Chapter 31

[English text for this chapter is available]

vāyuruvāca |
sthane saṃśayitaṃ viprā bhavadbhirhetucoditaiḥ |
jijñāsā hi na nāstikyaṃ sādhayetsādhubuddhiṣu || 1 ||
[Analyze grammar]

pramaṇamatra vakṣyāmi satāmmohanivartakam |
asatāṃ tvanyathābhāvaḥ prasādena vinā prabhoḥ || 2 ||
[Analyze grammar]

śivasya paripūrṇasya parānugrahamantarā |
na kiṃcidapi kartavyamiti sādhu viniścitam || 3 ||
[Analyze grammar]

svabhāva eva paryāptaḥ parānugrahakarmaṇi |
anyathā nissvabhavena na kimapyanugṛhyate || 4 ||
[Analyze grammar]

paraṃ sarvamanugrāhyaṃ paśupāśātmakaṃ jagat |
parasyānugrahārthaṃ tu patyurājñāsamanvayaḥ || 5 ||
[Analyze grammar]

patirājñāpakaḥ sarvamanugṛhṇāti sarvadā |
tadarthamarthasvīkāre parataṃtraḥ kathaṃ śivaḥ || 6 ||
[Analyze grammar]

anugrāhyanapekṣo 'sti na hi kaścidanugrahaḥ |
ataḥ svātantryaśabdārthānanapekṣatvalakṣaṇaḥ || 7 ||
[Analyze grammar]

etatpunaranugrāhyaṃ parataṃtraṃ tadiṣyate |
anugrahādṛte tasya bhuktimuktyorananvayāt || 8 ||
[Analyze grammar]

mūrtātmano 'pyanugrāhyā śivājñānanivartanāt |
ajñānādhiṣṭhitaṃ śambhorna kiṃcidiha vidyate || 9 ||
[Analyze grammar]

yenopalabhyate 'smābhissakalenāpi niṣkalaḥ |
sa mūrtyātmā śivaḥ śaivamūrtirityupacaryate || 10 ||
[Analyze grammar]

na hyasau niṣkalaḥ sākṣācchivaḥ paramakāraṇam |
sākāreṇānubhāvena kenāpyanupalakṣitaḥ || 11 ||
[Analyze grammar]

pramāṇagamyatāmātraṃ tatsvabhāvopapādakam |
na tāvatātropekṣādhīrupalakṣaṇamaṃtarā || 12 ||
[Analyze grammar]

ātmopamolvaṇaṃ sākṣānmūrtireva hi kācana |
śivasya mūrtirmūrtyātmā parastasyopalakṣaṇam || 13 ||
[Analyze grammar]

yathā kāṣṭheṣvanārūḍho na vahnirupalabhyate |
evaṃ śivo 'pi mūrtyātmanyanārūḍha iti sthitiḥ || 14 ||
[Analyze grammar]

yathāgnimānayetyukte jvalatkāṣṭhādṛte svayam |
nāgnirānīyate tadvatpūjyo mūrtyātmanā śivaḥ || 15 ||
[Analyze grammar]

ata eva hi pūjādau mūrtyātmaparikalpanam |
mūrtyātmani kṛtaṃ sākṣācchiva eva kṛtaṃ yataḥ || 16 ||
[Analyze grammar]

liṃgādāvapi tatkṛtyamarcāyāṃ ca viśeṣataḥ |
tattanmūrtyātmabhāvena śivo 'smābhirupāsyate || 17 ||
[Analyze grammar]

yathānugṛhyate so 'pi mūrtyātmā pārameṣṭhinā |
tathā mūrtyātmaniṣṭhena śivena paśavo vayam || 18 ||
[Analyze grammar]

lokānugrahaṇāyaiva śivena parameṣṭhinā |
sadāśivādayassarve mūrtyātmano 'pyadhiṣṭhitāḥ || 19 ||
[Analyze grammar]

