Chapter 30

[English text for this chapter is available]

tatrādau śivayoḥ pārśve dakṣiṇe vāmataḥ kramāt |
gaṃdhādyairarcayetpūrvaṃ devau heraṃbaṣaṇmukhau || 1 ||
[Analyze grammar]

tato brahmāṇi parita īśānādi yathākramam |
saśaktikāni sadyāṃtaṃ prathamāvaraṇe yajet || 2 ||
[Analyze grammar]

ṣaḍaṃgānyapi tatraiva hṛdayādīnyanukramāt |
śivasya ca śivāyāśca vāhneyādi samarcayet || 3 ||
[Analyze grammar]

tatra vāmādikānrudrānaṣṭau vāmādiśaktibhiḥ |
arcayedvā na vā paścātpūrvādiparitaḥ kramāt || 4 ||
[Analyze grammar]

prathamāvaraṇaṃ proktaṃ mayā te yadunaṃdana |
dvitīyāvaraṇaṃ prītyā procyate śraddhayā śṛṇu || 5 ||
[Analyze grammar]

anaṃtaṃ pūrvādikpatre tacchaktiṃ tasya vāmataḥ |
sūkṣmaṃ dakṣiṇadikpatre saha śaktyā samarcayet || 6 ||
[Analyze grammar]

tataḥ paścimadikpatre saha śaktyā śivottamam |
tathaivottaradikpatre caikanetraṃ samarcayet || 7 ||
[Analyze grammar]

ekarudraṃ ca tacchaktiṃ paścādīśadale 'rcayet |
trimūrtiṃ tasya śaktiṃ ca pūjayedagnidigdale || 8 ||
[Analyze grammar]

śrīkaṇṭhaṃ nairṛte patre tacchaktiṃ tasya vāmataḥ |
tathaiva mārute patre śikhaṃḍīśaṃ samarcayet || 9 ||
[Analyze grammar]

dvitīyāvaraṇe cejyāssarvartaścakravartinaḥ |
tṛtīyāvaraṇe pūjyāḥ śaktibhiścāṣṭamūrtayaḥ || 10 ||
[Analyze grammar]

aṣṭasu kramaśo dikṣu pūrvādiparitaḥ kramāt |
bhavaḥ śarvastatheśāno rudraḥ paśupatistataḥ || 11 ||
[Analyze grammar]

ugro bhīmo mahādeva ityaṣṭau mūrtayaḥ kramāt |
anaṃtaraṃ tataścaiva mahādevādayaḥ kramāt || 12 ||
[Analyze grammar]

śaktibhissaha saṃpūjyāstatraikādaśamūrtayaḥ |
mahādevaḥ śivo rudraḥ śaṃkaro nīlalohitaḥ || 12 ||
[Analyze grammar]

īśāno vijayo bhīmo devadevo bhavodbhavaḥ |
kapardīśaśca kathyaṃte tathaikādaśaśaktayaḥ || 13 ||
[Analyze grammar]

tatrāṣṭau prathamaṃ pūjyāḥ vāhneyādi yathākramam |
devadevaḥ pūrvapatre īśānaṃ cāgnigocare || 14 ||
[Analyze grammar]

bhavodbhavastayormadhye kapālīśastataḥ param |
tasminnāvaraṇe bhūyo vṛṣendraṃ purato yajet || 15 ||
[Analyze grammar]

naṃdinaṃ dakṣiṇe tasya mahākālaṃ tathottare |
śāstāraṃ vahnidikpatre mātḥrdakṣiṇadigdale || 16 ||
[Analyze grammar]

gajāsyaṃ nairṛte patre ṣaṇmukhaṃ vāruṇe punaḥ |
jyeṣṭhāṃ vāyudale gaurīmuttare caṃḍamaiśvare || 17 ||
[Analyze grammar]

śāstṛnandīśayormadhye munīndraṃ vṛṣabhaṃ yajet |
mahākālasyottarataḥ piṃgalaṃ tu samarcayet || 18 ||
[Analyze grammar]

