Chapter 15

pañcadaśo'dhyāyaḥ |
nāradaḥ |
brūhi me hariseneśa mūlamantreṇa vistarāt |
homakramaṃ kṛpādhāra śuśrūṣorbhaktavatsala || 1 ||
[Analyze grammar]

viṣvaksenaḥ |
śrṛṇu nārada tattvena pūrvabhāge yathāmune |
kuṇḍāni sruksruvaṃ caiva praspaṣṭaṃ proktavānaham || 2 ||
[Analyze grammar]

tatkrameṇa vinā vāpi saha vā mūlavidyayā |
homaṃ kuryādyathāśakti siddhaṃ vindeta sarvathā || 3 ||
[Analyze grammar]

vaiṣṇavaiḥ karaṇairyuktamatastaṃ prathamaṃ śrṛṇu |
pippalaṃ ca śamīgarbhamaraṇiṃ parikalpayet || 4 ||
[Analyze grammar]

mathitvā vaiṣṇavairagnimathavā ratnasaṃbhavam |
laukikaṃ vā samānīya prokṣayeddvādaśākṣaraiḥ || 5 ||
[Analyze grammar]

ācāryo'gniṃ samādāya svātmanyevopasaṃharet |
tena bījena matimān tarjanyaṅguṣṭhayā mune || 6 ||
[Analyze grammar]

añjalimudrayā cāgniṃ namaskṛtya punaḥ punaḥ |
kuṇḍaṃ vā sthaṇḍilaṃ vāpi caturaśraṃ tu kārayet || 7 ||
[Analyze grammar]

vaiṣṇavīkaraṇārthāya agnerhasta matandritaḥ |
caturaṅgulamānena khānayedavaṭaṃ dharām || 8 ||
[Analyze grammar]

khātāddhi dvyaṅgulaṃ hitvā mekhalāṃ parikalpayet |
caturaṅgulavistāramutsedhaṃ tu tathaiva ca || 9 ||
[Analyze grammar]

kāreyantamuniśārdūlada mekhalaikā samantataḥ |
ityekamekhalākuṇḍaṃ tantre'smin parikīrtitam || 10 ||
[Analyze grammar]

vaiṣṇavānalakuṇḍasya valayaṃ yonikalpanam |
yathākāmaṃ prakartavyā yoniḥ pippalapatravat || 11 ||
[Analyze grammar]

karṣaṇādiṣu sarvāsu kriyāsu munisattama |
vaiṣṇavīkaraṇārthāya saṃproktaṃ kuṇḍalakṣaṇam || 12 ||
[Analyze grammar]

saṃprokṣyābhyukṣma śā streṇa sādhako munasittama |
upalipyollikhedrekhāmargalāṃ yajñanāmikām || 13 ||
[Analyze grammar]

saumyāgrāṃ prathamāṃ tasyā rekhe pūrvāgrike tayoḥ |
madhye tisrastathārūpāḥ dakṣiṇādikrameṇa tu || 14 ||
[Analyze grammar]

evamullikhya cābhyukṣya praṇavenaiva mantravit |
śayyāṃ tu cintayet pūrvaṃ kuṇḍamadhye tu deśikaḥ || 15 ||
[Analyze grammar]

dharmādipādaṃ vinyasya tathādharmādikatrayam |
anantaṃ vinyasenmadhye tataḥ pāśāstrayo guṇāḥ || 16 ||
[Analyze grammar]

tataḥ proktavidhānena mūlamantreṇa sādhakaḥ |
pṛthivyādīni bhūtāni karaṇādīni kartṛke || 17 ||
[Analyze grammar]

paristaraṇasaṃchannāṃ dhūpāmodasudhūpitām |
dhyāyecca lakṣmīṃ tanmadhye prakṛtiṃ triguṇātmikām || 18 ||
[Analyze grammar]

tasmin śayanamadhye tu saṃprāptanavayauvanām |
atīva rūpasaṃmpannāṃ madaghūrṇitalocanām || 19 ||
[Analyze grammar]

sargaśaktisamopetāṃ vaiṣṇavīṃ śubhavigrahām |
divyamālyāmbaradharāṃ divyaratnavirājitām || 20 ||
[Analyze grammar]

