Chapter 55

te nivṛttā mahākāyāḥ śrutvāṅgadavacastadā |
naiṣṭhikīṃ buddhimāsthāya sarve saṃgrāmakāṅkṣiṇaḥ || 1 ||
[Analyze grammar]

samudīritavīryāste samāropitavikramāḥ |
paryavasthāpitā vākyairaṅgadena valīmukhāḥ || 2 ||
[Analyze grammar]

prayātāśca gatā harṣaṃ maraṇe kṛtaniścayāḥ |
cakruḥ sutumulaṃ yuddhaṃ vānarāstyaktajīvitāḥ || 3 ||
[Analyze grammar]

atha vṛkṣānmahākāyāḥ sānūni sumahānti ca |
vānarāstūrṇamudyamya kumbhakarṇamabhidravan || 4 ||
[Analyze grammar]

sa kumbhakarṇaḥ saṃkruddho gadāmudyamya vīryavān |
ardayan sumahākāyaḥ samantādvyākṣipad ripūn || 5 ||
[Analyze grammar]

śatāni sapta cāṣṭau ca sahasrāṇi ca vānarāḥ |
prakīrṇāḥ śerate bhūmau kumbhakarṇena pothitāḥ || 6 ||
[Analyze grammar]

ṣoḍaśāṣṭau ca daśa ca viṃśattriṃśattathaiva ca |
parikṣipya ca bāhubhyāṃ khādan viparidhāvati |
bhakṣayanbhṛśasaṃkruddho garuḍaḥ pannagāniva || 7 ||
[Analyze grammar]

hanūmāñ śailaśṛṅgāṇi vṛkṣāṃśca vividhānbahūn |
vavarṣa kumbhakarṇasya śirasyambaramāsthitaḥ || 8 ||
[Analyze grammar]

tāni parvataśṛṅgāṇi śūlena tu bibheda ha |
babhañja vṛkṣavarṣaṃ ca kumbhakarṇo mahābalaḥ || 9 ||
[Analyze grammar]

tato harīṇāṃ tadanīkamugraṃ dudrāva śūlaṃ niśitaṃ pragṛhya |
tasthau tato'syāpatataḥ purastānmahīdharāgraṃ hanumānpragṛhya || 10 ||
[Analyze grammar]

sa kumbhakarṇaṃ kupito jaghāna vegena śailottamabhīmakāyam |
sa cukṣubhe tena tadābhibūto medārdragātro rudhirāvasiktaḥ || 11 ||
[Analyze grammar]

sa śūlamāvidhya taḍitprakāśaṃ giriṃ yathā prajvalitāgraśṛṅgam |
bāhvantare mārutimājaghāna guho'calaṃ krauñcamivograśaktyā || 12 ||
[Analyze grammar]

sa śūlanirbhinna mahābhujāntaraḥ pravihvalaḥ śoṇitamudvamanmukhāt |
nanāda bhīmaṃ hanumānmahāhave yugāntameghastanitasvanopamam || 13 ||
[Analyze grammar]

tato vineduḥ sahasā prahṛṣṭā rakṣogaṇāstaṃ vyathitaṃ samīkṣya |
plavaṃgamāstu vyathitā bhayārtāḥ pradudruvuḥ saṃyati kumbhakarṇāt || 14 ||
[Analyze grammar]

nīlaścikṣepa śailāgraṃ kumbhakarṇāya dhīmate |
tamāpatantaṃ saṃprekṣya muṣṭinābhijaghāna ha || 15 ||
[Analyze grammar]

muṣṭiprahārābhihataṃ tacchailāgraṃ vyaśīryata |
savisphuliṅgaṃ sajvālaṃ nipapāta mahītale || 16 ||
[Analyze grammar]

ṛṣabhaḥ śarabho nīlo gavākṣo gandhamādanaḥ |
pañcavānaraśārdūlāḥ kumbhakarṇamupādravan || 17 ||
[Analyze grammar]

