Chapter 27

kailāsaṃ laṅghayitvātha daśagrīvaḥ sarākṣasaḥ |
āsasāda mahātejā indralokaṃ niśācaraḥ || 1 ||
[Analyze grammar]

tasya rākṣasasainyasya samantādupayāsyataḥ |
devalokaṃ yayau śabdo bhidyamānārṇavopamaḥ || 2 ||
[Analyze grammar]

śrutvā tu rāvaṇaṃ prāptamindraḥ saṃcalitāsanaḥ |
abravīttatra tāndevān sarvāneva samāgatān || 3 ||
[Analyze grammar]

ādityān savasūn rudrān viśvān sādhyānmarudgaṇān |
sajjībhavata yuddhārthaṃ rāvaṇasya durātmanaḥ || 4 ||
[Analyze grammar]

evamuktāstu śakreṇa devāḥ śakrasamā yudhi |
saṃnahyanta mahāsattvā yuddhaśraddhāsamanvitāḥ || 5 ||
[Analyze grammar]

sa tu dīnaḥ paritrasto mahendro rāvaṇaṃ prati |
viṣṇoḥ samīpamāgatya vākyametaduvāca ha || 6 ||
[Analyze grammar]

viṣṇo kathaṃ kariṣyāmo mahāvīryaparākrama |
asau hi balavān rakṣo yuddhārthamabhivartate || 7 ||
[Analyze grammar]

varapradānādbalavānna khalvanyena hetunā |
tacca satyaṃ hi kartavyaṃ vākyaṃ deva prajāpateḥ || 8 ||
[Analyze grammar]

tad yathā namucirvṛtro balirnarakaśambarau |
tvanmataṃ samavaṣṭabhya yathā dagdhāstathā kuru || 9 ||
[Analyze grammar]

na hyanyo deva devānāmāpatsu sumahābala |
gatiḥ parāyaṇaṃ vāsti tvāmṛte puruṣottama || 10 ||
[Analyze grammar]

tvaṃ hi nārāyaṇaḥ śrīmānpadmanābhaḥ sanātanaḥ |
tvayāhaṃ sthāpitaścaiva devarājye sanātane || 11 ||
[Analyze grammar]

tadākhyāhi yathātattvaṃ devadeva mama svayam |
asicakrasahāyastvaṃ yudhyase saṃyuge ripum || 12 ||
[Analyze grammar]

evamuktaḥ sa śakreṇa devo nārāyaṇaḥ prabhuḥ |
abravīnna paritrāsaḥ kāryaste śrūyatāṃ ca me || 13 ||
[Analyze grammar]

na tāvadeṣa durvṛttaḥ śakyo daivatadānavaiḥ |
hantuṃ yudhi samāsādya varadānena durjayaḥ || 14 ||
[Analyze grammar]

sarvathā tu mahat karma kariṣyati balotkaṭaḥ |
rakṣaḥ putrasahāyo'sau dṛṣṭametannisargataḥ || 15 ||
[Analyze grammar]

bravīṣi yattu māṃ śakra saṃyuge yotsyasīti ha |
naivāhaṃ pratiyotsye taṃ rāvaṇaṃ rākṣasādhipam || 16 ||
[Analyze grammar]

anihatya ripuṃ viṣṇurna hi pratinivartate |
durlabhaścaiṣa kāmo'dya varamāsādya rākṣase || 17 ||
[Analyze grammar]

pratijānāmi devendra tvatsamīpaṃ śatakrato |
rākṣasasyāhamevāsya bhavitā mṛtyukāraṇam || 18 ||
[Analyze grammar]

ahamenaṃ vadhiṣyāmi rāvaṇaṃ sasutaṃ yudhi |
devatāstoṣayiṣyāmi jñātvā kālamupasthitam || 19 ||
[Analyze grammar]

etasminnantare nādaḥ śuśruve rajanīkṣaye |
tasya rāvaṇasainyasya prayuddhasya samantataḥ || 20 ||
[Analyze grammar]

atha yuddhaṃ samabhavaddevarākṣasayostadā |
ghoraṃ tumulanirhrādaṃ nānāpraharaṇāyudham || 21 ||
[Analyze grammar]