divyagandhānuliptāṅgīṃ divyābharaṇabhūṣitām |
sābhilāṣāmṛtusnātāṃ prārthayantīṃ hariṃ prati || 21 ||
[Analyze grammar]

evaṃ rūpāṃ ca saṃcintya devīṃ paṅkajadhāriṇīm |
gandhamālyodakādīni mukhavāsāntakāni ca || 22 ||
[Analyze grammar]

yāni krīḍopacārāṇi tāni dhyātvā samantataḥ |
atīva rūpasampannaṃ prathame vayasi sthitam || 23 ||
[Analyze grammar]

makuṭāṅgadacitrāṅgaṃ nīlakuñcitamūrdhajam |
divyamālyāmbaradharaṃ divyaratnavirājitam || 24 ||
[Analyze grammar]

śrīvatsenāṅkitoraskaṃ vanamālāvirājitam |
sarvaratnaprabhājālakaustubhena virājitam || 25 ||
[Analyze grammar]

annatāṃsaṃ mahoraskaṃ karṇāntāyatalocanam |
ājānubāhuṃ śrīmantaṃ saumyaṃ prahasitānanam || 26 ||
[Analyze grammar]

lāvaṇyāmṛtatoyena siñcantamiva sarvataḥ |
caturbhujamanudhyāyet śaṅkhacakragadādharam || 27 ||
[Analyze grammar]

evaṃ rūpaṃ tato dhyātvā devīṃ devaṃ tathaiva ca |
arcayedgandhapuṣpādyairupacārairmanoramaiḥ || 28 ||
[Analyze grammar]

saṃpūjayettato bhaktyā svayaṃ tu vigataspṛhaḥ |
ekaśayyāgatau dhyātvā samāliṅgya vyavasthitau || 29 ||
[Analyze grammar]

paścāttu grāmyadharmeṇa paraṃ harṣamupāgatau |
devasya śuklamadhyasthaṃ vahnibījaṃ tu sādhakaḥ || 30 ||
[Analyze grammar]

tena bījena matimān nyasedagnimanuttamam |
garbhaśayyāṃ pratiṣṭhāpya tadratnena samanvitam || 31 ||
[Analyze grammar]

devaṃ visarjayet paścāt garbhādhāne kṛte sati |
agniṃ samedhayet paścāt śuṣkakāṣṭhairanantaram || 32 ||
[Analyze grammar]

prādeśamātrāḥsamidhaḥ kṛtvādhānaṃ tataḥ punaḥ |
parisamūhya tato darbhaiḥ paristīrya tridhā tridhā || 33 ||
[Analyze grammar]

agrairācchādayedyadvat mūlaṃ pūrvāditaḥ kramāt |
pātrāṇyāsādayettasmin idhmabarhidvayaṃ tathā || 34 ||
[Analyze grammar]

sruksruvau ca praṇītena kṣa payitvātra sādhakaḥ |
prokṣaṇī ca praṇīte dve ājyasthālīmukhaṃ tathā || 35 ||
[Analyze grammar]

yugmaṃ yugmaṃ vyavasthāpya anyadapyupayogi yat |
tatsarvaṃ prokṣāyitvā tu gṛhītvā prokṣaṇīṃ tataḥ || 36 ||
[Analyze grammar]

adbhiḥ saṃpūrya cotpūya pavitrāntarhite kare |
avasthāpya ca tattoyaṃ prokṣayitvātra sādhakaḥ || 37 ||
[Analyze grammar]

prokṣaṇyāmeva tatkṛtvā dhyātvā jyotiṣamavyayam |
pūrvavat sthāpayedagneḥ saṃskṛtyāntarjalena tu || 38 ||
[Analyze grammar]

triḥsaṃprokṣya tataḥsarvaṃ idhmaṃ visrasya sādhakaḥ |
gandhapuṣpākṣatayutāṃ pavitrāntarjalena tu || 39 ||
[Analyze grammar]

praṇītāmagrataḥ kṛtvā tasyāṃ sāṅgaṃ nyaseddharim |
gandhādibhiḥsamabhyarcya sarvarakṣākaraṃ prabhum || 40 ||
[Analyze grammar]

