Chapter 11

[English text for this chapter is available]

naṃdīśvara uvāca |
evamabhyarthito devairmatiṃ cakre kṛpā layaḥ |
mahātejo nṛsiṃhākhyaṃ saṃharttuṃ parameśvaraḥ || 1 ||
[Analyze grammar]

tadūrddhvaṃ smṛtavānrudro vīrabhadrammahābalam |
ātmano bhairavaṃ rūpaṃ prāha pralayakārakam || 2 ||
[Analyze grammar]

ājagāma tatassadyo gaṇānāmagraṇīrhasan |
sāṭṭahāsairgaṇavarairutpatadbhiritastataḥ || 3 ||
[Analyze grammar]

nṛsiṃharūpairatyugraiḥ koṭibhiḥ parivāritaḥ |
mādyadbhirabhito vīrairnṛtyadbhiśca mudānvitaiḥ || 4 ||
[Analyze grammar]

krīḍadbhiśca mahāvīrairbrahmādyaiḥ kandukairiva |
adṛṣṭapūrvairanyaiśca veṣṭito vīravanditaḥ || 5 ||
[Analyze grammar]

kalpāntajvalanajvālo vilasallocanatrayaḥ |
aśastro hi jaṭājūṭī jvaladbālendumaṇḍitaḥ || 6 ||
[Analyze grammar]

bālenduvalayā kāratīkṣṇadaṃṣṭrāṃkuradvayaḥ |
ākhaṇḍaladhanuḥkhaṇḍasaṃnibhabhrūlatānvitaḥ || 7 ||
[Analyze grammar]

mahāpracaṇḍahuṅkārabadhirīkṛtadiṅmukhaḥ |
nīlameghāñjana śyāmo bhīṣaṇaḥ śmaśrulodbhutaḥ || 8 ||
[Analyze grammar]

vādyakhaṇḍamakhaṇḍābhyāṃ bhrāmayaṃstriśikhaṃ muhuḥ |
vīrabhadro'pi bhagavānvaraśaktivijṛmbhitaḥ || 9 ||
[Analyze grammar]

svayaṃ vijñāpayāmāsa kimatra smṛtikāraṇam |
ājñāpaya jagatsvāmin prasādaḥ kriyatāmmayi || 10 ||
[Analyze grammar]

nandīśvara uvāca |
ityākarṇya maheśāno vīrabhadroktamādarāt |
vilokya vacanamprītyā provāca khala daṇḍadhṛk || 11 ||
[Analyze grammar]

|| śaṃkara uvāca |
akāle bhayamutpannaṃ devānāmapi bhairavam |
jvalitasya nṛsiṃhāgniśśamayainaṃ durāsadam || 12 ||
[Analyze grammar]

sāntvayanbodhayādau taṃ tena kinnopaśāmyati |
tato matparamaṃ bhāvaṃ bhairavaṃ sampradarśaya || 13 ||
[Analyze grammar]

sūkṣmaṃ saṃhṛtya sūkṣmeṇa sthūlaṃ sthūlena tejasā |
vaktramānāya kṛttiṃ ca vīrabhadra mamājñayā || 14 ||
[Analyze grammar]

nandīśvara uvāca |
ityādiṣṭo gaṇādhyakṣo praśāntaṃ vapurāsthitaḥ |
jagāma raṃhasā tatra yatrāste narakesarī || 15 ||
[Analyze grammar]

tatastambodhayāmāsa vīrabhadro haro harim |
uvāca vākyamīśānaḥ pitāputramivaurasam || 16 ||
[Analyze grammar]

vīrabhadra uvāca |
jagatsukhāya bhagavannavatīrṇosi mādhava |
sthityarthaṃ tvaṃ prayukto'si pareśaḥ parameṣṭhinā || 17 ||
[Analyze grammar]

jantucakraṃ bhagavatā pracchinnaṃ matsyarūpiṇā |
pucchenaiva samābadhya bhramannekārṇave purā || 18 ||
[Analyze grammar]

bibharṣi karmarūpeṇa vārāheṇoddhṛtā mahī |
anena harirūpeṇa hiraṇyakaśipurhataḥ || 19 ||
[Analyze grammar]

vāmanena balirbaddhastvayā vikramatā punaḥ |
tvameva sarvvabhūtānāṃ prabhavaḥ prabhuravyayaḥ || 20 ||
[Analyze grammar]

yadāyadā hi lokasya duḥkhaṃ kiñcitprajāyate |
tadātadāvatīrṇastvaṃ kariṣyasi nirāmayam || 21 ||
[Analyze grammar]

