Chapter 27

[English text for this chapter is available]

|| brahmovāca |
ekadā tu mune tena yajñaḥ prāraṃbhito mahān |
tatrāhūtāstadā sarve dīkṣitena surarṣayaḥ || 1 ||
[Analyze grammar]

maharṣayo'khilāstatra nirjarāśca samāgatāḥ |
yadyajñakaraṇārthaṃ hi śivamāyāvimohitaḥ || 2 ||
[Analyze grammar]

agastyaḥ kaśyapotriśca vāmadevastathā bhṛguḥ |
dadhīcirbhagavān vyāso bhāradvājo'tha gautamaḥ || 3 ||
[Analyze grammar]

pailaḥ parāśaro gargo bhārgavaḥ kakupassitaḥ |
sumaṃtutrikakaṃkāśca vaiśaṃpāyana eva ca || 4 ||
[Analyze grammar]

ete cānye ca bahavo munayo harṣitā yayu |
mama putrasya dakṣasya sadārāssasutā makham || 5 ||
[Analyze grammar]

tathā sarve suragaṇā lokapālā mahodayāḥ |
tathopanirjarāssarve svāpakārabalānvitāḥ || 6 ||
[Analyze grammar]

satyalokātsamānīto nutohaṃ viśvakārakaḥ |
sasutassa parīvāro mūrtavedāpisaṃyutaḥ || 7 ||
[Analyze grammar]

vaikuṃṭhācca tathā viṣṇussaṃprārthya vividhādarāt |
sapārṣadaparīvārassamānīto makhaṃ prati || 8 ||
[Analyze grammar]

evamanye samāyātā dakṣayajñaṃ vimohitāḥ |
satkṛtāstena dakṣena sarve te hi durātmanā || 9 ||
[Analyze grammar]

bhavanāni mahārhāṇi suprabhāṇi mahāṃti ca |
tvaṣṭrā kṛtāni divyāni tebhyo dattāni tena vai || 10 ||
[Analyze grammar]

teṣu sarveṣu dhiṣṇyeṣu yathāyogyaṃ ca saṃsthitāḥ |
sanmānitā arājaṃste sakalā viṣṇunā mayā || 11 ||
[Analyze grammar]

varttamāne mahāyajñe tīrthe kanakhale tadā |
ṛtvijaśca kṛtāstena bhṛgvādyāśca tapodhanāḥ || 12 ||
[Analyze grammar]

adhiṣṭhātā svayaṃ viṣṇussaha sarvamarudgaṇaiḥ |
ahaṃ tatrā'bhavaṃ brahmā trayīvidhinidarśakaḥ || 13 ||
[Analyze grammar]

tathaiva sarvadikpālā dvārapālāśca rakṣakāḥ |
sāyudhāssaparīvārāḥ kutūhalakarāssadā || 14 ||
[Analyze grammar]

upatasthe svayaṃ yajñassurūpastasya cādhvare |
sarve mahāmuniśreṣṭhāḥ svayaṃ vedadharā'bhavan || 15 ||
[Analyze grammar]

tanūnapādapi nijaṃ cakre rūpaṃ sahasraśaḥ |
haviṣā grahaṇāyāśu tasmin yajñe mahotsave || 16 ||
[Analyze grammar]

aṣṭāśītisahasrāṇi juhvati saha ṛtvijaḥ |
udgātāraścatuṣaṣṭi sahasrāṇi surarṣayaḥ || 17 ||
[Analyze grammar]

adhvaryavotha hotārastāvanto nāradādayaḥ |
saptarṣayassamā gāthāḥ kurvaṃti sma pṛthakpṛthak || 18 ||
[Analyze grammar]

gaṃdharvavidyādharasiddhasaṃghānādityasaṃghān sagaṇān sayajñān |
saṃkhyāvarānnāgacarān samastān vavre sa dakṣo hi mahādhvare sve || 19 ||
[Analyze grammar]

