Chapter 58

arjunopadeśo nāma sargaḥ |
aṣṭapañcāśaḥ sargaḥ |
bhagavān |
bhūya eva mahābāho śṛṇu me paramaṃ vacaḥ |
yatte'haṃ prīyamāṇāya vakṣyāmi hitakāmyayā || 1 ||
[Analyze grammar]

mātrāsparśāstu kaunteya śītoṣṇasukhaduḥkhadāḥ |
āgamāpāyino'nityāstāṃstitikṣasva bhārata || 2 ||
[Analyze grammar]

te tu naikātmanaścānye kvāto duḥkhaṃ kva vā sukham |
anādyante'navayave kutaḥ pūraṇakhaṇḍane || 3 ||
[Analyze grammar]

saṃsthitā sparśamātrākhyā kalāsminparamātmani |
anante'sanniveśādau hemnīva kaṭakāditā || 4 ||
[Analyze grammar]

yaṃ hi na vyathayantyete mātrāsparśā bhramātmakāḥ |
samaduḥkhasukho dhīraḥ so'mṛtatvāya kalpate || 5 ||
[Analyze grammar]

sarvatvādātmanastvete ābhāsāḥ saṃsthitā iva |
asadrūpāstvasadrūpaṃ kathaṃ soḍhuṃ na śakyate || 6 ||
[Analyze grammar]

manāgapi na vidyete sukhaduḥkhe asarvage |
sarvatvādātmatattvasya sattā kathamivānayoḥ || 7 ||
[Analyze grammar]

nāsato vidyate bhāvo nābhāvo vidyate sataḥ |
nāstyeva sukhaduḥkhādi paramātmāsti sarvagaḥ || 8 ||
[Analyze grammar]

sattvāsattvamatī tyaktvaivaitayorjagadātmanoḥ |
tyaktvā nakiñcinmadhyaṃ ca śeṣe baddhapado bhava || 9 ||
[Analyze grammar]

na hṛṣyati sukhenātmā duḥkhairglāyati nārjuna |
dṛṣadvaccetanātmāpi śarīrāntargato'pi san || 10 ||
[Analyze grammar]

jaḍaṃ cittādi duḥkhasya bhājanaṃ dehatāṃ gatam |
na caitasmin kṣate kṣīṇe kiñcidevātmanaḥ kṣatam || 11 ||
[Analyze grammar]

jaḍaṃ dehādi duḥkhāderyadidaṃ bhoktriti sthitam |
tanmāyābhramamevāṅga viddhyabodhavaśotthitam || 12 ||
[Analyze grammar]

na kiñcideva dehādi na ca duḥkhādi vidyate |
ātmano yatpṛthagbhūtaṃ kiṃ kenāto'nubhūyate || 13 ||
[Analyze grammar]

yadidaṃ kathayāmyatra tenaiṣā te vinaśyati |
bhrāntirduravabodhotthā samyagbodhena bhārata || 14 ||
[Analyze grammar]

yathā rajjvāmahibhayaṃ bodhānnaśyatyabodhajam |
tathā dehādi duḥkhādi bodhānnaśyatyabodhajam || 15 ||
[Analyze grammar]

viṣvagviśvamajaṃ brahma na naśyati na jāyate |
iti satyaṃ paraṃ viddhi bodhaḥ parama eṣa saḥ || 16 ||
[Analyze grammar]

brahmārṇavataraṅgastvaṃ kiñcidbhūtvā vilīyase |
brahmāvarte sphurasyadya brahmaivāsi nirāmayam || 17 ||
[Analyze grammar]

jagatkālaḥ kriyā deśastvamahaṃ sainikā iti |
brahmaṇyevaṃ parispando nātra staḥ sadasatkramau || 18 ||
[Analyze grammar]

jahi mānaṃ madaṃ śokaṃ bhayamīrṣyāṃ sukhāsukhe |
dvaitametadasadrūpamekaḥ sadrūpavānbhava || 19 ||
[Analyze grammar]

puruṣākṣauhiṇīnāṃ tvaṃ kṣayeṇānubhavātmanā |
brahmaṇā bṛṃhitaṃ yuddhaṃ brahma brahmamayaṃ kuru || 20 ||
[Analyze grammar]

