Chapter 6

[English text for this chapter is available]

brahmovāca |
sutavarya mahāprājña śṛṇu saṃdhyātapo mahat |
yacchrutvā naśyate pāpasamūhastatkṣaṇāddhruvam || 1 ||
[Analyze grammar]

upaviśya tapobhāvaṃ vasiṣṭhe svagṛhaṃ gate |
saṃdhyāpi tapaso bhāvaṃ jñātvā modamavāpa ha || 2 ||
[Analyze grammar]

tatassānaṃdamanaso veṣaṃ kṛtvā tu yādṛśam |
tapaścartuṃ samārebhe bṛhallohitatīragā || 3 ||
[Analyze grammar]

yathoktaṃ tu vaśiṣṭhena maṃtraṃ tapasi sādhanam |
maṃtreṇa tena sadbhaktyā pūjayāmāsa śaṃkaram || 4 ||
[Analyze grammar]

ekāntamanasastasyāḥ kurvaṃtyā sumahattapaḥ |
śaṃbhau vinyastacittāyā gatamekaṃ caturyugam || 5 ||
[Analyze grammar]

prasannobhūttadā śaṃbhustapasā tena toṣitaḥ |
aṃtarbahistathākāśe darśayitvā nijaṃ vapuḥ || 6 ||
[Analyze grammar]

yadrūpaṃ ciṃtayaṃtī sā tena pratyakṣatāṃ gataḥ || 7 ||
[Analyze grammar]

atha sā purato dṛṣṭvā manasā ciṃtitaṃ prabhum |
prasannavadanaṃ śāṃtaṃ mumodātīva śaṃkaram || 8 ||
[Analyze grammar]

sasādhvasamahaṃ vakṣye kiṃ kathaṃ staumi vā haram |
iti ciṃtāparā bhūtvā nyamīlayata cakṣuṣī || 9 ||
[Analyze grammar]

nimīlitākṣyāstasyāstu praviśya hṛdayaṃ haraḥ |
divyaṃ jñānaṃ dadau tasyai vācaṃ divye ca cakṣuṣī || 10 ||
[Analyze grammar]

divyajñānaṃ divyacakṣurdivyā vācamavāpa sā |
pratyakṣaṃ vīkṣya durgeśaṃ tuṣṭāva jagatāṃ patim || 11 ||
[Analyze grammar]

saṃdhyovāca |
nirākāraṃ jñānagamyaṃ paraṃ yannaiva sthūlaṃ nāpi sūkṣmaṃ na coccam |
aṃtaściṃtyaṃ yogibhistasya rūpaṃ tasmai tubhyaṃ lokakartre namostu || 12 ||
[Analyze grammar]

sarvaṃ śāṃtaṃ nirmalaṃ nirvikāraṃ jñānāgamyaṃ svaprakāśe'vikāram |
khādhvaprakhyaṃ dhvāṃtamārgātparastadrūpaṃ yasya tvāṃ namāmi prasannam || 13 ||
[Analyze grammar]

ekaṃ śuddhaṃ dīpyamānaṃ tathājaṃ cidānaṃdaṃ sahajaṃ cāvikāri |
nityānaṃdaṃ satyabhūtiprasannaṃ yasya śrīdaṃ rūpamasmai namaste || 14 ||
[Analyze grammar]

vidyākārodbhāvanīyaṃ prabhinnaṃ sattvacchaṃdaṃ dhyeyamātmasvarūpam |
sāraṃ pāraṃ pāvanānāṃ pavitraṃ tasmai rūpaṃ yasya caivaṃ namaste || 15 ||
[Analyze grammar]

yattvākāraṃ śuddharūpaṃ manojñaṃ ratnākalpaṃ svacchakarpūragauram |
iṣṭābhītī śūlamuṃḍe dadhānaṃ hastairnamo yogayuktāya tubhyam || 16 ||
[Analyze grammar]

gaganaṃ bhūrdiśaścaiva salilaṃ jyotireva ca |
punaḥ kālaśca rūpāṇi yasya tubhyaṃ namostu te || 17 ||
[Analyze grammar]

pradhānapuruṣau yasya kāyatvena vinirgatau |
tasmādavyaktarūpāya śaṃkarāya namonamaḥ || 18 ||
[Analyze grammar]

yo brahmā kurute sṛṣṭiṃ yo viṣṇuḥ kurute sthitim |
saṃhariṣyati yo rudrastasmai tubhyaṃ namonamaḥ || 19 ||
[Analyze grammar]

