Chapter 216

sargabrahmatvapratipādanaṃ nāma sargaḥ |
ṣoḍaśottaradviśatatamaḥ sargaḥ |
rāmaḥ |
anantaraṃ nabhaḥkośakuṭīkoṭarake mune |
tava dhyānātprabuddhasya vṛttaṃ varṣaśatena kim || 1 ||
[Analyze grammar]

vasiṣṭhaḥ |
tato dhyānātprabuddho'haṃ śrutavāṃstatra nissvanam |
mṛdvavyaktapadaṃ hṛdyaṃ na ca vādyānna geyataḥ || 2 ||
[Analyze grammar]

strīsvabhāvādiva mṛdu madhuraṃ cāninādi ca |
svalpāṅgatvādanirhrādi mayā tadvākyamūhitam || 3 ||
[Analyze grammar]

indindirarutākāraṃ tantrīraṇanarañjanam |
na rodanaṃ na paṭhanaṃ vaṃśakośasamasvanam || 4 ||
[Analyze grammar]

tadākarṇyāśu tatredamahaṃ cintitavānatha |
śabdakartrīkṣaṇātpaśyandiśo daśa savismayaḥ || 5 ||
[Analyze grammar]

vyomno'yaṃ siddhasañcāramārgaśūnyamanantaram |
bhāgo yojanalakṣāṇi samatikramya saṃsthitaḥ || 6 ||
[Analyze grammar]

tadihedṛgvidhasyāsya kutaśśabdasya sambhavaḥ |
śābdikaṃ na ca paśyāmi yatnenāpi vilokayan || 7 ||
[Analyze grammar]

anantamidamāśūnyaṃ puro me nirmalaṃ nabhaḥ |
iha bhūtaṃ prayatnena prekṣyamāṇaṃ na dṛśyate || 8 ||
[Analyze grammar]

yadeti cintayitvāhaṃ bhūyo bhūyo vilokayan |
śabdeśvaraṃ na paśyāmi tadā cintitavānidam || 9 ||
[Analyze grammar]

ākāśa eva bhūtvāhamākāśenaikatāṃ gataḥ |
ākāśaguṇaśabdārthān karomyākāśakośake || 10 ||
[Analyze grammar]

dehākāśamidaṃ sthāpya dhyāneneha yathāsthitam |
cidākāśavapurvyomnā yāmyaikyaṃ vārivāmbunā || 11 ||
[Analyze grammar]

cintayitvetyahaṃ tyaktuṃ dehaṃ padmāsane sthitaḥ |
āsaṃ samādhimādhātuṃ punarāmīlitekṣaṇaḥ || 12 ||
[Analyze grammar]

tyaktvā bāhyānapi sparśānaindriyānāntarānapi |
cittākāśe'hamabhavaṃ saṃvitspandamayātmakaḥ || 13 ||
[Analyze grammar]

kramāttadapi santyajya buddhitattvapadaṃ gataḥ |
sampanno'haṃ cidākāśo jagajjālaikadarpaṇaḥ || 14 ||
[Analyze grammar]

tatastena svabhāvena bhūtavyomaikatāmaham |
samprayāto'mbunevāmbu saurabhaṃ saurabheṇa vā || 15 ||
[Analyze grammar]

sampanno'tha mahākāśo vyāpyananto'tha sarvagaḥ |
anākāro'pyanādhāraḥ sarvārthādhāratāṃ gataḥ || 16 ||
[Analyze grammar]

yāvattrailokyavṛndāni saṃsārāṇāṃ śatāni ca |
tatra brahmāṇḍalakṣāṇi paśyāmyagaṇitānyapi || 17 ||
[Analyze grammar]

parasparamadṛṣṭāni mithaḥ khānyamalāni ca |
nānācāravicārāṇi śūnyānyeva parasparam || 18 ||
[Analyze grammar]

svapnarūpāṇi suptānāṃ tulyakālaṃ nṛṇāmiva |
mahārambhāṇyadṛṣṭāni śūnyāni ca parasparam || 19 ||
[Analyze grammar]

