Chapter 2

[English text for this chapter is available]

sūta uvāca |
ityākarṇya vacastasya nemiṣāraṇyavāsinaḥ |
papraccha ca muniśreṣṭhaḥ kathāṃ pāpapraṇāśinīm || 1 ||
[Analyze grammar]

nārada uvāca |
vidhevidhe mahā bhāga kathāṃ śaṃbhośśubhāvahām |
śṛṇvan bhavanmukhāṃbhojānna tṛptosmi mahāprabho || 2 ||
[Analyze grammar]

ataḥ kathaya tatsarvaṃ śivasya caritaṃ śubham |
satīkīrtyanvitaṃ divyaṃ śrotumicchāmi viśvakṛt || 3 ||
[Analyze grammar]

satī hi kathamutpannā dakṣadāreṣu śobhanā |
kathaṃ haro manaścakre dārāharaṇakarmaṇi || 4 ||
[Analyze grammar]

kathaṃ vā dakṣakopena tyaktadehā satī purā |
himavattanayā jātā bhūyo vākāśamāgatā || 5 ||
[Analyze grammar]

pārvatyāśca tapo'tyugraṃ vivāhaśca kathaṃ tvabhūt |
kathamarddhaśarīrasthā babhūva smaranāśinaḥ || 6 ||
[Analyze grammar]

etatsarvaṃ samācakṣva vistareṇa mahāmate |
nānyosti saṃśayacchettā tvatsamo na bhaviṣyati || 7 ||
[Analyze grammar]

brahmovāca |
śṛṇu tvaṃ ca mune sarvaṃ satīśivayaśaśśubham |
pāvanaṃ paramaṃ divyaṃ guhyādguhyatamaṃ param || 8 ||
[Analyze grammar]

etacchaṃbhuḥ purovāca bhaktavaryāya viṣṇave |
pṛṣṭastena mahābhaktyā paropakṛtaye mune || 9 ||
[Analyze grammar]

tatassopi mayā pṛṣṭo viṣṇuśśaivavarassudhīḥ |
prītyā mahyaṃ samācakhyau vistarānmunisattama || 10 ||
[Analyze grammar]

ahaṃ tatkathayiṣyāmi kathāmetāṃ purātanīm |
śivāśivayaśoyuktāṃ sarvakāmaphalapradām || 11 ||
[Analyze grammar]

purā yadā śivo devo nirguṇo nirvikalpakaḥ |
arūpaśśaktirahitaścinmātrassadasatparaḥ || 12 ||
[Analyze grammar]

abhavatsaguṇassopi dvirūpaśśaktimānprabhuḥ |
somo divyākṛtirvipra nirvi kārī parātparaḥ || 13 ||
[Analyze grammar]

tasya vāmāṃgajo viṣṇurbrahmāhaṃ dakṣiṇāṃgajaḥ |
rudro hṛdayato jāto'bhavacca munisattama || 14 ||
[Analyze grammar]

sṛṣṭikartābhavaṃ brahmā viṣṇuḥ pālanakārakaḥ |
layakartā svayaṃ rudrastridhābhūtassadāśivaḥ || 15 ||
[Analyze grammar]

tamevāhaṃ samārādhya brahmā lokapitāmahaḥ |
prajā sasarja sarvāstāssurāsuranarādikāḥ || 16 ||
[Analyze grammar]

sṛṣṭvā prajāpatīn dakṣapramukhānsurasattamān |
amanyaṃ suprasannohaṃ nijaṃ sarvamahonnatam || 17 ||
[Analyze grammar]

marīcimatriṃ pulahaṃ pulastyāṃgirasau kratum |
vasiṣṭhaṃ nāradaṃ dakṣaṃ bhṛguṃ ceti mahāprabhūn || 16 ||
[Analyze grammar]

brahmāhaṃ mānasānputrānasarjaṃ ca yadā mune |
tadā manmanaso jātā cārurūpā varāṃganā || 19 ||
[Analyze grammar]

nāmnā saṃdhyā divakṣāṃtā sāyaṃ saṃdhyā japaṃtikā |
atīva sundarī subhrūrmunicetovimohinī || 20 ||
[Analyze grammar]

na tādṛśī devaloke na martye na rasātale |
kālatrayepi vai nārī sampūrṇaguṇaśālinī || 2 ||
[Analyze grammar]

dṛṣṭvāhaṃ tāṃ samutthāya cintayanhṛdi hṛdgatam |
dakṣādayaśca sraṣṭāro marīcyādyāśca matsutāḥ || 22 ||
[Analyze grammar]