dhyātvā nītvottare bhāge sthāpayitvārcayed budhaḥ |
ājyasthālīmathājyena saṃpūryāgre nidhāya tu || 41 ||
[Analyze grammar]

saṃplavotplavanābhyāṃ tu kuryādājyasya saṃskṛtim |
ākhaṇḍitāgrau nihatau kuśau prādeśamātrakau || 42 ||
[Analyze grammar]

tābhyāmuttānapāṇibhyāmaṅguṣṭhānāmikena tu |
tānantayostu saṃgṛhya trirnītvā trirathānayet || 43 ||
[Analyze grammar]

sruksruvau cāpi saṃmṛjya punaḥ prakṣālya caiva hi |
niṣṭapya sthāpayitvā tu praṇavenaiva sādhakaḥ || 44 ||
[Analyze grammar]

tena bījena matimān garbhādhānādi homayet |
garbhādhānaṃ puṃsavanaṃ sīmantonnayanaṃ tathā || 45 ||
[Analyze grammar]

jātakarmanāmakaraṇānnaprāśanameva ca |
caulaṃ tathopanayanaṃ prājāpatyaṃ tu somakam || 46 ||
[Analyze grammar]

vaiśvadevaṃ ca śukriyaṃ samāvartanameva ca |
vivāha iti vijñeyo mune'taḥ parameva hi || 47 ||
[Analyze grammar]

saṃskārānukramaḥ proktastatkriyā vakṣyate'dhunā |
agniṃ samarcya gandhādyaiḥ garbhādhānādi homayet || 48 ||
[Analyze grammar]

ācāryo'nalajihvāsu saptasvevārabhenmune |
anyathākṛtatulyaṃ syāt viparītaphalapradam || 49 ||
[Analyze grammar]

nāradaḥ |
brūhi yatkathitaṃ pūrvaṃ śravaṇīyaṃ mayā yadi |
jihvā sapteti kiṃ nāma kiṃ padaṃ kiṃ guṇaṃ mune || 50 ||
[Analyze grammar]

viṣvaksenaḥ |
śrṛṇu vakṣyāmyahaṃ samyak rahasyaṃ paramaṃ mune |
jihvākhyāṃ sthānarūpe ca viniyogamataḥ param || 51 ||
[Analyze grammar]

jihvāgneḥ prathamā kālī karālī tadanantarā |
manojavā yā tṛtīyā tu turyā lohitā bhavet || 52 ||
[Analyze grammar]

sudhūmrā pañcamī ṣaṣṭha sphaliṅginyabhiśabditā |
saptamī viśvarūpākhyā saptajihvāḥ prakīrtitāḥ || 53 ||
[Analyze grammar]

kālyāstu madhyamaṃ sthānaṃ karālyāḥ pūrvadig bhavet |
manojavāyāḥ kīnāśaṃ vāruṇī lohitāpadam || 54 ||
[Analyze grammar]

sūdhūmrā somanīlāya sphuliṅginyanalālayā |
viśvarūpī śavasatirevaṃ sthānaṃ kramānmune || 55 ||
[Analyze grammar]

āsāṃ kālyāṃ vivāhāntaṃ garbhādhānādi kārayet |
vaiṣṇavānalarūpe tu praṇevana huned ghṛtam || 56 ||
[Analyze grammar]

ekaikamaṣṭāhutibhiḥ saṃskārāṇi viśeṣataḥ |
smaraṃstattadbhāvanayā sādhakaḥ prauḍhamānasaḥ || 57 ||
[Analyze grammar]

ṣoḍaśedhmān samādāya sakṛt praṇavamuccaran |
juhuyāt kuṇḍamadhye tu kālyāṃ cānnāvasānake || 58 ||
[Analyze grammar]

punarājyāhutiṃ hutvā praṇavenāṣṭadhātra tu |
caruṃ hutvākṣamātreṇa pratyekaikāhutiṃ kramāt || 59 ||
[Analyze grammar]

aṣṭākṣareṇa mantreṇa a ṣṭāviṃśatisaṃkhyayā |
pūrṇāhutiṃ tato hutvā srucā mūlena sādhakaḥ || 60 ||
[Analyze grammar]

vauṣaḍantena mantreṇa plutaṃ praṇavamuccaret |
gandhapuṣpādinābhyarcya namaskṛtyāgnimantrataḥ || 61 ||
[Analyze grammar]