jāyamānāni naśyanti vardhamānāni bhūriśaḥ |
vartamānānyatītāni bhaviṣyanti ca sarvaśaḥ || 20 ||
[Analyze grammar]

anekacittajātāni mahābhittīni khāni ca |
manasyevograrājyāni kṛtāni vividhairjanaiḥ || 21 ||
[Analyze grammar]

nirāvaraṇarūpāṇi tathaikāvaraṇāni ca |
pañcāvaraṇarūpāṇi ṣaḍekāvaraṇāni ca || 22 ||
[Analyze grammar]

daśāvaraṇacitrāṇi ṣoḍaśāvaraṇāni ca |
caturviṃśatyāvṛtīni ṣaṭtriṃśatyāvṛtīni ca || 23 ||
[Analyze grammar]

śūnyāni bhūtapūrṇāni pañcabhūtamayāni ca |
ekapṛthvyādibhūtāni catuṣpṛthvyādikāni ca || 24 ||
[Analyze grammar]

tripṛthvyādīni cānyāni dvipṛthvyādīnyathāpi ca |
tathā saptamahābhūtānyekajātimayāni ca || 25 ||
[Analyze grammar]

tvādṛśānubhavābhogaviruddhānīdṛśāni tu |
tathā nityāndhakārāṇi sūryādirahitāni ca || 26 ||
[Analyze grammar]

tathā mīlitasargāṇi ekanāthāvṛtāni ca |
vilakṣaṇaprajeśāni vicitrācāravanti ca || 27 ||
[Analyze grammar]

jātyandhapāramparyeṇa saṅketācāravanti ca |
tathā nityaprakāśāni jvalitāgnimayāni ca || 28 ||
[Analyze grammar]

tathā jalaikapūrṇāni pavanaikātmakāni ca |
stabdhāni paramākāśe vahanti ca tathāniśam || 29 ||
[Analyze grammar]

jāyamānāni puṣyanti paripuṣṭāni cābhitaḥ |
tiryaggacchanti cānyāni mūkasargamayānyapi || 30 ||
[Analyze grammar]

devamātraikasargāṇi naramātramayāni ca |
daityavṛndamayānyeva kriminirvivarāṇi ca || 31 ||
[Analyze grammar]

antarantastadantaśca svakośeṣvaṇukaṃ prati |
jātāni jāyamānāni kadalīdalapīṭhavat || 32 ||
[Analyze grammar]

parasparamadṛṣṭāni nānubhūtāni vai mithaḥ |
sainikasvapnajālāni jātānīva mahāntyapi || 33 ||
[Analyze grammar]

vividhānyapyanantāni svacchākāśātmakānyalam |
anyo'nyamanyavṛttīni na mitho'nyasthitīni ca || 34 ||
[Analyze grammar]

mithaścānyānyaśāstrāṇi mitho'nantāni yāni ca |
anyānyasanniveśāni mitho'nyānyāni yāni ca || 35 ||
[Analyze grammar]

anyo'nyaṃ paralokāni mithaḥ siddhapurāṇi ca |
anyādṛśamahābhūtānyanyādṛkṣagirīṇi ca || 36 ||
[Analyze grammar]

tvādṛśānubhavehānāmagamyānyātatāni ca |
asamañjasarūpāṇi kathyamānāni mādṛśaiḥ || 37 ||
[Analyze grammar]

aṇuvatprohyamānāni cidādityāṃśumaṇḍale |
paramārthaśriyo vyomni raśmijālāni kuṇḍale || 38 ||
[Analyze grammar]

kānicittāni tānyeva bhūtvā bhūtvā bhavantyalam |
kānicittādṛśānyeva jātāni vanaparṇavat || 39 ||
[Analyze grammar]

anyānyatrārdhasadṛśānyanyāni sadṛśānyapi |
kañcitkālaṃ susadṛśānyanyānyanagha kānicit || 40 ||
[Analyze grammar]

anyānyajñātakālāni yadṛcchāvaśataḥ svayam |
jāyamānāni puṣyanti susthirāṇi sthitāni ca || 41 ||
[Analyze grammar]

