Chapter 6

ṣaṣṭhaḥ paṭalaḥ |
samayācārayuktasya sādhakasya varānane |
jāyate vividhā siddhiḥ girigahvaramāśrite || 1 ||
[Analyze grammar]

suśuddhe bhūpradeśe tu sarvaśalyavivarjite |
pracchanne vijane ramye bhairavaṃ tatra pūjayet || 2 ||
[Analyze grammar]

japitvākṣaralakṣaṃ tu bahurūpasya suvrate |
pañcapraṇavasaṃyogājjapataḥ siddhyate dhruvam || 3 ||
[Analyze grammar]

mucyate na tu sandeho bhedanātpraṇavasya tu |
hrasvaṃ dīrghaṃ plutaṃ sūkṣmamatisūkṣmaṃ paraṃ śivam || 4 ||
[Analyze grammar]

praṇavaṃ pañcadhā jñātvā bhittvā mokṣo na saṃśayaḥ |
praṇavaḥ pañcadhāvasthaḥ haṃsena saha saṃyuktaḥ || 5 ||
[Analyze grammar]

yatkiñcidvāṅmayaṃ loke śivajñāne pratiṣṭhitam |
śivajñānaṃ ca tatrasthaṃ haṃsaḥ praṇavasaṃyutaḥ || 6 ||
[Analyze grammar]

vinā praṇavasaṃyogājjīva eko vyavasthitaḥ |
yathāprakṛti saṃyukto na ca tiṣṭhati caikataḥ || 7 ||
[Analyze grammar]

tathā ṣaṣṭhena sambhinno dehe jīvaḥ pravartate |
coditastu yadā tena tadā cordhvaṃ pravartate || 8 ||
[Analyze grammar]

pratyakṣamapi tattattvaṃ mahāmāyāvimohitāḥ |
kathitaṃ nābhijānanti vinā śāstreṇa codanām || 9 ||
[Analyze grammar]

ṣaṣṭhaścordhvavaho jñeyaḥ svabhāvamukhasaṃsthitaḥ |
aprakāśaḥ svadehastho guṇabhūtaḥ pravartate || 10 ||
[Analyze grammar]

nirguṇastu yadā deva ekākī kālavarjitaḥ |
vijñātavyaṃ na kiñcitsyātkevalo niṣkalastu saḥ || 11 ||
[Analyze grammar]

tasya rūpaṃ śarīraṃ ca nāsti varṇaḥ kriyā tathā |
sa kathaṃ gṛhyate sūkṣma agrāhyo nityamavyayaḥ || 12 ||
[Analyze grammar]

etasmātkāraṇāddevi ṣaṣṭhaṃ bījaṃ niyojitam |
pañcapañcakasaṃyukto dehe sakalaniṣkalaḥ || 13 ||
[Analyze grammar]

grahaṇaṃ tu yadā tasya yogī yogavicintakaḥ |
yogenāvāhitasyāpi bhāvamātraṃ tu bhāvayet || 14 ||
[Analyze grammar]

yadā karoti sṛṣṭiṃ ca ūrdhvaṃ binduḥ pravartate |
bindūpari ca yacchāntaḥ śivaḥ paramakāraṇam || 15 ||
[Analyze grammar]

tatra bindurlayaṃ yāti tatsthānaṃ durlabhaṃ suraiḥ |
ṣaṣṭhasvarasamāyogādabhyāsādacirāllabhet || 16 ||
[Analyze grammar]

