Yoga Vasistha [sanskrit]

223,437 words | ISBN-10: 8171101519

The Sanskrit edition of the Yoga-vasistha including English translation and grammatical analysis. The Yogavasistha is a Hindu spiritual text written by Valmiki (who also authored the Ramayana) dealing with the philosophical topics from the Advaita-vedanta school. Chronologically it precedes the Ramayana.

Chapter CLXIV

< Previous

Next >

śrīvasiṣṭha uvāca |
jīvāṇavo jagatyantaścidādityāṃśumaṇḍale |
yatra te'vayavāstulyāstenānavayavātmatā || 1 ||
[Analyze grammar]

sarvaṃ prāpya paraṃ bodhaṃ vastu svaṃ rūpamujjhati |
punastadekavākyatvānna kiṃcidvāparaṃ bhavet || 2 ||
[Analyze grammar]

sarvāsvevāsvavasthāsu tattvajñaviṣayaṃ tu tat |
paramevāmalaṃ brahma nānyatkiṃcitkadācana || 3 ||
[Analyze grammar]

yaccātattvajñaviṣayaṃ tajjānāti sa eva tat |
vayaṃ tu vidmo nāhaṃ tvaṃ nātattvajñaṃ na vastu tat || 4 ||
[Analyze grammar]

ayaṃ sohamayaṃ cājñaḥ satyo'yamiti buddhayaḥ |
saṃbhavanti na tattvajñe kva merau mṛgatṛṣṇikā || 5 ||
[Analyze grammar]

yathaikadravyaniṣṭhe hi citte'nyadravyasaṃvidaḥ |
na bhavanti pare tadvannānyāstiṣṭhanti saṃvidaḥ || 6 ||
[Analyze grammar]

idaṃ nāsīnna cotpannaṃ na cāsti na bhaviṣyati |
jagadbrahmaiva sadrūpamidamitthamavasthitam || 7 ||
[Analyze grammar]

cinnabhaḥ kācakacyaṃ ca svātmanyevāvatiṣṭhate |
jagadityeva tattatra tajjñānenaiva cetyate || 8 ||
[Analyze grammar]

svapneṣu kalpanapureṣu yathānyadasti cinmātramacchagaganaṃ nanu varjayitvā |
no kiṃcanāpi na ca rūpamarūpakeṣu rūpaṃ tathā jagati saṃprati jāgradākhye || 9 ||
[Analyze grammar]

pūrvaṃ kilodbhavati kiṃcana nāma nedaṃ taccāvabhāti tadanādi khameva cittvāt |
no kāraṇaṃ na sahakāri kilāsti yatra tasmātsvayaṃ bhavati vastviti keyamuktiḥ || 10 ||
[Analyze grammar]

tasmātsvayaṃ bhavati neha hi kaścidādau brahmādayo'jñaviditā na ca nāma santi |
vyomedamātatamayaṃ sa itaḥ svayaṃbhū rityādi cidgaganameva citā vibhāti || 11 ||
[Analyze grammar]