śailairvṛkṣaistalaiḥ pādairmuṣṭibhiśca mahābalāḥ |
kumbhakarṇaṃ mahākāyaṃ sarvato'bhinijaghnire || 18 ||
[Analyze grammar]

sparśāniva prahārāṃstān vedayāno na vivyathe |
ṛṣabhaṃ tu mahāvegaṃ bāhubhyāṃ pariṣasvaje || 19 ||
[Analyze grammar]

kumbhakarṇabhujābhyāṃ tu pīḍito vānararṣabhaḥ |
nipapātarṣabho bhīmaḥ pramukhāgataśoṇitaḥ || 20 ||
[Analyze grammar]

muṣṭinā śarabhaṃ hatvā jānunā nīlamāhave |
ājaghāna gavākṣaṃ ca talenendraripustadā || 21 ||
[Analyze grammar]

dattapraharavyathitā mumuhuḥ śoṇitokṣitāḥ |
nipetuste tu medinyāṃ nikṛttā iva kiṃśukāḥ || 22 ||
[Analyze grammar]

teṣu vānaramukhyeṣu patiteṣu mahātmasu |
vānarāṇāṃ sahasrāṇi kumbhakarṇaṃ pradudruvuḥ || 23 ||
[Analyze grammar]

taṃ śailamiva śailābhāḥ sarve tu plavagarṣabhāḥ |
samāruhya samutpatya dadaṃśuśca mahābalāḥ || 24 ||
[Analyze grammar]

taṃ nakhairdaśanaiścāpi muṣṭibhirjānubhistathā |
kumbhakarṇaṃ mahākāyaṃ te jaghnuḥ plavagarṣabhāḥ || 25 ||
[Analyze grammar]

sa vānarasahasraistairācitaḥ parvatopamaḥ |
rarāja rākṣasavyāghro girirātmaruhairiva || 26 ||
[Analyze grammar]

bāhubhyāṃ vānarān sarvānpragṛhya sa mahābalaḥ |
bhakṣayāmāsa saṃkruddho garuḍaḥ pannagāniva || 27 ||
[Analyze grammar]

prakṣiptāḥ kumbhakarṇena vaktre pātālasaṃnibhe |
nāsā puṭābhyāṃ nirjagmuḥ karṇābhyāṃ caiva vānarāḥ || 28 ||
[Analyze grammar]

bhakṣayanbhṛśasaṃkruddho harīnparvatasaṃnibhaḥ |
babhañja vānarān sarvān saṃkruddho rākṣasottamaḥ || 29 ||
[Analyze grammar]

māṃsaśoṇitasaṃkledāṃ bhūmiṃ kurvan sa rākṣasaḥ |
cacāra harisainyeṣu kālāgniriva mūrchitaḥ || 30 ||
[Analyze grammar]

vajrahasto yathā śakraḥ pāśahasta ivāntakaḥ |
śūlahasto babhau tasmin kumbhakarṇo mahābalaḥ || 31 ||
[Analyze grammar]

yathā śuṣkāṇyaraṇyāni grīṣme dahati pāvakaḥ |
tathā vānarasainyāni kumbhakarṇo vinirdahat || 32 ||
[Analyze grammar]

tataste vadhyamānāstu hatayūthā vināyakāḥ |
vānarā bhayasaṃvignā vinedurvisvaraṃ bhṛśam || 33 ||
[Analyze grammar]

anekaśo vadhyamānāḥ kumbhakarṇena vānarāḥ |
rāghavaṃ śaraṇaṃ jagmurvyathitāḥ khinnacetasaḥ || 34 ||
[Analyze grammar]

tamāpatantaṃ saṃprekṣya kumbhakarṇaṃ mahābalam |
utpapāta tadā vīraḥ sugrīvo vānarādhipaḥ || 35 ||
[Analyze grammar]

sa parvatāgramutkṣipya samāvidhya mahākapiḥ |
abhidudrāva vegena kumbhakarṇaṃ mahābalam || 36 ||
[Analyze grammar]

tamāpatantaṃ saṃprekṣya kumbhakarṇaḥ plavaṃgamam |
tasthau vivṛtasarvāṅgo vānarendrasya saṃmukhaḥ || 37 ||
[Analyze grammar]

kapiśoṇitadigdhāṅgaṃ bhakṣayantaṃ mahākapīn |
kumbhakarṇaṃ sthitaṃ dṛṣṭvā sugrīvo vākyamabravīt || 38 ||
[Analyze grammar]

pātitāśca tvayā vīrāḥ kṛtaṃ karma suduṣkaram |
bhakṣitāni ca sainyāni prāptaṃ te paramaṃ yaśaḥ || 39 ||
[Analyze grammar]

