Chapter 26

abhiṣikte tu sugrīve praviṣṭe vānare guhām |
ājagāma saha bhrātrā rāmaḥ prasravaṇaṃ girim || 1 ||
[Analyze grammar]

śārdūlamṛgasaṃghuṣṭaṃ siṃhairbhīmaravairvṛtam |
nānāgulmalatāgūḍhaṃ bahupādapasaṃkulam || 2 ||
[Analyze grammar]

ṛkṣavānaragopucchairmārjāraiśca niṣevitam |
megharāśinibhaṃ śailaṃ nityaṃ śucijalāśrayam || 3 ||
[Analyze grammar]

tasya śailasya śikhare mahatīmāyatāṃ guhām |
pratyagṛhṇata vāsārthaṃ rāmaḥ saumitriṇā saha || 4 ||
[Analyze grammar]

avasattatra dharmātmā rāghavaḥ sahalakṣmaṇaḥ |
bahudṛśyadarīkuñje tasminprasravaṇe girau || 5 ||
[Analyze grammar]

susukhe'pi bahudravye tasmin hi dharaṇīdhare |
vasatastasya rāmasya ratiralpāpi nābhavat |
hṛtāṃ hi bhāryāṃ smarataḥ prāṇebhyo'pi garīyasīm || 6 ||
[Analyze grammar]

udayābhyuditaṃ dṛṣṭvā śaśāṅkaṃ ca viśeṣataḥ |
āviveśa na taṃ nidrā niśāsu śayanaṃ gatam || 7 ||
[Analyze grammar]

tat samutthena śokena bāṣpopahatacetasaṃ |
taṃ śocamānaṃ kākutsthaṃ nityaṃ śokaparāyaṇam |
tulyaduḥkho'bravīdbhrātā lakṣmaṇo'nunayan vacaḥ || 8 ||
[Analyze grammar]

alaṃ vīra vyathāṃ gatvā na tvaṃ śocitumarhasi |
śocato hyavasīdanti sarvārthā viditaṃ hi te || 9 ||
[Analyze grammar]

bhavān kriyāparo loke bhavāndevaparāyaṇaḥ |
āstiko dharmaśīlaśca vyavasāyī ca rāghava || 10 ||
[Analyze grammar]

na hyavyavasitaḥ śatruṃ rākṣasaṃ taṃ viśeṣataḥ |
samarthastvaṃ raṇe hantuṃ vikramairjihmakāriṇam || 11 ||
[Analyze grammar]

samunmūlaya śokaṃ tvaṃ vyavasāyaṃ sthiraṃ kuru |
tataḥ saparivāraṃ taṃ nirmūlaṃ kuru rākṣasaṃ || 12 ||
[Analyze grammar]

pṛthivīmapi kākutstha sasāgaravanācalām |
parivartayituṃ śaktaḥ kimaṅga puna rāvaṇam || 13 ||
[Analyze grammar]

ahaṃ tu khalu te vīryaṃ prasuptaṃ pratibodhaye |
dīptairāhutibhiḥ kāle bhasmacchannamivānalam || 14 ||
[Analyze grammar]

lakṣmaṇasya tu tadvākyaṃ pratipūjya hitaṃ śubham |
rāghavaḥ suhṛdaṃ snigdhamidaṃ vacanamabravīt || 15 ||
[Analyze grammar]

vācyaṃ yadanuraktena snigdhena ca hitena ca |
satyavikrama yuktena taduktaṃ lakṣmaṇa tvayā || 16 ||
[Analyze grammar]

eṣa śokaḥ parityaktaḥ sarvakāryāvasādakaḥ |
vikrameṣvapratihataṃ tejaḥ protsāhayāmyaham || 17 ||
[Analyze grammar]

śaratkālaṃ pratīkṣe'hamiyaṃ prāvṛḍupasthitā |
tataḥ sarāṣṭraṃ sagaṇaṃ rākṣasaṃ taṃ nihanmyaham || 18 ||
[Analyze grammar]

tasya tadvacanaṃ śrutvā hṛṣṭo rāmasya lakṣmaṇaḥ |
punarevābravīdvākyaṃ saumitrirmitranandanaḥ || 19 ||
[Analyze grammar]

etatte sadṛśaṃ vākyamuktaṃ śatrunibarhaṇa |
idānīmasi kākutstha prakṛtiṃ svāmupāgataḥ || 20 ||
[Analyze grammar]

vijñāya hyātmano vīryaṃ tathyaṃ bhavitumarhasi |
etat sadṛśamuktaṃ te śrutasyābhijanasya ca || 21 ||
[Analyze grammar]

tasmāt puruṣaśārdūla cintayañ śatrunigraham |
varṣārātramanuprāptamatikrāmaya rāghava || 22 ||
[Analyze grammar]

niyamya kopaṃ pratipālyatāṃ śarat kṣamasva māsāṃścaturo mayā saha |
vasācale'sminmṛgarājasevite saṃvardhayañ śatruvadhe samudyataḥ || 23 ||
[Analyze grammar]