Chapter 59

tataḥ kṛtodakaṃ snātaṃ taṃ gṛdhraṃ hariyūthapāḥ |
upaviṣṭā girau durge parivārya samantataḥ || 1 ||
[Analyze grammar]

tamaṅgadamupāsīnaṃ taiḥ sarvairharibhirvṛtam |
janitapratyayo harṣāt saṃpātiḥ punarabravīt || 2 ||
[Analyze grammar]

kṛtvā niḥśabdamekāgrāḥ śṛṇvantu harayo mama |
tattvaṃ saṃkīrtayiṣyāmi yathā jānāmi maithilīm || 3 ||
[Analyze grammar]

asya vindhyasya śikhare patito'smi purā vane |
sūryātapaparītāṅgo nirdagdhaḥ sūryaraśmibhiḥ || 4 ||
[Analyze grammar]

labdhasaṃjñastu ṣaḍrātrādvivaśo vihvalanniva |
vīkṣamāṇo diśaḥ sarvā nābhijānāmi kiṃ cana || 5 ||
[Analyze grammar]

tatastu sāgarāñ śailānnadīḥ sarvāḥ sarāṃsi ca |
vanānyaṭavideśāṃśca samīkṣya matirāgamat || 6 ||
[Analyze grammar]

hṛṣṭapakṣigaṇākīrṇaḥ kandarāntarakūṭavān |
dakṣiṇasyodadhestīre vindhyo'yamiti niścitaḥ || 7 ||
[Analyze grammar]

āsīccātrāśramaṃ puṇyaṃ surairapi supūjitam |
ṛṣirniśākaro nāma yasminnugratapābhavat || 8 ||
[Analyze grammar]

aṣṭau varṣasahasrāṇi tenāsminnṛṣiṇā vinā |
vasato mama dharmajñāḥ svargate tu niśākare || 9 ||
[Analyze grammar]

avatīrya ca vindhyāgrāt kṛcchreṇa viṣamācchanaiḥ |
tīkṣṇadarbhāṃ vasumatīṃ duḥkhena punarāgataḥ || 10 ||
[Analyze grammar]

tamṛṣiṃ draṣṭu kāmo'smi duḥkhenābhyāgato bhṛśam |
jaṭāyuṣā mayā caiva bahuśo'bhigato hi saḥ || 11 ||
[Analyze grammar]

tasyāśramapadābhyāśe vavurvātāḥ sugandhinaḥ |
vṛkṣo nāpuṣpitaḥ kaścidaphalo vā na dṛśyate || 12 ||
[Analyze grammar]

upetya cāśramaṃ puṇyaṃ vṛkṣamūlamupāśritaḥ |
draṣṭukāmaḥ pratīkṣe ca bhagavantaṃ niśākaram || 13 ||
[Analyze grammar]

athāpaśyamadūrasthamṛṣiṃ jvalitatejasaṃ |
kṛtābhiṣekaṃ durdharṣamupāvṛttamudaṅmukham || 14 ||
[Analyze grammar]

tamṛkṣāḥ sṛmarā vyāghrāḥ siṃhā nāgāḥ sarīsṛpāḥ |
parivāryopagacchanti dātāraṃ prāṇino yathā || 15 ||
[Analyze grammar]

tataḥ prāptamṛṣiṃ jñātvā tāni sattvāni vai yayuḥ |
praviṣṭe rājani yathā sarvaṃ sāmātyakaṃ balam || 16 ||
[Analyze grammar]

ṛṣistu dṛṣṭvā māṃ tuṣṭaḥ praviṣṭaścāśramaṃ punaḥ |
muhūrtamātrānniṣkramya tataḥ kāryamapṛcchata || 17 ||
[Analyze grammar]

saumya vaikalyatāṃ dṛṣṭvā roṃṇāṃ te nāvagamyate |
agnidagdhāvimau pakṣau tvak caiva vraṇitā tava || 18 ||
[Analyze grammar]

dvau gṛdhrau dṛṣṭapūrvau me mātariśvasamau jave |
gṛdhrāṇāṃ caiva rājānau bhrātarau kāmarūpiṇau || 19 ||
[Analyze grammar]

jyeṣṭhastvaṃ tu ca saṃpātirjaṭāyuranujastava |
mānuṣaṃ rūpamāsthāya gṛhṇītāṃ caraṇau mama || 20 ||
[Analyze grammar]

kiṃ te vyādhisamutthānaṃ pakṣayoḥ patanaṃ katham |
daṇḍo vāyaṃ dhṛtaḥ kena sarvamākhyāhi pṛcchataḥ || 21 ||
[Analyze grammar]