tyaja tadvānarānīkaṃ prākṛtaiḥ kiṃ kariṣyasi |
sahasvaikaṃ nipātaṃ me parvatasyāsya rākṣasa || 40 ||
[Analyze grammar]

tadvākyaṃ harirājasya sattvadhairyasamanvitam |
śrutvā rākṣasaśārdūlaḥ kumbhakarṇo'bravīdvacaḥ || 41 ||
[Analyze grammar]

prajāpatestu pautrastvaṃ tathaivarkṣarajaḥsutaḥ |
śrutapauruṣasaṃpannastasmādgarjasi vānara || 42 ||
[Analyze grammar]

sa kumbhakarṇasya vaco niśamya vyāvidhya śailaṃ sahasā mumoca |
tenājaghānorasi kumbhakarṇaṃ śailena vajrāśanisaṃnibhena || 43 ||
[Analyze grammar]

tacchailaśṛṅgaṃ sahasā vikīrṇaṃ bhujāntare tasya tadā viśāle |
tato viṣeduḥ sahasā plavaṃgamā rakṣogaṇāścāpi mudā vineduḥ || 44 ||
[Analyze grammar]

sa śailaśṛṅgābhihataścukopa nanāda kopācca vivṛtya vaktram |
vyāvidhya śūlaṃ ca taḍitprakāśaṃ cikṣepa haryṛkṣapatervadhāya || 45 ||
[Analyze grammar]

tat kumbhakarṇasya bhujapraviddhaṃ śūlaṃ śitaṃ kāñcanadāmajuṣṭam |
kṣipraṃ samutpatya nigṛhya dorbhyāṃ babhañja vegena suto'nilasya || 46 ||
[Analyze grammar]

kṛtaṃ bhārasahasrasya śūlaṃ kālāyasaṃ mahat |
babhañja janaumāropya prahṛṣṭaḥ plavagarṣabhaḥ || 47 ||
[Analyze grammar]

sa tattadā bhagnamavekṣya śūlaṃ cukopa rakṣo'dhipatirmahātmā |
utpāṭya laṅkāmalayāt sa śṛṅgaṃ jaghāna sugrīvamupetya tena || 48 ||
[Analyze grammar]

sa śailaśṛṅgābhihato visaṃjñaḥ papāta bhūmau yudhi vānarendraḥ |
taṃ prekṣya bhūmau patitaṃ visaṃjñaṃ neduḥ prahṛṣṭā yudhi yātudhānāḥ || 49 ||
[Analyze grammar]

tamabhyupetyādbhutaghoravīryaṃ sa kumbhakarṇo yudhi vānarendram |
jahāra sugrīvamabhipragṛhya yathānilo meghamatipracaṇḍaḥ || 50 ||
[Analyze grammar]

sa taṃ mahāmeghanikāśarūpamutpāṭya gacchanyudhi kumbhakarṇaḥ |
rarāja merupratimānarūpo meruryathātyucchritaghoraśṛṅgaḥ || 51 ||
[Analyze grammar]

tataḥ samutpāṭya jagāma vīraḥ saṃstūyamāno yudhi rākṣasendraiḥ |
śṛṇvanninādaṃ tridaśālayānāṃ plavaṃgarājagrahavismitānām || 52 ||
[Analyze grammar]

tatastamādāya tadā sa mene harīndramindropamamindravīryaḥ |
asmin hṛte sarvamidaṃ hṛtaṃ syāt sarāghavaṃ sainyamitīndraśatruḥ || 53 ||
[Analyze grammar]

vidrutāṃ vāhinīṃ dṛṣṭvā vānarāṇāṃ tatastataḥ |
kumbhakarṇena sugrīvaṃ gṛhītaṃ cāpi vānaram || 54 ||
[Analyze grammar]

hanūmāṃścintayāmāsa matimānmārutātmajaḥ |
evaṃ gṛhīte sugrīve kiṃ kartavyaṃ mayā bhavet || 55 ||
[Analyze grammar]

yadvai nyāyyaṃ mayā kartuṃ tat kariṣyāmi sarvathā |
bhūtvā parvatasaṃkāśo nāśayiṣyāmi rākṣasaṃ || 56 ||
[Analyze grammar]