śāstṛmātṛsamūhasya madhye bhṛṃgīśvaraṃ tataḥ |
mātṛvighneśamadhye tu vīrabhadraṃ samarcayet || 19 ||
[Analyze grammar]

skandavighneśayormadhye yajeddevīṃ sarasvatīm |
jyeṣṭhākumārayormadhye śriyaṃ śivapadārcitām || 20 ||
[Analyze grammar]

jyeṣṭhāgaṇāmbayormadhye mahāmoṭīṃ samarcayet |
gaṇāmbācaṇḍayormadhye devīṃ durgāṃ prapūjayet || 21 ||
[Analyze grammar]

atraivāvaraṇe bhūyaḥ śivānucarasaṃhatim |
rudraprathamabhūtākhyāṃ vividhāṃ ca saśaktikām || 22 ||
[Analyze grammar]

śivāyāśca sakhīvargaṃ japeddhyātvā samāhitaḥ |
evaṃ tṛtīyāvaraṇe vitate pūjite sati || 23 ||
[Analyze grammar]

caturthāvaraṇaṃ dhyātvā bahistasya samarcayet |
bhānuḥ pūrvadale pūjyo dakṣiṇe caturānanaḥ || 24 ||
[Analyze grammar]

rudro varuṇadikpatre viṣṇuruttaradigdale |
caturṇāmapi devānāṃ pṛthagāvaraṇānyatha || 25 ||
[Analyze grammar]

tasyāṃgāni ṣaḍevādau dīptādyābhiśca śaktibhiḥ |
dīptā sūkṣmā jayā bhadrā vibhūtirvimalā kramāt || 26 ||
[Analyze grammar]

amoghā vidyutā caiva pūrvādi paritaḥ sthitāḥ |
dvitīyāvaraṇe pūjyāścatasro mūrtayaḥ kramāt || 27 ||
[Analyze grammar]

pūrvādyuttaraparyaṃtāḥ śaktayaśca tataḥ param |
ādityo bhāskaro bhānū raviścetyanupūrvaśaḥ || 28 ||
[Analyze grammar]

arko brahmā tathā rudro viṣṇuścaite vivasvataḥ |
vistārā pūrvadigbhāge sutarāṃ dakṣiṇe sthitāḥ || 29 ||
[Analyze grammar]

bodhanī paścime bhāge āpyāyinyuttare punaḥ |
uṣāṃ prabhāṃ tathā prājñāṃ sandhyāmapi tataḥ param || 30 ||
[Analyze grammar]

aiśānādiṣu vinyasya dvitīyāvaraṇe yajet |
somamaṃgārakaṃ caiva budhaṃ buddhimatāṃ varam || 31 ||
[Analyze grammar]

bṛhaspatiṃ bṛhadbuddhiṃ bhārgavaṃ tejasāṃ nidhim |
śanaiścaraṃ tathā rāhuṃ ketuṃ dhūmraṃ bhayaṃkaram || 32 ||
[Analyze grammar]

samaṃtato yajedetāṃstṛtīyāvaraṇe kramāt |
athavā dvādaśādityā dvitīyāvaraṇe yajet || 33 ||
[Analyze grammar]

tṛtīyāvaraṇe caiva rāśīndvādaśa pūjayet |
saptasapta gaṇāṃścaiva bahistasya samaṃtataḥ || 34 ||
[Analyze grammar]

ṛṣīndevāṃśca gaṃdharvānpannagānapsarogaṇān |
grāmaṇyaśca tathā yakṣānyātudhānāṃstathā hayān || 35 ||
[Analyze grammar]

saptacchaṃdomayāṃścaiva vālakhilyāṃśca pūjayet |
evaṃ tṛtīyāvaraṇe samabhyarcya divākaram || 36 ||
[Analyze grammar]

brahmāṇamarcayetpaścāttribhirāvaraṇaiḥ sahaḥ |
hiraṇyagarbhaṃ pūrvasyāṃ virājaṃ dakṣiṇe tataḥ || 37 ||
[Analyze grammar]

kālaṃ paścimadigbhāge puruṣaṃ cottare yajet |
hiraṇyagarbhaḥ prathamo brahmā kamalasannibhaḥ || 38 ||
[Analyze grammar]

kālo jātyaṃjanaprakhyaḥ puruṣaḥ sphaṭikopamaḥ |
triguṇo rājasaścaiva tāmasaḥ sāttvikastathā || 39 ||
[Analyze grammar]

catvāra ete kramaśaḥ prathamāvaraṇe sthitāḥ |
dvitīyāvaraṇe pūjyāḥ pūrvādiparitaḥ kramāt || 40 ||
[Analyze grammar]

sanatkumāraḥ sanakaḥ sanaṃdaśca sanātanaḥ |
tṛtīyāvaraṇe paścādarcayecca prajāpatīn || 41 ||
[Analyze grammar]

