Chapter 11

[English text for this chapter is available]

śrīmadbhāgavata mahāpurāṇa |
ṣaṣṭhaḥ skandhaḥekādaśo'dhyāyaḥ |
vṛtrasya bhaktijñānavairāgyayukta vīrocitodgārāḥśrīśuka uvācate evaṃ śaṃsato dharmaṃ vacaḥ patyuracetasaḥ |
naivāgṛhṇan bhayatrastāḥ palāyanaparā nṛpa || 1 ||
[Analyze grammar]

viśīryamāṇāṃ pṛtanāṃ āsurīṃ asurarṣabhaḥ |
kālānukūlaiḥ tridaśaiḥ kālyamānāmanāthavat || 2 ||
[Analyze grammar]

dṛṣṭvātapyata saṅkruddha indraśatruramarṣitaḥ |
tānnivāryaujasā rājan nirbhartsyedamuvāca ha || 3 ||
[Analyze grammar]

kiṃ va uccaritairmātuḥ dhāvadbhiḥ pṛṣṭhato hataiḥ |
na hi bhītavadhaḥ ślāghyo na svargyaḥ śūramāninām || 4 ||
[Analyze grammar]

yadi vaḥ pradhane śraddhā sāraṃ vā kṣullakā hṛdi |
agre tiṣṭhata mātraṃ me na ced‍grāmyasukhe spṛhā || 5 ||
[Analyze grammar]

evaṃ suragaṇān kruddho bhīṣayan vapuṣā ripūn |
vyanadatsumahāprāṇo yena lokā vicetasaḥ || 6 ||
[Analyze grammar]

tena devagaṇāḥ sarve vṛtravisphoṭanena vai |
nipeturmūrcchitā bhūmau yathaivāśaninā hatāḥ || 7 ||
[Analyze grammar]

mamarda pad‍bhyāṃ surasainyamāturaṃ |
nimīlitākṣaṃ raṇaraṅgadurmadaḥ |
gāṃ kampayan udyataśūla ojasā |
nālaṃ vanaṃ yūthapatiryathonmadaḥ || 8 ||
[Analyze grammar]

vilokya taṃ vajradharo'tyamarṣitaḥ |
svaśatrave'bhidravate mahāgadām |
cikṣepa tāmāpatatīṃ suduḥsahāṃ |
jagrāha vāmena kareṇa līlayā || 9 ||
[Analyze grammar]

sa indraśatruḥ kupito bhṛśaṃ tayā |
mahendravāhaṃ gadayoruvikramaḥ |
jaghāna kumbhasthala unnadan mṛdhe |
tatkarma sarve samapūjayan nṛpa || 10 ||
[Analyze grammar]

airāvato vṛtragadābhimṛṣṭo |
vighūrṇito'driḥ kuliśāhato yathā |
apāsarad bhinnamukhaḥ sahendro |
muñcannasṛk saptadhanurbhṛśārtaḥ || 11 ||
[Analyze grammar]

na sannavāhāya viṣaṇṇacetase |
prāyuṅkta bhūyaḥ sa gadāṃ mahātmā |
indro'mṛtasyandikarābhimarśa |
vītavyathakṣatavāho'vatasthe || 12 ||
[Analyze grammar]

sa taṃ nṛpendrāhavakāmyayā ripuṃ |
vajrāyudhaṃ bhrātṛhaṇaṃ vilokya |
smaraṃśca tatkarma nṛśaṃsamaṃhaḥ |
śokena mohena hasan jagāda || 13 ||
[Analyze grammar]

śrīvṛtra uvāca |
diṣṭyā bhavān me samavasthito ripuḥ |
yo brahmahā guruhā bhrātṛhā ca |
diṣṭyānṛṇo'dyāhamasattama tvayā |
macchūlanirbhinna dṛṣaddhṛdācirāt || 14 ||
[Analyze grammar]

yo no'grajasyātmavido dvijāteḥ |
gurorapāpasya ca dīkṣitasya |
viśrabhya khaḍgena śirāṃsyavṛścay |
paśorivākaruṇaḥ svargakāmaḥ || 15 ||
[Analyze grammar]

hrīśrīdayākīrtibhirujjhitaṃ tvāṃ |
svakarmaṇā puruṣādaiśca garhyam |
kṛcchreṇa macchūlavibhinnadehaṃ |
aspṛṣṭavahniṃ samadanti gṛdhrāḥ || 16 ||
[Analyze grammar]

anye'nu ye tveha nṛśaṃsamajñā |
ye hyudyatāstrāḥ praharanti mahyam |
tairbhūtanāthān sagaṇān niśāta |
triśūlanirbhinnagalairyajāmi || 17 ||
[Analyze grammar]

atho hare me kuliśena vīra |
hartā pramathyaiva śiro yadīha |
tatrānṛṇo bhūtabaliṃ vidhāya |
manasvināṃ pādarajaḥ prapatsye || 18 ||
[Analyze grammar]

sureśa kasmānna hinoṣi vajraṃ |
puraḥ sthite vairiṇi mayyamogham |
mā saṃśayiṣṭhā na gadeva vajraḥ |
syānniṣphalaḥ kṛpaṇārtheva yācñā || 19 ||
[Analyze grammar]

nanveṣa vajrastava śakra tejasā |
harerdadhīcestapasā ca tejitaḥ |
tenaiva śatruṃ jahi viṣṇuyantrito |
yato harirvijayaḥ śrīrguṇāstataḥ || 20 ||
[Analyze grammar]

ahaṃ samādhāya mano yathā'ha |
naḥ saṅkarṣaṇastaccaraṇāravinde |
tvadvajraraṃholulitagrāmyapāśo |
gatiṃ muneryāmyapaviddhalokaḥ || 21 ||
[Analyze grammar]

puṃsāṃ kilaikāntadhiyāṃ svakānāṃ |
yāḥ sampado divi bhūmau rasāyām |
na rāti yad dveṣa udvega ādhiḥ |
madaḥ kalirvyasanaṃ samprayāsaḥ || 22 ||
[Analyze grammar]

traivargikāyāsavighātamasmat |
patirvidhatte puruṣasya śakra |
tato'numeyo bhagavatprasādo |
yo durlabho'kiñcanagocaro'nyaiḥ || 23 ||
[Analyze grammar]

ahaṃ hare tava pādaikamūla |
dāsānudāso bhavitāsmi bhūyaḥ |
manaḥ smaretāsupaterguṇāṃste |
gṛṇīta vākkarma karotu kāyaḥ || 24 ||
[Analyze grammar]

na nākapṛṣṭhaṃ na ca pārameṣṭhyaṃ |
na sārvabhaumaṃ na rasādhipatyam |
na yogasiddhīrapunarbhavaṃ vā |
samañjasa tvā virahayya kāṅkṣe || 25 ||
[Analyze grammar]

ajātapakṣā iva mātaraṃ khagāḥ |
stanyaṃ yathā vatsatarāḥ kṣudhārtāḥ |
priyaṃ priyeva vyuṣitaṃ viṣaṇṇā |
mano'ravindākṣa didṛkṣate tvām || 26 ||
[Analyze grammar]

mamottamaślokajaneṣu sakhyaṃ |
saṃsāracakre bhramataḥ svakarmabhiḥ |
tvanmāyayātmātmajadāragehe |
ṣvāsaktacittasya na nātha bhūyāt || 27 ||
[Analyze grammar]