ṣaṣṭhaśca pañcamaścaiva tasya devi guṇāḥ smṛtāḥ |
saguṇaḥ sakalo jñeyo nirguṇo niṣkalaḥ śivaḥ || 17 ||
[Analyze grammar]

sakalo grahasaṃyukto niṣkalo bhāvamāśritaḥ |
sakale japyamāne tu japto bhavati niṣkalaḥ || 18 ||
[Analyze grammar]

surāsurāṇāṃ devena yajanopāyahetunā |
rūpaṃ tu sakalaṃ tasya dvidhāvasthaṃ prakāśitam || 19 ||
[Analyze grammar]

prathamaṃ prākṛtaṃ rūpaṃ vikṛtaṃ ca dvitīyakam |
prakṛtirvikṛtiścaiva ubhe ṣaṣṭhena saṃyute || 20 ||
[Analyze grammar]

ye padārthāḥ purā proktāstatrāsāvucchvasanmuhuḥ |
pravartate ca etena punastena nivartate || 21 ||
[Analyze grammar]

praṇavaḥ pañcadhāvasthaḥ trivarṇaśca tridaivataḥ |
bindunādasamāyuktaḥ praṇavaḥ paripaṭhyate || 22 ||
[Analyze grammar]

akāraśca ukāraśca makāraśca tṛtīyakaḥ |
varṇatrayamidaṃ proktaṃ brahmādyā devatāstrayaḥ || 23 ||
[Analyze grammar]

bindunādasamāyogādīśvaraśca sadāśivaḥ |
ete vai praṇavāḥ pañca haṃsaḥ prāṇayutaḥ sadā || 24 ||
[Analyze grammar]

paramātmā śivo haṃsastvapareṇa samanvitaḥ |
parataḥ praṇavānpañca punareva vadāmyaham || 25 ||
[Analyze grammar]

śaktiśca vyāpinī caiva samanātmā ca niṣkalaḥ |
unmanā ca tathā devi praṇavāḥ pañca kīrtitaḥ || 26 ||
[Analyze grammar]

parataḥ paramo haṃsaḥ sarvaṃ vyāpya vyavasthitaḥ |
ete vai praṇavāḥ pañca parāparavibhāgaśaḥ || 27 ||
[Analyze grammar]

parāpareṇa haṃsena nityameva praṇāmitāḥ |
pravartante hi sarvatra bhuktimuktiphalapradāḥ || 28 ||
[Analyze grammar]

pañcabhistu yutastvebhiḥ sa pañcapraṇavātmakaḥ |
tatrasthaḥ ekarūpastu niṣkalastattvataḥ smṛtaḥ || 29 ||
[Analyze grammar]

tadyogādapi tadbījaṃ sarvabījaprarohakam |
pravartate'yato yasmāddevāsuraniketanam || 30 ||
[Analyze grammar]

tatra mantrāśca varṇāśca pratiṣṭhāṃ yānti nānyathā |
tasya boddhādvimucyante ahikañcukavatpriye || 31 ||
[Analyze grammar]

tāvadbhramati saṃsāre yāvattattvaṃ na vindati |
vidite tu pure tattve na bhūyo jāyate kvacit || 32 ||
[Analyze grammar]

akṛtārtho narastāvad yāvaddhaṃsaṃ na vindati |
praṇavena samāyuktaṃ kṛtārtha iti nirdiśet || 33 ||
[Analyze grammar]

uccāraṃ ca tato jñātvā uccarettaṃ varānane |
uccārastrividho devi haṃsasya samudāhṛtaḥ || 34 ||
[Analyze grammar]

hakārokārasaṃyuktabindvante tu tṛtīyakaḥ |
sṛṣṭinyāsena tūccāraḥ saṃhārayoga ucyate || 35 ||
[Analyze grammar]

evamādikrameṇaiva mantramuccārayedbudhaḥ |
bindusthaṃ tritayaṃ kṛtvā vaktramudghāṭayettataḥ || 36 ||
[Analyze grammar]