mayā hate saṃyati kumbhakarṇe mahābale muṣṭiviśīrṇadehe |
vimocite vānarapārthive ca bhavantu hṛṣṭāḥ pravagāḥ samagrāḥ || 57 ||
[Analyze grammar]

atha vā svayamapyeṣa mokṣaṃ prāpsyati pārthivaḥ |
gṛhīto'yaṃ yadi bhavettridaśaiḥ sāsuroragaiḥ || 58 ||
[Analyze grammar]

manye na tāvadātmānaṃ budhyate vānarādhipaḥ |
śailaprahārābhihataḥ kumbhakarṇena saṃyuge || 59 ||
[Analyze grammar]

ayaṃ muhūrtāt sugrīvo labdhasaṃjño mahāhave |
ātmano vānarāṇāṃ ca yat pathyaṃ tat kariṣyati || 60 ||
[Analyze grammar]

mayā tu mokṣitasyāsya sugrīvasya mahātmanaḥ |
aprītaśca bhavet kaṣṭā kīrtināśaśca śāśvataḥ || 61 ||
[Analyze grammar]

tasmānmuhūrtaṃ kāṅkṣiṣye vikramaṃ pārthivasya naḥ |
bhinnaṃ ca vānarānīkaṃ tāvadāśvāsayāmyaham || 62 ||
[Analyze grammar]

ityevaṃ cintayitvā tu hanūmānmārutātmajaḥ |
bhūyaḥ saṃstambhayāmāsa vānarāṇāṃ mahācamūm || 63 ||
[Analyze grammar]

sa kumbhakarṇo'tha viveśa laṅkāṃ sphurantamādāya mahāhariṃ tam |
vimānacaryāgṛhagopurasthaiḥ puṣpāgryavarṣairavakīryamāṇaḥ || 64 ||
[Analyze grammar]

tataḥ sa saṃjñāmupalabhya kṛcchrādbalīyasastasya bhujāntarasthaḥ |
avekṣamāṇaḥ purarājamārgaṃ vicintayāmāsa muhurmahātmā || 65 ||
[Analyze grammar]

evaṃ gṛhītena kathaṃ nu nāma śakyaṃ mayā saṃprati kartumadya |
tathā kariṣyāmi yathā harīṇāṃ bhaviṣyatīṣṭaṃ ca hitaṃ ca kāryam || 66 ||
[Analyze grammar]

tataḥ karāgraiḥ sahasā sametya rājā harīṇāmamarendraśatroḥ |
nakhaiśca karṇau daśanaiśca nāsāṃ dadaṃśa pārśveṣu ca kumbhakarṇam || 67 ||
[Analyze grammar]

sa kumbhakarṇau hṛtakarṇanāso vidāritastena vimarditaśca |
roṣābhibhūtaḥ kṣatajārdragātraḥ sugrīvamāvidhya pipeṣa bhūmau || 68 ||
[Analyze grammar]

sa bhūtale bhīmabalābhipiṣṭaḥ surāribhistairabhihanyamānaḥ |
jagāma khaṃ vegavadabhyupetya punaśca rāmeṇa samājagāma || 69 ||
[Analyze grammar]

karṇanāsā vihīnasya kumbhakarṇo mahābalaḥ |
rarāja śoṇitotsikto giriḥ prasravaṇairiva || 70 ||
[Analyze grammar]

tataḥ sa puryāḥ sahasā mahātmā niṣkramya tadvānarasainyamugram |
babhakṣa rakṣo yudhi kumbhakarṇaḥ prajā yugāntāgniriva pradīptaḥ || 71 ||
[Analyze grammar]

bubhukṣitaḥ śoṇitamāṃsagṛdhnuḥ praviśya tadvānarasainyamugram |
cakhāda rakṣāṃsi harīnpiśācānṛkṣāṃśca mohād yudhi kumbhakarṇaḥ || 72 ||
[Analyze grammar]

ekaṃ dvau trīnbahūn kruddho vānarān saha rākṣasaiḥ |
samādāyaikahastena pracikṣepa tvaranmukhe || 73 ||
[Analyze grammar]

saṃprasravaṃstadā medaḥ śoṇitaṃ ca mahābalaḥ |
vadhyamāno nagendrāgrairbhakṣayāmāsa vānarān |
te bhakṣyamāṇā harayo rāmaṃ jagmustadā gatim || 74 ||
[Analyze grammar]