dvijarṣirājarṣisurarṣisaṃghā nṛpāssamitrāḥ sacivāssa sainyāḥ |
vasupramukhyā gaṇadevatāśca sarve vṛtāstena makhopavettrāḥ || 20 ||
[Analyze grammar]

dīkṣāyuktastadā dakṣaḥ kṛtakautukamaṃgalaḥ |
bhāryayā sahito reje kṛtasvastyayano bhṛśam || 21 ||
[Analyze grammar]

tasmin yajñe vṛtaśśaṃbhurna dakṣeṇa durātmanā |
kapālīti viniścitya tasya yajñārhatā na hi || 22 ||
[Analyze grammar]

kapālibhāryeti satī dayitā svasutāpi ca |
nāhūtā yajñaviṣaye dakṣeṇāguṇadarśinā || 23 ||
[Analyze grammar]

evaṃ pravartamāne hi dakṣayajñe mahotsave |
svakāryalagnāstatrāsan sarve te'dhvarasaṃmatāḥ || 24 ||
[Analyze grammar]

etasminnaṃtare'dṛṣṭvā tatra vai śaṃkaraṃ prabhum |
prodvignamānasaśśaivo dadhīco vākyamabravīt || 25 ||
[Analyze grammar]

dadhīca uvāca |
sarve śṛṇuta madvākyaṃ devarṣipramukhā mudā |
kasmānnaivāgataśśaṃbhurasmin yajñe mahotsave || 26 ||
[Analyze grammar]

ete sureśā munayo mahattarāssalokapālāśca samāgatā hi |
tathāpi yajñastu na śobhate bhṛśaṃ pinākinā tena mahātmanā vinā || 27 ||
[Analyze grammar]

yenaiva sarvāṇyapi maṃgalāni bhavaṃti śaṃsanti mahāvipaścitaḥ |
so'sau na dṛṣṭo'tra pumān purāṇo vṛṣadhvajo nīlagalaḥ pareśaḥ || 28 ||
[Analyze grammar]

amaṃgalānyeva ca maṃgalāni bhavaṃti yenādhigatāni dakṣaḥ |
tripaṃcakenāpyatha maṃgalāni bhavaṃti sadyaḥ parataḥ purāṇi || 29 ||
[Analyze grammar]

tasmāttvayaiva kartavyamāhvānaṃ parameśituḥ |
tvaritaṃ brahmaṇā vāpi viṣṇunā prabhuviṣṇunā || 30 ||
[Analyze grammar]

indreṇa lokapālaiśca dvijaissiddhaissahādhunā |
sarvathā''nayanīyosau śaṃkaro yajñapūrttaye || 31 ||
[Analyze grammar]

sarvairbhavadbhirgaṃtavyaṃ yatra devo maheśvaraḥ |
dākṣāyaṇyā samaṃ śambhumānayadhvaṃ tvarānvitāḥ || 32 ||
[Analyze grammar]

tena sarvaṃ pavitraṃ syācchambhunā paramātmanā |
atrāgatena deveśāssāṃbena paramātmanā || 33 ||
[Analyze grammar]

yasya smṛtyā ca nāmoktyā samagraṃ sukṛtaṃ bhavet |
tasmātsarvaprayatnena hyānetavyo vṛṣadhvajaḥ || 34 ||
[Analyze grammar]

samāgate śaṃkare'tra pāvano hi bhavenmakhaḥ |
bhaviṣyatyanyathā'pūrṇaḥ satyametadbravīmyaham || 35 ||
[Analyze grammar]

brahmovāca |
tasya tadvacanaṃ śrutvā dakṣo roṣasamanvitaḥ |
uvāca tvaritaṃ mūḍhaḥ prahasanniva duṣṭadhīḥ || 36 ||
[Analyze grammar]

mūlaṃ viṣṇurdevatānāṃ yatra dharmassanātanaḥ |
samānīto mayā samyak kimūnaṃ yajñakarmaṇi || 37 ||
[Analyze grammar]

