Chapter 20

[English text for this chapter is available]

vāyuruvāca |
tato viṣṇupradhānānāṃ surāṇāmamitaujasām |
dadarśa ca mahatsatraṃ citradhvajaparicchadam || 1 ||
[Analyze grammar]

sudarbhaṛtusaṃstīrṇaṃ susamiddhahutāśanam |
kāṃcanairyajñabhāṃḍaiśca bhrājiṣṇubhiralaṃkṛtam || 2 ||
[Analyze grammar]

ṛṣibhiryajñapaṭubhiryathāvatkarmakartṛbhiḥ |
vidhinā vedadṛṣṭena svanuṣṭhitabahukramam || 3 ||
[Analyze grammar]

devāṃganāsahasrāḍhyamapsarogaṇasevitam |
veṇuvīṇāravairjuṣṭaṃ vedaghoṣaiśca bṛṃhitam || 4 ||
[Analyze grammar]

dṛṣṭvā dakṣādhvare vīro vīrabhadraḥ pratāpavān |
siṃhanādaṃ tadā cakre gaṃbhīro jalado yathā || 5 ||
[Analyze grammar]

tataḥ kilakilāśabda ākāśaṃ pūrayanniva |
gaṇeśvaraiḥ kṛto jajñe mahānnyakkṛtasāgaraḥ || 6 ||
[Analyze grammar]

tena śabdena mahatāḥ grastā sarvedivaukasaḥ |
dudruvuḥ parito bhītāḥ srastavastravibhūṣaṇāḥ || 7 ||
[Analyze grammar]

kiṃsvidbhagno mahāmeruḥ kiṃsvitsaṃdīryate mahī |
kimidaṃ kimidaṃ veti jajalpustridaśā bhṛśam || 8 ||
[Analyze grammar]

mṛgendrāṇāṃ yathā nādaṃ gajeṃdrā gahane vane |
śrutvā tathāvidhaṃ kecittatyajurjīvitaṃ bhayāt || 9 ||
[Analyze grammar]

parvatāśca vyaśīryaṃta cakampe ca vasuṃdharā |
marutaśca vyaghūrṇaṃta cukṣubhe makarālayaḥ || 10 ||
[Analyze grammar]

agnayo naiva dīpyaṃte na ca dīpyati bhāskaraḥ |
grahāśca na prakāśaṃte nakṣatrāṇi ca tārakāḥ || 11 ||
[Analyze grammar]

etasminneva kāle tu yajñavāṭaṃ tadujjvalam |
saṃprāpa bhagavānbhadro bhadraiśca saha bhadrayā || 12 ||
[Analyze grammar]

taṃ dṛṣṭvā bhītabhīto 'pi dakṣo dṛḍha iva sthitaḥ |
kruddhavadvacanaṃ prāha ko bhavān kimihecchasi || 13 ||
[Analyze grammar]

tasya tadvacanaṃ śrutvā dakṣasya ca durātmanaḥ |
vīrabhadro mahātejā meghasaṃbhīranissvanaḥ || 14 ||
[Analyze grammar]

smayanniva tamālokya dakṣaṃ devāśca ṛtvijaḥ |
arthagarbhamasaṃbhrāntamavocaducitaṃ vacaḥ || 15 ||
[Analyze grammar]

vīrabhadra uvāca |
vayaṃ hyanucarāḥ sarve śarvasyāmitatejasaḥ |
bhāgābhilipsayā prāptā bhāgo nassaṃpradīyatām || 16 ||
[Analyze grammar]

atha cedadhvare 'smākaṃ na bhāgaḥ parikalpitaḥ |
kathyatāṃ kāraṇaṃ tatra yudhyatāṃ vā mayāmaraiḥ || 17 ||
[Analyze grammar]

ityuktāste gaṇeṃdreṇa devā dakṣapurogamāḥ |
ūcurmantrāḥ pramāṇaṃ no na vayaṃ prabhavastviti || 18 ||
[Analyze grammar]

mantrā ūcussurā yūyaṃ mohopahatacetasaḥ |
yena prathamabhāgārhaṃ na yajadhvaṃ maheśvaram || 19 ||
[Analyze grammar]

maṃtroktā api te devāḥ sarve saṃmūḍhacetasaḥ |
bhadrāya na dadurbhāgaṃ tatprahāṇamabhīpsavaḥ || 20 ||
[Analyze grammar]

yadā tathyaṃ ca pathyaṃ ca svavākyaṃ tadvṛthā 'bhavat |
tadā tato yayurmaṃdā brahmalokaṃ sanātanam || 21 ||
[Analyze grammar]

athovāca gaṇādhyakṣo devānviṣṇupurogamān |
mantrāḥ pramāṇaṃ na kṛtā yuṣmābhirbalagarvitaiḥ || 22 ||
[Analyze grammar]