tasmin kāle sumitrāyāḥ putraḥ parabalārdanaḥ |
cakāra lakṣmaṇaḥ kruddho yuddhaṃ parapuraṃjayaḥ || 75 ||
[Analyze grammar]

sa kumbhakarṇasya śarāñ śarīre sapta vīryavān |
nicakhānādade cānyān visasarja ca lakṣmaṇaḥ || 76 ||
[Analyze grammar]

atikramya ca saumitriṃ kumbhakarṇo mahābalaḥ |
rāmamevābhidudrāva dārayanniva medinīm || 77 ||
[Analyze grammar]

atha dāśarathī rāmo raudramastraṃ prayojayan |
kumbhakarṇasya hṛdaye sasarja niśitāñ śarān || 78 ||
[Analyze grammar]

tasya rāmeṇa viddhasya sahasābhipradhāvataḥ |
aṅgāramiśrāḥ kruddhasya mukhānniścerurarciṣaḥ || 79 ||
[Analyze grammar]

tasyorasi nimagnāśca śarā barhiṇavāsasaḥ |
hastāccāsya paribhraṣṭā papātorvyāṃ mahāgadā || 80 ||
[Analyze grammar]

sa nirāyudhamātmānaṃ yadā mene mahābalaḥ |
muṣṭibhyāṃ cāraṇābhyāṃ ca cakāra kadanaṃ mahat || 81 ||
[Analyze grammar]

sa bāṇairatividdhāṅgaḥ kṣatajena samukṣitaḥ |
rudhiraṃ parisusrāva giriḥ prasravaṇāniva || 82 ||
[Analyze grammar]

sa tīvreṇa ca kopena rudhireṇa ca mūrchitaḥ |
vānarān rākṣasānṛkṣān khādan viparidhāvati || 83 ||
[Analyze grammar]

tasmin kāle sa dharmātmā lakṣmaṇo rāmamabravīt |
kumbhakarṇavadhe yukto yogānparimṛśanbahūn || 84 ||
[Analyze grammar]

naivāyaṃ vānarān rājanna vijānāti rākṣasān |
mattaḥ śoṇitagandhena svānparāṃścaiva khādati || 85 ||
[Analyze grammar]

sādhvenamadhirohantu sarvato vānararṣabhāḥ |
yūthapāśca yathāmukhyāstiṣṭhantvasya samantataḥ || 86 ||
[Analyze grammar]

apyayaṃ durmatiḥ kāle gurubhāraprapīḍitaḥ |
prapatan rākṣaso bhūmau nānyān hanyāt plavaṃgamān || 87 ||
[Analyze grammar]

tasya tadvacanaṃ śrutvā rājaputrasya dhīmataḥ |
te samāruruhurhṛṣṭāḥ kumbhakarṇaṃ plavaṃgamāḥ || 88 ||
[Analyze grammar]

kumbhakarṇastu saṃkruddhaḥ samārūḍhaḥ plavaṃgamaiḥ |
vyadhūnayattān vegena duṣṭahastīva hastipān || 89 ||
[Analyze grammar]

tāndṛṣṭvā nirdhūtān rāmo ruṣṭo'yamiti rākṣasaḥ |
samutpapāta vegena dhanuruttamamādade || 90 ||
[Analyze grammar]

sa cāpamādāya bhujaṃgakalpaṃ dṛḍhajyamugraṃ tapanīyacitram |
harīn samāśvāsya samutpapāta rāmo nibaddhottamatūṇabāṇaḥ || 91 ||
[Analyze grammar]

sa vānaragaṇaistaistu vṛtaḥ paramadurjayaḥ |
lakṣmaṇānucaro rāmaḥ saṃpratasthe mahābalaḥ || 92 ||
[Analyze grammar]

sa dadarśa mahātmānaṃ kirīṭinamariṃdamam |
śoṇitāplutasarvāṅgaṃ kumbhakarṇaṃ mahābalam || 93 ||
[Analyze grammar]

sarvān samabhidhāvantaṃ yathāruṣṭaṃ diśā gajam |
mārgamāṇaṃ harīn kruddhaṃ rākṣasaiḥ parivāritam || 94 ||
[Analyze grammar]