kuṇḍādagniṃ samādāya pūrvakuṇḍe niyojayet |
tatastu dakṣiṇe nyasya paścime tadanantaram || 62 ||
[Analyze grammar]

uttare'gniṃ vinikṣipya mūlamantreṇa sādhakaḥ |
athavātra muniśreṣṭha sarvaṃ vai prathamena tu || 63 ||
[Analyze grammar]

kuṇḍe kuṇḍe vinikṣipya pāvakaṃ paramārthavit |
evaṃ saṃskṛtya vidhinā pāvakaṃ pāvanaṃ hareḥ || 64 ||
[Analyze grammar]

evaṃ tathāgnisaṃskāraṃ sarvayāgeṣu kīrtitam |
vaiṣṇavīkaraṇe caivaṃ vaiṣṇavāgnistato bhavet || 65 ||
[Analyze grammar]

paridhiprabhṛtīn dagdhvā praṇavena tu sādhakaḥ |
etatkrameṇa cotpādya vaiṣṇavāgniṃ tu nārada || 66 ||
[Analyze grammar]

kārayedvidhivat sarvaṃ karṣaṇādikriyādiṣu |
athavā muniśārdūla pūrvakuṇḍe tu kārayet || 67 ||
[Analyze grammar]

vaiṣṇavīkaraṇaṃ sarvaṃ śeṣaṃ sādhāraṇaṃ bhavet |
kuṇḍe vā sthaṇḍile vāpi vaiṣṇavīkaraṇaṃ kura1 || 68 ||
[Analyze grammar]

anyadeśe tu yo mohādagnimutpādayedyadi |
tatkriyā niṣphalā jñeyā sasyādinidhanaṃ bhavet || 69 ||
[Analyze grammar]

tasmāt sarvaprayatnena kārayedvidhicoditam |
caturaśrādikuṇḍāni saṃprokṣyāstreṇa mantrataḥ || 70 ||
[Analyze grammar]

vinyasennyāsamārgeṇa śaśāṅkādyakṣaraiḥ kramāt |
tatra nyāsakramaṃ vakṣye śrṛṇu kuṇḍeṣu nārada || 71 ||
[Analyze grammar]

kuṇḍe vā sthaṇḍile vāpi praṇavābhyukṣaṇe kṛte |
prokṣayedvasusūtreṇa dakṣiṇādyuttarāntakam || 72 ||
[Analyze grammar]

paścimādīndraparyantaṃ koṣṭhaṃ kṛtvā vibhajya ca |
tanmadhyakoṣṭhaṃ prastīrya śālinā kuḍubena ca || 73 ||
[Analyze grammar]

taṇḍulenākṣatenātra candramaṇḍalamālikhet |
tanmadhye bījamālikhya pūrvādaṣṭākṣaraṃ likhet || 74 ||
[Analyze grammar]

tadbahirvasukoṣṭheṣu āṛkārāntamālikhet |
indrādīśānaparyantaṃ tadbahiḥ svarakoṣṭhake || 75 ||
[Analyze grammar]

pūrvādīndreśaparyantaṃ jāntaraprabhṛtīn nyaset |
tadbahistattvakoṣṭheṣu jhādisāntamatho likhet || 76 ||
[Analyze grammar]

pūrvādyuttarapūrvāntaṃ tato vai mekhalāsu ca |
pūrvādisomaparyantaṃ paṭhantaṃ ca sudarśanam || 77 ||
[Analyze grammar]

yonimadhye tu viprendra viṣṇubījamanuttamam |
vinyaset pañcadhā tasminnanāmikyā tu sādhakaḥ || 78 ||
[Analyze grammar]

evaṃ nyāsaṃ kramāt kṛtvā sādhakānāṃ hitāya tu |
nyāsahīne'gnikāryaṃ syāt tatkriyā niṣphalā bhavet || 79 ||
[Analyze grammar]

tadgrāmo nidhanaṃ yāti tatsthānāṃ nidhanaṃ bhavet |
tasmāt sarvaprayatnena nyāsaṃ kuryādvicakṣaṇaḥ || 80 ||
[Analyze grammar]

kuṇḍe kuṇḍe muniśreṣṭha sthaṇḍile vāpyatandritaḥ |
gandhādidīpaparyantamabhyarcyāñjalimudrikām || 81 ||
[Analyze grammar]

darśayitvā yathānyāyaṃ kuryāt pañcaśataṃ kramāt |
tathaiva mekhalāyāṃ tu pūjayedyonimeva ca || 82 ||
[Analyze grammar]

ataḥ paraṃ pravakṣyāmi homānukramamuttamam |
karṣaṇādiṣu sarvāsu kriyāsu munisattama || 83 ||
[Analyze grammar]