īṣadudghāṭite vaktre tadā nādaṃ vijānata |
nādasthaṃ pañcadhā caiva śaktisthaṃ pañcadhā punaḥ || 37 ||
[Analyze grammar]

vyāpinyāṃ pañcadhā caiva samanāniṣkalātmanoḥ |
unmanā ca paraṃ tattvaṃ sarvaṃ vyāpya vyavasthitam || 38 ||
[Analyze grammar]

evaṃ jñātvā vimucyante śivatattvavido janāḥ |
anyathā naiva mucyante bindvante ye vyavasthitāḥ || 39 ||
[Analyze grammar]

jyotīrūpaṃ tu bindusthaṃ nādasthaṃ śabdarūpakam |
śaktisthaṃ sparśagaṃ caiva tadūrdhvaṃ śūnyarūpakam || 40 ||
[Analyze grammar]

brahmādipañcakaṃ yacca teṣāṃ śūnyaṃ ca tatpadam |
parāparavibhāgena te sarvatra vyavasthitāḥ || 41 ||
[Analyze grammar]

śūnyātītā tu samanā śuddhātmā tūnmanā tathā |
sarvātītaṃ paraṃ tattvaṃ sarvaṃ vyāpya vyavasthitam || 42 ||
[Analyze grammar]

mantrarūpāśca vijñeyā bindudharmāttu devatāḥ |
tatrasthā sarvakarmāṇi sādhayanti na saṃśayaḥ || 43 ||
[Analyze grammar]

tattvaṃ ca unmanātmā tu samanā śūnyameva ca |
sparśaścaiva tathā śabdo rūpaṃ ca tadanantaram || 44 ||
[Analyze grammar]

mantrātmani sthitāḥ sarve jñātavyā daiśikena tu |
tatrasthā jñānayogaṃ ca prayacchanti varānane || 45 ||
[Analyze grammar]

karmakāle tu sakalān śiraḥ pāṇyādibhiryutān |
japettu sakalāndevi niṣkalena samanvitān || 46 ||
[Analyze grammar]

dhyāyejjyotirmayān sarvān śabdasiddhipradāyakān |
śaktisthāḥ śaktidāḥ proktāḥ śūnyasthā vyāpakāḥ smṛtāḥ || 47 ||
[Analyze grammar]

kramājjñānapradāste vai samanāsthā varānane |
kaivalyadāstataścordhve sarvajñāśconmane pade || 48 ||
[Analyze grammar]

tattvena vedhitāḥ sarve ye mayā parikīrtitāḥ |
tajjñātvā siddhidāḥ sarve muktidāśca na saṃśayaḥ || 49 ||
[Analyze grammar]

pañcapraṇavasaṃyuktaṃ tattvaṃ te kathitaṃ mayā |
pañcapraṇavapūrveṇa oṃkārādyayutena tu || 50 ||
[Analyze grammar]

namaskārāvasānena bahurūpeṇa suvrate |
japataḥ siddhimāpnoti lakṣenākṣarasaṃkhyayā || 51 ||
[Analyze grammar]

praṇavādyena saṃyuktaṃ mantramevaṃ japetsadā |
japānte tu punarhomaṃ daśamāṃśena kārayet || 52 ||
[Analyze grammar]

nṛmāṃsaṃ purasaṃyuktaṃ ghṛtena ca pariplutam |
tataḥ siddhimavāpnoti adhamāṃ madhyamottamam || 53 ||
[Analyze grammar]

triguṇena tu japyena svacchandasadṛśo bhavet |
brahmaviṣṇvindradevānāṃ siddhadaityorageśinām || 54 ||
[Analyze grammar]

bhayadātā ca hartā ca śāpānugrahakṛdbhavet |
darpaṃ harati kālasya pātayedbhūdharānapi || 55 ||
[Analyze grammar]

sphoṭayedbilvayantrāṇi diggajānapi cālayet |
brahmarākṣasavetālān krūragrahavināyakān || 56 ||
[Analyze grammar]

smaraṇānnāśayeddevi avadhyastridaśairapi |
prākṛtānyapi karmāṇi siddhyanti japalakṣataḥ || 57 ||
[Analyze grammar]

tāni samyakpravakṣyāmi yathāvadanupūrvaśaḥ |
mohanā sahadevā ca bhūdhātrī cakralāñchanā || 58 ||
[Analyze grammar]

rāmavallyā sahaikatra ātmabījena poṣayet |
bhakṣe pāne ca dātavyaṃ vaśīkaraṇamuttamam || 59 ||
[Analyze grammar]

uttavāraṇimūlaṃ tu puṣyarkṣeṇa tu grāhayet |
ātmendriyeṇa saṃyuktaṃ vaśīkaraṇamuttamam || 60 ||
[Analyze grammar]