etasminnantare śūrā rākṣasā ghoradarśanāḥ |
yuddhārthamabhyadhāvanta sacivā rāvaṇājñayā || 22 ||
[Analyze grammar]

mārīcaśca prahastaśca mahāpārśvamahodarau |
akampano nikumbhaśca śukaḥ sāraṇa eva ca || 23 ||
[Analyze grammar]

saṃhrādirdhūmaketuśca mahādaṃṣṭro mahāmukhaḥ |
jambumālī mahāmālī virūpākṣaśca rākṣasaḥ || 24 ||
[Analyze grammar]

etaiḥ sarvairmahāvīryairvṛto rākṣasapuṃgavaḥ |
rāvaṇasyāryakaḥ sainyaṃ sumālī praviveśa ha || 25 ||
[Analyze grammar]

sa hi devagaṇān sarvānnānāpraharaṇaiḥ śitaiḥ |
vidhvaṃsayati saṃkruddhaḥ saha taiḥ kṣaṇadācaraiḥ || 26 ||
[Analyze grammar]

etasminnantare śūro vasūnāmaṣṭamo vasuḥ |
sāvitra iti vikhyātaḥ praviveśa mahāraṇam || 27 ||
[Analyze grammar]

tato yuddhaṃ samabhavat surāṇāṃ rākṣasaiḥ saha |
kruddhānāṃ rakṣasāṃ kīrtiṃ samareṣvanivartinām || 28 ||
[Analyze grammar]

tataste rākṣasāḥ śūrā devāṃstān samare sthitān |
nānāpraharaṇairghorairjaghnuḥ śatasahasraśaḥ || 29 ||
[Analyze grammar]

surāstu rākṣasān ghorānmahāvīryān svatejasā |
samare vividhaiḥ śastrairanayanyamasādanam || 30 ||
[Analyze grammar]

etasminnantare śūraḥ sumālī nāma rākṣasaḥ |
nānāpraharaṇaiḥ kruddho raṇamevābhyavartata || 31 ||
[Analyze grammar]

devānāṃ tadbalaṃ sarvaṃ nānāpraharaṇaiḥ śitaiḥ |
vidhvaṃsayati saṃkruddho vāyurjaladharāniva || 32 ||
[Analyze grammar]

te mahābāṇavarṣaiśca śūlaiḥ prāsaiśca dāruṇaiḥ |
pīḍyamānāḥ surāḥ sarve na vyatiṣṭhan samāhitāḥ || 33 ||
[Analyze grammar]

tato vidrāvyamāṇeṣu tridaśeṣu sumālinā |
vasūnāmaṣṭamo devaḥ sāvitro vyavatiṣṭhata || 34 ||
[Analyze grammar]

saṃvṛtaḥ svairanīkaistu praharantaṃ niśācaram |
vikrameṇa mahātejā vārayāmāsa saṃyuge || 35 ||
[Analyze grammar]

sumattayostayorāsīd yuddhaṃ loke sudāruṇam |
sumālino vasoścaiva samareṣvanivartinoḥ || 36 ||
[Analyze grammar]

tatastasya mahābāṇairvasunā sumahātmanā |
mahān sa pannagarathaḥ kṣaṇena vinipātitaḥ || 37 ||
[Analyze grammar]

hatvā tu saṃyuge tasya rathaṃ bāṇaśataiḥ śitaiḥ |
gadāṃ tasya vadhārthāya vasurjagrāha pāṇinā || 38 ||
[Analyze grammar]

tāṃ pradīptāṃ pragṛhyāśu kāladaṇḍanibhāṃ śubhām |
tasya mūrdhani sāvitraḥ sumālervinipātayat || 39 ||
[Analyze grammar]

tasya mūrdhani solkābhā patantī ca tadā babhau |
sahasrākṣasamutsṛṣṭā girāviva mahāśaniḥ || 40 ||
[Analyze grammar]

tasya naivāsthi kāyo vā na māṃsaṃ dadṛśe tadā |
gadayā bhasmasādbhūto raṇe tasminnipātitaḥ || 41 ||
[Analyze grammar]

taṃ dṛṣṭvā nihataṃ saṃkhye rākṣasāste samantataḥ |
dudruvuḥ sahitāḥ sarve krośamānā mahāsvanam || 42 ||
[Analyze grammar]