ācāryaḥ prakrameddhomaṃ barhiṃṣi samidhastathā |
paridhisruksruvānnaṃ cāpyājyaṃ lājaṃ tilaṃ tathā || 84 ||
[Analyze grammar]

tadindhanabalidravyaṃ gandhaṃ puṣpaṃ sudhūpakam |
dīpaṃ vardhanīṃ gandhodaṃ prokṣaṇīpātrakaṃ tathā || 85 ||
[Analyze grammar]

praṇītājyamathānyacca hastamutsṛjya vinyaset |
uttareṇānilasthānāt yugmaṃ yugmena sādhakaḥ || 86 ||
[Analyze grammar]

prokṣaṇyāṃ vardhanīnīramāsicya prokṣya vidyayā |
mūlayā sādhanadravyamāhūyāgniṃ tato mune || 87 ||
[Analyze grammar]

analaṃ pūrvavat prokṣya a gnimūrtimanusmaret |
agniṃ prokṣyāvaṭasthaṃ taṃ sānusvāre tu bījake || 88 ||
[Analyze grammar]

hastābhyāmanalaṃ sthāpya pūrvoktena vidhānataḥ |
edhāṃsi jvālayitvokṣya paristīryāgnimadhyame || 89 ||
[Analyze grammar]

padmamaṣṭadalaṃ dhyātvā tatra vai mūlaberataḥ |
āvāhayitvā deveśamarcayedvidhicoditam || 90 ||
[Analyze grammar]

atra kaścidviśeṣo'sti homakarmaṇi nārada |
devaṃ śvetādrisaṃkāśaṃ tripādaṃ saptabāhukam || 91 ||
[Analyze grammar]

vedaśṛṅgaṃ dvivadanaṃ pītāmbaradharaṃ harim |
śaṅkhacakragadāpāṇiṃ saptajihvaṃ subhūṣaṇam || 92 ||
[Analyze grammar]

saumyaṃcasarvābharaṇairdivyaiḥ parivṛtaṃ budhaḥ |
agnau vahnisvarūpeṇa sthitamarcāmukhaṃ smaret || 93 ||
[Analyze grammar]

tasmādardhyādi datvā ca dakṣiṇe'gnervidhiṃ nyaset |
taṃ pūjya vidhivat paścāt homadravyāṇi madhyame || 94 ||
[Analyze grammar]

praṇītābhājanaṃ nyasya tatra sāṅgaṃ nyaseddharim |
devamabhyarcya gandhādyaiḥ homakarma samācaret || 95 ||
[Analyze grammar]

nitye naimittike kāmye samidājyairyathākramam |
samit pālāśakhadirabilvodumbarapippalāḥ || 96 ||
[Analyze grammar]

sadvṛkṣā viduṣā grāhyāstanmānaṃ dvādaśāṅgulam |
kaniṣṭhikāghanā vakragrandhinyāsānyavṛttataḥ || 97 ||
[Analyze grammar]

paridhirhastamātraḥsyāt sthaṇḍile kuṇḍa eva vā |
madhyamekhalayā tulyamaṅguṣṭhānāṃ ghanaṃ viduḥ || 98 ||
[Analyze grammar]

devānāṃ paridhīn dikṣu catasṛṣvapi kārayet |
viṣṇuyāge viśeṣeṇa dvijānāmagnikarmaṇi || 99 ||
[Analyze grammar]

triṣveva tu mune buddhi homāntaṃ paścimādikam |
viṣṇormakhe mahendrādidarbhān sarvāsu cobhayoḥ || 100 ||
[Analyze grammar]