śravaṇākṣimalaṃ lālā rudhirendriyasaṃyutam |
bhūkadambasamopetaṃ dātavyaṃ payasā niśi || 61 ||
[Analyze grammar]

apravāse pradātavyaṃ mriyate viraheṇa sā |
ṣaṣṭiṃ kanakabījāni ṣoḍaśa maṇicandrikāḥ || 62 ||
[Analyze grammar]

naragodantasaṃyuktāḥ pradadyādyasya bhāminī |
eṣa kāpāliko yogo gacchantamanugacchati || 63 ||
[Analyze grammar]

śvetārkamūlaṃ mañjiṣṭhā caṭakasya śirastathā |
gṛhodbhavasya kuṣṭhaṃ ca svaraktendriyasaṃyutam || 64 ||
[Analyze grammar]

bhakṣye pāne pradātavyaṃ vaśīkaraṇamuttamam |
mohanā caiva kāntārī mayūraśikhayā yutā || 65 ||
[Analyze grammar]

ātmalālendriyairyuktaṃ vaśīkaraṇamuttamam |
lajjālukā ca gorambhā caṇḍālīkarmakaṃ tathā || 66 ||
[Analyze grammar]

nāgendrapadamiśraṃ tadātmabījasamanvitam |
eṣa yogavaro divyo dīyate yasya suvrate || 67 ||
[Analyze grammar]

madhureṇa samāyukto yāvadāyurvaśī sa tu |
caṇakā māṣamudgāśca apānena vinirgatāḥ || 68 ||
[Analyze grammar]

vāntaṃ ghṛtaṃ tathā retaḥ strīrajo hṛnmalaṃ tathā |
mūtraṃ raktaṃ tathā keśo lālā caiva varānane || 69 ||
[Analyze grammar]

putrajāniḥ kṛtāhvā ca nāgendrapadasaṃyutā |
mohanā viṣṇukrāntā ca dhātrī caivaikataḥ sthitā || 70 ||
[Analyze grammar]

puṣyarkṣeṇa niyuñjīta garvitānāṃ varānane |
bhakṣye pāne pradātavyo yogastridaśapūjitaḥ || 71 ||
[Analyze grammar]

uccāṭanaṃ pravakṣyāmi śatrūṇāṃ garvitātmanām |
kākolūkasya pakṣāṃśca kharoṣṭramūtramṛttikā || 72 ||
[Analyze grammar]

kṛtvā pratikṛtiṃ prājñaḥ kākaraktena lepayet |
kākolūkasya pakṣāṃśca gude tasya vinikṣipet || 73 ||
[Analyze grammar]

tāṃ catuṣpathe nikhanet śmaśānāgnimathopari |
prajvālya homayettatra kākapakṣāṃśca suvrate || 74 ||
[Analyze grammar]

udbhrāntapatrasahitān kharamūtreṇa bhāvitān |
yasya nāma samuddiśya yakārādyantarodhitam || 75 ||
[Analyze grammar]

mantrāvasāne vinyastaṃ visargāntaṃ pracāṭayet |
bhramate kākavatpṛthvīṃ śatrurvyādhinipīḍitaḥ || 76 ||
[Analyze grammar]

piṇyākaṃ nimbapattrāṇi mṛtkiṇvaṃ tu tuṣāṇi ca |
śatroḥ pratikṛtiṃ kṛtvā akṣapuṣpaistu veṣṭitām || 77 ||
[Analyze grammar]