vindhyamandarasaṃkāśaṃ kāñcanāṅgadabhūṣaṇam |
sravantaṃ rudhiraṃ vaktrādvarṣameghamivotthitam || 95 ||
[Analyze grammar]

jihvayā parilihyantaṃ śoṇitaṃ śoṇitokṣitam |
mṛdnantaṃ vānarānīkaṃ kālāntakayamopamam || 96 ||
[Analyze grammar]

taṃ dṛṣṭvā rākṣasaśreṣṭhaṃ pradīptānalavarcasaṃ |
visphārayāmāsa tadā kārmukaṃ puruṣarṣabhaḥ || 97 ||
[Analyze grammar]

sa tasya cāpanirghoṣāt kupito nairṛtarṣabhaḥ |
amṛṣyamāṇastaṃ ghoṣamabhidudrāva rāghavam || 98 ||
[Analyze grammar]

tatastu vātoddhatameghakalpaṃ bhujaṃgarājottamabhogabāhum |
tamāpatantaṃ dharaṇīdharābhamuvāca rāmo yudhi kumbhakarṇam || 99 ||
[Analyze grammar]

āgaccha rakṣo'dhipamā viṣādamavasthito'haṃ pragṛhītacāpaḥ |
avehi māṃ śakrasapatna rāmamayaṃ muhūrtādbhavitā vicetāḥ || 100 ||
[Analyze grammar]

rāmo'yamiti vijñāya jahāsa vikṛtasvanam |
pātayanniva sarveṣāṃ hṛdayāni vanaukasām || 101 ||
[Analyze grammar]

prahasya vikṛtaṃ bhīmaṃ sa meghasvanitopamam |
kumbhakarṇo mahātejā rāghavaṃ vākyamabravīt || 102 ||
[Analyze grammar]

nāhaṃ virādho vijñeyo na kabandhaḥ kharo na ca |
na vālī na ca mārīcaḥ kumbhakarṇo'hamāgataḥ || 103 ||
[Analyze grammar]

paśya me mudgaraṃ ghoraṃ sarvakālāyasaṃ mahat |
anena nirjitā devā dānavāśca mayā purā || 104 ||
[Analyze grammar]

vikarṇanāsa iti māṃ nāvajñātuṃ tvamarhasi |
svalpāpi hi na me pīḍā karṇanāsāvināśanāt || 105 ||
[Analyze grammar]

darśayekṣvākuśārdūla vīryaṃ gātreṣu me laghu |
tatastvāṃ bhakṣayiṣyāmi dṛṣṭapauruṣavikramam || 106 ||
[Analyze grammar]

sa kumbhakarṇasya vaco niśamya rāmaḥ supuṅkhān visasarja bāṇān |
tairāhato vajrasamapravegairna cukṣubhe na vyathate surāriḥ || 107 ||
[Analyze grammar]

yaiḥ sāyakaiḥ sālavarā nikṛttā vālī hato vānarapuṃgavaśca |
te kumbhakarṇasya tadā śarīraṃ vajropamā na vyathayāṃ pracakruḥ || 108 ||
[Analyze grammar]

sa vāridhārā iva sāyakāṃstānpibañ śarīreṇa mahendraśatruḥ |
jaghāna rāmasya śarapravegaṃ vyāvidhya taṃ mudgaramugravegam || 109 ||
[Analyze grammar]

tatastu rakṣaḥ kṣatajānuliptaṃ vitrāsanaṃ devamahācamūnām |
vyāvidhya taṃ mudgaramugravegaṃ vidrāvayāmāsa camūṃ harīṇām || 110 ||
[Analyze grammar]

vāyavyamādāya tato varāstraṃ rāmaḥ pracikṣepa niśācarāya |
samudgaraṃ tena jahāra bāhuṃ sa kṛttabāhustumulaṃ nanāda || 111 ||
[Analyze grammar]

sa tasya bāhurgiriśṛṅgakalpaḥ samudgaro rāghavabāṇakṛttaḥ |
papāta tasmin harirājasainye jaghāna tāṃ vānaravāhinīṃ ca || 112 ||
[Analyze grammar]

te vānarā bhagnahatāvaśeṣāḥ paryantamāśritya tadā viṣaṇṇāḥ |
pravepitāṅgā dadṛśuḥ sughoraṃ narendrarakṣo'dhipasaṃnipātam || 113 ||
[Analyze grammar]

