Chapter 14

tataḥ sa sacivaiḥ sārdhaṃ ṣaḍbhirnityaṃ balotkaṭaiḥ |
mahodaraprahastābhyāṃ mārīcaśukasāraṇaiḥ || 1 ||
[Analyze grammar]

dhūmrākṣeṇa ca vīreṇa nityaṃ samaragṛdhnunā |
vṛtaḥ saṃprayayau śrīmān krodhāl lokāndahanniva || 2 ||
[Analyze grammar]

purāṇi sa nadīḥ śailān vanānyupavanāni ca |
atikramya muhūrtena kailāsaṃ girimāviśat || 3 ||
[Analyze grammar]

taṃ niviṣṭaṃ girau tasmin rākṣasendraṃ niśamya tu |
rājño bhrātāyamityuktvā gatā yatra dhaneśvaraḥ || 4 ||
[Analyze grammar]

gatvā tu sarvamācakhyurbhrātustasya viniścayam |
anujñātā yayuścaiva yuddhāya dhanadena te || 5 ||
[Analyze grammar]

tato balasya saṃkṣobhaḥ sāgarasyeva vardhataḥ |
abhūnnairṛtarājasya giriṃ saṃcālayanniva || 6 ||
[Analyze grammar]

tato yuddhaṃ samabhavad yakṣarākṣasasaṃkulam |
vyathitāścābhavaṃstatra sacivāstasya rakṣasaḥ || 7 ||
[Analyze grammar]

taṃ dṛṣṭvā tādṛśaṃ sainyaṃ daśagrīvo niśācaraḥ |
harṣānnādaṃ tataḥ kṛtvā roṣāt samabhivartata || 8 ||
[Analyze grammar]

ye tu te rākṣasendrasya sacivā ghoravikramaḥ |
te sahasraṃ sahasrāṇāmekaikaṃ samayodhayan || 9 ||
[Analyze grammar]

tato gadābhiḥ parighairasibhiḥ śaktitomaraiḥ |
vadhyamāno daśagrīvastat sainyaṃ samagāhata || 10 ||
[Analyze grammar]

tairnirucchvāsavattatra vadhyamāno daśānanaḥ |
varṣamāṇairiva ghanairyakṣendraiḥ saṃnirudhyata || 11 ||
[Analyze grammar]

sa durātmā samudyamya kāladaṇḍopamāṃ gadām |
praviveśa tataḥ sainyaṃ nayanyakṣānyamakṣayam || 12 ||
[Analyze grammar]

sa kakṣamiva vistīrṇaṃ śuṣkendhanasamākulam |
vātenāgnirivāyatto'dahat sainyaṃ sudāruṇam || 13 ||
[Analyze grammar]

taistu tasya mṛdhe'mātyairmahodaraśukādibhiḥ |
alpāvaśiṣṭāste yakṣāḥ kṛtā vātairivāmbudāḥ || 14 ||
[Analyze grammar]

ke cittvāyudhabhagnāṅgāḥ patitāḥ samarakṣitau |
oṣṭhān svadaśanaistīkṣṇairdaṃśanto bhuvi pātitāḥ || 15 ||
[Analyze grammar]

bhayādanyonyamāliṅgya bhraṣṭaśastrā raṇājire |
niṣeduste tadā yakṣāḥ kūlā jalahatā iva || 16 ||
[Analyze grammar]

hatānāṃ svargasaṃsthānāṃ yudhyatāṃ pṛthivītale |
prekṣatāmṛṣisaṃghānāṃ na babhūvāntaraṃ divi || 17 ||
[Analyze grammar]

etasminnantare rāma vistīrṇabalavāhanaḥ |
agamat sumahānyakṣo nāmnā saṃyodhakaṇṭakaḥ || 18 ||
[Analyze grammar]

tena yakṣeṇa mārīco viṣṇuneva samāhataḥ |
patitaḥ pṛthivīṃ bheje kṣīṇapuṇya ivāmbarāt || 19 ||
[Analyze grammar]

prāptasaṃjño muhūrtena viśramya ca niśācaraḥ |
taṃ yakṣaṃ yodhayāmāsa sa ca bhagnaḥ pradudruve || 20 ||
[Analyze grammar]

tataḥ kāñcanacitrāṅgaṃ vaidūryarajatokṣitam |
maryādāṃ dvārapālānāṃ toraṇaṃ tat samāviśat || 21 ||
[Analyze grammar]

tato rāma daśagrīvaṃ praviśantaṃ niśācaram |
sūryabhānuriti khyāto dvārapālo nyavārayat || 22 ||
[Analyze grammar]

tatastoraṇamutpāṭya tena yakṣeṇa tāḍitaḥ |
rākṣaso yakṣasṛṣṭena toraṇena samāhataḥ |
na kṣitiṃ prayayau rāma varāt salilayoninaḥ || 23 ||
[Analyze grammar]

sa tu tenaiva taṃ yakṣaṃ toraṇena samāhanat |
nādṛśyata tadā yakṣo bhasma tena kṛtastu saḥ || 24 ||
[Analyze grammar]

tataḥ pradudruvuḥ sarve yakṣā dṛṣṭvā parākramam |
tato nadīrguhāścaiva viviśurbhayapīḍitāḥ || 25 ||
[Analyze grammar]