ātmanāmeva bhogāya mokṣāya ca viśeṣataḥ |
tattvātattvasvarūpeṣu mūrtyātmasu śivānvayaḥ || 20 ||
[Analyze grammar]

bhogaḥ karmavipākātmā sukhaduḥkhātmako mataḥ |
na ca karma śivo 'stīti tasya bhogaḥ kimātmakaḥ || 21 ||
[Analyze grammar]

sarvaṃ śivo 'nugṛhṇāti na nigṛhṇāti kiṃcana |
nigṛhṇatāṃ tu ye doṣāśśive teṣāmasaṃbhavāt || 22 ||
[Analyze grammar]

ye punarnigrahāḥ kecidbrahmādiṣu nidarśitāḥ |
te 'pi lokahitāyaiva kṛtāḥ śrīkaṇṭhamūrtinā || 23 ||
[Analyze grammar]

brahmāṇḍasyādhipatyaṃ hi śrīkaṇṭhasya na saṃśayaḥ |
śrīkaṇṭhākhyāṃ śivo mūrtiṃ krīḍatīmadhitiṣṭhati || 24 ||
[Analyze grammar]

sadoṣā eva devādyā nigṛhītā yathoditam |
tatastepi vipāpmānaḥ prajāścāpi gatajvarāḥ || 25 ||
[Analyze grammar]

nigraho 'pi svarūpeṇa viduṣāṃ na jugupsitaḥ |
ata eva hi daṇḍyeṣu daṇḍo rājñāṃ praśasyate || 26 ||
[Analyze grammar]

yatsiddhirīśvaratvena kāryavargasya kṛtsnaśaḥ |
na sa cedīśatāṃ kuryājjagataḥ kathamīśvaraḥ || 27 ||
[Analyze grammar]

īśecchā ca vidhātṛtvaṃ vidherājñāpanaṃ param |
ājñāvaśyamidaṃ kuryānna kuryāditi śāsanam || 28 ||
[Analyze grammar]

tacchāsanānuvartitvaṃ sādhubhāvasya lakṣaṇam |
viparītasamādhoḥ syānna sarvaṃ tattu dṛśyate || 29 ||
[Analyze grammar]

sādhu saṃrakṣaṇīyaṃ cedvinivartyamasādhu yat |
nivartate ca sāmāderaṃte daṇḍo hi sādhanam || 30 ||
[Analyze grammar]

hitārthalakṣaṇaṃ cedaṃ daṇḍāntamanuśāsanam |
ato yadviparītaṃ tadahitaṃ saṃpracakṣate || 31 ||
[Analyze grammar]

hite sadā niṣaṇṇānāmīśvarasya nidarśanam |
sa kathaṃ duṣyate sadbhirasatāmeva nigrahāt || 32 ||
[Analyze grammar]

ayuktakāriṇo loke garhaṇīyāvivekitā |
yadudvejayate lokantadayuktaṃ pracakṣate || 33 ||
[Analyze grammar]

sarvo 'pi nigraho loke na ca vidveṣapūrvakaḥ |
na hi dveṣṭi pitā putraṃ yo nigṛhyāti śikṣayet || 34 ||
[Analyze grammar]

mādhyasthenāpi nigrāhyānyo nigṛhṇāti mārgataḥ |
tasyāpyavaśyaṃ yatkiṃcinnairghṛṇyamanuvartate || 35 ||
[Analyze grammar]

anyathā na hinastyeva sadoṣānapyasau parān |
hinasti cāyamapyajñānparaṃ mādhyasthyamācaran || 36 ||
[Analyze grammar]

tasmādduḥkhātmikāṃ hiṃsāṃ kurvāṇo yaḥ sanirghṛṇaḥ |
iti nirbaṃdhayaṃtyeke niyamo neti cāpare || 37 ||
[Analyze grammar]

nidānajñasya bhiṣajo rugṇo hiṃsāṃ prayuṃjataḥ |
na kiṃcidapi nairghṛṇyaṃ ghṛṇaivātra prayojikā || 38 ||
[Analyze grammar]

ghṛṇāpi na guṇāyaiva hiṃsreṣu pratiyogiṣu |
tādṛśeṣu ghṛṇī bhrāntyā ghṛṇāntaritanirghṛṇaḥ || 39 ||
[Analyze grammar]

upekṣāpīha doṣāha rakṣyeṣu pratiyogiṣu |
śaktau satyāmupekṣāto rakṣyassadyo vipadyate || 40 ||
[Analyze grammar]

