Chapter 57

ityuktaḥ karuṇaṃ vākyaṃ vānaraistyaktajīvitaiḥ |
sabāṣpo vānarān gṛdhraḥ pratyuvāca mahāsvanaḥ || 1 ||
[Analyze grammar]

yavīyānmama sa bhrātā jaṭāyurnāma vānarāḥ |
yamākhyāta hataṃ yuddhe rāvaṇena balīyasā || 2 ||
[Analyze grammar]

vṛddhabhāvādapakṣatvācchṛṇvaṃstadapi marṣaye |
na hi me śaktiradyāsti bhrāturvairavimokṣaṇe || 3 ||
[Analyze grammar]

purā vṛtravadhe vṛtte sa cāhaṃ ca jayaiṣiṇau |
ādityamupayātau svo jvalantaṃ raśmimālinam || 4 ||
[Analyze grammar]

āvṛtyākāśamārgeṇa javena sma gatau bhṛśam |
madhyaṃ prāpte ca sūrye ca jaṭāyuravasīdati || 5 ||
[Analyze grammar]

tamahaṃ bhrātaraṃ dṛṣṭvā sūryaraśmibhirarditam |
pakṣābhyaṃ chādayāmāsa snehāt paramavihvalam || 6 ||
[Analyze grammar]

nirdagdhapakṣaḥ patito vindhye'haṃ vānarottamāḥ |
ahamasmin vasanbhrātuḥ pravṛttiṃ nopalakṣaye || 7 ||
[Analyze grammar]

jaṭāyuṣastvevamukto bhrātrā saṃpātinā tadā |
yuvarājo mahāprājñaḥ pratyuvācāṅgadastadā || 8 ||
[Analyze grammar]

jaṭāyuṣo yadi bhrātā śrutaṃ te gaditaṃ mayā |
ākhyāhi yadi jānāsi nilayaṃ tasya rakṣasaḥ || 9 ||
[Analyze grammar]

adīrghadarśinaṃ taṃ vā rāvaṇaṃ rākṣasādhipam |
antike yadi vā dūre yadi jānāsi śaṃsa naḥ || 10 ||
[Analyze grammar]

tato'bravīnmahātejā jyeṣṭho bhrātā jaṭāyuṣaḥ |
ātmānurūpaṃ vacanaṃ vānarān saṃpraharṣayan || 11 ||
[Analyze grammar]

nirdagdhapakṣo gṛdhro'haṃ gatavīryaḥ plavaṃgamāḥ |
vāṅmātreṇa tu rāmasya kariṣye sāhyamuttamam || 12 ||
[Analyze grammar]

jānāmi vāruṇāl lokān viṣṇostraivikramānapi |
devāsuravimardāṃśca amṛtasya ca manthanam || 13 ||
[Analyze grammar]

rāmasya yadidaṃ kāryaṃ kartavyaṃ prathamaṃ mayā |
jarayā ca hṛtaṃ tejaḥ prāṇāśca śithilā mama || 14 ||
[Analyze grammar]

taruṇī rūpasaṃpannā sarvābharaṇabhūṣitā |
hriyamāṇā mayā dṛṣṭā rāvaṇena durātmanā || 15 ||
[Analyze grammar]

krośantī rāma rāmeti lakṣmaṇeti ca bhāminī |
bhūṣaṇānyapavidhyantī gātrāṇi ca vidhunvatī || 16 ||
[Analyze grammar]

sūryaprabheva śailāgre tasyāḥ kauśeyamuttamam |
asite rākṣase bhāti yathā vā taḍidambude || 17 ||
[Analyze grammar]

tāṃ tu sītāmahaṃ manye rāmasya parikīrtanāt |
śrūyatāṃ me kathayato nilayaṃ tasya rakṣasaḥ || 18 ||
[Analyze grammar]

putro viśravasaḥ sākṣādbhrātā vaiśravaṇasya ca |
adhyāste nagarīṃ laṅkāṃ rāvaṇo nāma rākasaḥ || 19 ||
[Analyze grammar]

ito dvīpe samudrasya saṃpūrṇe śatayojane |
tasmiṃl laṅkā purī ramyā nirmitā viśvakarmaṇā || 20 ||
[Analyze grammar]

tasyāṃ vasati vaidehī dīnā kauśeyavāsinī |
rāvaṇāntaḥpure ruddhā rākṣasībhiḥ surakṣitā || 21 ||
[Analyze grammar]

janakasyātmajāṃ rājñastasyāṃ drakṣyatha maithilīm |
laṅkāyāmatha guptāyāṃ sāgareṇa samantataḥ || 22 ||
[Analyze grammar]

saṃprāpya sāgarasyāntaṃ saṃpūrṇaṃ śatayojanam |
āsādya dakṣiṇaṃ kūlaṃ tato drakṣyatha rāvaṇam || 23 ||
[Analyze grammar]

tatraiva tvaritāḥ kṣipraṃ vikramadhvaṃ plavaṃgamāḥ |
jñānena khalu paśyāmi dṛṣṭvā pratyāgamiṣyatha || 24 ||
[Analyze grammar]

ādyaḥ panthāḥ kuliṅgānāṃ ye cānye dhānyajīvinaḥ |
dvitīyo balibhojānāṃ ye ca vṛkṣaphalāśinaḥ || 25 ||
[Analyze grammar]

bhāsāstṛtīyaṃ gacchanti krauñcāśca kuraraiḥ saha |
śyenāścaturthaṃ gacchanti gṛdhrā gacchanti pañcamam || 26 ||
[Analyze grammar]

balavīryopapannānāṃ rūpayauvanaśālinām |
ṣaṣṭhastu panthā haṃsānāṃ vainateyagatiḥ parā |
vainateyācca no janma sarveṣāṃ vānararṣabhāḥ || 27 ||
[Analyze grammar]

garhitaṃ tu kṛtaṃ karma yena sma piśitāśanāḥ |
ihastho'haṃ prapaśyāmi rāvaṇaṃ jānakīṃ tathā || 28 ||
[Analyze grammar]

asmākamapi sauvarṇaṃ divyaṃ cakṣurbalaṃ tathā |
tasmādāhāravīryeṇa nisargeṇa ca vānarāḥ |
āyojanaśatāt sāgrādvayaṃ paśyāma nityaśaḥ || 29 ||
[Analyze grammar]

asmākaṃ vihitā vṛttirnisārgeṇa ca dūrataḥ |
vihitā pādamūle tu vṛttiścaraṇayodhinām || 30 ||
[Analyze grammar]

upāyo dṛśyatāṃ kaścil laṅghane lavaṇāmbhasaḥ |
abhigamya tu vaidehīṃ samṛddhārthā gamiṣyatha || 31 ||
[Analyze grammar]

samudraṃ netumicchāmi bhavadbhirvaruṇālayam |
pradāsyāmyudakaṃ bhrātuḥ svargatasya mahātmanaḥ || 32 ||
[Analyze grammar]

tato nītvā tu taṃ deśaṃ tīre nadanadīpateḥ |
nirdagdhapakṣaṃ saṃpātiṃ vānarāḥ sumahaujasaḥ || 33 ||
[Analyze grammar]

punaḥ pratyānayitvā vai taṃ deśaṃ patageśvaram |
babhūvurvānarā hṛṣṭāḥ pravṛttimupalabhya te || 34 ||
[Analyze grammar]