yasminvedāśca yajñāśca karmāṇi vividhāni ca |
pratiṣṭhitāni sarvāṇi so'sau viṣṇurihāgataḥ || 38 ||
[Analyze grammar]

satyalokātsamāyāto brahmā lokapitāmahaḥ |
vedaissopaniṣadbhiśca vividhairāgamaissaha || 39 ||
[Analyze grammar]

tathā suragaṇaissākamāgatassurarāṭ svayam |
tathā yūyaṃ samāyātā ṛṣayo vītakalmaṣāḥ || 40 ||
[Analyze grammar]

yeye yajñocitāśśāṃtāḥ pātrabhūtāssamāgatāḥ |
vedavedārthatattvajñāssarve yūyaṃ dṛḍhavratāḥ || 41 ||
[Analyze grammar]

atraiva ca kimasmākaṃ rudreṇāpi prayojanam |
kanyā dattā mayā vipra brahmaṇā noditena hi || 42 ||
[Analyze grammar]

haro'kulīnosau vipra pitṛmātṛvivarjitaḥ |
bhūtapretapiśācānāṃ patireko duratyayaḥ || 43 ||
[Analyze grammar]

ātmasaṃbhāvito mūḍha stabdho maunī samatsaraḥ |
karmaṇyasminna yogyosau nānīto hi mayā'dhunā || 44 ||
[Analyze grammar]

tasmāttvamīdṛśaṃ vākyaṃ punarvācyaṃ na hi kvacit |
sarverbhavadbhiḥ kartavyo yajño me saphalo mahān || 45 ||
[Analyze grammar]

brahmovāca |
etacchrutvā vacastasya dadhīco vākyamabravīt |
sarveṣāṃ śṛṇvatāṃ devamunīnāṃ sārasaṃ yutam || 46 ||
[Analyze grammar]

dadhīca uvāca |
ayajñoyaṃ mahājāto vinā tena śivena hi |
vināśopi viśeṣeṇa hyatra te hi bhaviṣyati || 47 ||
[Analyze grammar]

evamuktvā dadhīcosāveka eva vinirgataḥ |
yajñavāṭācca dakṣasya tvaritaḥ svāśramaṃ yayau || 48 ||
[Analyze grammar]

tatonye śāṃkarā ye ca mukhyāśśivamatānugāḥ |
niryayussvāśramān sadyaśśāpaṃ dattvā tathaiva ca || 49 ||
[Analyze grammar]

munau vinirgate tasmin makhādanyeṣu duṣṭadhīḥ |
śivadrohī munīn dakṣaḥ prahasannidamabravīt || 50 ||
[Analyze grammar]

|| dakṣa uvāca |
gataḥ śivapriyo vipro dadhīco nāma nāmataḥ |
anye tathāvidhā ye ca gatāste mama cādhvarāt || 51 ||
[Analyze grammar]

etacchubhataraṃ jātaṃ saṃmataṃ me hi sarvathā |
satyaṃ bravīmi deveśa surāśca munayastathā || 52 ||
[Analyze grammar]

vinaṣṭacittā maṃdāśca mithyāvādaratāḥ khalāḥ |
vedabāhyā durācārāstyājyāste makhakarmaṇi || 53 ||
[Analyze grammar]

vedavādaratā yūyaṃ sarve viṣṇupurogamāḥ |
yajñaṃ me saphalaṃ viprāssurāḥ kurvaṃtu mā'ciram || 54 ||
[Analyze grammar]

|| brahmovāca |
ityākarṇya vacastasya śivamāyāvimohitāḥ |
yanmakhe devayajanaṃ cakrussarve surarṣayaḥ || 55 ||
[Analyze grammar]

iti tanmakhaśāpo hi varṇito me munīśvara |
yajñavidhvaṃsayogopi procyate śṛṇu sādaram || 56 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe yajñaprāraṃbho nāma saptaviṃśo'dhyāyaḥ || 27 ||
[Analyze grammar]