Chapter 18

ityuktaḥ praśritaṃ vākyaṃ dharmārthasahitaṃ hitam |
paruṣaṃ vālinā rāmo nihatena vicetasā || 1 ||
[Analyze grammar]

taṃ niṣprabhamivādityaṃ muktatoyamivāmbudam |
uktavākyaṃ hariśreṣṭhamupaśāntamivānalam || 2 ||
[Analyze grammar]

dharmārthaguṇasaṃpannaṃ harīśvaramanuttamam |
adhikṣiptastadā rāmaḥ paścādvālinamabravīt || 3 ||
[Analyze grammar]

dharmamarthaṃ ca kāmaṃ ca samayaṃ cāpi laukikam |
avijñāya kathaṃ bālyānmāmihādya vigarhase || 4 ||
[Analyze grammar]

apṛṣṭvā buddhisaṃpannān vṛddhānācāryasaṃmatān |
saumya vānaracāpalyāttvaṃ māṃ vaktumihecchasi || 5 ||
[Analyze grammar]

ikṣvākūṇāmiyaṃ bhūmiḥ saśailavanakānanā |
mṛgapakṣimanuṣyāṇāṃ nigrahānugrahāvapi || 6 ||
[Analyze grammar]

tāṃ pālayati dharmātmā bharataḥ satyavāgṛjuḥ |
dharmakāmārthatattvajño nigrahānugrahe rataḥ || 7 ||
[Analyze grammar]

nayaśca vinayaścobhau yasmin satyaṃ ca susthitam |
vikramaśca yathā dṛṣṭaḥ sa rājā deśakālavit || 8 ||
[Analyze grammar]

tasya dharmakṛtādeśā vayamanye ca pārthivaḥ |
carāmo vasudhāṃ kṛtsnāṃ dharmasaṃtānamicchavaḥ || 9 ||
[Analyze grammar]

tasminnṛpatiśārdūla bharate dharmavatsale |
pālayatyakhilāṃ bhūmiṃ kaścareddharmanigraham || 10 ||
[Analyze grammar]

te vayaṃ mārgavibhraṣṭaṃ svadharme parame sthitāḥ |
bharatājñāṃ puraskṛtya nigṛhṇīmo yathāvidhi || 11 ||
[Analyze grammar]

tvaṃ tu saṃkliṣṭadharmā ca karmaṇā ca vigarhitaḥ |
kāmatantrapradhānaśca na sthito rājavartmani || 12 ||
[Analyze grammar]

jyeṣṭho bhrātā pitā caiva yaśca vidyāṃ prayacchati |
trayaste pitaro jñeyā dharme ca pathi vartinaḥ || 13 ||
[Analyze grammar]

yavīyānātmanaḥ putraḥ śiṣyaścāpi guṇoditaḥ |
putravatte trayaścintyā dharmaścedatra kāraṇam || 14 ||
[Analyze grammar]

sūkṣmaḥ paramadurjñeyaḥ satāṃ dharmaḥ plavaṃgama |
hṛdisthaḥ sarvabhūtānāmātmā veda śubhāśubham || 15 ||
[Analyze grammar]

capalaścapalaiḥ sārdhaṃ vānarairakṛtātmabhiḥ |
jātyandha iva jātyandhairmantrayandrakṣyase nu kim || 16 ||
[Analyze grammar]

ahaṃ tu vyaktatāmasya vacanasya bravīmi te |
na hi māṃ kevalaṃ roṣāttvaṃ vigarhitumarhasi || 17 ||
[Analyze grammar]

tadetat kāraṇaṃ paśya yadarthaṃ tvaṃ mayā hataḥ |
bhrāturvartasi bhāryāyāṃ tyaktvā dharmaṃ sanātanam || 18 ||
[Analyze grammar]

asya tvaṃ dharamāṇasya sugrīvasya mahātmanaḥ |
rumāyāṃ vartase kāmāt snuṣāyāṃ pāpakarmakṛt || 19 ||
[Analyze grammar]