aṣṭau pūrvāṃśca pūrvādau trīnprākpaścādanukramāt |
dakṣo rucirbhṛguścaiva marīciśca tathāṃgirāḥ || 42 ||
[Analyze grammar]

pulastyaḥ pulahaścaiva kraturatriśca kaśyapaḥ |
vasiṣṭhaśceti vikhyātāḥ prajānāṃ patayastvime || 43 ||
[Analyze grammar]

teṣāṃ bhāryāśca taissārdhaṃ pūjanīyā yathākramam |
prasūtiśca tathākūtiḥ khyātiḥ sambhūtireva ca || 44 ||
[Analyze grammar]

dhṛtiḥ smṛtiḥ kṣamā caiva sannatiścānasūyakā |
devamātārundhatī ca sarvāḥ khalu pativratāḥ || 45 ||
[Analyze grammar]

śivārcanarato nityaṃ śrīmatyaḥ priyadarśanāḥ |
prathamāvaraṇe vedāṃścaturo vā prapūjayet || 46 ||
[Analyze grammar]

itihāsapurāṇāni dvitīyāvaraṇe punaḥ |
tṛtīyāvaraṇe paścāddharmaśāstrapurassarāḥ || 47 ||
[Analyze grammar]

vaidikyo nikhilā vidyāḥ pūjyā eva samaṃtataḥ |
pūrvādipurato vedāstadanye tu yathāruci || 48 ||
[Analyze grammar]

aṣṭadhā vā caturdhā vā kṛtvā pūjāṃ samaṃtataḥ |
evaṃ brahmāṇamabhyarcya tribhirāvaraṇairyutam || 49 ||
[Analyze grammar]

dakṣiṇe paścime paścādrudraṃ sāvaraṇaṃ yajet |
tasya brahmaṣaḍaṃgāni prathamāvaraṇaṃ smṛtam || 50 ||
[Analyze grammar]

dvitīyāvaraṇe caiva vidyeśvaramayaṃ tathā |
tṛtīyāvaraṇe bhedo vidyate sa tu kathyate || 51 ||
[Analyze grammar]

catasro mūrtayastasya pūjyāḥ pūrvāditaḥ kramāt |
triguṇāssakalo devaḥ purastācchivasaṃjñakaḥ || 52 ||
[Analyze grammar]

rājaso dakṣiṇe brahmā sṛṣṭikṛtpūjyate bhavaḥ |
tāmasaḥ paścime cāgniḥ pūjyassaṃhārako haraḥ || 53 ||
[Analyze grammar]

sāttvikassukhakṛtsaumye viṣṇurviśvapatirmṛḍaḥ |
evaṃ paścimadigbhāge śambhoḥ ṣaḍviṃśakaṃ śivam || 54 ||
[Analyze grammar]

samabhyarcyottare pārśve tato vaikuṃṭhamarcayet |
vāsudevaṃ puraskṛtvā prathamāvaraṇe yajet || 55 ||
[Analyze grammar]

aniruddhaṃ dakṣiṇataḥ pradyumnaṃ paścime tataḥ |
saumye saṃkarṣaṇaṃ paścādvyatyastau vā yajedimau || 56 ||
[Analyze grammar]

prathamāvaraṇaṃ proktaṃ dvitīyāvaraṇaṃ śubham |
matsyaḥ kūrmo varāhaśca narasiṃhotha vāmanaḥ || 57 ||
[Analyze grammar]

rāmaścānyatamaḥ kṛṣṇo bhavānaśvamukhopi ca |
tṛtīyāvaraṇe cakruḥ pūrvabhāge samarcayet || 58 ||
[Analyze grammar]

nārāyaṇākhyāṃ yāmyestraṃ kvacidavyāhataṃ yajet |
paścime pāṃcajanyaṃ ca śārṅgaṃdhanurathottare || 59 ||
[Analyze grammar]

evaṃ tryāvaraṇaiḥ sākṣādviśvākhyāṃ paramaṃ harim |
mahāviṣṇuṃ sadāviṣṇuṃ mūrtīkṛtya samarcayet || 60 ||
[Analyze grammar]

itthaṃ viṣṇoścaturvyūhakramānmūrticatuṣṭayam |
pūjayitvā ca tacchaktīścatasraḥ pujayetkramāt || 61 ||
[Analyze grammar]

