Chapter 93

paraṃ prabodhanaṃ buddheḥ sādho sadṛśamātmanaḥ || 1 ||
[Analyze grammar]

asti vindhyavane hastī mahāyūthapayūthapaḥ |
agastyaruddhayā vṛddhyā vindhyenevaidhitaḥ svataḥ || 2 ||
[Analyze grammar]

vajrāśriviṣamau dīrghau stastasya daśanau śitau |
kalpānalaśikhātulyau sumerūnmūlanakṣamau || 3 ||
[Analyze grammar]

sa baddho lohajālena hastipena cchalāditaḥ |
munīndreṇeva vindhyādrirupendreṇeva vā baḍiḥ || 4 ||
[Analyze grammar]

nibaddho yantraṇāpāśaśastrakumbhārpito gajaḥ |
tāṃ jagāma vyathāṃ vīro na vāggocarameti yā || 5 ||
[Analyze grammar]

ripau hastipake dūrādguptaṃ paśyati vāraṇaḥ |
ayassamudgake tasminnināya divasatrayam || 6 ||
[Analyze grammar]

khedānnigaḍanirbhedayatnavān sa jhaṇajjhaṇam |
cakāra kiṅkiṇīkvāṇamupodghātai ratho yathā || 7 ||
[Analyze grammar]

dantābhyāṃ yatnatastābhyāṃ muhūrtadvitayena saḥ |
babhañja śṛṅkhalājālaṃ svargārgaḍamivāsuraḥ || 8 ||
[Analyze grammar]

taṃ tasya nigaḍacchedamapaśyaddūrato ripuḥ |
baḍeḥ svargāvadalanaṃ harirmerutaṭādiva || 9 ||
[Analyze grammar]

tasyāvacchinnapāśasya mūrdhni tālataro ripuḥ |
papātākramataḥ svargaṃ harirmerorbaḍeriva || 10 ||
[Analyze grammar]

sa patanpādapānmohādaprāpya kariṇaśśiraḥ |
papātordhvyāṃ phalaṃ pakvaṃ vātāhatamivākulaḥ || 11 ||
[Analyze grammar]

taṃ puraḥ patitaṃ dṛṣṭvā mahebhaḥ karuṇāṃ yayau |
sphuratsphāraguṇāḥ santaḥ santi tiryaggatāvapi || 12 ||
[Analyze grammar]

patitaṃ dalayāmīti kiṃ nāma mama pauruṣam |
vāraṇo'pīti kalayanna jaghāna ca taṃ ripum || 13 ||
[Analyze grammar]

kevalaṃ nigaḍavyūhaṃ vidāryāśu jagāma ha |
vitataṃ setumutsārya vipulaugha ivāmbhasaḥ || 14 ||
[Analyze grammar]

tamanādṛtya mātaṅgo bhaṅktvā jālaṃ javād yayau |
vidārya meghasaṅghātaṃ nabhasīva divākaraḥ || 15 ||
[Analyze grammar]

gate gaje samuttasthau hastipaḥ svasthadehadhīḥ |
gajenaiva samaṃ tasya vyathā dūrataraṃ gatā || 16 ||
[Analyze grammar]

prottālatālaviṭapātsa tathā patito'pi san |
na bhedamāpa durbhedā manye dehā durātmanām || 17 ||
[Analyze grammar]

vardhate prāvṛṣīvābdaḥ kukāryeṣvasatāṃ balam |
atīvāsītsamutsāhī sa gajākramaṇe tadā || 18 ||
[Analyze grammar]

vāraṇārirasiṃho'sau gatebho duḥkhamāyayau |
āgatyopagate'ntardhiṃ nidhāna iva nirdhanaḥ || 19 ||
[Analyze grammar]

so'nviyeṣa gajaṃ yatnādgulmakāntaritaṃ vane |
payodapihitaṃ bhoktuṃ rāhurindumivāmbare || 20 ||
[Analyze grammar]

cireṇālabhatebhendraṃ kasmiṃścitkānane sthitam |
viśrāmyantaṃ tarutale samarādiva nirgatam || 21 ||
[Analyze grammar]

atha yatra sthito nāgastatra tadbandhanakṣamam |
parayā rājasāmagryā gajalampaṭarūpayā || 22 ||
[Analyze grammar]

sa khātavalayaṃ cakre hastipaḥ kānane navam |
sarvadikkaṃ vidhirbhūmau samudravalayaṃ yathā || 23 ||
[Analyze grammar]

uparyasthagayajjīrṇalataughena sa taṃ śaṭhaḥ |
śūnyaṃ tanvabhrajālena śaratkāla ivāmbaram || 24 ||
[Analyze grammar]

dinaiḥ katipayaireva vāraṇo viharanvane |
tasminnipatitaḥ khāte śuṣkābdhāviva parvataḥ || 25 ||
[Analyze grammar]

vrajan sarpākṛtau kūpe pātālatalabhīṣaṇe |
khāte śuṣkābdhikhātābhe gajaratnasamudgake || 26 ||
[Analyze grammar]

iti bhūyo dṛḍhaṃ baddhastena hastipakena saḥ |
tiṣṭhatyadyāpi duḥkhena bhūsadmani yathā baḍiḥ || 27 ||
[Analyze grammar]

ahaniṣyatpuraivāsau yadyagropagataṃ ripum |
tannālapsyata tadduḥkhaṃ gajaḥ khātanibandhanam || 28 ||
[Analyze grammar]

maurkhyādāgāminaṃ kālaṃ vartamānakriyākramaiḥ |
aśodhayannaro duḥkhaṃ yāti vindhyagajo yathā || 29 ||
[Analyze grammar]

mukto'smi śastranigaḍāditi tuṣṭo'pi vāraṇaḥ |
dūrastho'pi punarbaddho maurkhyaṃ kveva na bādhate || 30 ||
[Analyze grammar]

maurkhyaṃ nibandhanamavaihi paraṃ mahātmanbandho na bandha iha cetasi tadviyukte |
ātmodaye trijagadātmamayaṃ samastamaśve sthitasya sahayā nanu sarvabhūmiḥ || 31 ||
[Analyze grammar]