tadvyatītasya te dharmāt kāmavṛttasya vānara |
bhrātṛbhāryābhimarśe'smindaṇḍo'yaṃ pratipāditaḥ || 20 ||
[Analyze grammar]

na hi dharmaviruddhasya lokavṛttādapeyuṣaḥ |
daṇḍādanyatra paśyāmi nigrahaṃ hariyūthapa || 21 ||
[Analyze grammar]

aurasīṃ bhaginīṃ vāpi bhāryāṃ vāpyanujasya yaḥ |
pracareta naraḥ kāmāttasya daṇḍo vadhaḥ smṛtaḥ || 22 ||
[Analyze grammar]

bharatastu mahīpālo vayaṃ tvādeśavartinaḥ |
tvaṃ ca dharmādatikrāntaḥ kathaṃ śakyamupekṣitum || 23 ||
[Analyze grammar]

gurudharmavyatikrāntaṃ prājño dharmeṇa pālayan |
bharataḥ kāmavṛttānāṃ nigrahe paryavasthitaḥ || 24 ||
[Analyze grammar]

vayaṃ tu bharatādeśaṃ vidhiṃ kṛtvā harīśvara |
tvadvidhānbhinnamaryādānniyantuṃ paryavasthitāḥ || 25 ||
[Analyze grammar]

sugrīveṇa ca me sakhyaṃ lakṣmaṇena yathā tathā |
dārarājyanimittaṃ ca niḥśreyasi rataḥ sa me || 26 ||
[Analyze grammar]

pratijñā ca mayā dattā tadā vānarasaṃnidhau |
pratijñā ca kathaṃ śakyā madvidhenānavekṣitum || 27 ||
[Analyze grammar]

tadebhiḥ kāraṇaiḥ sarvairmahadbhirdharmasaṃhitaiḥ |
śāsanaṃ tava yad yuktaṃ tadbhavānanumanyatām || 28 ||
[Analyze grammar]

sarvathā dharma ityeva draṣṭavyastava nigrahaḥ |
vayasyasyopakartavyaṃ dharmamevānupaśyatā || 29 ||
[Analyze grammar]

rājabhirdhṛtadaṇḍāstu kṛtvā pāpāni mānavāḥ |
nirmalāḥ svargamāyānti santaḥ sukṛtino yathā || 30 ||
[Analyze grammar]

āryeṇa mama māndhātrā vyasanaṃ ghoramīpsitam |
śramaṇena kṛte pāpe yathā pāpaṃ kṛtaṃ tvayā || 31 ||
[Analyze grammar]

anyairapi kṛtaṃ pāpaṃ pramattairvasudhādhipaiḥ |
prāyaścittaṃ ca kurvanti tena tacchāmyate rajaḥ || 32 ||
[Analyze grammar]

tadalaṃ paritāpena dharmataḥ parikalpitaḥ |
vadho vānaraśārdūla na vayaṃ svavaśe sthitāḥ || 33 ||
[Analyze grammar]

vāgurābhiśca pāśaiśca kūṭaiśca vividhairnarāḥ |
praticchannāśca dṛśyāśca gṛhṇanti subahūnmṛgān |
pradhāvitān vā vitrastān visrabdhānativiṣṭhitān || 34 ||
[Analyze grammar]

pramattānapramattān vā narā māṃsārthino bhṛśam |
vidhyanti vimukhāṃścāpi na ca doṣo'tra vidyate || 35 ||
[Analyze grammar]

yānti rājarṣayaścātra mṛgayāṃ dharmakovidāḥ |
tasmāttvaṃ nihato yuddhe mayā bāṇena vānara |
ayudhyanpratiyudhyan vā yasmācchākhāmṛgo hyasi || 36 ||
[Analyze grammar]

durlabhasya ca dharmasya jīvitasya śubhasya ca |
rājāno vānaraśreṣṭha pradātāro na saṃśayaḥ || 37 ||
[Analyze grammar]

tānna hiṃsyānna cākrośennākṣipennāpriyaṃ vadet |
devā mānuṣarūpeṇa carantyete mahītale || 38 ||
[Analyze grammar]