prabhāmāgneyadigbhāge nairṛte tu sarasvatīm |
gaṇāṃbikā ca vāyavye lakṣmīṃ raudre samarcayet || 62 ||
[Analyze grammar]

evaṃ bhānvādimūrtīnāṃ tacchaktīnāmanaṃtaram |
pūjāṃ vidhāya lokeśāṃstatraivāvaraṇe yajet || 63 ||
[Analyze grammar]

indramagniṃ yamaṃ caiva nirṛtiṃ varuṇaṃ tathā |
vāyuṃ somaṃ kuberaṃ ca paścādīśānamarcayet || 64 ||
[Analyze grammar]

evaṃ caturthāvaraṇaṃ pūjayitvā vidhānataḥ |
āyudhāni maheśasya paścādbāṃhyaṃ samarcayet || 65 ||
[Analyze grammar]

śrīmantriśūlamaiśāne vajraṃ māhendradiṅmukhe |
paraśuṃ vahnidigbhāge yāmye sāyakamarcayet || 66 ||
[Analyze grammar]

nairṛte tu yajetkhaḍgaṃ pāśaṃ vāruṇagocare |
aṃkuśaṃ mārute bhāge pinākaṃ cottare yajet || 67 ||
[Analyze grammar]

paścimābhimukhaṃ raudraṃ kṣetrapālaṃ samarcayet |
pañcamāvaraṇaṃ caiva sampūjyānantaraṃ bahiḥ || 68 ||
[Analyze grammar]

sarvāvaraṇadevānāṃ bahirvā pañcame 'thavā |
pañcame mātṛbhissārdhaṃ mahokṣa purato yajet || 69 ||
[Analyze grammar]

tataḥ samaṃtataḥ pūjyāssarvā vai devayonayaḥ |
khecarā ṛṣayassiddhā daityā yakṣāśca rākṣasāḥ || 70 ||
[Analyze grammar]

anaṃtādyāśca nāgeṃdrā nāgaistattatkulodbhavaiḥ |
ḍākinībhūtavetālapretabhairavanāyakāḥ || 71 ||
[Analyze grammar]

pātālavāsinaścānye nānāyonisamudbhavāḥ |
nadyassamudrā girayaḥ kānanāni sarāṃsi ca || 72 ||
[Analyze grammar]

paśavaḥ pakṣiṇo vṛkṣāḥ kīṭādyāḥ kṣudrayonayaḥ |
narāśca vividhākārā mṛgāśca kṣudrayonayaḥ || 73 ||
[Analyze grammar]

bhuvanānyantaraṇḍasya tato brahmāṇḍakoṭayaḥ |
bahiraṃḍānyasaṃkhyāni bhuvanāni sahādhipaiḥ || 74 ||
[Analyze grammar]

brahmāṃḍādhārakā rudrā daśadikṣu vyavasthitāḥ |
yadgauḍa yacca māmeyaṃ yadvā śāktaṃ tataḥ param || 75 ||
[Analyze grammar]

yatkiñcidasti śabdasya vācyaṃ cidacidātmakam |
tatsarvaṃ śivayoḥ pārśve buddhvā sāmānyato yajet || 76 ||
[Analyze grammar]

kṛtāṃjalipuṭāḥ sarve 'ciṃtyāḥ smitamukhāstathā |
prītyā saṃprekṣamāṇāśca devaṃ devīṃ ca sarvadā || 77 ||
[Analyze grammar]

itthamāvaraṇābhyarcāṃ kṛtvāvikṣepaśāṃtaye |
punarabhyarcya deveśaṃ paktvākṣaramudīrayet || 78 ||
[Analyze grammar]

nivedayettataḥ paścācchivayoramṛtopamam |
suvyañjanasamāyuktaṃ śuddhaṃ cāru mahācarum || 79 ||
[Analyze grammar]

dvātriṃśadāḍhakairmukhyamadhamaṃ tvāḍhakāvaram |
sādhayitvā yathāsaṃpacchraddhayā vinivedayet || 80 ||
[Analyze grammar]

tato nivedya pānīyaṃ tāṃbūlaṃ copadaṃśakaiḥ |
nīrājanādikaṃ kṛtvā pūjāśeṣaṃ samāpayet || 81 ||
[Analyze grammar]

bhogopayogyadravyāṇi viśiṣṭānyeva sādhayet |
vittaśāṭhyaṃ na kurvīta bhaktimānvibhave sati || 82 ||
[Analyze grammar]