sarpasyāsyagatampaśyanyastu rakṣyamupekṣate |
doṣābhāsānsamutprekṣya phalataḥ so 'pi nirghṛṇaḥ || 41 ||
[Analyze grammar]

tasmādghṛṇā guṇāyaiva sarvatheti na saṃmatam |
saṃmataṃ prāptakāmitvaṃ sarvaṃ tvanyadasammatam || 42 ||
[Analyze grammar]

mūrtyātmasvapi rāgādyā doṣāḥ santyeva vastutaḥ |
tathāpi teṣāmevaite na śivasya tu sarvathā || 43 ||
[Analyze grammar]

agnāvapi samāviṣṭaṃ tāmraṃ khalu sakālikam |
iti nāgnirasau duṣyettāmrasaṃsargakāraṇāt || 43 ||
[Analyze grammar]

nāgneraśucisaṃsargādaśucitvamapekṣate |
aśucestvagnisaṃyogācchucitvamapi jāyate || 44 ||
[Analyze grammar]

evaṃ śodhyātmasaṃsargānna hyaśuddhaḥ śivo bhavet |
śivasaṃsargatastveṣa śodhyātmaiva hi śudhyati || 45 ||
[Analyze grammar]

ayasyagnau samāviṣṭe dāho 'gnereva nāyasaḥ |
mūrtātmanyevamaiśvaryamīśvarasyaiva nātmanām || 46 ||
[Analyze grammar]

na hi kāṣṭhaṃ jvalatyūrdhvamagnireva jvalatyasau |
kāṣṭhasyāṃgāratā nāgnerevamatrāpi yojyatām || 47 ||
[Analyze grammar]

ata eva jagatyasminkāṣṭhapāṣāṇamṛtsvapi |
śivāveśavaśādeva śivatvamupacaryate || 48 ||
[Analyze grammar]

maitryādayo guṇā gauṇāstasmātte bhinnavṛttayaḥ |
tairguṇairuparaktānāṃ doṣāya ca guṇāya ca || 49 ||
[Analyze grammar]

yattu gauṇamagauṇaṃ ca tatsarvamanugṛhṇataḥ |
na guṇāya na doṣāya śivasya guṇavṛttayaḥ || 50 ||
[Analyze grammar]

na cānugrahaśabdārthaṃ gauṇamāhurvipaścitaḥ |
saṃsāramocanaṃ kiṃ tu śaivamājñāmayaṃ hitam || 51 ||
[Analyze grammar]

hitaṃ tadājñākaraṇaṃ yaddhitaṃ tadanugrahaḥ |
sarvaṃ hite niyuñjāvaḥ sarvānugrahakārakaḥ || 52 ||
[Analyze grammar]

yastūpakāraśabdārthastamapyāhuranugraham |
tasyāpi hitarūpatvācchivaḥ sarvopakārakaḥ || 53 ||
[Analyze grammar]

hite sadā niyuktaṃ tu sarvaṃ cidacidātmakam |
svabhāvapratibandhaṃ tatsamaṃ na labhate hitam || 54 ||
[Analyze grammar]

yathā vikāsayatyeva raviḥ padmāni bhānubhiḥ |
samaṃ na vikasantyeva svasvabhāvānurodhataḥ || 55 ||
[Analyze grammar]

svabhāvo 'pi hi bhāvānāṃ bhāvino 'rthasya kāraṇam |
na hi svabhāvo naśyantamarthaṃ kartṛṣu sādhayet || 56 ||
[Analyze grammar]

suvarṇameva nāṃgāraṃ drāvayatyagnisaṃgamaḥ |
evaṃ pakvamalāneva mocayenna śivaparān || 57 ||
[Analyze grammar]

yadyathā bhavituṃ yogyaṃ tattathā na bhavetsvayam |
vinā bhāvanayā kartā svatantrassantato bhavet || 58 ||
[Analyze grammar]

svabhāvavimalo yadvatsarvānugrāhakaśśivaḥ |
svabhāvamalināstadvadātmano jīvasaṃjñitāḥ || 59 ||
[Analyze grammar]

anyathā saṃsarantyete niyamānna śivaḥ katham |
karmamāyānubandhosya saṃsāraḥ kathyate budhaiḥ || 60 ||
[Analyze grammar]

anubandho 'yamasyaiva na śivasyeti hetumān |
sa heturātmanāmeva nijo nāgantuko malaḥ || 61 ||
[Analyze grammar]