tvaṃ tu dharmamavijñāya kevalaṃ roṣamāsthitaḥ |
pradūṣayasi māṃ dharme pitṛpaitāmahe sthitam || 39 ||
[Analyze grammar]

evamuktastu rāmeṇa vālī pravyathito bhṛśam |
pratyuvāca tato rāmaṃ prāñjalirvānareśvaraḥ || 40 ||
[Analyze grammar]

yattvamāttha naraśreṣṭha tadevaṃ nātra saṃśayaḥ |
prativaktuṃ prakṛṣṭe hi nāpakṛṣṭastu śaknuyāt || 41 ||
[Analyze grammar]

yadayuktaṃ mayā pūrvaṃ pramādādvākyamapriyam |
tatrāpi khalu me doṣaṃ kartuṃ nārhasi rāghava || 42 ||
[Analyze grammar]

tvaṃ hi dṛṣṭārthatattvajñaḥ prajānāṃ ca hite rataḥ |
kāryakāraṇasiddhau te prasannā buddhiravyayā || 43 ||
[Analyze grammar]

māmapyavagataṃ dharmādvyatikrāntapuraskṛtam |
dharmasaṃhitayā vācā dharmajña paripālaya || 44 ||
[Analyze grammar]

bāṣpasaṃruddhakaṇṭhastu vālī sārtaravaḥ śanaiḥ |
uvāca rāmaṃ saṃprekṣya paṅkalagna iva dvipaḥ || 45 ||
[Analyze grammar]

na tvātmānamahaṃ śoce na tārāṃ nāpi bāndhavān |
yathā putraṃ guṇaśreṣṭhamaṅgadaṃ kanakāṅgadam || 46 ||
[Analyze grammar]

sa mamādarśanāddīno bālyāt prabhṛti lālitaḥ |
taṭāka iva pītāmburupaśoṣaṃ gamiṣyati || 47 ||
[Analyze grammar]

sugrīve cāṅgade caiva vidhatsva matimuttamām |
tvaṃ hi śāstā ca goptā ca kāryākāryavidhau sthitaḥ || 48 ||
[Analyze grammar]

yā te narapate vṛttirbharate lakṣmaṇe ca yā |
sugrīve cāṅgade rājaṃstāṃ cintayitumarhasi || 49 ||
[Analyze grammar]

maddoṣakṛtadoṣāṃ tāṃ yathā tārāṃ tapasvinīm |
sugrīvo nāvamanyeta tathāvasthātumarhasi || 50 ||
[Analyze grammar]

tvayā hyanugṛhītena śakyaṃ rājyamupāsitum |
tvadvaśe vartamānena tava cittānuvartinā || 51 ||
[Analyze grammar]

sa tamāśvāsayad rāmo vālinaṃ vyaktadarśanam || 52 ||
[Analyze grammar]

na vayaṃ bhavatā cintyā nāpyātmā harisattama |
vayaṃ bhavadviśeṣeṇa dharmataḥ kṛtaniścayāḥ || 53 ||
[Analyze grammar]

daṇḍye yaḥ pātayeddaṇḍaṃ daṇḍyo yaścāpi daṇḍyate |
kāryakāraṇasiddhārthāv ubhau tau nāvasīdataḥ || 54 ||
[Analyze grammar]

tadbhavāndaṇḍasaṃyogādasmādvigatakalmaṣaḥ |
gataḥ svāṃ prakṛtiṃ dharmyāṃ dharmadṛṣṭtena vartmanā || 55 ||
[Analyze grammar]

sa tasya vākyaṃ madhuraṃ mahātmanaḥ samāhitaṃ dharmapathānuvartinaḥ |
niśamya rāmasya raṇāvamardino vacaḥ suyuktaṃ nijagāda vānaraḥ || 56 ||
[Analyze grammar]

śarābhitaptena vicetasā mayā pradūṣitastvaṃ yadajānatā prabho |
idaṃ mahendropamabhīmavikrama prasāditastvaṃ kṣama me mahīśvara || 57 ||
[Analyze grammar]