nādhikastvatsamo'pyasti hare śivaparāyaṇaḥ |
tvayā vedāśca dharmāśca śubhamārge pratiṣṭhitāḥ || 22 ||
[Analyze grammar]

yadarthamavatāro'yaṃ nihatassa hi dānavaḥ |
hiraṇyakaśipuścaiva prahlādo'pi surakṣitaḥ || 23 ||
[Analyze grammar]

atīva ghoraṃ bhagavannarasiṃhavapustava |
upasaṃhara viśvātmaṃstvameva mama sannidhau || 24 ||
[Analyze grammar]

nandīśvara uvāca |
ityukto vīrabhadreṇa nṛsiṃhaḥ śāntayā girā |
tato'dhikaṃ mahāghoraṃ kopañcakre mahāmadaḥ || 25 ||
[Analyze grammar]

uvāca ca mahāghoraṃ kaṭhinaṃ vacanantadā |
vīrabhadrammahāvīraṃ daṃṣṭrābhirbhīṣayanmune || 26 ||
[Analyze grammar]

nṛsiṃha uvāca |
āgatosi yatastatra gaccha tvammā hitaṃ vada |
idānīṃ saṃhariṣyāmi jagadetaccarācaram || 27 ||
[Analyze grammar]

saṃharturna hi saṃhāraḥ svato vā parato'pi vā |
śāsitammama sarvvatra śāstā ko'pi na vidyate || 28 ||
[Analyze grammar]

matprasādena sakalamabhayaṃ hi pravarttate |
ahaṃ hi sarvaśaktīnāṃ pravartakanivartakaḥ || 29 ||
[Analyze grammar]

yadyadvibhūtimatsattvaṃ śrīmadūrjitameva vā |
tattadviddhi gaṇādhyakṣa mama tejovijṛmbhitam || 30 ||
[Analyze grammar]

devatāparamārthajñaṃ māmeva paramamviduḥ |
madaṃśāśśaktisampannā brahmaśakrādayassurāḥ || 31 ||
[Analyze grammar]

mannābhikamalājjātaḥ purā brahmā jagatkaraḥ |
sarvādhikassvatantraśca kartā hartākhileśvaraḥ || 32 ||
[Analyze grammar]

idantu matparaṃ tejaḥ kiṃ punaḥ śrotumicchasi |
ato māṃ śaraṇamprāpya gaccha tvaṃ vigatajvaraḥ || 33 ||
[Analyze grammar]

avehi paramaṃ bhāvamidambhūtaṃ gaṇeśvara |
māmakaṃ sakalaṃ viśvaṃ sadevāsuramānuṣam || 34 ||
[Analyze grammar]

kālo'smyahaṃ lokavināśaheturlokānsamāhartumahampravṛttaḥ |
mṛtyormṛtyuṃ viddhi māṃ vīrabhadra jīvantyete matprasādena devāḥ || 35 ||
[Analyze grammar]

nandīśvara uvāca |
sāhaṅkāraṃ vacaḥ śrutvā hareramitavikramaḥ |
vihasyovāca sāvajñantato visphuritādharaḥ || 36 ||
[Analyze grammar]

vīrabhadra uvāca |
kinna jānāsi viśveśaṃ saṃhartārampinākinam |
asadvādo vivādaśca vināśastvayi kevalaḥ || 37 ||
[Analyze grammar]

tavānyonyāvatārāṇi kāni śeṣāṇi sāmpratam |
kṛtāni yena kenaiva kathāśeṣo bhaviṣyati || 38 ||
[Analyze grammar]

doṣaṃ taṃ vada yena tvamavasthāmīdṛśī gataḥ |
tena saṃhāradakṣeṇa dakṣiṇāśeṣameṣyasi || 39 ||
[Analyze grammar]

prakṛtistvaṃ pumānrudrastvayi vīryyaṃ samāhitam |
tvannābhipaṅkajājjātaḥ pañca vaktraḥ pitāmahaḥ || 40 ||
[Analyze grammar]

jagattrayīsarjanārthaṃ śaṃkaraṃ nīlalohitam |
lalāṭe'cintayatsoyantapasyugre ca saṃsthitaḥ || 41 ||
[Analyze grammar]

tallalāṭādabhūcchambhuḥ sṛṣṭyarthe tena bhūṣaṇam |
ato'haṃ devadevasya tasya bhairavarūpiṇaḥ || 42 ||
[Analyze grammar]

tvatsaṃhāre niyukto'smi vinayena balena ca |
devadevena rudreṇa sakalaprabhuṇā hare || 43 ||
[Analyze grammar]

