Chapter 185

yathāsukhavyavahārayogopadeśo nāma sargaḥ |
pañcāśītyuttaraśatatamaḥ sargaḥ |
rāmaḥ |
bījāṅkurāṇāṃ puruṣakarmaṇāṃ janmakāriṇām |
daivaśabdārthayuktānāṃ tattvaṃ vada vibho punaḥ || 1 ||
[Analyze grammar]

vasiṣṭhaḥ |
daivakarmādiparyāyaṃ ghaṭādighaṭanāvadhi |
saṃvitspandanamevedaṃ loke puruṣatāṃ gatam || 2 ||
[Analyze grammar]

saṃvitspandādṛte puṃstvaṃ karma vā kīdṛśaṃ bhavet |
ghaṭāvaṭapaṭādyātma hyetenaiva jagatkṛtam || 3 ||
[Analyze grammar]

pravartate jagallakṣmīḥ saṃvitspandātsavāsanāt |
nivartate hi saṃsāraḥ saṃvitspandādavāsanāt || 4 ||
[Analyze grammar]

avāsanaṃ hi saṃvitteḥ spandamaspandanaṃ viduḥ |
sa spando'pyapsu na spando yenāvartādi nohyate || 5 ||
[Analyze grammar]

manāgapi na bhedo'sti saṃvitspandamayātmanoḥ |
kalpanāṃśādṛte rāma sṛṣṭau puruṣakarmaṇoḥ || 6 ||
[Analyze grammar]

jalavīcyoryathā dvitvaṃ saṅkalpotthaṃ na vāstavam |
tatheha citparispandarūpayorjantukarmaṇoḥ || 7 ||
[Analyze grammar]

karmaiva puruṣo rāma puruṣasyaiva karmatā |
ete hyabhinne viddhi tvaṃ yathā tuhinaśītate || 8 ||
[Analyze grammar]

himaṃ yattad yathā śaityaṃ yacchaityaṃ tad yathā himam |
yatkarmāsau tathā janturyo jantuḥ karma tattathā || 9 ||
[Analyze grammar]

saṃvitspandarasasyaite daivakarmanarādayaḥ |
paryāyaśabdā na punaḥ pṛthakkarmādayaḥ sthitāḥ || 10 ||
[Analyze grammar]

spandātsaṃvijjagadbījamaspandād yātyabījatām |
aṅkuraśca tadevāntassthitatvādaṅkuraśriyaḥ || 11 ||
[Analyze grammar]

cittvaṃ ca kvacidaspandaṃ kvacitspandi svabhāvataḥ |
anantamekārṇavavadadikkālakramaṃ sthitam || 12 ||
[Analyze grammar]

saṃvitspando vāsanāvāniha bījamakāraṇam |
bhūtvā kāraṇatāmeti dehāderaṅkurāvaleḥ || 13 ||
[Analyze grammar]

tṛṇavallīlatāgulmabījāṅkuragaterapi |
bījaṃ saṃvitspanda eva tasya bījaṃ na vidyate || 14 ||
[Analyze grammar]

na bījāṅkurayorbhedo vidyate'gnyauṣṇyayoriva |
bījamevāṅkuraṃ viddhi viddhi karmaiva mānavam || 15 ||
[Analyze grammar]

saṃvitsphurantī bhūkośe karoti sthāvarāṅkuram |
sthūlān sūkṣmānmṛdūn krūrānpayo budbudakāniva || 16 ||
[Analyze grammar]

vidā vinā dharākośādatyantaparipelavāt |
aṅkurānvajrasārāṃśca ka ullāsayituṃ kṣamaḥ || 17 ||
[Analyze grammar]

prāṇivīryarasāntassthā saṃvijjaṅgamamātatam |
tanoti latikāntasstho rasaḥ puṣpaphalaṃ yathā || 18 ||
[Analyze grammar]

yadi sarvagatā saṃvidbhavennātibalīyasī |
tatka ullāsane śaktaḥ syādevāsurabhūbhṛtām || 19 ||
[Analyze grammar]

jaṅgamānāṃ sthāvarāṇāmetadādyaṃ hi bījakam |
saṃvidvisphuraṇāmātramasya bījaṃ na vidyate || 20 ||
[Analyze grammar]

bījāṅkuravikalpānāṃ kriyāpuruṣakarmaṇām |
ūrmivīcitaraṅgānāṃ nāmni bhedo na vastuni || 21 ||
[Analyze grammar]

dvitvaṃ nṛkarmaṇoryasya bījāṅkuradhiyāttayoḥ |
vipaścitpaśave tasmai mahate'stu sadā namaḥ || 22 ||
[Analyze grammar]

saṃvitterjanmabījasya yo'ntasstho vāsanārasaḥ |
sa karotyaṅkurollāsaṃ tamasaṅgāgninā daha || 23 ||
[Analyze grammar]

kurvato'kurvataścaiva manasā yadamajjanam |
śubhāśubheṣu kāryeṣu tadasaṅgaṃ vidurbudhāḥ || 24 ||
[Analyze grammar]

atha vā vāsanotsāda evāsaṅga iti smṛtaḥ |
yayā kayācid yuktyāntaḥ sampādaya tameva hi || 25 ||
[Analyze grammar]

yayaiva vā vetsi tayā yuktyā puruṣayatnataḥ |
vāsanāṃ kuru nirmūlāmetadeva paraṃ śivam || 26 ||
[Analyze grammar]

pauruṣeṇa prayatnena yathā jānāsi vā tathā |
nivārayāhambhāvāṃśameṣo'sau vāsanākṣayaḥ || 27 ||
[Analyze grammar]

nāstyeva pauruṣādanyā saṃsārottaraṇe gatiḥ |
nirahambhāvarūpe'sminvāsanākṣayanāmani || 28 ||
[Analyze grammar]

ādyaiva saṃvidastīha so'ṅkuro bījamasti tat |
tatkarma tacca puruṣastaddaivaṃ tacchubhāśubham || 29 ||
[Analyze grammar]

na bījamādāvastyanyannāṅkuro na ca vā naraḥ |
na karma na ca daivādi kevalaṃ vidudeti hi || 30 ||
[Analyze grammar]

no bījamasti na kilāṅkurako'pi vāsti nāpyasti karma puruṣaśca na vāsti sādho |
ekaṃ tu vittvamuditaṃ hyanayābhidhānalakṣmyā naṭaḥ suranarāsuraśobhayeva || 31 ||
[Analyze grammar]

ityeva niścayamanāmaya bhāvayitvā tyaktvā bhṛśaṃ puruṣakarmavicāraśaṅkām |
nirvāsanaḥ sakalasaṅkalanāvimuktaḥ saṃvidvapurnanu yathābhimatecchamāssva || 32 ||
[Analyze grammar]

praśāntasarvecchamaśaṅkamacchacinmātrasaṃstho'khilakāryakārī |
ātmaikarāmaḥ paripūrṇakāmo bhavābhayo rāma śamābhirāmaḥ || 33 ||
[Analyze grammar]