Chapter 1

[English text for this chapter is available]

vande mahānandamanantalīlammaheśvaraṃ sarvvavibhummahāntam |
gaurīpriyaṃ kārtikavighnarājasamudbhavaṃ śaṃkaramādidevam || 1 ||
[Analyze grammar]

śaunaka uvāca |
vyāsaśiṣyamahābhāga sūta jñānadayānidhe |
vada śaṃbhvavatārāṃśca yairakārṣītsatāṃ śivam || 1 ||
[Analyze grammar]

sūta uvāca |
mune śaunaka sadbhaktyā dattacitto jitendriyaḥ |
avatārāñchivasyāhaṃ vacmi te munaye śṛṇu || 2 ||
[Analyze grammar]

etatpṛṣṭaḥ purā nandī śivamūrtissatāṃ gatiḥ |
sanatkumāreṇa mune tamuvāca śivaṃ smaran || 3 ||
[Analyze grammar]

nandīśvara uvāca |
asaṃkhyātā hi kalpeṣu vibhoḥ sarvveśvarasya vai |
avatārāstathāpīha vacmyahaṃ tānyathāmati || 4 ||
[Analyze grammar]

ekonaviṃśakaḥ kalpo vijñeyaḥ śveta lohitaḥ |
sadyojātāvatārastu prathamaḥ parikīrtitaḥ || 5 ||
[Analyze grammar]

tasmiṃstatparamaṃ brahma dhyāyato brahmaṇastathā |
utpannastu śikhāyuktaḥ kumāraḥ śvetalohitaḥ || 6 ||
[Analyze grammar]

taṃ dṛṣṭvā puruṣaṃ brahmā brahmarūpiṇamīśvaram |
jñātvā dhyātvā sa hṛdaye vavande prayatāñjaliḥ || 7 ||
[Analyze grammar]

sadyojātaṃ śivaṃ buddhvā jaharṣa bhuvaneśvaraḥ |
muhurmuhuśca sadbuddhyā paraṃ taṃ samacintayat || 8 ||
[Analyze grammar]

tato'sya dhyāyataḥ śvetāḥ prādurbhūtā yaśasvinaḥ |
kumārāḥ paravijñānaparabrahmasvarūpiṇaḥ || 9 ||
[Analyze grammar]

sunando nandanaścaiva viśvanandopanandanau |
śiṣyāstasya mahātmāno yaistadbrahma samāvṛtam || 10 ||
[Analyze grammar]

sadyojātaśca vai śambhurdadau jñānaṃ ca vedhase |
sargaśaktimapi prītyā prasannaḥ parameśvaraḥ || 11 ||
[Analyze grammar]

tato viṃśatimaḥ kalpo rakto nāma prakīrtitaḥ |
brahmā yatra mahātejā raktavarṇamadhārayat || 12 ||
[Analyze grammar]

dhyāyataḥ putrakāmasya prādurbhū to vidhessutaḥ |
raktamālyāmbaradharo raktākṣo raktabhūṣaṇaḥ || 13 ||
[Analyze grammar]

sa taṃ dṛṣṭvā mahātmānaṃ kumāraṃ dhyānamāśritaḥ |
vāmadevaṃ śivaṃ jñātvā praṇanāma kṛtāṃjaliḥ || 14 ||
[Analyze grammar]

tatastasya sutā hyāsaṃścatvāro raktavāsasaḥ |
virajāśca vivāhaśca viśoko viśvabhāvanaḥ || 15 ||
[Analyze grammar]

vāmadevaḥ sa vai śambhurdadau jñānaṃ ca vedhase |
sargaśaktimapi prītyā prasannaḥ parameśvaraḥ || 16 ||
[Analyze grammar]

ekaviṃśatimaḥ kalpaḥ pītavāsā iti smṛtaḥ |
brahmā yatra mahābhāgaḥ pītavāsā babhūva ha || 17 ||
[Analyze grammar]

dhyāyataḥ putrakāmasya vidherjātaḥ kumārakaḥ |
pītavastrādika prauḍho mahātejā mahābhujaḥ || 18 ||
[Analyze grammar]

taṃ dṛṣṭvā dhyānasaṃyuktaṃ jñātvā tatpuruṣaṃ śivam |
praṇanāma tato buddhyā gāyatrīṃ śāṃkarīṃ vidhiḥ || 19 ||
[Analyze grammar]

japitvā tu mahādevīṃ sarvalokanamaskṛtām |
prasannastu mahādevo dhyānayuktena cetasā || 20 ||
[Analyze grammar]

tato'sya pārśvato divyāḥ prādurbhūtāḥ kumārakāḥ |
pītavastrā hi sakalā yogamārgapravartakāḥ || 21 ||
[Analyze grammar]

tatastasmingate kalpe pītavarṇe svayaṃbhuvaḥ |
punaranyaḥ pravṛttastu kalpo nāmnā śivastu sa || 22 ||
[Analyze grammar]

ekārṇave saṃvyatīte divyavarṣasahasrake |
sraṣṭukāmaḥ prajā brahmā cintayāmāsa duḥkhitaḥ || 23 ||
[Analyze grammar]

tato'paśyanmahātejā prādurbhūtaṃ kumārakam |
kṛṣṇavarṇaṃ mahāvīryaṃ dīpyamānaṃ svatejasā || 24 ||
[Analyze grammar]

dhṛtakṛṣṇāmbaroṣṇīṣaṃ kṛṣṇayajñopavītinam |
kṛṣṇena maulināyuktaṃ kṛṣṇasnānānulepanam || 25 ||
[Analyze grammar]

sa taṃ dṛṣṭvā mahātmānamaghoraṃ ghoravikramam |
vavande devadeveśamadbhutaṃ kṛṣṇapiṃgalam || 26 ||
[Analyze grammar]