āgantukatve kasyāpi bhāvyaṃ kenāpi hetunā |
yo 'yaṃ heturasāvekastvavicitrasvabhāvataḥ || 62 ||
[Analyze grammar]

ātmatāyāḥ samatve 'pi baddhā muktāḥ pare yataḥ |
baddheṣveva punaḥ kecillayabhogādhikārataḥ || 63 ||
[Analyze grammar]

jñānaiśvaryādivaiṣamyaṃ bhajante sottarādharāḥ |
kecinmūrtyātmatāṃ yānti kecidāsannagocarāḥ || 64 ||
[Analyze grammar]

mūrtyātmasu śivāḥ kecidadhvanāṃ mūrdhasu sthitāḥ |
madhye maheśvarā rudrāstvarvācīnapade sthitāḥ || 65 ||
[Analyze grammar]

āsanne 'pi ca māyāyāḥ parasmātkāraṇāttrayam |
tatrāpyātmā sthito 'dhastādantarātmā ca madhyataḥ || 66 ||
[Analyze grammar]

parastātparamātmeti brahmaviṣṇumaheśvarāḥ |
vartante vasavaḥ kecitparamātmapadāśrayāḥ || 67 ||
[Analyze grammar]

antarātmapade kecitkecidātmapade tathā |
śāntyatītapade śaivāḥ śānte māheśvare tataḥ || 68 ||
[Analyze grammar]

vidyāyāntu yathā raudrāḥ pratiṣṭhāyāṃ tu vaiṣṇavāḥ |
nivṛttau ca tathātmāno brahmā brahmāṃgayonayaḥ || 69 ||
[Analyze grammar]

devayonyaṣṭakaṃ mukhyaṃ mānuṣyamatha madhyamam |
pakṣyādayo 'dhamāḥ pañcayonayastāścaturdaśa || 70 ||
[Analyze grammar]

uttarādharabhāvo 'pi jñeyassaṃsāriṇo malaḥ |
yathāmabhāvo muktasya pūrvaṃ paścāttu pakvatā || 71 ||
[Analyze grammar]

malo 'pyāmaśca pakvaśca bhavetsaṃsārakāraṇam |
āme tvadharatā puṃsāṃ pakve tūttaratā kramāt || 72 ||
[Analyze grammar]

paśvātmānastridhābhinnā ekadvitrimalāḥ kramāt |
atrottarā ekamalā dvimalā madhyamā matāḥ || 73 ||
[Analyze grammar]

trimalāstvadhamā jñeyā yathottaramadhiṣṭhitāḥ |
trimalānadhitiṣṭhaṃti dvimalaikamalāḥ kramāt || 73 ||
[Analyze grammar]

itthamaupādhiko bhedo viśvasya parikalpitaḥ |
ekadvitrimalānsarvāñchiva eko 'dhitiṣṭhati || 74 ||
[Analyze grammar]

aśivātmakamapyetacchivenādhiṣṭhitaṃ yathā |
arudrātmakamityevaṃ rudrairjagadadhiṣṭhitam || 75 ||
[Analyze grammar]

aṇḍāntā hi mahābhūmiśśatarudrādyadhiṣṭhitā |
māyāntamantarikṣaṃ tu hyamareśādibhiḥ kramāt || 76 ||
[Analyze grammar]

aṃguṣṭhamātraparyantaissamaṃtātsaṃtataṃ tatam |
mahāmāyāvasānā dyaurvāyvādyairbhuvanādhipaiḥ || 77 ||
[Analyze grammar]

anāśritāntairadhvāntarvartibhissamadhiṣṭhitāḥ |
te hi sākṣāddiviṣadastvantarikṣasadastathā || 78 ||
[Analyze grammar]

pṛthivīpada ityevaṃ devā devavrataiḥ stutā |
evantribhirmalairāmaiḥ pakvaireva pṛthakpṛthak || 79 ||
[Analyze grammar]