śmaśāne nikhanettāṃ tu vahniṃ prajvālya copari |
puṣpairvibhītatarujairyasya nāmnā tu homayet || 78 ||
[Analyze grammar]

vidviṣṭo vai bhavecchatruḥ kāmadevasamo'pi yaḥ |
priyaṅgulatikāmiśraṃ gugguluṃ ghṛtavedhitam || 79 ||
[Analyze grammar]

hṛtvā tvaṣṭaśataṃ devi subhagaḥ samprajāyate |
jātikuṭmalakairmiśraistrimadhvaktaistilairhutaiḥ || 80 ||
[Analyze grammar]

subhagatvamavāpnoti rūpahīno'pi yo naraḥ |
tilairlavaṇasammiśraistrimadhvaktairhutaiḥ priyaiḥ || 81 ||
[Analyze grammar]

saptāhādvaśamāyāti yā strī rūpeṇa garvitā |
rājikā lavaṇaṃ caiva madhukṣīraghṛtaplutam || 82 ||
[Analyze grammar]

homayennāmasammiśraṃ yasyākarṣettu taṃ drutam |
narasya rocanāṃ gṛhya dviradasya madena tu || 83 ||
[Analyze grammar]

bhāvayitvābhimantryaitanmantreṇāṣṭaśataṃ japet |
snāne vilepane madye gandhe vā yasya dīyate || 84 ||
[Analyze grammar]

sa vaśyo bhavati kṣipraṃ dhanadaḥ prāṇadastathā |
athavā mārayetkṣipraṃ śatruṃ niścitamātmanaḥ || 85 ||
[Analyze grammar]

apakāraśatairyuktaṃ kṛtaghnaṃ duṣṭacetasam |
kapāladvayamādāya nāma śatroḥ samālikhet || 86 ||
[Analyze grammar]

kapālasampuṭasthaṃ tadviṣāṅgāreṇa bhāvitam |
rudhireṇa samāyuktaṃ humphaṭkāravidarbhitam || 87 ||
[Analyze grammar]

mahāpretavanaṃ gatvā svacchandaṃ pūjayettataḥ |
kṛṣṇamālyopahāraiśca tataḥ karma samārabhet || 88 ||
[Analyze grammar]

vijñāpya bhairavaṃ devaṃ śatruṃ me vinipātaya |
anujñātastu devena gṛhittvā tacchirodvayam || 89 ||
[Analyze grammar]

tatra gatvā mahādevi kapālāsanasaṃsthitaḥ |
tatrastho roṣasampūrṇo dakṣiṇābhimukhaḥ sthitaḥ || 90 ||
[Analyze grammar]

ātmano bhairavaṃ rūpaṃ jñātvā ghoraṃ subhīṣaṇam |
kruddhaḥ samuccarenmantrī dvātriṃśākṣarasammitam || 91 ||
[Analyze grammar]

vilomena mahābhāge śatrunāma tato'ntagam |
humphaḍdvayaṃ samuccārya kādye cāsphālayedbhṛśam || 92 ||
[Analyze grammar]

khaṇḍaśaścūrṇite yāvattāvacchaturvinaśyati |
saptarātreṇa deveśi prayogastvanivartakaḥ || 93 ||
[Analyze grammar]

evaṃ śatasahasrāṇi anyakalpotthitāni ca |
prayogāṇāṃ karotyeṣa mantrarājeśvareśvaraḥ || 94 ||
[Analyze grammar]

anulomagataṃ devaṃ vauṣatkārāntasaṃsthitam |
kṣīraṃ tu homayeddevi śāntyarthe hitakārakam || 95 ||
[Analyze grammar]

vaṣadāpyāyane śastaṃ svāhāntaṃ vaśakarmaṇi |
mantrāṇāṃ tarpaṇārthaṃ ca natyantaṃ cārcane smṛtam || 96 ||
[Analyze grammar]

etaddhi kathitaṃ devi sādhakasya sumedhasaḥ |
kriyākālāṃśayuktasya akleśāttu sukhāvaham |
iti svacchandatantre pañcapraṇavādhikāraḥ ṣaṣṭhaḥ paṭalaḥ || 97 ||
[Analyze grammar]