asaṃvidan sukhaṃ duḥkhaṃ lābhālābhau jayājayau |
yuddhabrahmaikatāṃ gaccha brahmādistambha bhārata || 21 ||
[Analyze grammar]

lābhālābhasamo bhūtvā bhūtvā nūnaṃ nakiñcana |
jaḍo vāta iva spandī prasṛtaṃ kāryamācara || 22 ||
[Analyze grammar]

yatkaroṣi yadaśnāsi yajjuhoṣi dadāsi yat |
yatkariṣyasi kaunteya tadātmeti sthiro bhava || 23 ||
[Analyze grammar]

yanmayo yo bhavatyantaḥ sa tadāpnotyasaṃśayam |
brahmasatyamavāptuṃ tvaṃ brahmasatyamayo bhava || 24 ||
[Analyze grammar]

anapekṣya phalaṃ brahma bhūtvā brahmeti bhāvitam |
kriyate kevalaṃ karma brahmajñena yathāgatam || 25 ||
[Analyze grammar]

karmaṇyakarma yaḥ paśyatyakarmaṇi ca karma yaḥ |
sa buddhimānmanuṣyeṣu sa coktaḥ sarvakarmakṛt || 26 ||
[Analyze grammar]

mā karmaphalaheturbhūrmā te saṅgo'stvakarmaṇi |
yogasthaḥ kuru karmāṇi saṅgaṃ tyaktvā dhanañjaya || 27 ||
[Analyze grammar]

karmāsaktimanāśritya tathā nāśritya mūḍhatām |
naiṣkarmyamapyanāśritya samastiṣṭha yathāsthitam || 28 ||
[Analyze grammar]

tyaktvā karmaphalāsaṅgaṃ nityatṛpto nirāśrayaḥ |
karmaṇyabhipravṛtto'pi naiva kiñcitkaroti saḥ || 29 ||
[Analyze grammar]

āsaktimāhuḥ kartṛtvamakarturapi tadbhavet |
maurkhye sthite hi manasi tasmānmaurkhyaṃ parityajet || 30 ||
[Analyze grammar]

paraṃ tajjñatvamāśritya nirāsaktermahātmanaḥ |
sarvakarmaratasyāpi kartṛtodeti na kvacit || 31 ||
[Analyze grammar]

akartṛtvādabhoktṛtvamabhoktṛtvātsamaikatā |
samaikatvādanantatvaṃ tato brahmatvamātatam || 32 ||
[Analyze grammar]

nānātāmalamutsṛjya paramātmaikatāṃ gataḥ |
kurvan kāryamakāryaṃ ca naiva kartā tvamarjuna || 33 ||
[Analyze grammar]

yasya sarve samārambhāḥ kāmasaṅkalpavarjitāḥ |
jñānāgnidagdhakarmāṇaṃ tamāhuḥ paṇḍitaṃ budhāḥ || 34 ||
[Analyze grammar]

samaḥ somyaḥ sthiraḥ svasthaśśāntaḥ sarvārthanisspṛhaḥ |
yastiṣṭhati sa suvyagro'pyalamavyagratāṃ gataḥ || 35 ||
[Analyze grammar]

nirdvandvo nityasattvastho niryogakṣema ātmavān |
yathāprāptānuvartī ca bhava bhūṣitabhūtalaḥ || 36 ||
[Analyze grammar]

karmendriyāṇi saṃyamya ya āste manasā smaran |
indriyārthānvimūḍhātmā mithyācāraḥ sa ucyate || 37 ||
[Analyze grammar]

yastvindriyāṇi manasā niyamyārabhate'rjuna |
karmendriyaiḥ karmayogamasaktaḥ sa viśiṣyate || 38 ||
[Analyze grammar]

āpūryamāṇaṃ tvacalapratiṣṭhaṃ samudramāpaḥ praviśanti yadvat |
tadvatkāmā yaṃ praviśanti sarve sa śāntimāpnoti na kāmakāmī || 39 ||
[Analyze grammar]