śaṭhasyopekṣakasyāpi vyaṃgyaṃ caivānutiṣṭhataḥ |
na phalaṃtyeva karmāṇi kāmyānīti satāṃ kathā || 83 ||
[Analyze grammar]

tasmātsamyagupekṣāṃ ca tyaktvā sarvāṃgayogataḥ |
kuryātkāmyāni karmāṇi phalasiddhiṃ yadīcchati || 84 ||
[Analyze grammar]

itthaṃ pūjāṃ samāpyātha devaṃ devīṃ praṇamya ca |
bhaktyā manassamādhāya paścātstotramudīrayet || 85 ||
[Analyze grammar]

tataḥ stotramupāsyānte tvaṣṭottaraśatāvarām |
japetpañcākṣarīṃ vidyāṃ sahasrottaramutsukaḥ || 86 ||
[Analyze grammar]

vidyāpūjāṃ guroḥ pūjāṃ kṛtvā paścādyathākramam |
yathodayaṃ yathāśrāddhaṃ sadasyānapi pūjayet || 87 ||
[Analyze grammar]

tataḥ udvāsya deveśaṃ sarvairāvaraṇaiḥ saha |
maṇḍalaṃ gurave dadyādyāgopakaraṇaissaha || 88 ||
[Analyze grammar]

śivāśritebhyo vā dadyātsarvamevānupūrvaśaḥ |
athavā tacchivāyaiva śivakṣetre samarpayet || 89 ||
[Analyze grammar]

śivāgnau vā yajeddevaṃ homadravyaiśca saptabhiḥ |
samabhyarcya yathānyāyaṃ sarvāvaraṇadevatāḥ || 90 ||
[Analyze grammar]

eṣa yogeśvaro nāma triṣu lokeṣu viśrutaḥ |
na tasmādadhikaḥ kaścidyāgo 'sti bhuvane kvacit || 91 ||
[Analyze grammar]

na tadasti jagatyasminnasadhyaṃ yadanena tu |
aihikaṃ vā phalaṃ kiṃcidāmuṣmikaphalaṃ tu vā || 92 ||
[Analyze grammar]

idamasya phalaṃ nedamiti naiva niyamyate |
śreyorūpasya kṛtsnasya tadidaṃ śreṣṭasādhanam || 93 ||
[Analyze grammar]

idaṃ na śakyate vaktuṃ puruṣeṇa yadarcyate |
ciṃtāmaṇerivaitasmāttattena prāpyate phalam || 94 ||
[Analyze grammar]

tathāpi kṣudramuddiśya phalaṃ naitatprayojayet |
laghvarthī mahato yasmātsvayaṃ laghutaro bhavet || 95 ||
[Analyze grammar]

mahadvā phalamalpaṃ vā kṛtaṃ cetkarma sidhyati |
mahādevaṃ samuddiśya kṛtaṃ karma prayujyatām || 96 ||
[Analyze grammar]

tasmādananyalabhyeṣu śatrumṛtyuṃjayādiṣu |
phaleṣu dṛṣṭādṛṣṭeṣu kuryādetadvicakṣaṇaḥ || 97 ||
[Analyze grammar]

mahatsvapi ca pāteṣu mahārāgabhayādiṣu |
durbhikṣādiṣu śāṃtyarthaṃ śāṃtiṃ kuryādanena tu || 98 ||
[Analyze grammar]

bahunā kiṃ pralāpena mahāvyāpannivārakam |
ātmīyamastraṃ śaivānāmidamāha maheśvaraḥ || 99 ||
[Analyze grammar]

tasmāditaḥ paraṃ nāsti paritrāṇamihātmanaḥ |
iti matvā prayuṃjānaḥ karmedaṃ śubhamaśnute || 100 ||
[Analyze grammar]

stotramātraṃ śucirbhūtvā yaḥ paṭhetsusamāhitaḥ |
sopyabhīṣṭatamādarthādaṣṭāṃśaphalamāpnuyāt || 101 ||
[Analyze grammar]

arthaṃ tasyānusandhāya parvaṇyanaśanaḥ paṭhet |
aṣṭābhyāṃ vā caturdaśyāṃ phalamardhaṃ samāpnuyāt || 102 ||
[Analyze grammar]

yastvarthamanusaṃdhāya parvādiṣu tathā vratī |
māsamekaṃ japetstotraṃ sa kṛtsnaṃ phalamāpnuyāt || 103 ||
[Analyze grammar]