yasmādasminmakhe devairitthaṃ vayamasatkṛtāḥ |
tasmādvo jīvitaissārdhamapaneṣyāmi garvitam || 23 ||
[Analyze grammar]

ityuktvā bhagavān kruddho vyadahannetravahninā |
yakṣavāṭaṃ mahākūṭaṃ yathātisraḥ puro haraḥ || 24 ||
[Analyze grammar]

tato gaṇeśvarāssarve parvatodagravigrahāḥ |
yūpānutpāṭya hotḥṇāṃ kaṃṭheṣvābadhya rajjubhiḥ || 25 ||
[Analyze grammar]

yajñapātrāṇi citrāṇi bhittvā saṃcūrṇya vāriṇi |
gṛhītvā caiva yajñāṃgaṃ gaṃgāsrotasi cikṣipuḥ || 26 ||
[Analyze grammar]

tatra divyānnapānānāṃ rāśayaḥ parvatopamāḥ |
kṣīranadyo 'mṛtasrāvāḥ susnigdhadadhikardamāḥ || 27 ||
[Analyze grammar]

uccāvacāni māṃsāni bhakṣyāṇi surabhīṇi ca |
rasavanti ca pānāni lehyacoṣyāṇi tāni vai || 28 ||
[Analyze grammar]

vīrāstadbhujate vaktrairviluṃpaṃti kṣipaṃti ca |
vajraiścakrairmahāśūlaiśśaktibhiḥ pāśapaṭṭiśaiḥ || 29 ||
[Analyze grammar]

musalairasibhiṣṭaṃkairbhidhipālaiḥ paraśvadhaiḥ |
uddhatāṃstridaśānsarvāṃllokapālapurassarān || 30 ||
[Analyze grammar]

bibhidurbalino vīrā vīrabhadrāṃgasaṃbhavāḥ |
chiṃdhi bhiṃdhi kṣipa kṣipraṃ māryatāṃ dāryatāmiti || 31 ||
[Analyze grammar]

harasva praharasveti pāṭayotpāṭayeti ca |
saṃraṃbhaprabhavāḥ krūrāśśabdāḥ śravaṇaśaṃkavaḥ || 32 ||
[Analyze grammar]

yatratatra gaṇeśānāṃ jajñire samarocitāḥ |
vivṛttanayanāḥ keciddaṣṭadaṃṣṭroṣṭhatālavaḥ || 33 ||
[Analyze grammar]

āśramasthānsamākṛṣya mārayanti tapodhanāt |
sruvānapaharantaśca kṣipantogniṃ jaleṣu ca || 34 ||
[Analyze grammar]

kalaśānapi bhindaṃtaśchiṃdaṃto maṇivedikāḥ |
gāyaṃtaśca nadantaśca hasantaśca muhurmuhuḥ || 35 ||
[Analyze grammar]

raktāsavaṃ pibantaśca nanṛturgaṇapuṃgavāḥ |
nirmathya seṃdrānamarān gaṇendrānvṛṣendranāgendramṛgendrasārāḥ || 36 ||
[Analyze grammar]

cakrurbahūnyapratimabhāvāḥ saharṣaromāṇi viceṣṭitāni |
nandaṃti kecitpraharanti keciddhāvanti kecitpralapanti kecit || 37 ||
[Analyze grammar]

nṛtyanti kecidvihasanti kecidvalganti kecitpramathā balena |
kecijjighṛkṣaṃti ghanānsa toyānkecidgrahītuṃ ravimutpataṃti || 38 ||
[Analyze grammar]

kecitprasartuṃ pavanena sārdhamicchaṃti bhīmāḥ pramathā viyatsthāḥ |
ākṣipya kecicca varāyudhāni mahā bhujaṃgāniva vainateyāḥ || 39 ||
[Analyze grammar]

bhramaṃti devānapi vidravaṃtaḥ khamaṃḍale parvatakūṭakalpāḥ |
utpāṭya cotpāṭyagṛhāṇi kecitsajālavātāyanavedikāni || 40 ||
[Analyze grammar]

vikṣipya vikṣipya jalasya madhye kālāṃbudābhāḥ pramathā nineduḥ |
udvartitadvārakapāṭakuḍyaṃ vidhvastaśālāvalabhīgavākṣam || 41 ||
[Analyze grammar]

aho batābhajyata yajñavāṭamanāthavadvākyamivāyathārtham |
hā nātha tāteti pituḥ suteti bhratarmamāmbeti ca mātuleti || 42 ||
[Analyze grammar]

utpāṭyamāneṣu gṛheṣu nāryo hyānāthaśabdānbahuśaḥ pracakruḥ || 43 ||
[Analyze grammar]