niśācarāṇāṃ rakṣāyai viśeṣaṃ munisattama |
mahendraprabhṛtīnāṃ tu homadravyāpahāriṇām || 101 ||
[Analyze grammar]

evaṃ jñātvā muniśreṣṭha idhmādyairhomamācaret |
karālyāṃ samidho hutvā mūlamantreṇa mantravit || 102 ||
[Analyze grammar]

manojavāyāmājyena vedādyenaiva deśikaḥ |
lohitāyāṃ tathānnena juhuyānmūrtimantrataḥ || 103 ||
[Analyze grammar]

sudhūmrāyāṃ tathā lājān vidhāyātha dvitīyayā |
tṛtīyena tu mantreṇa sphuliṅginyāṃ tilaṃ tathā || 104 ||
[Analyze grammar]

viśvarūpyāṃ caturthena tattaddravyaṃ dine dine |
adhomukhāṅguṣṭhasahitānāmikā sahamadhyamā || 105 ||
[Analyze grammar]

āmadhyaparva gṛhṇāti kriyāṃ tenaiva kārayet |
homadravyeṇa homaṃ tu sarpiṣā śuktikāhutim || 106 ||
[Analyze grammar]

prāyaścittāhutiṃ pūrṇāṃ paridhyādi tathā param |
anuktasthānakaṃ sarvaṃ kālyāṃ tu juhuyāt punaḥ || 107 ||
[Analyze grammar]

samidāditilāntaṃ ca dravyamaṣṭottaraṃ śatam |
prāyaścittāhutiṃ kuryādekāṃ mūlena vidyayā || 108 ||
[Analyze grammar]

pūrṇāhutiṃ tato hutvā srucā mūlena sādhakaḥ |
vauṣaḍantena mantreṇa dvādaśākṣarasaṃjñayā || 109 ||
[Analyze grammar]

paridhiprabhṛtīn sarvān vauṣaḍantaṃ tathā hunet |
svāhāntaṃ mūlamantreṇa muṣṭyājyena ca pūraṇam || 110 ||
[Analyze grammar]

āhutīśca yathāśāstraṃ juhuyāt sādhakottamaḥ |
pūrṇāhutyavasāne tu mūlenāṣṭottaraṃ japet || 111 ||
[Analyze grammar]

paridhīnutsavānte ca dāhayedutsave mune |
nityāgnau ca yathākāmaṃ sarvaṃ naimittikaṃ tathā || 112 ||
[Analyze grammar]

utsavānutsavāgnau vā kuryānnaimittikaṃ budhaḥ |
ācāryebhyo yathākāmaṃ dakṣiṇāmādadettataḥ || 113 ||
[Analyze grammar]

dakṣiṇāhīnametaccet sarvaṃ niṣphalameva hi |
tasmādācāryatṛptyarthaṃ rājarāṣṭravivṛddhaye || 114 ||
[Analyze grammar]

ācāryaṃ pūjayecchiṣyaṃ bhūṣaṇācchādanairapi |
dhānyaiścaiva dhanaiścaiva yajamānena satkṛtaḥ || 115 ||
[Analyze grammar]

dakṣiṇāṃ gurave dadyāt yajamāno yathābalam |
anyathākṛtametaccet sarvaṃ rāṣṭraṃ vinaśyati || 116 ||
[Analyze grammar]

tasmāt sarvaprayatnena vidhānoktaṃ samācaret |
kuṇḍastha pūjayeddevamupacāreṇa yatnataḥ || 117 ||
[Analyze grammar]

anantaraṃ praviśyātha mudrāmañjalisaṃjñitām |
udvāsayettataḥ kuṇḍāt mūlabere vidhānavit || 118 ||
[Analyze grammar]

karṣaṇādyutsave kāle nityotsavavidhāvapi |
evamuktaprakāreṇa homaṃ kuryādvicakṣaṇaḥ || 119 ||
[Analyze grammar]

hareratipriyāśeṣalokān samavikārayet |
nityahome tu paridhīn barhīṃṣi ca na dāhayet || 120 ||
[Analyze grammar]

etadrahasyaṃ kathitaṃ mune homavidhikramam |
hareratipriyakaraṃ yaḥ kuryāt kārayedapi || 121 ||
[Analyze grammar]