Chapter 63

pravṛtte saṃkule tasmin ghore vīrajanakṣaye |
aṅgadaḥ kampanaṃ vīramāsasāda raṇotsukaḥ || 1 ||
[Analyze grammar]

āhūya so'ṅgadaṃ kopāttāḍayāmāsa vegitaḥ |
gadayā kampanaḥ pūrvaṃ sa cacāla bhṛśāhataḥ || 2 ||
[Analyze grammar]

sa saṃjñāṃ prāpya tejasvī cikṣepa śikharaṃ gireḥ |
arditaśca prahāreṇa kampanaḥ patito bhuvi || 3 ||
[Analyze grammar]

hatapravīrā vyathitā rākṣasendracamūstadā |
jagāmābhimukhī sā tu kumbhakarṇasuto yataḥ |
āpatantīṃ ca vegena kumbhastāṃ sāntvayaccamūm || 4 ||
[Analyze grammar]

sa dhanurdhanvināṃ śreṣṭhaḥ pragṛhya susamāhitaḥ |
mumocāśīviṣaprakhyāñ śarāndehavidāraṇān || 5 ||
[Analyze grammar]

tasya tacchuśubhe bhūyaḥ saśaraṃ dhanuruttamam |
vidyudairāvatārciṣmaddvitīyendradhanuryathā || 6 ||
[Analyze grammar]

ākarṇakṛṣṭamuktena jaghāna dvividaṃ tadā |
tena hāṭakapuṅkhena patriṇā patravāsasā || 7 ||
[Analyze grammar]

sahasābhihatastena vipramuktapadaḥ sphuran |
nipapātādrikūṭābho vihvalaḥ plavagottamaḥ || 8 ||
[Analyze grammar]

maindastu bhrātaraṃ dṛṣṭvā bhagnaṃ tatra mahāhave |
abhidudrāva vegena pragṛhya mahatīṃ śilām || 9 ||
[Analyze grammar]

tāṃ śilāṃ tu pracikṣepa rākṣasāya mahābalaḥ |
bibheda tāṃ śilāṃ kumbhaḥ prasannaiḥ pañcabhiḥ śaraiḥ || 10 ||
[Analyze grammar]

saṃdhāya cānyaṃ sumukhaṃ śaramāśīviṣopamam |
ājaghāna mahātejā vakṣasi dvividāgrajam || 11 ||
[Analyze grammar]

sa tu tena prahāreṇa maindo vānarayūthapaḥ |
marmaṇyabhihatastena papāta bhuvi mūrchitaḥ || 12 ||
[Analyze grammar]

aṅgado mātulau dṛṣṭvā patitau tau mahābalau |
abhidudrāva vegena kumbhamudyatakārmukam || 13 ||
[Analyze grammar]

tamāpatantaṃ vivyādha kumbhaḥ pañcabhirāyasaiḥ |
tribhiścānyaiḥ śitairbāṇairmātaṃgamiva tomaraiḥ || 14 ||
[Analyze grammar]

so'ṅgadaṃ vividhairbāṇaiḥ kumbho vivyādha vīryavān |
akuṇṭhadhārairniśitaistīkṣṇaiḥ kanakabhūṣaṇaiḥ || 15 ||
[Analyze grammar]

aṅgadaḥ pratividdhāṅgo vāliputro na kampate |
śilāpādapavarṣāṇi tasya mūrdhni vavarṣa ha || 16 ||
[Analyze grammar]

sa praciccheda tān sarvānbibheda ca punaḥ śilāḥ |
kumbhakarṇātmajaḥ śrīmān vāliputrasamīritān || 17 ||
[Analyze grammar]

āpatantaṃ ca saṃprekṣya kumbho vānarayūthapam |
bhruvorvivyādha bāṇābhyāmulkābhyāmiva kuñjaram || 18 ||
[Analyze grammar]

aṅgadaḥ pāṇinā netre pidhāya rudhirokṣite |
sālamāsannamekena parijagrāha pāṇinā || 19 ||
[Analyze grammar]

tamindraketupratimaṃ vṛkṣaṃ mandarasaṃnibham |
samutsṛjantaṃ vegena paśyatāṃ sarvarakṣasām || 20 ||
[Analyze grammar]

sa ciccheda śitairbāṇaiḥ saptabhiḥ kāyabhedanaiḥ |
aṅgado vivyathe'bhīkṣṇaṃ sasāda ca mumoha ca || 21 ||
[Analyze grammar]

aṅgadaṃ vyathitaṃ dṛṣṭvā sīdantamiva sāgare |
durāsadaṃ hariśreṣṭhā rāghavāya nyavedayan || 22 ||
[Analyze grammar]

rāmastu vyathitaṃ śrutvā vāliputraṃ mahāhave |
vyādideśa hariśreṣṭhāñjāmbavatpramukhāṃstataḥ || 23 ||
[Analyze grammar]

te tu vānaraśārdūlāḥ śrutvā rāmasya śāsanam |
abhipetuḥ susaṃkruddhāḥ kumbhamudyatakārmukam || 24 ||
[Analyze grammar]

tato drumaśilāhastāḥ kopasaṃraktalocanāḥ |
rirakṣiṣanto'bhyapatannaṅgadaṃ vānararṣabhāḥ || 25 ||
[Analyze grammar]

jāmbavāṃśca suṣeṇaśca vegadarśī ca vānaraḥ |
kumbhakarṇātmajaṃ vīraṃ kruddhāḥ samabhidudruvuḥ || 26 ||
[Analyze grammar]