nidānabhūtaissaṃsārarogaḥ puṃsāṃ pravartate |
asya rogasya bhaiṣajyaṃ jñānameva na cāparam || 80 ||
[Analyze grammar]

bhiṣagājñāpakaḥ śambhuśśivaḥ paramakāraṇam |
aduḥkhenā 'pi śakto 'sau paśūnmocayituṃ śivaḥ || 81 ||
[Analyze grammar]

kathaṃ duḥkhaṃ karotīti nātra kāryā vicāraṇā |
duḥkhameva hi sarvo 'pi saṃsāra iti niścitam || 82 ||
[Analyze grammar]

kathaṃ duḥkhamaduḥkhaṃ syātsvabhāvo hyaviparyayaḥ |
na hi rogī hyarogī syādbhiṣagbhaiṣajyakāraṇāt || 83 ||
[Analyze grammar]

rogārtaṃ tu bhiṣagrogādbhaiṣajaissukhamuddharet |
evaṃ svabhāvamalinānsvabhāvādduḥkhinaḥ paśūn || 84 ||
[Analyze grammar]

svājñauṣadhavidhānena duḥkhānmocayate śivaḥ |
na bhiṣakkāraṇaṃ roge śivaḥ saṃsārakāraṇam || 85 ||
[Analyze grammar]

ityetadapi vaiṣamyaṃ na doṣāyāsya kalpate |
duḥkhe svabhāvasaṃsiddhe kathantatkāraṇaṃ śivaḥ || 86 ||
[Analyze grammar]

svābhāviko malaḥ puṃsāṃ sa hi saṃsārayatyamūn |
saṃsārakāraṇaṃ yattu malaṃ māyādyacetanam || 87 ||
[Analyze grammar]

tatsvayaṃ na pravarteta śivasānnidhyamantarā |
yathā maṇirayaskāṃtassānnidhyādupakārakaḥ || 88 ||
[Analyze grammar]

ayasaścalatastadvacchivo 'pyasyeti sūrayaḥ |
na nivartayituṃ śakyaṃ sānnidhyaṃ sadakāraṇam || 89 ||
[Analyze grammar]

adhiṣṭhātā tato nityamajñāto jagataśśivaḥ |
na śivena vinā kiṃcitpravṛttamiha vidyate || 90 ||
[Analyze grammar]

tatpreritamidaṃ sarvaṃ tathāpi na sa muhyati |
śaktirājñātmikā tasya niyantrī viśvatomukhī || 91 ||
[Analyze grammar]

tayā tatamidaṃ śaśvattathāpi sa na duṣyati |
anidaṃ prathamaṃ sarvamīśitavyaṃ sa īśvaraḥ || 92 ||
[Analyze grammar]

īśanācca tadīyājñā tathāpi sa na duṣyati |
yo 'nyathā manyate mohātsa vinaṣyati durmatiḥ || 93 ||
[Analyze grammar]

tacchaktivaibhavādeva tathāpi sa na duṣyati |
etasminnaṃtare vyomnaḥ śrutāḥ vāgarīriṇī || 94 ||
[Analyze grammar]

satyamomamṛtaṃ saumyamityāvirabhavatsphuṭam |
tato hṛṣṭatarāḥ sarve vinaṣṭāśeṣasaṃśayāḥ || 95 ||
[Analyze grammar]

munayo vismayāviṣṭāḥ preṇemuḥ pavanaṃ prabhum |
tathā vigatasandehānkṛtvāpi pavano munīn || 96 ||
[Analyze grammar]

naite pratiṣṭhitajñānā iti matvaivamabravīt |
vāyuruvācva |
parokṣamaparokṣaṃ ca dvividhaṃ jñānamiṣyate || 97 ||
[Analyze grammar]

parokṣamasthiraṃ prāhuraparokṣaṃ tu susthiram |
hetūpadeśagamyaṃ yattatparokṣaṃ pracakṣate || 98 ||
[Analyze grammar]

aparokṣaṃ punaḥ śreṣṭhādanuṣṭhānādbhaviṣyati |
nāparokṣādṛte mokṣa iti kṛtvā viniścayam || 99 ||
[Analyze grammar]

śreṣṭhānuṣṭhānasiddhyarthaṃ prayatadhvamatandritāḥ || 100 ||
[Analyze grammar]