ekaṃ rakṣo vidāryaiva tacchaktikalayā yutaḥ |
ahaṃkārāvalepena garjasi tvamatandritaḥ || 44 ||
[Analyze grammar]

upakāro hi sādhūnāṃ sukhāya kila saṃmataḥ |
upakāro hyasādhūnāmapakārāya kevalam || 45 ||
[Analyze grammar]

yannṛsiṃha maheśānaṃ punarbhūtaṃ tu manyase |
tarhyajñānī mahāgarvī vikārī sarvathā bhavān || 46 ||
[Analyze grammar]

na tvaṃ sraṣṭā na saṃhartā bhartāpi na nṛsiṃhaka |
paratantro vimūḍhātmā na svatantro hi kutracit || 47 ||
[Analyze grammar]

kulālacakravacchaktyā preritosi pinākinā |
nānāvatārakartā tvaṃ tadadhīnassadā hare || 48 ||
[Analyze grammar]

adyāpi tava nikṣiptaṃ kapālaṃ kūrmarūpiṇaḥ |
hara hāralatāmadhye dagdhaḥ kaścinna badhyate || 49 ||
[Analyze grammar]

vismṛtiḥ kiṃ tadaṃśena daṃṣṭrotpātanapīḍitam |
vārāhavighnahaste'dya yākrośantārakāriṇā || 50 ||
[Analyze grammar]

dagdhosi paśya śūlāgre viṣvaksenacchalādbhavān |
dakṣayajñe śiraśchinnaṃ mayā tejaḥsvarūpiṇā || 51 ||
[Analyze grammar]

adyāpi tava putrasya brahmaṇaḥ pañcamaṃ śiraḥ |
chinnaṃ na sajjitaṃ bhūyo hare tadvismṛtantvayā || 52 ||
[Analyze grammar]

nirjitastvaṃ dadhīcena saṃgrāme samarudgaṇaḥ |
kaṇḍūyamāne śirasi kathaṃ tadvismṛtantvayā || 53 ||
[Analyze grammar]

cakraṃ vikramato yasya cakrapāṇe tava priyam |
kutaḥ prāptaṃ kṛtaṃ kena tvayā tadapi vismṛtam || 54 ||
[Analyze grammar]

ye mayā sakalā lokā gṛhītāstvaṃ payonidhau |
nidrāparavaśaśśeṣe sa kathaṃ sāttviko bhavān || 55 ||
[Analyze grammar]

tvadādistambaparyantaṃ rudraśaktivijṛmbhitam |
śaktimānabhitastvaṃ ca hyanalāttvaṃ vimohitaḥ || 56 ||
[Analyze grammar]

tattejaso hi māhātmyaṃ pumāndra ṣṭunna hi kṣamaḥ |
asthūlā ye prapaśyanti tadviṣṇoḥ paramampadam || 57 ||
[Analyze grammar]

dyāvāpṛthivyā indrāgneryamasya varuṇasya ca |
dhvāntodare śaśāṃke ca janitvā parameśvaraḥ || 58 ||
[Analyze grammar]

kālosi tvaṃ mahākālaḥ kālakālo maheśvara |
atastvamugrakalayā mṛtyormṛtyurbhaviṣyasi || 59 ||
[Analyze grammar]

sthirodya tvakṣaro vīro vīro viśvāvakaḥ prabhuḥ |
upahantā jvaraṃ bhīmo mṛgaḥ pakṣī hiraṇmayaḥ || 60 ||
[Analyze grammar]

śāstā śeṣasya jagatastattvaṃ naiva caturmukhaḥ |
nānye ca kevalaṃ śambhussarvaśāstā na saṃśayaḥ || 61 ||
[Analyze grammar]

itthaṃ sarvaṃ samālokya saṃhārātmānamātmanā |
na vinaṣṭantvamātmānaṃ kuru he nṛhare'budha || 62 ||
[Analyze grammar]

no cedidānīṃ krodhasya mahābhairavarūpiṇaḥ |
vajrāśaniriva sthāṇau tvayi mṛtyuḥ patiṣyati || 63 ||
[Analyze grammar]

nandīśvara uvāca |
ityuktvā vīrabhadropi virarāmākutobhayaḥ |
dṛṣṭvā nṛsiṃhābhiprāyaṃ krodhamūrttiśśivasya saḥ || 64 ||
[Analyze grammar]

iti śrīśivamahāpurāṇe tṛtīyāyāṃ śatarudrasaṃhitāyāṃ śarabhāvatāravarṇanaṃ nāmaikādaśo'dhyāyaḥ || 11 ||
[Analyze grammar]