammar]

tato brahmasamādeśādbhra mimāropya bhāskaram |
rūpaṃ nirvartayāmāsa viśvakarmā śanaiḥśanaiḥ || 6 ||
[Analyze grammar]

tatastuṣṭāva taṃ brahmā sarvadevagaṇaiḥ saha |
guhyairnānāvidhaiḥ stotrairvedavedāṅgapāragaiḥ || 7 ||
[Analyze grammar]

svasti te'stu jagannātha dharmavarṣahimākara |
śāṃtiste sarvalokānāṃ devadeva divākara || 8 ||
[Analyze grammar]

tato rudraśca viṣṇvādyāḥ stuvaṃtastaṃ divākaram |
tejaste vardhatāṃ deva likhyate'pi divaspate || 9 ||
[Analyze grammar]

indraścāgatya taṃ devaṃ likhyamānamathāstuvat |
jaya deva jayasveti tattvado'si jagatpate || 10 ||
[Analyze grammar]

ṛṣayastu tataḥ sapta viśvāmitrapurogamāḥ |
tuṣṭuvurvividhaiḥ stotraiḥ svastisvastītivādinaḥ || 11 ||
[Analyze grammar]

vedoktābhirathāśīrbhirvālakhilyāśca tuṣṭuvuḥ |
tvaṃ nātha mokṣiṇāṃ mokṣo dhyeyastvaṃ dhyānināmapi || 12 ||
[Analyze grammar]

tvaṃ gatiḥ sarvabhūtānāṃ tvayi sarvaṃ pratiṣṭhitam |
prajābhyaścaiva deveśa śaṃ no'stu jagataḥ pate || 13 ||
[Analyze grammar]

tvatto bhavati vai nityaṃ jagatsaṃlīyate tvayi |
tvamekastvaṃ dvidhā caiva tridhā ca tvaṃ na saṃśayaḥ || 14 ||
[Analyze grammar]

tvayaikena jagatsṛṣṭaṃ tvayaikena prabodhitam |
tato vidyādharagaṇā yakṣarākṣasapannagāḥ || 15 ||
[Analyze grammar]

kṛtāñjalipuṭāḥ sarve śirobhiḥ praṇatā ravim |
ūcurevaṃvidhā vāco manaḥ śrotrasukhapradāḥ || 16 ||
[Analyze grammar]

sahyaṃ bhavatu te tejo bhūtānāṃ bhūtabhāvana |
hāhā hūhūstataścaiva tumbururnāradastathā || 17 ||
[Analyze grammar]

upagātuṃ samārabdhā gāmuccaiḥ kuśalā ravim |
ṣaḍjamadhyamagāṃdhāragrāmatrayaviśāradāḥ || 18 ||
[Analyze grammar]

mūrcchanābhistataścaiva tathā dhaivatapañcamaiḥ |
nānānubhāvamandraiśca ardhamandraistathaiva ca || 19 ||
[Analyze grammar]

trisādhanaiḥ prakāraistu vādyatālasamanvitaiḥ |
viśvācī ca ghṛtācī ca urvaśī ca tilottamā || 20 ||
[Analyze grammar]

menakā sahajanyā ca rambhā cāpsarasāṃ varā |
hāvabhāvavilāsaiśca kurvatyo'bhinayānbahūn || 21 ||
[Analyze grammar]

tato'tīva kalaṃ geyaṃ madhuraṃ ca pravartate |
sarveṣāṃ devasaṃghānāṃ manaḥ śrotrasukhapradam || 22 ||
[Analyze grammar]

pravādyaṃ tu tatastatra vīṇāvaṃśādi suvrata |
paṇavāḥ puṣkarāścaiva mṛdaṅgāḥ paṭahāstathā || 23 ||
[Analyze grammar]

devadundubhayaḥ śaṃkhāḥ śataśo'tha sahasraśaḥ |
gāyadbhiścaiva gandharvairnṛtyadbhiścāpsarogaṇaiḥ || 24 ||
[Analyze grammar]

tūryavāditraghoṣaiśca sarvaṃ kolāhalīkṛtam |
tataḥ kṛtaiḥ karapuṭaiḥ padyakuḍmalasannibhaiḥ || 25 ||
[Analyze grammar]

lalāṭopari vinyastaiḥ praṇemuḥ sarvadevatāḥ |
tataḥ kolāhale tasminsarvadevasamāgame || 26 ||
[Analyze grammar]

tejasaḥ śātanaṃ cakre viśvakarmā śanaiḥ śanaiḥ || 27 ||
[Analyze grammar]

iti himajalagharmakālahetorharakamalāsanaviṣṇusaṃstutasya |
tadupari likhanaṃ niśamya bhānorvrajati divākaralokamāyuṣonte || 28 ||
[Analyze grammar]