evaṃ ciṃtayato me hi brahmaṇo munisattama |
mānasaḥ puruṣo maṃjurāvirbhūto mahādbhutaḥ || 23 ||
[Analyze grammar]

kāṃcanīkṛtajātābhaḥ pīnoraskassunāsikaḥ |
suvṛttorukaṭījaṃgho nīlavelitakesaraḥ || 24 ||
[Analyze grammar]

lagnabhrūyugalo lolaḥ pūrṇacandranibhānanaḥ |
kapāṭāyatasadvakṣo romarājīvarājitaḥ || 25 ||
[Analyze grammar]

abhramātaṃgakākāraḥ pīno nīlasuvāsakaḥ |
āraktapāṇinayanamukhapādakarodbhavaḥ || 26 ||
[Analyze grammar]

kṣīṇamadhyaścārudantaḥ pramattagajagaṃdhanaḥ |
praphullapadmapatrākṣaḥ kesaraghrāṇatarpaṇaḥ || 27 ||
[Analyze grammar]

kaṃbugrīvo mīnaketuḥ prāṃśurmakaravāhanaḥ |
paṃcapuṣpāyudho vegī puṣpakodaṃḍamaṃḍitaḥ || 28 ||
[Analyze grammar]

kāṃtaḥ kaṭākṣapātena bhrāmayannayanadvayam |
sugaṃdhimāruto tāta śṛṃgārarasasevitaḥ || 29 ||
[Analyze grammar]

taṃ vīkṣya puruṣaṃ sarve dakṣādyā matsutāśca te |
autsukyaṃ paramaṃ jagmurvismayāviṣṭamānasāḥ || 30 ||
[Analyze grammar]

abhavadvikṛtaṃ teṣāṃ matsutānāṃ mano drutam |
dhairyaṃ naivālabhattāta kāmākulitacetasām || 31 ||
[Analyze grammar]

māṃ sopi vedhasaṃ vīkṣya sraṣṭāraṃ jagatāṃ patim |
praṇamya puruṣaḥ prāha vinayānatakaṃdharaḥ || 32 ||
[Analyze grammar]

puruṣa uvāca |
kiṃ kariṣyāmyahaṃ karma brahmaṃstatra niyojaya |
mānyodya puruṣo yasmāducitaḥ śobhito vidhe || 33 ||
[Analyze grammar]

abhimānaṃ ca yogyaṃ ca sthānaṃ patnī ca yā mama |
tanme vada trilokeśa tvaṃ sraṣṭā jagatāṃ patiḥ || 34 ||
[Analyze grammar]

brahmovāca |
evaṃ tasya vacaḥ śrutvā puruṣasya mahātmanaḥ |
kṣaṇaṃ na kiṃcitprāvocatsa sraṣṭā cātivismitaḥ || 35 ||
[Analyze grammar]

ato manassusaṃyamya samyagutsṛjya vismayam |
avocatpuruṣaṃ brahmā tatkāmaṃ ca samāvahan || 36 ||
[Analyze grammar]

|| brahmovāca |
anena tvaṃ svarūpeṇa puṣpabāṇaiśca paṃcabhiḥ |
mohayan puruṣān strīśca kuru sṛṣṭiṃ sanātanīm || 37 ||
[Analyze grammar]

asmiñjīvāśca devādyāstrailokye sacarācare |
ete sarve bhaviṣyanti na kṣamāstyavalaṃbane || 38 ||
[Analyze grammar]

ahaṃ vā vāsudevo vā sthāṇurvā puruṣottamaḥ |
bhaviṣyāmastava vaśe kimanye prāṇadhārakāḥ || 39 ||
[Analyze grammar]

pracchannarūpo jaṃtūnāṃ praviśanhṛdayaṃ sadā |
sukhahetuḥ svayaṃ bhūtvā sṛṣṭiṃ kuru sanātanīm || 40 ||
[Analyze grammar]

tvatpuṣpabāṇasya sadā sukhalakṣyaṃ manodbhutam |
sarveṣāṃ prāṇināṃ nityaṃ sadā madakaro bhavān || 41 ||
[Analyze grammar]

iti te karma kathitaṃ sṛṣṭiprāvartakaṃ punaḥ |
nāmānyete vadiṣyaṃti sutā me tava tattvataḥ || 42 ||
[Analyze grammar]

brahmovāca |
ityuktvāhaṃ suraśreṣṭha svasutānāṃ mukhāni ca |
ālokya svāsane pādme propaviṣṭo'bhavaṃ kṣaṇam || 43 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ dvitīye satīkhaṃḍe kāmaprādurbhāvo nāma dvitīyo'dhyāyaḥ || 2 ||
[Analyze grammar]