samīkṣyātatatastāṃstu vānarendrānmahābalān |
āvavāra śaraugheṇa nageneva jalāśayam || 27 ||
[Analyze grammar]

tasya bāṇacayaṃ prāpya na śokerativartitum |
vānarendrā mahātmāno velāmiva mahodadhiḥ || 28 ||
[Analyze grammar]

tāṃstu dṛṣṭvā harigaṇāñ śaravṛṣṭibhirarditān |
aṅgadaṃ pṛṣṭhataḥ kṛtvā bhrātṛjaṃ plavageśvaraḥ || 29 ||
[Analyze grammar]

abhidudrāva vegena sugrīvaḥ kumbhamāhave |
śailasānu caraṃ nāgaṃ vegavāniva kesarī || 30 ||
[Analyze grammar]

utpāṭya ca mahāśailānaśvakarṇāndhavānbahūn |
anyāṃśca vividhān vṛkṣāṃścikṣepa ca mahābalaḥ || 31 ||
[Analyze grammar]

tāṃ chādayantīmākāśaṃ vṛkṣavṛṣṭiṃ durāsadām |
kumbhakarṇātmajaḥ śrīmāṃściccheda niśitaiḥ śaraiḥ || 32 ||
[Analyze grammar]

abhilakṣyeṇa tīvreṇa kumbhena niśitaiḥ śaraiḥ |
ācitāste drumā rejuryathā ghorāḥ śataghnayaḥ || 33 ||
[Analyze grammar]

drumavarṣaṃ tu tacchinnaṃ dṛṣṭvā kumbhena vīryavān |
vānarādhipatiḥ śrīmānmahāsattvo na vivyathe || 34 ||
[Analyze grammar]

nirbhidyamānaḥ sahasā sahamānaśca tāñ śarān |
kumbhasya dhanurākṣipya babhañjendradhanuḥprabham || 35 ||
[Analyze grammar]

avaplutya tataḥ śīghraṃ kṛtvā karma suduṣkaram |
abravīt kupitaḥ kumbhaṃ bhagnaśṛṅgamiva dvipam || 36 ||
[Analyze grammar]

nikumbhāgraja vīryaṃ te bāṇavegaṃ tadadbhutam |
saṃnatiśca prabhāvaśca tava vā rāvaṇasya vā || 37 ||
[Analyze grammar]

prahrādabalivṛtraghnakuberavaruṇopama |
ekastvamanujāto'si pitaraṃ balavattaraḥ || 38 ||
[Analyze grammar]

tvāmevaikaṃ mahābāhuṃ śūlahastamariṃdamam |
tridaśā nātivartante jitendriyamivādhayaḥ || 39 ||
[Analyze grammar]

varadānāt pitṛvyaste sahate devadānavān |
kumbhakarṇastu vīryeṇa sahate ca surāsurān || 40 ||
[Analyze grammar]

dhanuṣīndrajitastulyaḥ pratāpe rāvaṇasya ca |
tvamadya rakṣasāṃ loke śreṣṭho'si balavīryataḥ || 41 ||
[Analyze grammar]

mahāvimardaṃ samare mayā saha tavādbhutam |
adya bhūtāni paśyantu śakraśambarayoriva || 42 ||
[Analyze grammar]

kṛtamapratimaṃ karma darśitaṃ cāstrakauśalam |
pātitā harivīrāśca tvayaite bhīmavikramāḥ || 43 ||
[Analyze grammar]

upālambhabhayāccāpi nāsi vīra mayā hataḥ |
kṛtakarmā pariśrānto viśrāntaḥ paśya me balam || 44 ||
[Analyze grammar]

tena sugrīvavākyena sāvamānena mānitaḥ |
agnerājyahutasyeva tejastasyābhyavardhata || 45 ||
[Analyze grammar]

tataḥ kumbhaḥ samutpatya sugrīvamabhipadya ca |
ājaghānorasi kruddho vajravegena muṣṭinā || 46 ||
[Analyze grammar]

tasya carma ca pusphoṭa saṃjajñe cāsya śoṇitam |
sa ca muṣṭirmahāvegaḥ pratijaghne'sthimaṇḍale || 47 ||
[Analyze grammar]

tadā vegena tatrāsīttejaḥ prajvālitaṃ muhuḥ |
vajraniṣpeṣasaṃjātajvālā merau yathā girau || 48 ||
[Analyze grammar]

sa tatrābhihatastena sugrīvo vānararṣabhaḥ |
muṣṭiṃ saṃvartayāmāsa vajrakalpaṃ mahābalaḥ || 49 ||
[Analyze grammar]

arciḥsahasravikacaṃ ravimaṇḍalasaprabham |
sa muṣṭiṃ pātayāmāsa kumbhasyorasi vīryavān || 50 ||
[Analyze grammar]

muṣṭinābhihatastena nipapātāśu rākṣasaḥ |
lohitāṅga ivākāśāddīptaraśmiryadṛcchayā || 51 ||
[Analyze grammar]

kumbhasya patato rūpaṃ bhagnasyorasi muṣṭinā |
babhau rudrābhipannasya yathārūpaṃ gavāṃ pateḥ || 52 ||
[Analyze grammar]

tasmin hate bhīmaparākrameṇa plavaṃgamānāmṛṣabheṇa yuddhe |
mahī saśailā savanā cacāla bhayaṃ ca rakṣāṃsyadhikaṃ viveśa || 53 ||
[Analyze grammar]