phalāni tānyanantāni paramārthamahātaroḥ |
ananyānyeva cānyāni tanmayānyeva vai tataḥ || 42 ||
[Analyze grammar]

kānicitsvalpakalpāni dīrghakalpāni kānicit |
anyānyaniyataṃ bhūri niyataṃ bhūri kānicit || 43 ||
[Analyze grammar]

tāni śūnyatvajālāni paramākāśakośake |
aparijñātakālāni dṛḍhānyajñātadoṣake || 44 ||
[Analyze grammar]

abdhyarkākāśamervādiśatairāvalitānyalam |
ciccamatkārakhe svapnajālānyābhānti cābilam || 45 ||
[Analyze grammar]

anubhūterbhramātmatvātkāraṇānāmabhāvataḥ |
pṛthvyādīnāmahetūnāmatyantaṃ santyasanti ca || 46 ||
[Analyze grammar]

mṛgatṛṣṇāmbubharavaddvicandravyomavarṇavat |
sampannāni na satyāni satyānyapyanubhūtitaḥ || 47 ||
[Analyze grammar]

citsaṅkalpanabhasyeva bhāsamānāni bhūriśaḥ |
vāsanāvātanunnāni vinunnānyātmaceṣṭitaiḥ || 48 ||
[Analyze grammar]

surāsurādimaṣakānyākāśoḍumbaradrume |
phalāni rasapūrṇāni ghūrṇamānāni mārutaiḥ || 49 ||
[Analyze grammar]

abhijātasvabhāvasya sarvārambhakarasya ca |
śuddhacittattvabālasya saṅkalpanagarāṇi khe || 50 ||
[Analyze grammar]

tvamahaṃ sa idaṃ ceti dhiyācaladṛḍhānyalam |
sampannānyarkadīptyeva paṅkakrīḍanakāni ca || 51 ||
[Analyze grammar]

dhṛtāni rasaśālinyā niyatyā nityatṛptayā |
vanānyugraphalānīva vasantarasalekhayā || 52 ||
[Analyze grammar]

mahākartṝṇyakartṝṇi na kṛtānyeva khāni ca |
svayaṃsampannarūpāṇi cidvyomnaiva kṛtāni ca || 53 ||
[Analyze grammar]

paramārthamayānyeva tadanyatvoditāni ca |
alabdhānyeva labdhāni sadāsantyeva santi ca || 54 ||
[Analyze grammar]

caturdaśadaśaikādividhabhūtagaṇāni ca |
punastānyeva tānyantaranyānyanyānyatho bahiḥ || 55 ||
[Analyze grammar]

narakasvargapātālabandhumitramayānyapi |
mahārambhamayānyeva śūnyāni paramārthataḥ || 56 ||
[Analyze grammar]

kṣīrāmbudherjalānīva snehasārāṇi sarvataḥ |
taraṅgabhaṅgurāṇyantarbahiścāvṛttimanti ca || 57 ||
[Analyze grammar]

ābhāsamātrarūpāṇi tejāṃsyātmavivasvataḥ |
jātānīva svatastāni spandanāni nabhasvataḥ || 58 ||
[Analyze grammar]

vṛkṣarūpāṇi pattrāṇāṃ buddhyahaṅkāracetasām |
asatāmapyasantyeva svapno'nyastho nṛṇāmiva || 59 ||
[Analyze grammar]

purāṇavedasiddhāntakalpanātalpapāliṣu |
ghananidrāṇi suptāni bibhranti śavatāmiva || 60 ||
[Analyze grammar]

paramārthamahāraṇye cidgandharvakṛtāṇi khe |
sūryadīpakadīptīni gṛhāṇi gahanānyati || 61 ||
[Analyze grammar]

prajāyamānāni nabhasyanante viśīryamāṇāni ca nirnimittam |
tadā tvahaṃ taimirikākṣadṛṣṭakeśoṇḍukānīva jagantyapaśyam || 62 ||
[Analyze grammar]