Chapter 19

atha taṃ vyathayā dīnaṃ saviśeṣamamarṣitam |
śvasantamiva nāgendraṃ roṣavisphāritekṣaṇam || 1 ||
[Analyze grammar]

āsādya rāmaḥ saumitriṃ suhṛdaṃ bhrātaraṃ priyam |
uvācedaṃ sa dhairyeṇa dhārayan sattvamātmavān || 2 ||
[Analyze grammar]

saumitre yo'bhiṣekārthe mama saṃbhārasaṃbhramaḥ |
abhiṣekanivṛttyarthe so'stu saṃbhārasaṃbhramaḥ || 3 ||
[Analyze grammar]

yasyā madabhiṣekārthaṃ mānasaṃ paritapyate |
mātā naḥ sā yathā na syāt saviśaṅkā tathā kuru || 4 ||
[Analyze grammar]

tasyāḥ śaṅkāmayaṃ duḥkhaṃ muhūrtamapi notsahe |
manasi pratisaṃjātaṃ saumitre'hamupekṣitum || 5 ||
[Analyze grammar]

na buddhipūrvaṃ nābuddhaṃ smarāmīha kadā cana |
mātṝṇāṃ vā piturvāhaṃ kṛtamalpaṃ ca vipriyam || 6 ||
[Analyze grammar]

satyaḥ satyābhisaṃdhaśca nityaṃ satyaparākramaḥ |
paralokabhayādbhīto nirbhayo'stu pitā mama || 7 ||
[Analyze grammar]

tasyāpi hi bhavedasmin karmaṇyapratisaṃhṛte |
satyaṃ neti manastāpastasya tāpastapecca mām || 8 ||
[Analyze grammar]

abhiṣekavidhānaṃ tu tasmāt saṃhṛtya lakṣmaṇa |
anvagevāhamicchāmi vanaṃ gantumitaḥ punaḥ || 9 ||
[Analyze grammar]

mama pravrājanādadya kṛtakṛtyā nṛpātmajā |
sutaṃ bharatamavyagramabhiṣecayitā tataḥ || 10 ||
[Analyze grammar]

mayi cīrājinadhare jaṭāmaṇḍaladhāriṇi |
gate'raṇyaṃ ca kaikeyyā bhaviṣyati manaḥsukham || 11 ||
[Analyze grammar]

buddhiḥ praṇītā yeneyaṃ manaśca susamāhitam |
tattu nārhāmi saṃkleṣṭuṃ pravrajiṣyāmi māciram || 12 ||
[Analyze grammar]

kṛtāntastveva saumitre draṣṭavyo matpravāsane |
rājyasya ca vitīrṇasya punareva nivartane || 13 ||
[Analyze grammar]

kaikeyyāḥ pratipattirhi kathaṃ syānmama pīḍane |
yadi bhāvo na daivo'yaṃ kṛtāntavihito bhavet || 14 ||
[Analyze grammar]

jānāsi hi yathā saumya na mātṛṣu mamāntaram |
bhūtapūrvaṃ viśeṣo vā tasyā mayi sute'pi vā || 15 ||
[Analyze grammar]

so'bhiṣekanivṛttyarthaiḥ pravāsārthaiśca durvacaiḥ |
ugrairvākyairahaṃ tasyā nānyaddaivāt samarthaye || 16 ||
[Analyze grammar]

kathaṃ prakṛtisaṃpannā rājaputrī tathāguṇā |
brūyāt sā prākṛteva strī matpīḍāṃ bhartṛsaṃnidhau || 17 ||
[Analyze grammar]

yadacintyaṃ tu taddaivaṃ bhūteṣvapi na hanyate |
vyaktaṃ mayi ca tasyāṃ ca patito hi viparyayaḥ || 18 ||
[Analyze grammar]

kaściddaivena saumitre yoddhumutsahate pumān |
yasya na grahaṇaṃ kiṃ cit karmaṇo'nyatra dṛśyate || 19 ||
[Analyze grammar]

sukhaduḥkhe bhayakrodhau lābhālābhau bhavābhavau |
yasya kiṃ cittathābhūtaṃ nanu daivasya karma tat || 20 ||
[Analyze grammar]

vyāhate'pyabhiṣeke me paritāpo na vidyate |
tasmādaparitāpaḥ saṃstvamapyanuvidhāya mām |
pratisaṃhāraya kṣipramābhiṣecanikīṃ kriyām || 21 ||
[Analyze grammar]

na lakṣmaṇāsminmama rājyavighne mātā yavīyasyatiśaṅkanīyā |
daivābhipannā hi vadantyaniṣṭaṃ jānāsi daivaṃ ca tathāprabhāvam || 22 ||
[Analyze grammar]