sa kumbhakarṇo'stranikṛttabāhurmahānnikṛttāgra ivācalendraḥ |
utpāṭayāmāsa kareṇa vṛkṣaṃ tato'bhidudrāva raṇe narendram || 114 ||
[Analyze grammar]

taṃ tasya bāhuṃ saha sālavṛkṣaṃ samudyataṃ pannagabhogakalpam |
aindrāstrayuktena jahāra rāmo bāṇena jāmbūnadacitritena || 115 ||
[Analyze grammar]

sa kumbhakarṇasya bhujo nikṛttaḥ papāta bhūmau girisaṃnikāśaḥ |
viveṣṭamāno nijaghāna vṛkṣāñ śailāñ śilāvānararākṣasāṃśca || 116 ||
[Analyze grammar]

taṃ chinnabāhuṃ samavekṣya rāmaḥ samāpatantaṃ sahasā nadantam |
dvāvardhacandrau niśitau pragṛhya ciccheda pādau yudhi rākṣasasya || 117 ||
[Analyze grammar]

nikṛttabāhurvinikṛttapādo vidārya vaktraṃ vaḍavāmukhābham |
dudrāva rāmaṃ sahasābhigarjan rāhuryathā candramivāntarikṣe || 118 ||
[Analyze grammar]

apūrayattasya mukhaṃ śitāgrai rāmaḥ śarairhemapinaddhapuṅkhaiḥ |
sa pūrṇavaktro na śaśāka vaktuṃ cukūja kṛcchreṇa mumoha cāpi || 119 ||
[Analyze grammar]

athādade sūryamarīcikalpaṃ sa brahmadaṇḍāntakakālakalpam |
ariṣṭamaindraṃ niśitaṃ supuṅkhaṃ rāmaḥ śaraṃ mārutatulyavegam || 120 ||
[Analyze grammar]

taṃ vajrajāmbūnadacārupuṅkhaṃ pradīptasūryajvalanaprakāśam |
mahendravajrāśanitulyavegaṃ rāmaḥ pracikṣepa niśācarāya || 121 ||
[Analyze grammar]

sa sāyako rāghavabāhucodito diśaḥ svabhāsā daśa saṃprakāśayan |
vidhūmavaiśvānaradīptadarśano jagāma śakrāśanitulyavikramaḥ || 122 ||
[Analyze grammar]

sa tanmahāparvatakūṭasaṃnibhaṃ vivṛttadaṃṣṭraṃ calacārukuṇḍalam |
cakarta rakṣo'dhipateḥ śirastadā yathaiva vṛtrasya purā puraṃdaraḥ || 123 ||
[Analyze grammar]

tad rāmabāṇābhihataṃ papāta rakṣaḥśiraḥ parvatasaṃnikāśam |
babhañja caryāgṛhagopurāṇi prākāramuccaṃ tamapātayacca || 124 ||
[Analyze grammar]

taccātikāyaṃ himavatprakāśaṃ rakṣastadā toyanidhau papāta |
grāhānmahāmīnacayānbhujaṃgamānmamarda bhūmiṃ ca tathā viveśa || 125 ||
[Analyze grammar]

tasmirhate brāhmaṇadevaśatrau mahābale saṃyati kumbhakarṇe |
cacāla bhūrbhūmidharāśca sarve harṣācca devāstumulaṃ praṇeduḥ || 126 ||
[Analyze grammar]

tatastu devarṣimaharṣipannagāḥ surāśca bhūtāni suparṇaguhyakāḥ |
sayakṣagandharvagaṇā nabhogatāḥ praharṣitā rāma parākrameṇa || 127 ||
[Analyze grammar]

praharṣamīyurbahavastu vānarāḥ prabuddhapadmapratimairivānanaiḥ |
apūjayan rāghavamiṣṭabhāginaṃ hate ripau bhīmabale durāsade || 128 ||
[Analyze grammar]

sa kumbhakarṇaṃ surasainyamardanaṃ mahatsu yuddheṣvaparājitaśramam |
nananda hatvā bharatāgrajo raṇe mahāsuraṃ vṛtramivāmarādhipaḥ || 129 ||
[Analyze grammar]