Chapter 86

tatastāṃ rajanīmuṣya bharataḥ saparicchadaḥ |
kṛtātithyo bharadvājaṃ kāmādabhijagāma ha || 1 ||
[Analyze grammar]

tamṛṣiḥ puruṣavyāghraṃ prekṣya prāñjalimāgatam |
hutāgnihotro bharataṃ bharadvājo'bhyabhāṣata || 2 ||
[Analyze grammar]

kaccidatra sukhā rātristavāsmadviṣaye gatā |
samagraste janaḥ kaccidātithye śaṃsa me'nagha || 3 ||
[Analyze grammar]

tamuvācāñjaliṃ kṛtvā bharato'bhipraṇamya ca |
āśramādabhiniṣkrantamṛṣimuttama tejasaṃ || 4 ||
[Analyze grammar]

sukhoṣito'smi bhagavan samagrabalavāhanaḥ |
tarpitaḥ sarvakāmaiśca sāmātyo balavattvayā || 5 ||
[Analyze grammar]

apetaklamasaṃtāpāḥ subhakṣyāḥ supratiśrayāḥ |
api preṣyānupādāya sarve sma susukhoṣitāḥ || 6 ||
[Analyze grammar]

āmantraye'haṃ bhagavan kāmaṃ tvāmṛṣisattama |
samīpaṃ prasthitaṃ bhrāturmaireṇekṣasva cakṣuṣā || 7 ||
[Analyze grammar]

āśramaṃ tasya dharmajña dhārmikasya mahātmanaḥ |
ācakṣva katamo mārgaḥ kiyāniti ca śaṃsa me || 8 ||
[Analyze grammar]

iti pṛṣṭastu bharataṃ bhrātṛdarśanalālasaṃ |
pratyuvāca mahātejā bharadvājo mahātapāḥ || 9 ||
[Analyze grammar]

bharatārdhatṛtīyeṣu yojaneṣvajane vane |
citrakūṭo giristatra ramyanirdarakānanaḥ || 10 ||
[Analyze grammar]

uttaraṃ pārśvamāsādya tasya mandākinī nadī |
puṣpitadrumasaṃchannā ramyapuṣpitakānanā || 11 ||
[Analyze grammar]

anantaraṃ tat saritaścitrakūṭaśca parvataḥ |
tato parṇakuṭī tāta tatra tau vasato dhruvam || 12 ||
[Analyze grammar]

dakṣiṇenaiva mārgeṇa savyadakṣiṇameva ca |
gajavājirathākīrṇāṃ vāhinīṃ vāhinīpate |
vāhayasva mahābhāga tato drakṣyasi rāghavam || 13 ||
[Analyze grammar]

prayāṇamiti ca śrutvā rājarājasya yoṣitaḥ |
hitvā yānāni yānārhā brāhmaṇaṃ paryavārayan || 14 ||
[Analyze grammar]

vepamānā kṛśā dīnā saha devyā sumantriyā |
kausalyā tatra jagrāha karābhyāṃ caraṇau muneḥ || 15 ||
[Analyze grammar]

asamṛddhena kāmena sarvalokasya garhitā |
kaikeyī tasya jagrāha caraṇau savyapatrapā || 16 ||
[Analyze grammar]

taṃ pradakṣiṇamāgamya bhagavantaṃ mahāmunim |
adūrādbharatasyaiva tasthau dīnamanāstadā || 17 ||
[Analyze grammar]

tataḥ papraccha bharataṃ bharadvājo dṛḍhavrataḥ |
viśeṣaṃ jñātumicchāmi mātṝṇāṃ tava rāghava || 18 ||
[Analyze grammar]

evamuktastu bharato bharadvājena dhārmikaḥ |
uvāca prāñjalirbhūtvā vākyaṃ vacanakovidaḥ || 19 ||
[Analyze grammar]

yāmimāṃ bhagavandīnāṃ śokānaśanakarśitām |
piturhi mahiṣīṃ devīṃ devatāmiva paśyasi || 20 ||
[Analyze grammar]

eṣā taṃ puruṣavyāghraṃ siṃhavikrāntagāminam |
kausalyā suṣuve rāmaṃ dhātāramaditiryathā || 21 ||
[Analyze grammar]

asyā vāmabhujaṃ śliṣṭā yaiṣā tiṣṭhati durmanāḥ |
karṇikārasya śākheva śīrṇapuṣpā vanāntare || 22 ||
[Analyze grammar]

etasyāstau sutau devyāḥ kumārau devavarṇinau |
ubhau lakṣmaṇaśatrughnau vīrau satyaparākramau || 23 ||
[Analyze grammar]

yasyāḥ kṛte naravyāghrau jīvanāśamito gatau |
rājā putravihīnaśca svargaṃ daśaratho gataḥ || 24 ||
[Analyze grammar]

aiśvaryakāmāṃ kaikeyīmanāryāmāryarūpiṇīm |
mamaitāṃ mātaraṃ viddhi nṛśaṃsāṃ pāpaniścayām |
yatomūlaṃ hi paśyāmi vyasanaṃ mahadātmanaḥ || 25 ||
[Analyze grammar]

ityuktvā naraśārdūlo bāṣpagadgadayā girā |
sa niśaśvāsa tāmrākṣo kruddho nāga ivāsakṛt || 26 ||
[Analyze grammar]

bharadvājo maharṣistaṃ bruvantaṃ bharataṃ tadā |
pratyuvāca mahābuddhiridaṃ vacanamarthavat || 27 ||
[Analyze grammar]

na doṣeṇāvagantavyā kaikeyī bharata tvayā |
rāmapravrājanaṃ hyetat sukhodarkaṃ bhaviṣyati || 28 ||
[Analyze grammar]

abhivādya tu saṃsiddhaḥ kṛtvā cainaṃ pradakṣiṇam |
āmantrya bharataḥ sainyaṃ yujyatāmityacodayat || 29 ||
[Analyze grammar]

tato vājirathānyuktvā divyān hemapariṣkritān |
adhyārohat prayāṇārthī bahūnbahuvidho janaḥ || 30 ||
[Analyze grammar]

gajakanyāgajāścaiva hemakakṣyāḥ patākinaḥ |
jīmūtā iva gharmānte saghoṣāḥ saṃpratasthire || 31 ||
[Analyze grammar]

vividhānyapi yānāni mahāni ca laghūni ca |
prayayuḥ sumahārhāṇi pādaireva padātayaḥ || 32 ||
[Analyze grammar]

atha yānapravekaistu kausalyāpramukhāḥ striyaḥ |
rāmadarśanakāṅkṣiṇyaḥ prayayurmuditāstadā || 33 ||
[Analyze grammar]

sa cārkataruṇābhāsāṃ niyuktāṃ śibikāṃ śubhām |
āsthāya prayayau śrīmānbharataḥ saparicchadaḥ || 34 ||
[Analyze grammar]

sā prayātā mahāsenā gajavājirathākulā |
dakṣiṇāṃ diśamāvṛtya mahāmegha ivotthitaḥ |
vanāni tu vyatikramya juṣṭāni mṛgapakṣibhiḥ || 35 ||
[Analyze grammar]

sā saṃprahṛṣṭadvipavājiyodhā vitrāsayantī mṛgapakṣisaṃghān |
mahadvanaṃ tat pravigāhamānā rarāja senā bharatasya tatra || 36 ||
[Analyze grammar]