namonamaḥ kāraṇakāraṇāya divyāmṛtajñānavibhūtidāya |
samastalokāṃtarabhūtidāya prakāśarūpāya parātparāya || 20 ||
[Analyze grammar]

yasyā'paraṃ no jagaducyate padāt kṣitirdiśassūrya iṃdurmanaujaḥ |
barhirmukhā nābhitaścāntarikṣaṃ tasmai tubhyaṃ śaṃbhave me namostu || 21 ||
[Analyze grammar]

tvaṃ paraḥ paramātmā ca tvaṃ vidyā vividhā haraḥ |
sadbrahma ca paraṃ brahma vicāraṇaparāyaṇaḥ || 22 ||
[Analyze grammar]

yasya nādirna madhyaṃ ca nāṃtamasti jagadyataḥ |
kathaṃ stoṣyāmi taṃ devaṃ vāṅmanogocaraṃ haram || 23 ||
[Analyze grammar]

yasya brahmādayo deva munayaśca tapodhanāḥ |
na vipraṇvaṃti rūpāṇi varṇanīyaḥ kathaṃ sa me || 24 ||
[Analyze grammar]

striyā mayā te kiṃ jñeyā nirguṇasya guṇāḥ prabho |
naiva jānaṃti yadrūpaṃ sendrā api surāsurāḥ || 25 ||
[Analyze grammar]

namastubhyaṃ maheśāna namastubhyaṃ tamomaya |
prasīda śaṃbho deveśa bhūyobhūyo namostu te || 26 ||
[Analyze grammar]

brahmovāca |
ityākarṇya vacastasyāssaṃstutaḥ parameśvaraḥ |
suprasannataraścābhūcchaṃkaro bhaktavatsalaḥ || 27 ||
[Analyze grammar]

atha tasyāśśarīraṃ tu valkalājinasaṃyutam |
paricchannaṃ jaṭāvrātaiḥ pavitre mūrdhni rājitaiḥ || 28 ||
[Analyze grammar]

himānītarjitāṃbhojasadṛśaṃ vadanaṃ tadā |
nirīkṣya kṛpayāviṣṭo haraḥ provāca tāmidam || 29 ||
[Analyze grammar]

maheśvara uvāca |
prītosmi tapasā bhadre bhavatyāḥ parameṇa vai |
stavena ca śubhaprājñe varaṃ varaya sāṃpratam || 30 ||
[Analyze grammar]

yena te vidyate kāryaṃ vareṇāsminmanogatam |
tatkariṣye ca bhadraṃ te prasannohaṃ tava vrataiḥ || 31 ||
[Analyze grammar]

brahmovāca |
iti śrutvā maheśasya prasannamanasastadā |
saṃdhyovāca suprasannā praṇamya ca muhurmuhuḥ || 32 ||
[Analyze grammar]

saṃdhyovāca |
yadi deyo varaḥ prītyā varayogyāsmyahaṃ yadi |
yadi śuddhāsmyahaṃ jātā tasmātpāpānmaheśvara || 33 ||
[Analyze grammar]

yadi deva prasavro'si tapasā mama sāṃpratam |
vṛtastadāyaṃ prathamo varo mama vidhīyatām || 34 ||
[Analyze grammar]

utpannamātrā deveśa prāṇinosminnabhaḥ sthale |
na bhavaṃtu samenaiva sakāmāssaṃbhavaṃtu vai || 35 ||
[Analyze grammar]

yaddhi vṛttā hi lokeṣu triṣvapi prathitā yathā |
bhaviṣyāmi tathā nānyā vara eko vṛto mayā || 36 ||
[Analyze grammar]

sakāmā mama sṛṣṭistu kutracinna patiṣyati |
yo me patirbhavennātha sopi me'tisuhṛcca vai || 37 ||
[Analyze grammar]

yo drakṣyati sakāmo māṃ puruṣastasya pauruṣam |
nāśaṃ gamiṣyati tadā sa ca klībo bhaviṣyati || 38 ||
[Analyze grammar]

brahmovāca |
iti śrutvā vacastasyaśśaṃkaro bhaktavatsalaḥ |
uvāca suprasannātmā niṣpāpāyāstayerite || 39 ||
[Analyze grammar]

maheśvara uvāca |
śṛṇu devi ca saṃdhye tvaṃ tvatpāpaṃ bhasmatāṃ gatam |
tvayi tyakto mayā krodhaḥ śuddhā jātā tapaḥkarāt || 40 ||
[Analyze grammar]

