Chapter 37

yāvattu niryatastasya rajorūpamadṛśyata |
naivekṣvākuvarastāvat saṃjahārātmacakṣuṣī || 1 ||
[Analyze grammar]

yāvad rājā priyaṃ putraṃ paśyatyatyantadhārmikam |
tāvadvyavardhatevāsya dharaṇyāṃ putradarśane || 2 ||
[Analyze grammar]

na paśyati rajo'pyasya yadā rāmasya bhūmipaḥ |
tadārtaśca viṣaṇṇaśca papāta dharaṇītale || 3 ||
[Analyze grammar]

tasya dakṣiṇamanvagāt kausalyā bāhumaṅganā |
vāmaṃ cāsyānvagāt pārśvaṃ kaikeyī bharatapriyā || 4 ||
[Analyze grammar]

tāṃ nayena ca saṃpanno dharmeṇa nivayena ca |
uvāca rājā kaikeyīṃ samīkṣya vyathitendriyaḥ || 5 ||
[Analyze grammar]

kaikeyi mā mamāṅgāni sprākṣīstvaṃ duṣṭacāriṇī |
na hi tvāṃ draṣṭumicchāmi na bhāryā na ca bāndhavī || 6 ||
[Analyze grammar]

ye ca tvāmupajīvanti nāhaṃ teṣāṃ na te mama |
kevalārthaparāṃ hi tvāṃ tyaktadharmāṃ tyajāmyaham || 7 ||
[Analyze grammar]

agṛhṇāṃ yacca te pāṇimagniṃ paryaṇayaṃ ca yat |
anujānāmi tat sarvamasmiṃl loke paratra ca || 8 ||
[Analyze grammar]

bharataścet pratītaḥ syād rājyaṃ prāpyedamavyayam |
yanme sa dadyāt pitrarthaṃ mā mā taddattamāgamat || 9 ||
[Analyze grammar]

atha reṇusamudhvastaṃ tamutthāpya narādhipam |
nyavartata tadā devī kausalyā śokakarśitā || 10 ||
[Analyze grammar]

hatveva brāhmaṇaṃ kāmāt spṛṣṭvāgnimiva pāṇinā |
anvatapyata dharmātmā putraṃ saṃcintya tāpasaṃ || 11 ||
[Analyze grammar]

nivṛtyaiva nivṛtyaiva sīdato rathavartmasu |
rājño nātibabhau rūpaṃ grastasyāṃśumato yathā || 12 ||
[Analyze grammar]

vilalāpa ca duḥkhārtaḥ priyaṃ putramanusmaran |
nagarāntamanuprāptaṃ buddhvā putramathābravīt || 13 ||
[Analyze grammar]

vāhanānāṃ ca mukhyānāṃ vahatāṃ taṃ mamātmajam |
padāni pathi dṛśyante sa mahātmā na dṛśyate || 14 ||
[Analyze grammar]

sa nūnaṃ kva cidevādya vṛkṣamūlamupāśritaḥ |
kāṣṭhaṃ vā yadi vāśmānamupadhāya śayiṣyate || 15 ||
[Analyze grammar]

utthāsyati ca medinyāḥ kṛpaṇaḥ pāṃśuguṇṭhitaḥ |
viniḥśvasanprasravaṇāt kareṇūnāmivarṣabhaḥ || 16 ||
[Analyze grammar]

drakṣyanti nūnaṃ puruṣā dīrghabāhuṃ vanecarāḥ |
rāmamutthāya gacchantaṃ lokanāthamanāthavat || 17 ||
[Analyze grammar]

sakāmā bhava kaikeyi vidhavā rājyamāvasa |
na hi taṃ puruṣavyāghraṃ vinā jīvitumutsahe || 18 ||
[Analyze grammar]

ityevaṃ vilapan rājā janaughenābhisaṃvṛtaḥ |
apasnāta ivāriṣṭaṃ praviveśa purottamam || 19 ||
[Analyze grammar]

śūnyacatvaraveśmāntāṃ saṃvṛtāpaṇadevatām |
klāntadurbaladuḥkhārtāṃ nātyākīrṇamahāpathām || 20 ||
[Analyze grammar]

tāmavekṣya purīṃ sarvāṃ rāmamevānucintayan |
vilapanprāviśad rājā gṛhaṃ sūrya ivāmbudam || 21 ||
[Analyze grammar]

mahāhradamivākṣobhyaṃ suparṇena hṛtoragam |
rāmeṇa rahitaṃ veśma vaidehyā lakṣmaṇena ca || 22 ||
[Analyze grammar]

kausalyāyā gṛhaṃ śīghraṃ rāma māturnayantu mām |
iti bruvantaṃ rājānamanayandvāradarśitaḥ || 23 ||
[Analyze grammar]

tatastatra praviṣṭasya kausalyāyā niveśanam |
adhiruhyāpi śayanaṃ babhūva lulitaṃ manaḥ || 24 ||
[Analyze grammar]

tacca dṛṣṭvā mahārājo bhujamudyamya vīryavān |
uccaiḥ svareṇa cukrośa hā rāghava jahāsi mām || 25 ||
[Analyze grammar]

sukhitā bata taṃ kālaṃ jīviṣyanti narottamāḥ |
pariṣvajanto ye rāmaṃ drakṣyanti punarāgatam || 26 ||
[Analyze grammar]

na tvāṃ paśyāmi kausalye sādhu māṃ pāṇinā spṛśa |
rāmaṃ me'nugatā dṛṣṭiradyāpi na nivartate || 27 ||
[Analyze grammar]

taṃ rāmamevānuvicintayantaṃ samīkṣya devī śayane narendram |
upopaviśyādhikamārtarūpā viniḥśvasantī vilalāpa kṛcchraṃ || 28 ||
[Analyze grammar]