aghoraṃ tu tato brahmā brahmarūpaṃ vyaciṃtayat |
tuṣṭāva vāgbhiriṣṭābhirbhaktavatsalamavyayam || 27 ||
[Analyze grammar]

athāsya pārśvataḥ kṛṣṇāḥ kṛṣṇasnānānulepanāḥ |
catvārastu mahātmānaḥ saṃbabhūvuḥ kumārakāḥ || 28 ||
[Analyze grammar]

kṛṣṇa kṛṣṇaśikhaścaiva kṛṣṇā syaḥ kṛṣṇakaṇṭhadhṛk |
iti te'vyaktanāmānaḥ śivarūpāḥ sutejasaḥ || 29 ||
[Analyze grammar]

evaṃbhūtā mahātmāno brahmaṇaḥ sṛṣṭihetave |
yogaṃ pravarttayā māsurghorākhyaṃ mahadadbhutam || 30 ||
[Analyze grammar]

athānyo brahmaṇaḥ kalpaḥ prāvarttata munīśvarāḥ |
viśvarūpa iti khyāto nāmataḥ paramādbhutaḥ || 31 ||
[Analyze grammar]

brahmaṇaḥ putrakāmasya dhyāyato manasā śivam |
prādurbhūtā mahānādā viśvarūpā sarasvatī || 32 ||
[Analyze grammar]

tathāvidhaḥ sa bhagavānīśānaḥ parameśvaraḥ |
śuddhasphaṭikasaṃkāśaḥ sarvābharaṇabhūṣitaḥ || 33 ||
[Analyze grammar]

taṃ dṛṣṭvā praṇanāmāsau brahmeśānamajaṃ vibhum |
sarvagaṃ sarvadaṃ sarvaṃ surūpaṃ rūpavarjitam || 34 ||
[Analyze grammar]

īśāno'pi tathādiśya sanmārgaṃ brahmaṇe vibhuḥ |
saśaktiḥ kalpayāṃcakre sa bālāṃścaturaḥ śubhān || 35 ||
[Analyze grammar]

jaṭīmuṇḍī śikhaṇḍī ca arddhamuṇḍaśca jajñire |
yogenādiśya saddharmaṃ kṛtvā yogagatiṃ gatāḥ || 36 ||
[Analyze grammar]

evaṃ saṃkṣepataḥ proktaḥ sadyādīnāṃ samudbhavaḥ |
sanatkumāra sarvajña lokānāṃ hitakāmyayā || 37 ||
[Analyze grammar]

atha teṣāṃ mahāprājña vyavahāraṃ yathāyatham |
trilokahitakāraṃ hi sarvaṃ brahmāṇḍasaṃsthitam || 38 ||
[Analyze grammar]

īśānaḥ puruṣo ghoro vāmasaṃjñastathaiva ca |
brahmasaṃjño maheśasya mūrtayaḥ paṃca viśrutāḥ || 39 ||
[Analyze grammar]

īśānaḥ śivarūpaśca garīyānprathamaḥ smṛtaḥ |
bhoktāraṃ prakṛteḥ sākṣātkṣetrajñamadhitiṣṭhati || 40 ||
[Analyze grammar]

śaivastatpuruṣākhyaśca svarūpo hi dvitīyakaḥ |
guṇāśrayātmakaṃ bhogyaṃ sarvajñamadhitiṣṭhati || 41 ||
[Analyze grammar]

dharmāya svāṃgasaṃyuktaṃ buddhitattvaṃ pinākinaḥ |
aghorākhyasvarūpo yastiṣṭhatyaṃtastṛtīyakaḥ || 42 ||
[Analyze grammar]

vāmadevāhvayo rūpaścaturthaḥ śaṅkarasya hi |
ahaṃkṛteradhiṣṭhāno bahukāryakaraḥ sadā || 43 ||
[Analyze grammar]

īśānāhvasvarūpo hi śaṃkarasyeśvaraḥ sadā |
śrotrasya vacasaścāpi vibhorvyomnastathaiva ca || 44 ||
[Analyze grammar]

tvakpāṇisparśavāyūnāmīśvaraṃ rūpamaiśvaram |
puruṣākhyaṃ vicārajñā matimantaḥ pracakṣate || 45 ||
[Analyze grammar]

vapuṣaśca rasasyāpi rūpasyāgnestathaiva ca |
aghorākhyamadhiṣṭhānaṃ rūpamāhurmanīṣiṇaḥ || 46 ||
[Analyze grammar]

raśanāyāśca pāyośca rasasyāpāṃ tathaiva ca |
īśvaraṃ vāmadevākhyaṃ svarūpaṃ śāṃkaraṃ smṛtam || 47 ||
[Analyze grammar]

prāṇasya caivopasthasya gaṃdhasya ca bhuvastathā |
sadyojātāhvayaṃ rūpamīśvaraṃ śāṃkaraṃ viduḥ || 48 ||
[Analyze grammar]

ime svarūpāḥ śaṃbhorhi vandanīyāḥ prayatnataḥ |
śreyorthibhirnarairnityaṃ śreyasāmekahetavaḥ || 49 ||
[Analyze grammar]

yaḥ paṭhecchṛṇuyādvāpi sadyādīnāṃ samudbhavam |
sa bhuktvā sakalānkāmānprayāti paramāṃ gatim ||
[Analyze grammar]

iti śrīśivamahāpurāṇe tṛtīyāyāṃ śatarudrasaṃhitāyāṃ śivasya pañcabrahmāvatāravarṇanaṃ nāma prathamo'dhyāyaḥ || 1 ||
[Analyze grammar]