yadyadvṛtaṃ tvayā bhadre dattaṃ tadakhilaṃ mayā |
suprasannena tapasā tava saṃdhye vareṇa hi || 41 ||
[Analyze grammar]

prathamaṃ śaiśavo bhāvaḥ kaumārākhyo dvitīyakaḥ |
tṛtīyo yauvano bhāvaścaturtho vārddhakastathā || 42 ||
[Analyze grammar]

tṛtīye tvatha saṃprāpte vayobhāge śarīriṇaḥ |
sakāmāssyurdvitīyāṃto bhaviṣyati kvacit kvacit || 43 ||
[Analyze grammar]

tapasā tava maryādā jagati sthāpitā mayā |
utpannamātrā na yathā sakāmāssyuśśarīriṇaḥ || 44 ||
[Analyze grammar]

tvaṃ ca loke satībhāvaṃ tādṛśaṃ samavāpnuhi |
triṣu lokeṣu nānyasyā yādṛśaṃ saṃbhaviṣyati || 45 ||
[Analyze grammar]

yaḥ paśyati sakāmastvāṃ pāṇigrāhamṛte tava |
sa sadyaḥ klībatāṃ prāpya durbalatvaṃ gamiṣyati || 46 ||
[Analyze grammar]

patistava mahābhāgastaporūpasamanvitaḥ |
saptakalpāṃtajīvī ca bhaviṣyati saha tvayā || 47 ||
[Analyze grammar]

iti te ye varā mattaḥ prārthitāste kṛtā mayā |
anyacca te vadiṣyāmi pūrvajanmani saṃsthitam || 48 ||
[Analyze grammar]

agnau śarītyāgaste pūrvameva pratiśrutaḥ |
tadupāyaṃ vadāmi tvāṃ tatkuruṣva na saṃśayaḥ || 49 ||
[Analyze grammar]

sa ca medhātithiryajñe mune dvādaśavārṣike |
kṛtsnaprajvalite vahnāvacirāt kriyatāṃ tvayā || 50 ||
[Analyze grammar]

etacchailopatyakāyāṃ caṃdrabhāgānadītaṭe |
medhātithirmahāyajñaṃ kurute tāpasāśrame || 51 ||
[Analyze grammar]

tatra gatvā svayaṃ chaṃdaṃ munibhirnnopalakṣitā |
matprasādādvahnijātā tasya putrī bhaviṣyasi || 52 ||
[Analyze grammar]

yaste varo vāñchanīyaḥ svāmī manasi kaścana |
taṃ nidhāya nijasvāṃte tyaja vahnau vapuḥ svakam || 53 ||
[Analyze grammar]

yadā tvaṃ dāruṇaṃ saṃdhye tapaścarasi parvate |
yāvaccaturyugaṃ tasya vyatīte tu kṛte yuge || 54 ||
[Analyze grammar]

tretāyāḥ prathame bhāge jātā dakṣasya kanyakā |
vākpāśśīlasamāpannā yathā yogyaṃ vivāhitāḥ || 55 ||
[Analyze grammar]

tanmadhye sa dadau kanyā vidhave saptaviṃśatiḥ |
candro'nyāssaṃparityajya rohiṇyāṃ prītimānabhūt |
taddhetorhi yadā candraśśapto dakṣeṇa kopinā |
tadā bhavatyā nikaṭe sarve devāssamāgatāḥ || 57 ||
[Analyze grammar]

na dṛṣṭāśca tvayā saṃdhye te devā brahmaṇā saha |
mayi vinyastamanasā khaṃ ca dṛṣṭvā labhetpunaḥ || 58 ||
[Analyze grammar]

caṃdrasya śāpamokṣārthaṃ jātā caṃdranadī tadā |
sṛṣṭā dhātrā tadaivātra medhātithirupasthitaḥ || 59 ||
[Analyze grammar]

tapasā satsamo nāsti na bhūto na bhaviṣyati |
yena yajñassamārabdho jyotiṣṭomo mahāvidhiḥ || 60 ||
[Analyze grammar]

tatra prajvalito vahnistasmintyaja vapuḥ svakam |
supavitrā tvamidānīṃ saṃpūrṇostu paṇastava || 61 ||
[Analyze grammar]

etanmayā sthāpitante kāryārthaṃ bho tapasvini |
tatkuruṣva mahābhāge yāhi yajñe mahāmuneḥ |
tasyāhitaṃ ca deveśastatraivāṃtaradhīyata || 62 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe saṃdhyācaritravarṇanaṃ nāma ṣaṣṭho'dhyāyaḥ || 6 ||
[Analyze grammar]